1 ଜିଓୟାକିମ୍‌ ରାଜାନ୍‌ ଜିଉଦା ଡେସାନ୍‌ ସାସନଡାଲେ ୟାଗି ବର୍ସେଙ୍‌ ଆଡ୍ରେଏନ୍‌ ଆ ଡିନ୍ନାଇଂ ବାବିଲ୍‌ ଡେସାନ୍‌ ଆ ରାଜା ନବୁକଦନିତ୍ସରନ୍‌ ଜିରୁସାଲମନ୍‌ ଜିର୍ରେ ତିଆତେ ଇୟ୍‌ଲାୟ୍‌ ଜୁରୁଏ । 2 ଆରି, ପ୍ରବୁନ୍‌ ଜିଉଦାନ୍‌ ଆ ରାଜା ଜିଓୟାକିମନ୍‌ଆଡଙ୍‌ ଆରି ପରମେସ୍ୱରନ୍‌ ଆସିଂଲୋଙ୍‌ ଆଡ୍ରକୋଏନ୍‌ ଲାଙ୍‌ଲେଡ୍‌ ସିମ୍ମାଞ୍ଜି ନବୁକଦନିତ୍ସରନ୍‌ ଆସିଲୋଙ୍‌ ସୋରୋପ୍ପାୟେନ୍‌; ସିଲତ୍ତେ ଆନିନ୍‌ ସିନିୟ ଡେସାଲୋଙନ୍‌ ଆଡ୍ରକୋଏନ୍‌ ଆ ସନୁମ୍‌ସିଂଲୋଙ୍‌ ତିଆତେଜି ପାଙେନ୍‌, ସିଲଡ୍‌ଲ୍ଲନ୍‌ ତି ଆ ସିମ୍ମାଜି ଆ ସନୁମନ୍‌ ଆ କୋଟସିଂଲୋଙ୍‌ ଇୟ୍‌ଲେ ଡକ୍କୋଏ । 3 ଆରି, ଇସ୍ରାଏଲ୍‌ମରଞ୍ଜି ଆମଙ୍‌ଲୋଙ୍‌ ସିଲଡ୍‌ ଲାଙ୍‌ଲେଡ୍‌ ମନ୍‌ରାଞ୍ଜିଆଡଙ୍‌, ରାଜାସିଙନ୍‌ ଆ ମନ୍‌ରାଜିଆଡଙ୍‌ ଆରି ସୋଡ଼ାମରଞ୍ଜି ଆ କୁତ୍ତମ୍ମାଲୋଙ୍‌ ସିଲଡ୍‌ ଲାଙ୍‌ଲେଡ୍‌ ମନ୍‌ରାଞ୍ଜିଆଡଙ୍‌ ଅନୋରୋଙନ୍‌ ଆସନ୍‌ ରାଜାନ୍‌ ଅସ୍ପନସ୍‌ଆଡଙ୍‌ ବରେନ୍‌ । 4 ଅଙ୍ଗା ମନ୍‌ରାଜି ଏର୍‌ପନାରା ଆରି ଏର୍‌ବନାଲ୍‌ସ ଡକୋଜି, ମନଙ୍‌ରାଡମ୍‌, ଅଡ଼୍‌କୋନ୍‌ ଆ ଗିଆନ ଆମଙଞ୍ଜି ଡକୋତେ, ଲରଞଙ୍‌ତଜି, ବୁଡ୍ଡିଜି ଆରି ରାଜାସିଂଲୋଙନ୍‌ ସେବା କାବ୍ବାଡ଼ାନ୍‌ ଲୁମ୍‌ଲେ ରପ୍ତିତଜି, ଏତ୍ତେଗନ୍‌ ଆ ବେଣ୍ଡିଆମର୍‌ଜିଆଆଡଙ୍‌ ଓରୋଙ୍‌ଡାଲେ, ଅସ୍ପନସ୍‌ ଆନିଞ୍ଜିଆଡଙ୍‌ କଲ୍‌ଦିଅ ପାଟନ୍‌ ଡ କଲ୍‌ଦିଅ ଲଙ୍‌ଲଙନ୍‌ ଞଙ୍‌ଞଙେଞ୍ଜି । 