1 କେନ୍‌ସିଲଡ୍‌ ନବ୍‌କୁଦ୍‌ନିତ୍ସରନ୍‌ ରାଜାନ୍‌ ସାସନ୍‌ଡାଲେ ବାଗୁ ବର୍ସେଙ୍‌ଆଡ୍ରେନ୍‌ ଆଡିଡ୍‌, ଆନିନ୍‌ ଅବୟ୍‌ ଗନୁମ୍‌ନ୍ତେନ୍‌ ଗିଜେନ୍‌, ତିଲୋଙ୍‌ ଆପୁଡାରାନ୍‌ ଉଲାକୋଲା ଡେନେ କି ଆନିନ୍‌ ମଡେଏନ୍‌ । 2 ତିଲୋଙ୍‌ ରାଜାନ୍‌ ତି ଆଗନୁମ୍‌ନ୍ତେ ଅନବ୍‌ଜନାନ୍‌ ଆସନ୍‌ ମନ୍ତ୍ରର୍‌ ମରଞ୍ଜି, ତନେୟ୍‌ ମରଞ୍ଜି ଆରି କଲଦିଅମରଞ୍ଜି ଅନୋଡେନ୍‌ ଆସନ୍‌ ବାଙେଞ୍ଜି । ତି ସିଲଡ୍‌ଲ୍ଲନ୍‌ ଆନିଞ୍ଜି ଜିର୍ରାଜି କି ରାଜାନ୍‌ ଆମୁକ୍କାଲୋଙ୍‌ ତନଙେଞ୍ଜି । 3 ଆରି ରାଜାନ୍‌ ଆନିଞ୍ଜି ବର୍ରେନ୍, ଞେନ୍‌ ଅବୟ୍‌ ଗନୁମ୍‌ତେ ଗିୟ୍‌ଲାୟ୍‌, ତି ଆଗୁନୁମ୍‌ନ୍ତେ ଜନ୍‌ନାନ୍‌ ଆସନ୍‌ ମନଞେନ୍‌ ଜରୁଇୟ୍‌ମତେ । 4 ତିଲୋଙ୍‌ କଲ୍‌ଦିୟ୍‌ଞ୍ଜି ଅରାମିୟ୍‌ ଲଙ୍‌ଲଙ୍‌ଲୋଙନ୍‌ ରାଜାନ୍‌ ବର୍ରେଞ୍ଜି, ଏ ରାଜା ଗୋଗୋୟ୍‌ ବର୍ସେଙ୍‌ ଅମେଙନ୍ତୁ; କମ୍ୱାରିନମ୍‌ ଗନୁନ୍ତେନମ୍‌ ଅବ୍‌ଜନାଲେନ୍‌, ଇନ୍‌ଲେଞ୍ଜି ତିଆତେ ଏବର୍‌ତମ୍‌ । 5 ରାଜାନ୍‌ କଲଦିଅମରଞ୍ଜି ଜାଲଙ୍‌ଲେ ବର୍ରେନ୍, ଅମଙ୍‌ଞେନ୍‌ ସିଲଡ୍‌ ବର୍ରେନ୍‌ ଡୁଙଲନ୍‌ ଜିର୍ରତେ; ଆମ୍ୱେଞ୍ଜିଲୋଙ୍‌ ସିଲଡ୍‌ କେନ୍‌ ଆଗୁନୁମ୍‌ନ୍ତେ ଇନିଆଗ୍ରାମ୍‌ଗାମ୍‌ ଏନବ୍‌ଜନାଲିୟ୍‌ଡେନ୍‌, ଆମ୍ୱେଞ୍ଜି ଆଡଅଙ୍‌ଡୟ୍‌ ଡେୟ୍‌ଲେ ସେତବେନ୍‌ ଆରି ଅସିଂବେଞ୍ଜି ପାଡୁଅମେତାୟ୍‌ । 6 ବନ୍‌ଡ ଆମ୍ୱେଞ୍ଜି ଗନୁମ୍‌ନ୍ତେନ୍‌ ଇନିଆଗ୍ରାମ୍‌ଗାମ୍‌ ଏବର୍ରନ୍‌ଡେନ୍‌, ଆମ୍ୱେଞ୍ଜି ଅମଙ୍‌ଞେନ୍‌ ସିଲଡ୍‌ ତନିୟ୍‌ତିୟ୍‌ ଡ ଓଞୋଲ୍‍କୁଜନ୍‍ ଆରି ସୋଡ଼୍‌ସନାୟୁନ୍‌ ଏଙାଙ୍‌ତେ; ତିଆସନ୍‌ କେନ୍‌ ଆଗୁନୁମ୍‌ନ୍ତେ ଇନିଇନିଆଗ୍ରାମ୍‌ଗାମ୍‌ ଅମଙ୍‌ଞେନ୍‌ ବରିୟ୍‌ମ୍ୱା । 