1 ବେଲ୍‌ଟସତ୍ସରନ୍‌ ରାଜା ୟାଗି ବର୍ସେଙ୍‌ ଆସାସନେନ୍‌ ଆଡିନ୍ନାଙ୍‌ ଞେନ୍‌ ଦାନିଏଲନ୍‌ ଆପ୍ରତମୁନ୍‌ ଆତନାଲ୍‌ମାଡ୍‌ ସିଲଡ୍‌ ଆରି ଅବୟ୍‌ ଗିୟ୍‌ଲାୟ୍‌ । 2 ଆରି ଞେନ୍‌ ତନଲ୍‌ମାଡନ୍‌ ଗିୟ୍‌ଲାୟ୍‌; ଞେନ୍‌ ଗିଜାନ୍‌ ଗିଜାନ୍‌ ଗିୟ୍‌ଲାୟ୍‌ ଡ, ଞେନ୍‌ ଏଲମ୍‌ ଡେସାରେଙ୍‌ ସୁସନ୍‌ ରାଜାସିଂଲୋଙନ୍‌ ଡକୋ; ଆରି ତି ତନଲ୍‌ମାଡ୍‌ଲୋଙନ୍‌ ଞେନ୍‌ ଗିୟ୍‌ଲାୟ୍‌ ଡ, ଉଡ଼ୟ୍‌ ଅଲ୍‌ବାନ୍‌ ଆନେଙ୍‌ବାନ୍‌ ଡକୋ । 3 ତିଲୋଙନ୍‌ ଞେନ୍‌ ସାବ୍‌କୁଡ୍‌ମଲନ୍‌ ଗିୟ୍‌ଲାୟ୍‌ ଡ, ଅଲନ୍‌ ଆମୁକ୍କାବାନ୍‌ ଅବୟ୍‌ ମେଣ୍ତାନ୍‌ ଆତନଙ୍‌ ଡକୋ, ବନଡ୍‌ ଆଡେରିଙନ୍‌ ବାଗୁ ଡ ତି ବାଗୁନ୍‌ ଆଡେରିଙ୍‌ ଡେଙ୍ଗା; ବନ୍‌ଡ ଅବୟ୍‌ ଆଡେରିଙ୍‌ ଆତିକିଲୋଙ୍‌ ଡେଙ୍ଗା ଡ ତିଆତେ ଡେଙ୍ଗା, ତିଆତେ ଆନ୍ନା ଡୁଙ୍‌ଲନାୟ୍‌ । 4 ଞେନ୍‌ ତି ମେଣ୍ତାନ୍‌ ବରୁବ୍‌ୟୋଙ୍‌ଗଡ୍‌ ଡ ଅର୍ଜଡୋମ୍‌ଗଡ୍‌ ଅର୍କାବଡ଼ିଗଡ୍‌ ରୁମ୍‌ପେଲେ ତୁସେଲେ ଆ ଜିର୍ରେନ୍‌ ଞେନ୍‌ ଗିୟ୍‌ଲାୟ୍‌; ଆରି ଅନ୍ନୁଙ୍‌ଜା ଆ ଜନ୍ତୁ ଆମୁକ୍କାଲୋଙନ୍‌ ତନଙ୍‌ଲେ ଅଃର୍ରପ୍ତିଲଜି, ଆରି ଆସିଂନ୍‌ ଆନିଜା ଡଙ୍‌ଲେ ଅଃର୍ରପ୍ତିଲଜି; ବନ୍‌ଡ ଆନିନ୍‌ ଆନିନ୍‌ଡମ୍‌ ଞେନ୍‌ ତୁମ୍‌ଗାମ୍‌ଲେ ବର୍ରନେ । 5 ଆରି ତି କୁମ୍ମେଡନ୍‌ ଆବର୍ନେ ଞେନ୍‌ ଇୟ୍‌ମଲେ ଆଡ୍ରକୋଲନାୟ ଆଡିଡ୍‌, ଅବୟ୍‌ କୁମ୍ମେଡନ୍‌ ବରୁବ୍‌ୟୋଙ୍‌ଗଡ ସିଲଡ୍‌ ଅଡ଼୍‌କୋନ୍‌ ପୁର୍ତିନ୍‌ ଏଙ୍‌ଲେ ଜିର୍ରାୟ୍‌ ଡ ଆନିନ୍‌ ଲବନ୍‌ ଆସୁଙେଲୋ; ଆରି, ତି କୁମ୍ମେଡନ୍‌ ବାରମଡ୍‌ଲୋଙନ୍‌ ଆମଡ୍ଡି ବର୍ରନ୍‌ତଙନ୍‌ ଆଡେରିଙ୍‌ ଡକୋଏନ୍‌ । 