1 ବାବିଲନ୍‌ ଆରାଜା ଆପ୍ରତମୁନ୍‌ ବେଲଟତ୍ସରନ୍‌ ଆବର୍ସେଙ୍‌ଲୋଙନ୍‌ ଦାନିଏଲନ୍‌ ଆଲୁଲୁଡ୍‌ଲୋଙନ୍‌ ଗନୁନ୍ତେନ୍‌ ଡ ତନାଲ୍‌ମାଡ୍‌ ଗିଜେନ୍‌; ତିଲୋଙ୍‌ ତି ଆଗୁନୁନ୍ତେ ଇଡେନ୍‌ ବର୍ରନେଲୋଙନ୍‌ ଅବ୍‌ଜନାଏନ୍‌ । 2 ଦାନିଏଲନ୍‌ ବର୍ରନେ, ଞେନ୍‌ ଅବୟ୍‌ ତଗଲନ୍‌ ତନାଲ୍‌ମଡନ୍‌ ଗିୟ୍‌ଲାୟ୍‌, ଗିୟ୍‌ବା ସୋଡ଼ା ସମେଁଡ୍ରାନ୍‌ ରୁଆଙନ୍‌ ଆତୁଣ୍ତୋ ଅଡ଼୍‌କୋରେଙନ୍‌ ବର୍ରନ୍‌ତଙନ୍‌ ରିଙ୍‌ଙ୍ଗେନ୍‌ । 3 ଆରି ଉଞ୍ଜି ଆନା ଆନା ସୋଡ଼ାରାଡମ୍‌ ଆଜନ୍ତୁ ସମେଁଙ୍‌ଡ୍ରାନ୍‌ ସିଲଡ୍‌ ଡୁଲନ୍‌ ଜିର୍ରାଜି । 4 ଆ ପର୍ତମ୍ମୁନ୍‌ ଆ ଜନ୍ତୁ ସିଅଁ କିଡନ୍‌ ଅନ୍ତମ୍‌ ଆରି ଅଡ଼ାଙନ୍‌ ଅନ୍ତମ୍‌ ଆ ଡେନ୍ନାନ୍‌ ଡକୋଏନ୍‌; ଞେନ୍‌ ଗିଜାନ୍‌ ଗିଜାନ୍‌ ଆଡେନା ରପୁୟ୍‌ୟାଜେନ୍‌, ଆରି ଆନିନ୍‌ ପୁର୍ତିନ୍‌ ସିଲଡ୍‌ ଡୁଲନ୍‌ଜିର୍ରେ ଡ ମନ୍‌ରାନ୍‌ ଅନ୍ତମ୍‌ ବାଗଜଙନ୍‌ ବୟନ୍‌ ତନଙେନ୍‌, ଆରି ଆନିନ୍‌ ମନ୍‌ରାନ୍‌ ଆଉଗ୍ଗରନ୍‌ତିଏଞ୍ଜି । 5 କେନ୍‌ ଆତିକି ଗିୟ୍‌ବା, ଆରି ଅବୟ୍‌ ବାଗୁ ଆଜନ୍ତୁ କମ୍ୱୁଡନ୍‌ ଅନ୍ତମ୍‌ ଗିୟ୍‌ତାଏନ୍‌, ଆନିନ୍‌ ବନେଙ୍‌ଗଡ୍‌ ତକେଲେପାଙେଞ୍ଜି ଡ ଆମୁକ୍କାଲୋଙ୍‌ ଆଜିନ୍‌ ୟାଗି ଡେୟ୍‌ ଡେୟ୍‌ ଆପ୍ପନରାଜାଙନ୍‌ ଡକୋଏନ୍‌; ଆରି ଆନିନ୍‌ କେନ୍‌ ଆବର୍ନେ ବର୍ରେଞ୍ଜି, "ଡୋନା, ଇସ୍ସୁମନମ୍‌ ଜେଲୁନ୍‌ ଜୁମା । 