7 ଆନିଞ୍ଜି ବାଗୁତରନ୍‌ ଜାଲଙ୍‌ଲେ ବର୍ରେଞ୍ଜି, ରାଜାନ୍, କମ୍ୱାରିନମଞ୍ଜି ଗନୁମ୍‌ନ୍ତେନ୍‌ ଅବ୍‌ଜନାଲେନ୍‌, ତିଡେନ୍‌ ଇନ୍‌ଲେଞ୍ଜି ଇନିଆଗ୍ରାମ୍‌ଗାମ୍‌ ଏବର୍ରତନାୟ୍‌ । 8 ରାଜାନ୍‌ ଜାଲଙ୍‌ଡାଲେ ବର୍ରନେ,ଅମଙ୍‌ଞେନ୍‌ ସିଲଡ୍‌ ବର୍ରନେ ଡୁଙତନାୟ୍‌, କେନ୍‌ ଆତେ ଗିୟ୍‌ଲେ ଆମ୍ୱେଞ୍ଜି ଡିନ୍ନାନ୍‌ ଏବ୍‌ଡିଙ୍‌ନେବା ଗାମ୍‌ଲେ ଏଇସ୍ସୁମ୍‌ତେ, କେନ୍‌ ଆତେ ଆଜାଡ଼ିନ୍‌ ଞେନ୍‌ ଜନା। 9 ବନଡ୍‌ ଆମ୍ୱେଞ୍ଜି କେନ୍‌ ଆଗନୁନ୍ତେନ୍‌ ଏନବ୍‌ଜନାଲିୟ୍‌ଡେନ୍; ଆମ୍ୱେଞ୍ଜି ଆସନ୍‌ ଆବୟନ୍‌ ବନାୟ୍‌ବର୍ରନ୍‌ ଡକୋ; ଇନିଆସନ୍‌ଗାମେଣ୍ଡେନ୍‌ ଡିନ୍ନାନ୍‌ ଅର୍ରଙ୍‌ଆନ୍ନାନେନ୍‌ଜାୟ୍‌ ଆମ୍ୱେଞ୍ଜି ମୁକାଲୋଙ୍‌ଞେନ୍‌ କଣ୍ତାୟ୍‌ବର୍ରନ୍‌ ଡ କାଜ୍ଜାନ୍‌ ଆବର୍ନେ ବର୍ରନେନ୍‌ ଆସନ୍‌ ଏବ୍‌ଜାଡାଲନ୍‌; ତିଆସନ୍‌ ଆମ୍ୱେନ୍‌ ଞେନ୍‌ ଅବ୍‌ଜନାଙଁମ୍ୱା, ତିଡେନ୍‌ ଆମ୍ୱେଞ୍ଜି ଗନୁମ୍‌ନ୍ତେନ୍‌ ଇନିଆଗ୍ରାମ୍‌ଗାମ୍‌ ବର୍ରନ୍‌ ଏର୍ରବ୍‌ତିତେ,କେନ୍‌ଆତେ ଞେନ୍‌ ଜନାତିଁୟ୍‌ । 10 କଲଦିଅମରଞ୍ଜି ରାଜାନ୍‌ ଆମୁକ୍କାଲୋଙ୍‌ ଜାଲଙ୍‌ଲେ ବର୍ରେଞ୍ଜି, ରାଜାନ୍‌ ଆବିସୟ୍‌ ଆନ୍ନା ବର୍ରନ୍‌ ରପ୍ତିତେ, କେନ୍‌ ପୁର୍ତିଲୋଙନ୍‌ ଆନ୍ନିଙ୍‌ ମନ୍‌ରାତଡ୍‌; ଇନିଆସନ୍‌ ଆନିନ୍‌ ରାଜା, ପ୍ରବୁନ୍‌ ଅଡ଼େ ପନସୁଆତିମର୍ର ଆମନ୍ତ୍ର ଅଡ଼େ ତନେୟ୍‌ମର୍ରତଡ୍‌ ଆରି କଲଦିଅନ୍‌ ଏନେଲେ ଆବର୍ନେ ଅବର୍ରଞ୍ଜି । 11 ଆରି, ରାଜାନ୍‌ କନଲ୍‌କଲ୍‌ଡାନ୍‌ ଆବର୍ନେ ଅବର୍ରନ୍‌ତଡ୍‌ । ବନ୍‌ଡ କୋଙ୍‌ଡାୟ୍‌ଜଞ୍ଜି ତୁମ୍‌ କେନ୍‌ ଆବର୍ନେ ବର୍ରତପ୍ତିତଜି ଆରି କୋଙ୍‌ଡାୟ୍‌ଞ୍ଜି ମନ୍‌ରାଞ୍ଜି ବୟନ୍‌ ମାୟ୍‌ଲନ୍‌ ଅଃଡ୍ଡକୋନେଜି । 