6 ଞେନ୍‌ ଅଙ୍ଗା ବାଗ୍‌ ଡେରିଙନ୍‌ ମେଣ୍ତାନ୍‌ ଅଲନ୍‌ ଆମୁକ୍କାବାନ୍‌ ଆତନଙ୍‌ ଡକୋଲନ୍‌ ଞେନ୍‌ ତିଆତେ ଗିୟ୍‌ଲାୟ୍‌, ତି ଆ ବୋର୍ସାନ୍‌ ବାତ୍ତେ ତୁଣ୍ତୁନ୍‌ ଏଙେନ୍‌ । 7 ଞେନ୍‌ ଗିୟ୍‌ଲାୟ୍‌ ଡ ମେଣ୍ତାନ୍‌ ଆମଙନ୍‌ ଜିର୍ରାୟ୍‌ କି ବର୍ରାବନ୍‌ ବୟନ୍‌ ମେଣ୍ତାନ୍‌ ସମେନ୍‌ ଡ ଆଡେରିଙନ୍‌ ବାଗୁନ୍‌ ଲବ୍‌ଗଡ୍‌ଡେନ୍‌ ଡ ଆମୁକ୍କାବନ୍‌ ତି ମେଣ୍ତାନ୍‌ ତନନଙନ୍‌ ଆସନ୍‌ ବୋର୍ସାତଡ୍‌ ଡେଲୋ; ବନ୍‌ଡ ତି କୁମ୍ମେଡନ୍‌ ଲବନ୍‌ ଅବ୍‌ସେଲ୍ଲେ ଆତଲ୍‌ଜଙ୍‌ଲୋଙନ୍‌ ଅଲେନେନ୍‌, ତି ମେଣ୍ତାନ୍‌ ଆନବ୍‌ମେଙ୍‌ ଆସନ୍‌ ଆନିଙ୍‌ଜା ଅଃଡ୍ଡକୋଲଞ୍ଜି। 8 ତି ସିଲଡ୍‌ଲ୍ଲନ୍‌ ମେଣ୍ତାନ୍‌ ବୋର୍ସାଏନ୍‌ ଆକ୍‌ରାନ୍‌ ଅବ୍‌ଗୋଗୋୟଲନ୍‌ ବର୍ରନେ, ଆନିନ୍‌ ବୋର୍ସାନ୍‌ ଆଡ୍ରକୋଏନ୍‌ ଆଡିଡ୍‌ ଡେରିଙ୍‌ ଲବ୍‌ଗଡେନ୍‌; ଆରି ତି ଆତିକି ରୁଆଙନ୍‌ ଅଡ଼୍‌କୋରେଙନ୍‌ ଉଞ୍ଜି ବର୍ରନ୍ତଙନ୍‌ ଆଡେରିଙ୍‌ ଡୁଙ୍‌ଲନାୟ୍‌ । 9 ଆରି ତି ଆଡେରିଙନ୍‌ ଅବୟ୍‌ଲୋଙନ୍‌ ସନ୍ନା ଆଡେରିଙନ୍‌ ଡୁଙ୍‌ଲନ୍‌ ଅର୍ଜଡ଼ୋମ୍‌ଗଡ୍‌ ଡ ଡୁଙ୍‌ୟୋଙ୍‌ଗଡ୍‌ ଇସ୍ରାଏଲ୍‌ ଡେସାଗଡ୍‌ ଗୋଗୋୟ୍‌ଲେ ପାଙେନ୍‌ । 10 ତିଆତେ ରୁଆଙନ୍‌ ଆସିପାଇଜି ଗୋଗୋୟ୍‌ଲେ ପାଙେନ୍‌ ଡ ସିପାଇଞ୍ଜି ଡ ତୁତୁଜଞ୍ଜି ଲାଙ୍‌ଲେଲ୍‌ ଲବନ୍‌ ଅବ୍‌ସେଲ୍ଲେ ଆତଲ୍‌ଜଙ୍‌ଲୋଙନ୍‌ ଅଲେନେନ୍‌ । 