5 ଆରି ଆନିଞ୍ଜି ୟାଗି ବର୍ସେଙ୍‌ ଆ ତିକ୍କି ରାଜାନ୍‌ ଆ ମୁକାଲୋଙ୍‌ ଏଙ୍ଗାଲ୍‌ଡେନ୍‌ ତନଙ୍‌ଲେ ରପ୍ତିଏଜି, ତିଆସନ୍‌ ରାଜାନ୍‌ ଆନିଞ୍ଜି ଆସନ୍‌ ରାଜାନ୍‌ ଆଜ୍ରୋମ୍‌ତେନ୍‌ ଆ ଜନୋମ୍‌ଜୋମ୍‌ଜି ଡ ଆଗ୍ରାତେନ୍‌ ଆ ଦ୍ରାକ୍ୟାସାଲ୍‌ଜି ଡିତାନ୍‌ ତିୟ୍‌ଲେ ୟାଗି ବର୍ସେଙ୍‌ ଜାୟ୍‌ ବନ୍‌ଲେ ଡନକ୍କୋନ୍‌ ଆସନ୍‌ ବରେଞ୍ଜି । 6 ତି ଆନିଞ୍ଜିଲୋଙ୍‌ ଜିଉଦା କେଜ୍ଜାନ୍‌ ଆ ମନ୍‌ରା ଦାନିଏଲନ୍‌, ଅନାନିଅନ୍‌, ମିସାଏଲନ୍‌ ଡ ଅସରିଅନ୍‌ ଡକୋଏଞ୍ଜି । 7 ଆରି, ଅସ୍ପନସ୍‌ ଦାନିଏଲନ୍‌ଆଡଙ୍‌ ବେଲଟସତ୍ସର, ଅନାନିଅନ୍‌ ଆଡଙ୍‌ ସଦ୍ରକ୍‌, ମିସାଏଲନ୍‌ଆଡଙ୍‌ ମୟ୍‌ସକନ୍‌ ଆରି ଅସରିଅନ୍‌ଆଡଙ୍‌ ଅବେଦ୍‌ନଗୋ ଗାମ୍‌ଲେ ଅବ୍‌ଞୁମେନ୍‌ ।

8 ବନଡ୍‌ ରାଜାନ୍‌ ଆଜ୍ରୋମ୍‌ତେନ୍‌ ଆ ଜନୋମ୍‌ଜୋମ୍‌ଜି ଡ ଆଗ୍ରାତେନ୍‌ ଆ ଦ୍ରାକ୍ୟାସାଲ୍‌ଜି ଜୋମ୍‌ଲେ ଗାଲେ ଏର୍‌ମଡ଼ିର୍‌ ଅଃନ୍ନେମ୍ମେନାୟ୍‌ ଗାମ୍‌ଲେ ଦାନିଏଲନ୍‌ ଆ ମନ୍ନଲୋଙନ୍‌ ଗବ୍‌ରିଏନ୍‌; ତିଆସନ୍‌ ଆନିନ୍‌ ଏଙ୍ଗାଲ୍‌ଡେନ୍‌ ଆନିନ୍‌ଡମ୍‌ ଏର୍‌ମଡ଼ିର୍‌ ଡେଡଙିୟ୍‌ତଡ୍‌ ଗାମ୍‌ଲେ ଅସ୍ପନସ୍‌ଆଡଙ୍‌ ବରେନ୍‌ । 9 ତିଆଡିଡ୍‌ ଇସ୍ୱରନ୍‌ ନିୟ୍‌ ଅସ୍ପନସ୍‌ ଆଗନିୟ୍‌ଗିୟ୍‌ଲୋଙ୍‌ ଦାନିଏଲନ୍‌ଆଡଙ୍‌ ସନାୟୁମନ୍‌ ଡ କାନ୍‌କାରମ୍‌ଗାମେନ୍‌ । 