12 କେନ୍‌ ଆବର୍ନେ ଲୋଙନ୍‌ ରାଜାନ୍‌ ଗୋଗୋୟ୍‌ ବନ୍‌ର୍ରାବନ୍‌ ବାତ୍ତେ ବାବିଲନ୍‌ ଅଡ଼୍‌କୋନ୍‌ ଅବ୍‌ଜନାମରଞ୍ଜି ରନ୍‌ବୁନ୍‌ ଆସନ୍‌ ବାଙେନ୍‌ । 13 ତିଲୋଙ୍‌ ବନାୟ୍‌ବର୍ରନ୍‌ ଅଡ଼୍‌କୋରେଙନ୍‌ ଜନାଏଞ୍ଜି, ଆଜନାମରଞ୍ଜି ରବୁତଜି; ଆରି ଦାନିଏଲନ୍‌ ଆମନ୍‌ଡ୍ରାଞ୍ଜି ରନବୁନ୍‌ ଆସନ୍‌ ସାଜେଞ୍ଜି ।

14 ତିଆଡିଡ୍‌ ଅରିୟୋକ୍‌ ଆଞୁମର୍ର ରାଜାସେନାପତି ବାବିଲନ୍‌ ଆଜନାମରଞ୍ଜି ରନବୁନ୍‌ ଆସନ୍‌ ଡୁଙଲନାୟ୍‌, ତିଆତେ ଦାନିଏଲନ୍‌ ଇୟ୍‌ମବୁଡିନ୍‌ ବାତ୍ତେ ଜାଲଙେନ୍‌; 15 ଆନିନ୍‌ ରାଜାସେନାପତିନ୍‌ ଅରିୟୋନ୍‌ ଜାଲଙ୍‌ଲେ ବର୍ରେନ୍‌, ଇନିଆସନ୍‌ ରାଜାନ୍‌ ଆବର୍ନେ ଡିୟନାୟ୍‌ଡଣ୍ତ ? ତିଲୋଙ୍‌ ଅରିୟୋକ୍‌ ଦାନିଏଲନ୍‌ ଅଡ଼୍‌କୋନ୍‌ ଆବର୍ନେ ଅବ୍‌ଜନାଏନ୍‌ । 16 ତି ସିଲଡ୍‌ଲ୍ଲନ୍‌ ଦାନିଏଲନ୍‌ ରାଜାନ୍‌ ଆମଙ୍‌ ଜିର୍ରେ ଆରି ଅସୁୟ ରୟଙନ୍‌ ସନାୟ୍‌ସାୟ ଗାମ୍‌ଲେ ପ୍ରାର୍ତନାଲନ୍‌, ତିଡେନ୍‌ ରାଜାନ୍‌ ଆଗନୁମ୍‌ନ୍ତେନ୍‌ ଇନିଆଗ୍ରାମ୍‌ଗାମ୍‌ ତିଆତେ ଅବ୍‌ଜନାତମ୍‌ ଗାମ୍‌ଲେ ବର୍ରେନ୍‌ । 17 ତି ସିଲଡ୍‌ ଦାନିଏଲନ୍‌ ଆସିଙନ୍‌ ଜିର୍ରେ, ଆନିନ୍‌ ଡ ଆସାଙ୍ଗଞ୍ଜି ଅନାନିନ୍‌, ମିସାଏଲନ୍‌ ଡ ଅସରିଅଞ୍ଜି ଇନି ଡେଲୋ ତିଆତେ ବର୍ରଞ୍ଜି । 18 କେନ୍‌ ଆସନ୍‌ ଗନନ୍‌ଲୁଡନ୍‌ ଆବିସୟ୍‌ ରୁଆଙନ୍‌ ଆ ଇସ୍ୱର ସନାୟୁମନ୍‌ ଆପ୍ରାର୍ତନାନ୍‌ ଆସନ୍‌ ଦାନିଏଲନ୍‌ ଆସାଙ୍ଗଞ୍ଜି ଅନାନିଅନ୍‌, ମିସାୟେଲନ୍‌ ଡ ଅସରିୟ ବାବିଲନ୍‌ କେନ୍‌ ଆବର୍ନେଜି ଅବ୍‌ଜନାଏନ୍‌ । 19 କେନ୍‌ସିଲଡ୍‌ ଇସ୍ୱରନ୍‌ ଦାନିଏଲନ୍‌ ତଗଲନ୍‌ ତନଲ୍‌ମାଡନ୍‌ ଆବର୍ନେ ଅବ୍‌ଜନାଏନ୍‌ । ତିଲୋଙ୍‌ ଦାନିଏଲନ୍‌ ରୁଆଙ୍‌ ଇସ୍ୱରନ୍‌ ସନେନ୍‌ସେନନ୍‌ ତିଏନ୍‌ । 