6 କେନ୍‌ ଆତିକି ଞେନ୍‌ ଗିୟ୍‌ଲାୟ୍, ଗିୟ୍‌ବା, ଚିତାକିନାନ୍‌ ଅନ୍ତମ୍‌ ଆରି ଅବୟ୍‌ ଜନ୍ତୁ, ଆକିନ୍‌ଣ୍ତୋଙ୍‌ଗଡ୍‌ ଅନ୍ତିଡନ୍‌ ଆଡେନା ଅନ୍ତମ୍‌ ଉଞ୍ଜି ଡକୋଏନ୍‌; ଆନିନ୍‌ ନିୟ୍‌ ଜନ୍ତୁନ୍‌ ଉଞ୍ଜି ଆବ୍ବବ ଡକୋଏନ୍‌ ଆରି, ଆନିନ୍‌ ସାସନନ୍‌ ଆସନ୍‌ ତିୟେଞ୍ଜି ।" 7 କେନ୍‌ସସିଲଡ୍‌ ଞେନ୍‌ ତଗଲନ୍‌ ତନାଲ୍‌ମଡନ୍‌ ଗିୟ୍‌ଲାୟ୍‌, ଗିୟ୍‌ବ, ଉଞ୍ଜିନ୍‌ ଆଜନ୍ତୁ,ଆନିନ୍‌ ବର୍ରନ୍‌ତଙନ୍‌, ବୋର୍ସା ଡକୋଏନ୍‌ ଡ ଗୋଗୋୟ୍‌ ବପ୍ପୁନ୍‌ ଡ ଆଜିନ୍‌ଜି ଲୁଆଙନ୍‌ ଅନ୍ତମ୍‌ ରଡ଼ୋଡକୋଏନ୍‌; ଆନିନ୍‌ ଜୋମେଡେନ୍‌ ଲଗଡ୍‌ଲେ ଲତିଆଜେନ୍‌ ଡ ଲାଙ୍‌ଲେ ଅଙ୍ଗାତେ ଡକୋଏନ୍‌, ଆତଲ୍‌ଜଙ୍‌ଲୋଙ୍‌ ତିଆତେଜି ଅଲେନେନ୍‌; ଆରି ଆନିନ୍‌ ଆମ୍ମୁଙ୍‌ଜି ଆ ଜନ୍ତୁଜି ସିଲଡ୍‌ ଆନା; ଆରି ଆଡେରିଙନ୍‌ ଦସଟା ଡକୋଏନ୍‌ । 8 ଞେନ୍‌ ଆଡେରିଙନ୍‌ ଆବିସୟ୍‌ ଇୟମ୍‌ ଇୟମ୍‌ଲେ ଗିୟ୍‌ବା,ତି ଅଡ଼୍‌କୋଲୋଙନ୍‌ ଆରି ଅବୟ୍‌ ଡେରିଙନ୍‌ ଡୁଙ୍‌ଲନାୟ୍‌, ତିଆତେ ସନା, ତି ଆମୁକ୍କାଲୋଙନ୍‌ ଆପ୍ରତମୁନ୍‌ ଆଡେରିଙ୍‌ଲୋଙ୍‌ ୟାଗି ଆଡେରିଙନ୍‌ ଡୁଙ୍‌ଲନାୟ୍‌; ଆରି ଗିୟ୍‌ବା କେନ୍‌ ଆଡେରିଙ୍‌ ମନ୍‌ଡ୍ରାନ୍‌ ଆମଡ୍‌ ଅନ୍ତମ୍‌ ଡ କଙ୍କରିମର୍ରନ୍‌ ଆବର୍ନେ ଅନ୍ତମ୍‌ ଡକୋଏନ୍‌ ।

