Mark 5

yelliys nyayrus ettmeTTuwθ elli tlemmes yesuwε seg edbeces

21 umax i yerjeε yesuwε yteme tissent g elfluwkeθ, emlaymen felles leεbaδ egget g ecceT. 22 yeseδ eryaz seg imeqqaren nelmejmeε ellesmes yayrus, max i yezre yesuwε yuDe f ikreεn-es, 23 imelges eSbiyH yennes: «yelli temezyent εuddi eθjaf, est HuT felles efusex, bac e θebre tekker!» 24 yexDem iyδes eθbεent leεbaδ egget ukanen etzeHamen δiys.

25 weθkan telle temeTTuwθ γer-s enziyf niδammen*5.25 enziyf niδammen - temeTTuwθ Hesben δiys ettemenzuwsθ seg eθnac nesne εlexaTer γer-s enziyf niδammen. elli ettilemmes eθeδwel Hette ennette δemenzuws. seg eθnac nesne, 26 εedden felles iĎbiyben egget, teδfeε elli γer-s elkul, welterbiyH Hette cey, teqqiym diyme ettexyab. 27 max i θesle s elxber nyesuwε, taδef uggemmes nleεbaδ s δeffer tlemmes edbeces, 28 εlexaTer tenne g ules: «max elemse edbeces yezziyiyδ bac e briγ.» 29 yuqe enziyf niδammen g elweqθes, eθHus g elbeδnes elli netteθ tebre. 30 yHus yesuwε g elweqθes elli elquwweθ teffeγ essis yebren yleεbaδ yen: «δ wiyn ylemmes edbeciyw?» 31 ennanes etlemδas: «tzerreδ g leεbaδ tδuzzen δiyx weθnecδeδ: δ wiyn iylemmes?» 32 yeqqiym iberren bac e yzer δ wiyn iθilemmes. 33 tukkeδ temeTTuwtdiyn max i θessen elli yejrayes, teseδ treεεec tesjδes tennes elHqiyqeθ elkul. 34 yennes: «elimenem yeSSebrayem eyelli. berre weθukδec, tebriδ seg weTTenem.»

35 unette elyuwc iδukke useδen iryazen seg elHuwc numeqqar nelmejmeε unihnin eqqarnes: «yelliyx eθjaf, eθerniyc eθqelqeδ imuεellem.» 36 yer yesuwε imenes elyesliyc, yennes yumeqqar nelmejmeε: «eθukδec, yezzi eθemneδ berk.» 37 welyedji Hed eθyeθbeε kan δbuTrus dyeεquwb dyuwHenna enjes nyeεquwb. 38 max i θiwDen yelHuwc numeqqar nelmejmeε, yesle yesuwε elHes d εeyyeĎ nleεbaδ duzeεwgensen. 39 yaδef yennasen: «ecbiykum etzeεwgem wetεeyĎem? tefruwxθe eltjafc, emme tenεes!» 40 eSSen felles. yemenni nette yessufeγθen elkul, yaδef nette ddaddes ntefruwxθ dyemmes delli iyδes yetwali tefruwxθ. 41 yeTTeft seg wefuses yennes: «Teliyθa quwmiy!» meεnahe: «eθefruwxθ, enniyγem ekker!» 42 tekker g elweqθes tebδe tegguwr, weθkan δyelliys neθnac nesne, esθeγerben egget elkulhum. 43 iweSSaθen yesuwε eSbiyH bac e lleqqaren yHette Hed, yennasen ettessečen.