20 ଦାନିଏଲନ୍‌ ଜାଲଙ୍‌ଡାଲେ ବର୍ରେନ୍‌, ପରମେସ୍ୱରନ୍‌ ଆଞୁମ୍‌ ଅଡ଼୍‌କୋ ଡିନ୍ନା ସନେନ୍‌ସେନ୍‌ଡେଏତୁ; ଇନିଆସନ୍‌ ବୁଡିନ୍‌ ଡ ରନପ୍ତିନ୍‌ ଆନିନ୍‌ଆତେ; 21 ଆନିନ୍‌ ଗନ୍ତାନ୍‌ ଡ ଜିରୁବନ୍‌ ବନ୍ତାତେ; ଆନିନ୍‌ ରାଜାଞ୍ଜି ଆରାଜା ତବ୍‌ଲେ ଡ ଆନିଞ୍ଜି ଆନିନ୍‌ ତବ୍‌ନଙ୍‌ତେ; ଆନିନ୍‌ ବୁଡିମରଞ୍ଜି ବୁଡିନ୍‌ ଡ ବନୁଡିମରଞ୍ଜି ଗନନ୍‌ଲୁଡନ୍‌ ତିୟ୍‌ତେ; 22 ଆନିନ୍‌ ଜରୁ ଡ ସସବର୍ରନ୍‌ ଅଡ଼୍‌କୋନ୍‌ ଆବିସୟ୍‌ ବର୍ରତନେ; ଲୋଙଡ୍‌ଲୋଙନ୍‌ ଇନି ଡକୋ, ତିଆତେ ଆନିନ୍‌ ଜନାତେ ଡ ଆମଙନ୍‌ ସାଆରନ୍‌ ଡକୋତନେ । 23 ଏ ଜୋଜୋଞେନ୍‌ଞ୍ଜି ଆ ଇସ୍ୱର, ଞେନ୍‌ ଆମ୍ୱେନ୍‌ ସନେନ୍‌ସେନନ୍‌ ଡ ସନେଙ୍କେନନ୍‌ ତିୟ୍‌ତବେନ୍‌, ଆମ୍ୱେଞ୍ଜି ଞେନ୍‌ ବୁଡିନ୍‌ ଡ ବୋର୍ସାନ୍‌ ଏତିୟ୍‌ଲିଁୟ୍‌ ଡ ଅମଙ୍‌ବାବେନ୍‌ କାକୁର୍ତିତନାୟ୍‌ କେନ୍‌ ଆବିସୟ୍‌ ନମିଞେନ୍‌ ଅବ୍‌ଜନାଇଙ୍‌ଁଁବା; ଇନିଆସନ୍‌ ରାଜାବେନ୍‌ ଆବର୍ନେ ଞେନ୍‌ ଅବ୍‌ଜନାଲଲେନ୍‌ । 24 କେନ୍‌ ଆସନ୍‌ ବାବିଲନ୍‌ ଜନ୍‌ନାମରଞ୍ଜି ରନବୁନ୍‌ ଆସନ୍‌ ରାଜାନ୍‌ ତବ୍‌ନଙେନ୍‌ ଅରିୟୋକ୍‌ ଆମଙ୍‌ବାନ୍‌ ଦାନିଏଲନ୍‌ ଇୟେନ୍; ଆନିନ୍‌ ଜିର୍ରେନ୍‌ କି ଏନେଲେ ବର୍ରେନ୍, ବାବିଲନ୍‌ ଜନ୍‌ନାମରଞ୍ଜି ଏର୍ରବୁଡଙ୍‌; ରାଜାନ୍‌ ଆମଙ୍‌ ଞେନ୍‌ ଓରୋଙିୟ୍‌ଁବା, ଞେନ୍‌ ରାଜାନ୍‌ ଆମଙ୍‌ ବର୍ରତନାୟ୍‌ । 25 ତିଲୋଙ୍‌ ଅରିୟୋକନ୍‌ ଦାନିଏଲନ୍‌ ଲଜିର୍‌ ରାଜାନ୍‌ ଆଡୁଆରା ଓରୋଙ୍‌ଲେ ଏନେଲେ ବର୍ରନେ, ଜିଉଦାନ୍‌ ମରଞ୍ଜି ଲୋଙ୍‌ ଞେନ୍‌ ଅବୟ୍‌ନେ ଞାଙ୍‌ଲାୟ୍‌, ଆନିନ୍‌ ରାଜାନ୍‌ ଆଗନୁମ୍‌ନ୍ତେ ଅବ୍‌ଜନାତେ । 