9 ଞେନ୍‌ ଗିଜାନ୍‌ ଗିଜାନ୍‌,

ଲାଙ୍‌ଲେଡ୍‌ ସିଂଅନ୍‌ଗଡେଲେନ୍‌,

ଆରି ଗୋଗୋୟ୍‌ ବର୍ସେଙ୍‌ଜାୟ୍‌ ବନୁଡାନ୍‌ ଅଡ଼ୋଲାୟ୍‌ ।

ଆସିନ୍‌ରିନ୍‌ ଆଡ଼େରନ୍‌ ଅନ୍ତମ୍‌ ଜେଏନ୍‌,

ଆବବ୍‌ଲୋଙନ୍‌ ଆ ଉଉ ମେଣ୍ତାନ୍‌ ଅନ୍ତମ୍‌ ଡକୋଏନ୍‌ ।

ଆତ୍ରଙ୍‌ଙ୍ଗୁମନ୍‌ ଆଉଲାଙ୍‌ତୋଡନ୍‌ ଅନ୍ତମ୍‌

ଡ ତି ଅଡ଼୍‌କୋନ୍‌ ଆଚକ୍ର ଆଡୁଡୁତୋଡନ୍‌ ଅନ୍ତମ୍‌ ତଗୋନ୍‌ ।

10 ଆମୁକ୍କାଲୋଙନ୍‌ ସିଲଡ୍‌ ତଗୋନ୍‌ ଡୁଙ୍‌ଲନାୟ୍‌;

ଅଜାର ଅଜାର ମନ୍‌ରାନ୍‌ ଆବର୍ନେତୁମ୍‌ ବର୍ରଞ୍ଜି

ଅୟୁତ ଅୟୁତ ମନ୍‌ରାନ୍‌ ଆମୁକ୍କାବାନ୍‌ ତନଙେଞ୍ଜି ।

ପଞ୍ଚୁଆତିନ୍‌ ତଙ୍ଗୁମେଞ୍ଜି କି

ବଇନ୍‌ ଉଜେଞ୍ଜି ।

11 ତି ଆଡେରିଙ୍‌ ଆ ବର୍ରନେ ଞେନ୍‌ ତୁମ୍‌ ଆଗ୍ରାମ୍‌ତେ ଆସରଙ୍‌ ଆସନ୍‌ ତି ଆଡିନ୍ନାଇଙ୍‌ ଆଙାଲାୟ୍‌; ଞେନ୍‌ ଗିୟ୍‌ଲାୟ୍‌ ଡ ଆ ତିନିକିଲୋଙ୍‌ ତି ଜନ୍ତୁନ୍‌ ରନ୍‌ବୁନ୍‌ଡେନ୍‌ ଡ ଆନିନ୍‌ଆଡଙ୍‌ କୋମାବେତୁ ଗାମ୍‌ଲେ ତଗୋଲୋଙନ୍‌ ସେଡେଞ୍ଜି । 12 ଆରି ଆନ୍ନା ଜନ୍ତୁଜି ସିଲଡ୍‌ ଆ ବୋର୍ସାନ୍‌ ପାଙେଞ୍ଜି; ଏଲେଜାକିୟ୍‌ ଡେନ୍‌ ଅବୟ୍‌ ଡିନ୍ନାଇଙ୍‌ଜାୟ୍‌ ଆନିଞ୍ଜି ଅନମେଙନ୍‌ ଆସନ୍‌ ଅବ୍‌ଗୋଗୋଜେନ୍‌ ।

13 ଞେନ୍‌ ତଗଲନ୍‌ ତନାଲ୍‌ମଡନ୍‌ ଗିୟ୍‌ଲାୟ୍,ଆରି ଗିୟ୍‌ବା, ମନ୍‌ରାନ୍‌ ଆଡାଙ୍ଗାଡ଼ାଅନନ୍‌ ଅନ୍ତମ୍‌ ରୁଆଙନ୍‌ ଆମେଗଲୋଙ୍‌ ଜିର୍ରରାୟ୍‌;