11 ଓ, ତି ସିପାଇଞ୍ଜି ଆ ସୋଡ଼ା ବିରୁଡଲୋଙ୍‌ ଆନିନ୍‌ଡମ୍‌ ଜାଏନ୍‌ କି ଆନିନ୍‌ ସିଲଡ୍‌ ଆଏଡ଼ର୍‌ ତନୋମୋଡ୍‌ପୁରନ୍‌ ରାଉଲନ୍‌ ପାଙେନ୍‌ କି ମନଣ୍ତିରନ୍‌ ଅବ୍‌ଗୁରୁଡ୍ଡେନ୍‌ । 12 ଆରି ତି ଆବର୍ନେନ୍‌ ଅଃନ୍ନମ୍‌ଡଙଲନ୍‌ ଆସନ୍‌ ଆଏଡ଼ର୍‌ ଅନମଙ୍‌ପୁରନ୍‌ ବୟନ୍‌ ସିପାଇଞ୍ଜି ଆସିଲୋଙ୍‌ ତିୟେଞ୍ଜି ଡ ତି ଆଡେରିଙନ୍‌ ଆଜାଡ଼ିନ୍‌ ଆ ଲବଲୋଙନ୍‌ ସମେନ୍‌, ଆରି ଆଇସ୍ସୁମନ୍‌ ବାତ୍ତେ ଆ କାବାଡ଼ାନ୍‌ଲୁମ୍‌ଲେ ଆନିନ୍‌ ଜିନଏନ୍‌ । 13 କେନ୍‌ସିଲଡ୍‌ ଞେନ୍‌ ମଡ଼ିର୍‌ ମନ୍‌ଡ୍ରାନ୍‌ ଆବର୍ନେ ଅମ୍‌ଡଙଲାୟ୍‌; ଅଙ୍ଗା ବର୍ରନେନ୍‌ ବର୍ରନ୍‌, ଆନିନ୍‌ ଆନ୍ନା ଅବୟ୍‌ ମଡ଼ିର୍‌ ମନ୍‌ଡ୍ରାନ୍‌ ବର୍ରେନ୍‌, ଆଏଡ଼ର୍‌ ଅନମଙ୍‌ପୁରନ୍‌ ଡ ବର୍ରନେନ୍‌ ଅଃନ୍ନମ୍‌ଡଙେ ପାଡ଼ୋମରଞ୍ଜି ଡ ଲତିଡନେନ୍‌ ଆସନ୍‌ ଡରମ ସିପାଇଞ୍ଜି ଆସିଲୋଙ୍‌ ତିୟ୍‌ଡମ୍‌ଲନ୍‌ କେନ୍‌ ଆବିସୟ୍‌ ଅଙ୍ଗା ତନଲ୍‌ମାଡନ୍‌, ଡିଅଙ୍ଗା ଓୟୋଙ୍‌ଜାୟ୍‌ ଡେଏ ? 14 ଆନିନ୍‌ ଞେନ୍‌ ବରିଁୟ୍‌, ବାଗୁ ଅଜାର ୟାଗିସ ସାଲ୍ଲୁମ୍‌ ଡୁତାନ୍‌ଜାୟ୍‌; ତି ସିଲଡ୍‌ଲ୍ଲନ୍‌ ମଡ଼ିର୍‌ ଜାଗାରେଙନ୍‌ ମନଙ୍‌ଡେତେ ।

15 ଞେନ୍‌ ଦାନିଏଲନ୍‌ କେନ୍‌ ଆତନାଲ୍‌ମଡ୍‌ ଆଗ୍ରିଲାୟନ୍‌ ସିଲଡ୍‌ ତିଆତେ ଜନ୍‌ନାନ୍‌ ଆସନ୍‌ ଏର୍ରରାୟ୍‌ଗୋୟ୍‌ଲାୟ୍; ଆରି ଗିୟ୍‌ବା ମନ୍‌ରାନ୍‌ ଅନ୍ତମ୍‌ ଅବୟ୍‌ ମନ୍‌ରାନ୍‌ ତେତେନ୍‌ ମୁକାଲୋଙ୍‌ ଞେନ୍‌ ଆ ତନଙ । 