26 ରାଜାନ୍‌ ଦାନିଏଲନ୍‌ ବର୍ରେନ୍‌, ଆନାଞୁମ୍‌ ବେଲଟଚରନ୍‌ ଡକୋଏନ୍‌, ଆନିନ୍‌ ଜାଲଙ୍‌ଲେ ବର୍ରେନ୍‌, ଞେନ୍‌ ଅଙ୍ଗା ଗନୁମ୍‌ତେ ଗିୟ୍‌ଲାୟ୍‌, ଆମନ୍‌ ପଙ୍‌ ତି ? ଇନିଆଗ୍ରାମ୍‌ଗାମ୍‌ ଞେନ୍‌ ଅବ୍‌ଜନାଇଙ୍‌ଁ । 27 ଦାନିଏଲନ୍‌ ରାଜାନ୍‌ ବର୍ରେନ୍‌, ରାଜାନ୍‌ ଅଙ୍ଗା ଜରୁ ବର୍ରନ୍‌ବର୍ରନ୍‌, ତିଆତେ ଜନାମରଞ୍ଜି ଅଡ଼େ ତନେୟ୍‌ମରଞ୍ଜି ଡ ମନ୍ତ୍ରମରଞ୍ଜି ମନଙ୍‌ ଞନଙ୍‌ତିୟ୍‌ମରଞ୍ଜି ରାଜାନ୍‌ ଆମୁକ୍କାଲୋଙ୍‌ ଆନ୍ନିଙ୍‌ ବର୍ରନ୍‌ ଅର୍ରବ୍‌ତିଲଜି; 28 ବନ୍‌ଡ ଆନା କେନ୍‌ ଜରୁ ବର୍ରନ୍‌ ଆନା ବର୍ରତନେ, ଏନେଲେ ଅବୟ୍‌ ଇସ୍ୱରନ୍‌ ରୁଆଙନ୍‌ ଡକୋ, ଆରି ତିକିୟୋଙ୍‌ ଇନି ଇନି ଡେତେ, ତିଆତେ ନବ୍‌କୁଦ୍‌ନିତ୍ସରନ୍‌ ରାଜାନ୍‌ ଅବ୍‌ଜନାଏନ୍‌ । ଗୁନୁମ୍‌ନ୍ତେନ୍‌ ଡ ଲନୁଡ୍‌ବାନମ୍‌ ଆ ତୋଣ୍ତୁଲୋଙ୍‌ ତନାଲ୍‌ମାଡନ୍‌ କେନ୍‌ଏଡ୍‌ନେଲେ; 29 ଏ ରାଜା ଆ ଲନୁଡ୍‌ଲୋଙନ୍‌ ଆ ମନ୍ନ୍‌ଲୋଙ୍‌ ଆମ୍ମୁଙ୍‌ ଆ ଜିର୍ରତାଞନ୍‌ ଆବିସୟ୍‌ଜି ଗାମ୍‌ଲେ ଇୟ୍ୟମ୍‌ଲେ ଡକୋଲନ୍; ଆରି ତି ଜରୁବର୍ରନ୍‌ ବର୍ରନେ, ଆନିନ୍‌ ଇନିଡେତେ, ତିଆତେ ଆନିନ୍‌ ଆଡଙ୍‌ ବର୍ରେନ୍‌ । 30 ବନ୍‌ଡ ଅଙ୍ଗାଜାକିଁୟ୍‌ ଆମନ୍‌ଡ୍ରା ବୁଡିନ୍‌ ଆତିକି ସିଲଡ୍‌ ଗିଆନଞେନ୍‌ ଗୋଗୋୟ୍‌ ଡକୋଗାମ୍‌ଲେ କେନ୍‌ ଜରୁବର୍ରନ୍‌ ଆବିସୟ୍‌ ବର୍ରନାୟ୍‌, ତିଆତେ ତଡ୍‌, ବନ୍‌ଡ ରାଜାନ୍‌ ଏଙ୍ଗାଲେ ଗନ୍‌ଲୁତେ କି ଆମନଲୋଙ୍‌ ଆନିଃୟମ୍‌ ଜନାତେ, କେନ୍‌ ଆସନ୍‌ ତିଆତେ ଞେନ୍‌ ବୟନ୍‌ ବର୍ରନେନ୍‌ ଡୁଙ୍‌ଲନାୟ୍‌ ।