10 ସିଲତ୍ତେ ଅସ୍ପନସ୍‌ ଦାନିଏଲନ୍‌ଆଡଙ୍‌ ବରେନ୍‌, "ଆନା ଆମ୍ୱେଞ୍ଜି ଆସନ୍‌ ଜନୋମ୍‌ଜୋମନ୍‌ ଡ ଗନାଗାନ୍‌ ତିୟ୍‌ତବେନ୍‌, ତିଆତେ ପ୍ରବୁଞେନ୍‌ ସୋଡ଼ା ରାଜାନ୍‌ଆଡଙ୍‌ ଞେନ୍‌ ବତଙ୍‌ତିଁୟ୍‌; ଇନିଆସନ୍‌ଗାମେଣ୍ଡେନ୍‌ ଆମ୍ୱେନ୍‌ ଆନିନ୍‌ ସନରିବେନ୍‌ ଆ ବେଣ୍ତିଆଜି ଆ ମୁକ୍କା ସିଲଡ୍‌ ମୁକ୍କାବେଞ୍ଜି ଆସନାଆର୍‌ ଗିୟ୍‌ତବେନ୍‌ ? ଏତ୍ତେଲ୍‌ଡେନ୍‌ ଆମ୍ୱେଞ୍ଜି ଆସନ୍‌ ରାଜାନ୍‌ ଞେନ୍‌ଆଡଙ୍‌ ଗବ୍ବାତିଁୟ୍‌ ।"

11 ତିଲୋଙ୍‌ ଅସ୍ପନସ୍‌ ଦାନିଏଲନ୍‌, ଅନାନିଅନ୍‌, ମିସାୟେଲନ୍‌ ଡ ଅସରିୟ ଆଉପ୍ରେଙ୍‌ ଅଙ୍ଗା ଅସିଂଙ୍‌ବୟନ୍‌ ଡକୋଏନ୍‌, ଆନିନ୍‌ ଦାନିଏଲନ୍‌ ବରେନ୍‌; 12 ସନାୟୁମନ୍‌ ବାତ୍ତେ କମ୍ୱାରିନଞ୍ଜି ଦସଡିନ୍ନା ଏମ୍ମାଲ୍‌ମାଲ୍‌ବା; ଗାଗାନେଲେଞ୍ଜି ଆସନ୍‌ ଜନ୍‌ଡ୍ରୋମନ୍‌ ଡ ଗାଡାନେନ୍‌ ଆସନ୍‌ ଡାଆନ୍‌ ତିୟ୍‌ଲେନ୍‌ବା । 13 ତିଲୋଙ୍‌ ମୁକାଲେନ୍‌ ଡ ରାଜାନ୍‌ ଆଗନା ଆଜନୋମ୍‌ ବେଣ୍ତିଆଞ୍ଜି ଆମୁକ୍କାଏଗିୟ୍‌ବା; ତିଲୋଙ୍‌ ଆନିନ୍‌ ଏଙ୍ଗାଲେ ଗିୟ୍‌ତେ, ତିଅନ୍ତମ୍‌ କମ୍ୱାରିଞ୍ଜି ଆଡଙ୍‌ ଞନ୍‌ଡ୍ରମ୍‌ନେତୋଜି । 14 ତିଲୋଙ୍‌ କେନ୍‌ ଆ ବର୍ରନେଜି ଅଡ଼େନ୍‌ କି ଦସଡିନ୍ନାଜାୟ୍‌ ଆନିଞ୍ଜି ମନାଲ୍‌ମାଲନ୍‌ ତିୟେଞ୍ଜି । 15 ଆରି, ଦସଡିନ୍ନା ଆଡ୍ରେନ୍‌ ସିଲଡ୍‌ ରାଜାନ୍‌ ଆଗାଗାନେ ଅଡ଼୍‌କୋନ୍‌ ଆବେଣ୍ତିଆଜି ଆମୁକ୍କା କି ସିଲଡ୍‌ କେନ୍‌ ଆମୁକ୍କାଞ୍ଜି ମନଙ୍‌ ଗିୟ୍‌ତାଏଞ୍ଜି ଆରି ଆନିଞ୍ଜି ଗୋଗୋୟ୍‌ ଜେଲ୍‌ଜେଲ୍‌ ଗିୟ୍‌ତାଏଞ୍ଜି । 