16 ଆରି ଉଡ଼ୟ୍‌ ଅଲଲୋଙନ୍‌ ଞେନ୍‌ ଅବୟ୍‌ ମନ୍‌ଡ୍ରାନ୍‌ ଆସରଙ୍‌ ଅମ୍‌ଡଙ୍‌ଲାୟ୍, ଆନିନ୍‌ ଓଡ୍ଡେଲେ ବର୍ରନେ, ଏ ଗାବ୍ରିଏଲ, କେନ୍‌ ମନ୍‌ରାନ୍‌ ଆ ତନାଲ୍‌ମଡ୍‌ ଆଗ୍ରାମ୍‌ଗାମ୍ ଇନି ବର୍ନା । 17 ତିଲୋଙ୍‌ ଞେନ୍‌ ଅଙ୍ଗା ଜାଗାଲୋଙନ୍‌ ତନଙ୍‌ଲେ ଡକୋଲନାୟ୍‌, ଆନିନ୍‌ ତି ଆନେଙ୍‌ବାନ୍‌ ଜିର୍ରରାୟ,ଞେନ୍‌ ବତଙ୍‌ଲିୟ୍‌ ଡ ତୁଙ୍‌ରୁଙ୍‌ମ୍ୱାଲନ୍‌ ଗୋଙ୍‌ଲିଁୟ୍‌, ବନ୍‌ଡ ଆନିନ୍‌ ବରିଁୟ୍‌, ଏ ମନ୍‌ରାନ୍‌ ଆଅନ୍‌, ଅବ୍‌ଗନ୍‌ଲୁନା ଇନିଆସନ୍‌ କେନ୍‌ ଆତନାଲ୍‌ମଡ୍‌ ତିକିୟୋଙ୍‌ ଆବର୍ନେଜି । 18 ଆନିନ୍‌ ଆବର୍ନେନ୍‌ ଅମଡଙଲେ ଲବଲୋଙନ୍‌ ମୁକ୍କାଡାଲେ ଅସେତ୍ତା ଡିମଲିୟ୍‌; ବନ୍‌ଡ ଆନିନ୍‌ ସୁଙେଡାଲେ ଞେନ୍‌ ଆଡଙ୍‌ ଅବ୍‌ଡୋଲିୟ୍‌ । 19 ଆରି ଞେନ୍‌ ଆଡଙ୍‌ ବରିଁୟ୍‌, "ଗିଜା, ବର୍ରାବିଙନ୍‌ ଇନିଡେତେ ତିଆତେ ଞେନ୍‌ ଅବ୍‌ଜନାତମ୍‌; ଇନିଆସନ୍‌ କେନ୍‌ ଆବର୍ନେ ତିକିୟୋଙ୍‌ ଆବର୍ନେ । 20 ଆମନ୍‌ ଅଙ୍ଗା ମେଣ୍ତାନ୍‌ ଗିଜେନ୍‌, ଆଡେରିଙନ୍‌ ବାଗୁନ୍‌ ମାଦିୟ୍‌ ଡ ପାରସିକନ୍‌ ରାଜା । 21 ଆରି ତି ର କୁମ୍ମେଡନ୍‌ ଆଉସାଲ୍‌ ଗ୍ରିସ୍‌ ଡେସାନ୍‌ ରାଜା ଡ ବାଗ୍‌ ମଡ୍ଡ୍‌ଲୋଙନ୍‌ ଆମଡ୍ଡି ସୋଡ଼ା ଡେରିଙନ୍‌ ଆ ପ୍ରତମୁନ୍‌ ଆ ରାଜା । 22 ଆରି ଅଙ୍ଗା ଡେରିଙନ୍‌ ଲଗଡ୍‌ଡାଲେ ଅଙ୍ଗାଲୋଙ୍‌ ଉଞ୍ଜି ଡେରିଙନ୍‌ ଡୁଙ୍‌ଲନାୟ୍, ତିଲୋଙ୍‌ ତି ଆଡେସାଲୋଙ୍‌ ଉଞ୍ଜି ଡେସାନ୍‌ ଡୁଙ୍‌ତନାୟ୍‌ ଗାମ୍‌ଲେ ଜନାତମ୍‌, ବନ୍‌ଡ ଆମ୍ମୁଙ୍‌ ଅନ୍ତମ୍‌ ଅବୋର୍ସାଲୋ । 