31 ଏ ରାଜାନ୍‌ ଆମନ୍‌ ଗିଜାନ୍‌ଗିଜାନ୍‌ ଅବୟ୍‌ ସୋର୍‌ଡାଡ୍‌ କୋଙ୍‌ଡାଜନ୍‌ ଗିଜେନ୍‌, ଗୋଗୋୟ୍‌ ସାଆର୍ର ଆରି ତି ଆକୋଙ୍‌ଡାୟ୍‌ ମୁକାଲୋଙ୍‌ନମ୍‌ ଆତନଙ୍‌ ଡକୋଲନ୍‌ ଡ ତିଆତେ ଗନିୟ୍‌ଗିଜନ୍‌ ବର୍ରଙ୍‌ତଙନ୍‌ ଡକୋଏନ୍‌ । 32 ତି କୋଙ୍‌ଡାଜନ୍‌ ଆବବ୍‌ଲୋଙନ୍‌ ମନଙ୍‌ ସୁନ୍ନାନ୍‌, ଆଡେନାଲୋଙ୍‌ ଡ ଆମାୟଙ୍‌ଲୋଙ୍‌ ରୁପାନ୍‌ତୁମ୍‌, ଆକମ୍ପୋଙନ୍‌ ଡ ଆବୁଲୁନ୍‌ ପିତଡ଼ନ୍‌, 33 ଆ ଜଙ୍‌ଲୋଙ୍‌ ଲଆଙ୍‌ ଡ ଆତଲ୍‌ଜଙନ୍‌ ଅସୋୟ୍‌ ଲଆଙ୍‌, ଅସୋୟ୍‌ ଲବନ୍‌ ଅନ୍ତମ୍‌ ଡକୋଲନ୍‌ । 34 ଆରି ମନଙ୍‌ ଗିଜାନ୍‌ଗିଜାନ୍‌ ଆତିନିକି ଆସିଂନ୍‌ ବୟନ୍‌ ଏର୍ରସ୍‌ନୁଙେନ୍‌ ଅବୟ୍‌ ଅରେଙନ୍‌ ତି କୋଙ୍‌ଡାଜନ୍‌ ଆଲୁଆଙ୍‌ ଡ ଲବନ୍‌ ଆତଲ୍‌ଜଙ୍‌ ସମ୍‌ଲେ ଡୟ୍‌ ଡେୟ୍‌ଲେ ସେଡେନ୍‌ । 35 ତିଆସନ୍‌ ଲୁଆଙନ୍‌, ଲବନ୍‌, ପିତ୍ତଡ଼ନ୍‌, ରୁପାନ୍‌ ଡ ସୁନ୍ନାନ୍‌ ଆବମାଡନ୍‌ ଡୟ୍‌ ଡୟ୍‌ଲନ୍‌, ଆରି ଡାଗାଡାଇଙନ୍‌ ଆତନିଲ୍‌ ଆପୁଲାସରନ୍‌ ଅନ୍ତମ୍‌ ଡେଲୋ, ଆରି ରିନ୍‌ଙ୍ଗେନ୍‌ ତି ଅଡ଼୍‌କୋନ୍‌ ପାଙ୍‌ରିଙ୍‌ଲେ ପାଙେନ୍‌ ଡ ତି ଅଡ଼୍‌କୋନ୍‌ ଆସନ୍‌ ଇନିଙ୍‌ଜାଗାନ୍‌ ଅଃଞାଙ୍‌ଲୋ; ଆରି ତି କୋଙ୍‌ଡାଜନ୍‌ ଅଙ୍ଗା ଅରେଙନ୍‌ ସମେନ୍‌ ତିଆତେ ଗୋଗୋୟ୍‌ଲେ ଅବୟ୍‌ ସୋଡ଼ା ବରୁନ୍‌ ଡେଲୋ, ଆରି ଅଡ଼୍‌କୋନ୍‌ ପୁର୍ତିରେଙନ୍‌ ବରିଜାଜେନ୍‌ । 36 ଗନୁମ୍‌ନ୍ତେନ୍‌ କେନ୍‌; ନମି ଇନ୍‌ଲେଞ୍ଜି ରାଜାନ୍‌ ଆମଙ୍‌ କେନ୍‌ ଏନେଲେ ଗାମ୍‌ଲେ ଏବ୍‌ଜନାତାୟ୍‌ । 37 ଏ ରାଜା, ଆମନ୍‌ ରାଜାଞ୍ଜି ଆରାଜା; ରୁଆଙ୍‌ ଇସ୍ୱରନ୍‌ ରାଜ୍ୟନମ୍‌, ରନପ୍ତିନ୍‌, ବୋର୍ସାନ୍‌, ଗନୁଗୁନ୍‌ନେମେଙନ୍‌ ତିୟ୍‌ତିୟ୍‌ଲଙ୍‌ଲନ୍‌ । 38 ଅଙ୍ଗାଲୋଙ୍‌ ଜାକିଁୟ୍‌ଡେନ୍‌ ମନ୍‌ରାଞ୍ଜି ଡକୋତଞ୍ଜି, ତି ଆ ଜାଗାଲୋଙ୍‌ କମ୍ପୋଙ୍‌ଲୋଙନ୍‌ ଆତ୍ରଞିୟ୍‌ତଞ୍ଜି ଆ ଜନ୍ତୁଜି ଡ ରୁଆଙ୍‌ଲୋଙନ୍‌ ଆରେଙ୍‌ତେଞ୍ଜି ଆ ଅନ୍ତିଡ୍‌ଜି ଆସିଂଲୋଙନ୍‌ ଡକୋ ଡ ତି ଅଡ଼୍‌କୋନ୍‌ ଆ ତୋଣ୍ତୁଲୋଙ୍‌ ଆମନ୍‌ ତିୟ୍‌ଲମ୍‌ଜି; ଆମନ୍‌ ମା ତି ସୁନ୍ନାବବନ୍‌ । 