ଆନିନ୍‌ ଗୋଗୋ ଅୟମ୍‌ ତି ବୁଡାକୋଜନ୍‌ ଆମଙ୍‌ ଆଡ୍ରକୋଲନ୍,

ଆନିଞ୍ଜି ଆମୁକ୍କାବାନ୍‌ ଓରୋଙ୍‌ଲାଜି ।

14 ଆରି ଅଡ଼୍‌କୋନ୍‌ ଆବିରିଣ୍ତା, ଡେସାବାଜି ଡ ଲଙ୍‌ଲଙ୍‌ମରଞ୍ଜି ଏଙ୍ଗାଲେ ଡେନ୍‌ ଆନିଞ୍ଜି ସେବାତଜି,

ତିଆସନ୍‌ ଆନିନ୍‌ ଆସସନନ୍‌, ଆମଇମା ଡ ରାଜ୍ୟନ୍‌ ତନିୟନ୍‌ ଡେଲୋ;

ଆସାସନନ ଅଃନ୍ନଞିଡେନ୍‌, ଆଙ୍ଗିୟ୍‌ଜା ଅସ୍ସୁଜେ,

ଆରି ଆରାଜ୍ୟନ୍‌ ଅଃନଞିଡେ ।

15 ଞେନ୍‌ ଦାନିଏଲ, ପୁଡ଼ାରାଞେନ୍‌ ଡଅଙ୍‌ଞେନ୍‌ ୟେଡାଲନ୍‌ ଡ ଅନିଃୟମ୍‌ଞେନ୍‌ ଡ ତନାଲ୍‌ମଡ୍‌ ଅଡ଼େତ୍ତେ ଅଡ଼େନ୍ନେ ଅମେଲିୟ୍‌ ।