16 ତି ସିଲଡ୍‌ଲ୍ଲନ୍‌ ଅସିଂମରନ୍‌ ତି ଗାଗାନେ ଗାଡାନେନ୍‌ ଆସନ୍‌ ଦ୍ରାକ୍ୟାଡାନ୍‌ ଡଙ୍‌ଡଙ୍‌ଲେ ଆନିଞ୍ଜି ଜମ୍ମଲନ୍‌ ତିୟେଞ୍ଜି । 17 ଆରି, ଇସ୍ୱରନ୍‌ ଉଞ୍ଜି ବେଣ୍ତିଆଞ୍ଜି ଅଡ଼୍‌କୋନ୍‌ ଇଡଲନ୍‌ ଡ ବୁଡିଲୋ ଜନ୍‌ନାନ୍‌ ତିୟେଞ୍ଜି; ଆରି ଦାନିଏଲନ୍‌ ଅଡ଼୍‌କୋନ୍‌ ଆ ତନାଲ୍‌ମଡ୍‌ ଡ ଗନୁମ୍‌ନ୍ତେନ୍‌ ଆବର୍ନେ ବୁଡିମର୍ରଡେଲୋ । 18 ଆରି ରାଜାନ୍‌ ଆମଙ୍‌ ଅନୋରୋଙନ୍‌ ଆସନ୍‌ ଅଙ୍ଗାଆଡିଡ୍‌ ଗବ୍‌ରିଏନ୍, ତିଆତେ ଅଞିଡେନ୍‌, ଅସ୍ପନସ୍‌ ଆନିଞ୍ଜିଆଡଙ୍‌ ନବୁକଦ୍‌ନିତ୍ସରନ୍‌ ଆମୁକ୍କାବାନ୍‌ ଉରୋଙ୍‌ଲାଜି । 19 ଆରି ରାଜାନ୍‌ ଆନିଞ୍ଜି ବୟନ୍‌ କଡାଡିଲନ୍‌; ଆରି ଆନିଞ୍ଜିଲୋଙ୍‌ ଦାନିଏଲନ୍‌, ଅନାନିଅନ୍‌, ମିସାୟେଲନ୍‌ ଡ ଅସରିୟ ଆନିଙ୍‌ଜା ସମାନ ଅଃଗିୟ୍‌ତାଲଜି; ତିଆସନ୍‌ କେନ୍‌ ଆନିଞ୍ଜି ରାଜାନ୍‌ ଆମୁକ୍କାଲୋଙ୍‌ ତନଙେଞ୍ଜି । 20 ଆରି ଆନିଞ୍ଜି ବୁଡି ଡ ଜନ୍‌ନାନ୍‌ଲୋଙନ୍‌ ତି ଅଡ଼୍‌କୋନ୍‌ ଆବର୍ନେଜି ବର୍ରେଞ୍ଜି ରାଜାନ୍‌ ବର୍ରେନ୍‌ ଡେନ୍‌, ତି ଅଡ଼୍‌କୋନ୍‌ ମନ୍ତ୍ରର ତନେୟ୍‌ଜନ୍‌ ବର୍ରନେ ତିକ୍କି ଦସଗୁନା ଗୋଗୋୟ୍‌ ଗିୟ୍‌ତାଏନ୍‌ । 21 ଆରି, ଦାନିଏଲନ୍‌ କୋରସ୍‌ ରାଜାନ୍‌ ଆପ୍ରତମୁନ୍‌ ବର୍ସେଙନ୍‌ଜାୟ୍‌ ଆନିନ୍‌ ଆସ୍‌ନେବାନ୍‌ ଲୁମେନ୍‌ ।