39 ଆରି ତିକିୟୋଙ୍‌ ଆମନ୍‌ ସିଲଡ୍‌ ଆରି ଅବୟ୍‌ ରାଜ୍ୟ ଡୋତନେ ଡ ତିଲୋଙ୍‌ ୟାଗି ପିତ୍ତଡ଼ନ୍‌ ରାଜ୍ୟନ୍‌ ଅବୟ୍‌ ଡୋତନେ, ତିଆତେ ସମ୍ପ୍ରର୍‌ ପୁର୍ତିନ୍‌ ଆନିନ୍‌ ସାସନତେ । 40 ଆରି ଉଞ୍ଜି ରାଜ୍ୟନ୍‌ ଲୁଆଙନ୍‌ ଅନ୍ତମ୍‌ ରଡୋ ଡେତେ; ଇନିଆସନ୍‌ ଲୁଆଙନ୍‌ ଏଙ୍ଗାଲେ ଅଡ଼୍‌କୋନ୍‌ ଆଜନବ୍‌ଜି ଲୁଆଙନ୍‌ ଡୟ୍‌ ଡେୟ୍‌ଲେ ସେତ୍ତେ ଡ ଲୁଆଙନ୍‌ ଏଙ୍ଗାଲେ କେନ୍‌ ଅଡ଼୍‌କୋନ୍‌ ଲବ୍‌ତିତେ, ତିଅନ୍ତମ୍‌ ତି ରାଜ୍ୟନ୍‌ ଡୟ୍‌ ଡୟଲନ୍‌ ଅଡ଼୍‌କୋନ୍‌ ଲଗଡ୍‌ଡାଲେ ଲତିତେ । 41 ଆରି ଆମନ୍‌ ଏଙ୍ଗାଲେ ଗିଜେନ୍‌, ଆତଲ୍‌ଜଙନ୍‌ ଡ ଆ ଅଣ୍ତର୍‌ଜଙନ୍‌ ଅସୋୟ୍‌ କୁମ୍ୱିଜନ୍‌ ଲବନ୍‌ଅନ୍ତମ୍‌ ଡ ଅସୋୟ୍‌ ଲଆଙନ୍‌ ଡକୋଏନ୍‌, ତିଅନ୍ତମ୍‌ ରଡୋ ରାଜ୍ୟନ୍‌ ଡେତେ; ବନ୍‌ଡ ତିଲୋଙ୍‌ ଲୁଆଙନ୍‌ ରଡୋ ଡକୋତନେ, ଇନିଆସନ୍‌ କଦ୍ଦମଲୋଙନ୍‌ ଲୁଆଙନ୍‌ ଆମାୟ୍‌ମାୟ୍‌ଆତ୍ତେ ଆମନ୍‌ ଗିୟ୍‌ତେ । 42 ଆରି ଆତଲଜଙନ୍‌ ଅଡ଼୍‌କୋନ୍‌ ଏଙ୍ଗାଲେ ଅସୋୟ୍‌ ଲଆଙନ୍‌ ଡ ଅସୋୟ୍‌ ଲବନ୍‌ ଡକୋଏନ୍‌, ତିଅନ୍ତମ୍‌ ରାଜ୍ୟନ୍‌ ବଲୟ୍‌ଲୟ୍‌ ରଡୋ ଆରି ବଲୟ୍‌ଲୟ୍‌ ଅଞିଡ୍‌ତେ । 43 ଆରି ଆମନ୍‌ ଏଙ୍ଗାଲେ କଦ୍ଦମନ୍‌ ବୟନ୍‌ ଲୁଆଙନ୍‌ ଆମାୟ୍‌ମାୟ୍‌ ଆତେ ଗିଜେନ୍‌, ତି ଅନ୍ତମ୍‌ ଆନିଞ୍ଜି ମନ୍‌ରାଞ୍ଜି ଆବିରିଣ୍ତା ଅଲିଡାନ୍‌ ମାୟ୍‌ତଞ୍ଜି; ବନ୍‌ଡ ଲୁଆଙନ୍‌ ଏଙ୍ଗାଲେ ଲବନ୍‌ଲୋଙନ୍‌ ଅମାୟ୍‌ନେ, ତିଅନ୍ତମ୍‌ ଆନିଞ୍ଜି ରମ୍ମଙ୍‌ ରମ୍ମଙ୍‌ ମାୟ୍‌ ମାୟ୍‌ଲନ୍‌ ଅଃଡ୍ଡକୋନେଜି । 