16 ଆନାଜି ମଙ୍‌ବାଞେନ ତନଞେଞ୍ଜି, ଆନିଞ୍ଜିଲୋଙ୍‌ ଅବୟ୍‌ନେ ଜିର୍ରେନ୍‌ କି କେନ୍‌ ଅଡ଼୍‌କୋନ୍‌ ଆବର୍ନେ ବର୍ରାୟ୍‌ । ତିଲୋଙ୍‌ ଆନିନ୍‌ କେନ୍‌ ଅଡ଼୍‌କୋନ୍‌ ଅବ୍‌ଜନାଲେ ବରିଁୟ୍‌ । 17 "ତି ଉଞ୍ଜି ସୋଡ଼ା ଜନ୍ତୁନ୍‌ ଇଞ୍ଜି ରାଜାନ୍‌ ଡକୋ, ଆନିଞ୍ଜି ପୁର୍ତିଲୋଙନ୍‌ ସିଲଡ୍‌ ଡୁଙ୍‌ତନାଜି । 18 ବନଡ୍‌ ଅଡ଼୍‌କୋନ୍‌ ସିଲଡ୍‌ ତୋଣ୍ତୁନ୍‌ ମଡ଼ିର୍‌ ଆରାଜ୍ୟ ଡେତେ ଡ ଅଃନ୍ନଞିଡେ, ଆଗ୍ରାମ୍‌ଗାମ୍‌, ଅଃନ୍ନଞିଡେନ୍‌ ଆଡିନ୍ନାଇଙ୍‌ଜାୟ୍‌ ଆନିନ୍‌ ରାଜ୍ୟନ୍‌ ସାସନତେ ।" 19 ତି ଆଡିଡ୍‌ ଅଙ୍ଗା ଇଞ୍ଜି ଜନ୍ତୁ, ଆନିଞ୍ଜି ଲୋଙ ସିଲଡ୍‌ ମେର୍ରନ୍‌ ଆନ୍ନା, ବରନ୍‌ନ୍ତଙନ୍‌, ଆଜିନ୍‌ ଲୁଆଙନ୍‌ ଅନ୍ତମ୍‌ ଡ ଆନ୍‌ଡେରିସିନ୍‌ ପିତ୍ତଡ଼ନ୍‌ ଅନ୍ତମ୍‌ ଡକୋଏନ୍‌, ଆନିନ୍‌ ଜୁମେଡେନ୍‌, ଲବ୍‌ଗଡ୍‌ଲେ ଲବ୍‌ତିତେ ଡ ଲାଙ୍‌ଲେ ଅଡ଼୍‌କୋନ୍‌ ଆତଲ୍‌ଜଙ୍‌ଲୋଙନ୍‌ ଅଲେନେ, ଞେନ୍‌ ତିଆତେ ଜନ୍‌ନାନ୍‌ ଆସନ୍‌ ଇସ୍ସୁମ୍‌ଲାୟ୍‌; 20 ଆରି ଆବ୍ବବ୍‌ଲୋଙନ୍‌ ଦସଟା ଆଡେରିଙନ୍‌ ଡକୋଏନ୍‌ ଡ ଆନ୍ନା ଆଡରେରିଙନ୍‌ ଡୋଲନ ଡ ଆନା ମୁକାଲୋଙନ୍‌ ୟାଗି ଆଡେରିଙନ୍‌ ଅସେଡେନ୍; ତି ଆଗ୍ରାମ୍‌ଗାମ୍‌ ଆନିନ୍‌ ଅଙ୍ଗା ଆଡେରିଙନ୍‌ ଆମଡ୍‌ ଡ ମନଙ୍‌ତଡନ୍‌ ଆବର୍ନେ ଆତଡ୍‌ଲୋଙନ୍‌ ଡକୋଏନ୍‌, ତି ଆତନୁବନ୍‌ ଆଡୁକୁରିଞ୍ଜି ଆତିକି ବର୍ରନ୍‌ତଙନ୍‌ ଡକୋଏନ୍‌, ଞେନ୍‌ ଆତେ ଜନନାନ୍‌ ଆସନ୍‌ ଇସ୍ସୁମ୍‌ଲାୟ୍‌ । 21 ଞେନ୍‌ ଗିୟ୍‌ଲାୟ୍‌, ଆରି ତି ଆଡେରିଙନ୍‌ ମଡ଼ିର୍‌ମରଞ୍ଜି ବୟନ୍‌ ଜୁଜଲଞ୍ଜି ଡ ଆନିଞ୍ଜି ଅବ୍‌ନାରେନ୍; 22 ତିଲୋଙ୍‌ ଆତିନିକି ଗୋଗୋୟ୍‌ ଅୟମ୍‌ ଆ ବୁଡାକୋୟ୍‌ ଜିର୍ରାୟ୍‌ ଡ ଅଡ଼୍‌କୋନ୍‌ ସିଲଡ୍‌ ଆନିନ୍‌ ମଡ଼ିର୍‌ମରଞ୍ଜି ଆପନ୍‌ସୁଆତିନ୍‌ କାବାଡ଼ାନ୍‌ ଡ ମଡ଼ିର୍‌ମରଞ୍ଜି ଆରାଜ୍ୟ ଡକୋନେନ୍‌ ଆସନ୍‌ ଡିନ୍ନାନ୍‌ ଅଡ଼ୋଲାୟ୍‌ ।

23 ଆନିନ୍‌ କେନ୍‌ ଅନ୍ତମ୍‌ ବର୍ରନେ, ଇଞ୍ଜି ଜନ୍ତୁ ପୁର୍ତିନ୍‌ ରାଜ୍ୟନ୍‌ ଡେତେ, ତିଆତେ ଆନ୍ନା ରାଜ୍ୟଞ୍ଜି ସିଲଡ୍‌ ଆନ୍ନାତନ୍‌ ଅଡ଼୍‌କୋନ୍‌ ଆପୁର୍ତିନ୍‌ ଅବ୍‌ଞିତେ, ଆରି ଡୟ୍‌ ଡୟ୍‌ଡାଲେ ଅଲେନ୍‌ଲେ ସେତ୍ତେ ଡ ତିଆତେ ଲବ୍‌ଗଡ୍‌ଲେସେତେ । 24 ଆରି, ତି ଦସଟା ଆଡେରିଙନ୍‌ ଆଗନାମ୍‌ କେନ୍‌, ତି ରାଜ୍ୟଲୋଙନ୍‌ ଦସଟା ରାଜାନ୍‌ ଡୁଙ୍‌ତନାଜି; ଆନିଞ୍ଜି ଲୋଙନ୍‌ ଆରି ଅବୟ୍‌ନେ ଡୁଙ୍‌ତନାୟ୍‌ । ଆନିନ୍‌ ଆମ୍ମୁଙ୍‌ଜିମା ଅନ୍ତମ୍‌ ଆନ୍ନାତନ୍‌ ଡ ଆନିନ୍‌ ୟାଗି ରାଜାନ୍‌ ଅବ୍‌ନାରେଲେ ସାସନତେ । 25 ଆରି ଆନିନ୍‌ ଅଡ଼୍‌କୋନ୍‌ ଆବିରୁଡଲୋଙ୍‌ ବର୍ରତନେ ଡ ଅଡ଼୍‌କୋନ୍‌ ମଡ଼ିର୍‌ମରଞ୍ଜି ସାସନତେ; ଆରି ଆନିନ୍‌ ଜୁଗାନ୍‌ ଡ ବନାଁୟ୍‌ବରନ୍‌ ଆନ୍ନବ୍‌ ଆନ୍ନା ଆସନ୍‌ ପଚୁଆତିତେ; ଆରି ଅବୟ୍‌ ଜୁଗାନ୍‌ ବାଗୁ ମଡ଼ିର୍‌ ପୁର୍‌ପୁରନ୍‌ ଡ ତୁଡ୍ରୁ ଆଙ୍ଗାୟ୍‌ଜାୟ୍‌ ମଡ଼ିର୍‌ ପୁର୍‌ପୁରନ୍‌ ଜାୟ୍‌ ଆନିଞ୍ଜି ତିଆତେ ଆସିଲୋଙନ୍‌ ଞାଙତଜି । 26 ବନ୍‌ଡ ପଞ୍ଚୁଆତି ସବାନ୍‌ ତୁତୁମ୍‌ତେ ଡ ଆତିନିକି ଜାୟ୍‌ ଆନିନ୍‌ ସାସନତେ ଅଞିଡେନ୍‌ କି ଗୁରୁଡ୍ଡେଏନ୍‌ ଆସନ୍‌ ଆମଙନ୍‌ ସିଲଡ୍‌ ପାଙ୍‌ତଜି । 27 ଆରି ସାସନ ଜୁଗାନ୍‌ ଡ ରୁଆଙଲୋଙନ୍‌ ଆଡ୍ରକୋତଞ୍ଜି ଆରାଜ୍ୟଜି ମଇମା, ଅଡ଼୍‌କୋନ୍‌ ସିଲଡ୍‌ ମଡ଼ିର୍‌ମରଞ୍ଜି ଡକୋତଞ୍ଜି; ଆରାଜ୍ୟ ଆନଞିଡେ ରାଜ୍ୟନ୍‌ ଡ ଅଡ଼୍‌କୋନ୍‌ ଆସାସନ ଆସେବାନ୍‌ ଡ ଆବର୍ନେ ଅନମ୍‌ଡଙନ୍‌ ଡେତେ ।

28 ତେନେଲୋଙ ଗନୁନ୍ତେଞେନ୍‌ ଅଞିଡେନ୍‌ । ଞେନ୍‌ ଦାନିଏଲନ୍‌ କେନ୍‌ ଆର୍ବନେ ବର୍ରତନାୟ୍‌, ଅନିଃୟମ୍‌ଞେନ୍‌ କଲାୟ୍‌ବିଲାୟ୍‌ ଅମେଲିୟ୍‌ ଡ ମୁକାଞେନ୍‌ ମୁସୁକାଏନ୍‌, ବନ୍‌ଡ ଞେନ୍‌ କେନ୍‌ ଆବର୍ନେ ମନଲୋଙ୍‌ଞେନ୍‌ ଡକୋଲାୟ୍‌ ।