44 ଆରି ତି ରାଜାଞ୍ଜି ଆଡିନ୍ନାଇଙ୍‌ ରୁଆଙନ୍‌ ଆ ଇସ୍ୱର ଅବୟ୍‌ ରାଜ୍ୟନ୍‌ ତବ୍‌ନଙ୍‌ତେ, ତିଆତେ ଆଙ୍ଗିୟ୍‌ଜା ଇନ୍ନିଙ୍‌ ଅଡ଼େ, ଆରି ଆନିଞ୍ଜି ଆନ୍ନା ବିରିଣ୍ତା ଆସିଂଲୋଙ୍‌ ଅଃନ୍ନମ୍‌ରେଙେଜି; ବନ୍‌ଡ କେନ୍‌ ଅଡ଼୍‌କୋନ୍‌ ରାଜ୍ୟନ୍‌ ଡୟ୍‌ ଡୟ୍‌ଲନ୍‌ ଗୁରୁଡେଲେ ଅଲିଡାନ୍‌ ଅଃନ୍ନଞିଡେନ୍‌ । 45 ଅଙ୍ଗାଜାକିଁୟ୍‌ ଆମନ୍‌ଡ୍ରା ତି ବରୁନ୍‌ ଅର୍ରସନମନ୍‌ ତି ଅରେଙନ୍‌ ଅବୟ୍‌, ଲୁଆଙନ୍‌, ପିତ୍ତଡ଼ନ୍‌, ରୁପାନ୍‌ ଡ ସୁନ୍ନାନ୍‌ ଅବ୍‌ଗୁଣ୍ତାଏନ୍‌, କେନ୍‌ ଆତେ ଆମନ୍‌ ଗିଜେନ୍‌; ତିଆତେ କେନ୍‌ ଆତିକି ଡେତେ, ତିଆତେ ସୋଡ଼ା ଇସ୍ୱରନ୍‌ ରାଜାନ୍‌ ଅବ୍ବଜନାତମ୍‌; ଆରି କେନ୍‌ ଆଗୁନୁମ୍‌ନ୍ତେ ଆଜାଡ଼ିନ୍‌ ଡ କେନ୍‌ ଆଗ୍ରାମ୍‌ଗାମ୍‌ ଆଜାଡ଼ିନ୍‌ ।

46 ତି ଆଡିଡ୍‌ ନବୁକଦ୍‌ନିତ୍ସରନ୍‌ ରାଜାନ୍‌ ତୁଡୁମ୍‌ଡାଲେ ଦାନିଏଲନ୍‌ ଲୋମେନ୍‌ ଡ ମନ୍‌ରାଞ୍ଜି ଏଙ୍ଗାଲେ ଆନିନ୍‌ ଆସନ୍‌ ଅନମଙନ୍‌ ଡ ଲଙିଡ୍‌ ଦୁପକାଡିନ୍‌ ସୁରୁପାୟ୍‌ତଜି,କେନ୍‌ ଆତେ ବାଞେନ୍‌ । 47 ରାଜା ଦାନିଏଲନ୍‌ ଜାଲଙ୍‌ଲେ ବର୍ରେନ୍‌, ଆମନ୍‌ କେନ୍‌ ଜରୁବର୍ରନ୍‌ ବର୍ରନ୍‌ ରପ୍ତିଏନ୍, କେନ୍‌ ଆସନ୍‌ ଆଜାଡ଼ିନ୍‌ ଇସ୍ୱରନମ୍‌ ଡ ରାଜାନ୍‌ଞ୍ଜି ଆପ୍ରବୁ ଡ ଜରୁ ବିସୟଞ୍ଜି ବର୍ରନ୍‌ରପ୍ତିତେ । 48 ତିଲୋଙ୍‌ ରାଜାନ୍‌ ଦାନିଏଲନ୍‌ ଅବ୍‌ସୋଡ଼ାଡାଲେ ଜବ୍ର ଗୋଗୋୟ୍‌ ତଙ୍ଗାନ୍‌ତିଏନ୍‌, ଆରି ଅଡ଼୍‌କୋ ବାବିଲନ୍‌ ଡେସାନ୍‌ ଅଡ଼୍‌କୋନ୍‌ ଜନାମରଞ୍ଜି ସିଲଡ୍‌ ଆନିନ୍‌ ସୋଡ଼ାମର୍‌ ଅମ୍ମେଏନ୍‌ । 49 ଆରି ଦାନିଏଲନ୍‌ ରାଜାନ୍‌ ଆମଙ୍‌ ଜିର୍ରେ ଇୟ୍‌ଲେକାକୁର୍ତିନେ, ରାଜା ସଦ୍ରକନ୍‌, ମୟ୍‌ସକନ୍‌ ଡ ଅବେଦନଗ୍‌ ବାବିଲୋନ୍‌ ଡେସାଲୋଙନ୍‌ ତବ୍‌ନଙେନ୍; ବନ୍‌ଡ ଦାନିଏଲନ୍‌ ରାଜାନ୍‌ ଆଡୁଆରାଲୋଙନ୍‌ ଡକୋଲନ୍‌ ।