23 ଆରି ଆ ରାଜ୍ୟ ଆଡିନ୍ନାଇଙ୍‌ ଆଙ୍ଗା ବନାଞନ୍‌ ବର୍ରନ୍‌ ଅମ୍‌ଡଙେଞ୍ଜି ତି ଆତେ ଅଡ଼୍‌କୋନ୍‌ ଅମ୍‌ଡଙ୍‌ତଜି, ତିଆଡିଡ୍‌ ବର୍ରନତଙନ୍‌ ଡେତେ ଡ କଣ୍ତାୟ୍‌ରାଜାନ୍‌ ଡୁଙ୍‌ତନାୟ । 24 ଆନିନ୍‌ ଆ ବୋର୍ସାନ୍‌ ଗୋଗୋୟ୍‌ତେ, ବନ୍‌ଡ ତିଆତେ ଆବୋର୍ସାନ୍‌ତଡ୍‌; ଆରି ବସାନ୍ନିଆନ୍‌ଡାନ୍‌ ରବ୍ବୁତେ ଡ ଆନିନ୍‌ଡମ୍‌ ଅଃବୋର୍ସାଲନ୍‌ ଲୁମେନ୍‌; ଆରି ଆନିନ୍‌ ବୋର୍ସାମରଞ୍ଜି ଡ ମଡ଼ିର୍‌ମରଞ୍ଜି ରବ୍ବୁତେ । 25 ଆରି ଆସୁତ୍ରନ୍‌ ବାତ୍ତେ ଆସିଂନ୍‌ ଡନେନ୍‌ ଡେସମ୍‌ତେ ଡ ଆନିନ୍‌ ଆଉଗ୍ଗର୍‌ଲୋଙନ୍‌ ଞେନ୍‌ ତୁମ୍‌ ଗାମ୍‌ଡମ୍‌ତନ୍‌ ଡ ଇନିଙ୍‌ତଡନ୍‌ ଆଡିନ୍ନାଇଙ୍‌ ଲାଙ୍‌ଲେଡ୍‌ ମନ୍‌ରାନ୍‌ ରବ୍ବୁତେ; ଆରି ଆନିନ୍‌ ସୋଡ଼ାମରଞ୍ଜି ଆସୋଡ଼ା ଆବିରୁଡଲୋଙଜି ତନଙ୍‌ତେ; ବନ୍‌ଡ ଆନିନ୍‌ ‌ଆସିଂତଡ୍‌ଜାୟ୍‌ଡେନ୍‌ ଇନିଙ୍‌ଅଡେ । 26 ଡୋତାନ୍‌ ଡ ସାଲ୍ଲୁମ୍‌ ଆବିସୟ୍‌ ତନଲ୍‌ମାଡନ୍‌ କଡାଡିନ୍‌ ଆଜାଡ଼ିନ୍‌; ବନ୍‌ଡ ଆମ୍ୱେନ୍‌ କେନ୍‌ ଆତ୍‌ନାଲ୍‌ମଡ୍‌ ସିଲୁଆ; ଇନିଆସନ୍‌ ତିଆତେ ବିଅଜିଙ୍‌ ଆବର୍ନେଜି ।" 27 ଞେନ୍‌ ଦାନିଏଲ୍‌ କେନ୍‌ ସିଲଡ୍‌ ମନ୍‌ଙ୍ଗାଲିୟ୍‌ ଡ ଅୟମ୍‌ଡିନ୍ନା ଅଃସୁଲିୟ୍‌; ତିଲୋଙ୍‌ ଞେନ୍‌ ଡୋଲନ ରାଜାନ୍‌ ଆକାବାଡ଼ା ଲୁମ୍‌ଲାୟ୍‌; ଆରି ତି ଆତନାଲ୍‌ମଡ୍‌ଲୋଙ୍‌ ଞେନ୍‌ ଓଙ୍‌ଲାୟ୍‌ ବନ୍‌ଡ ଆନିଙ୍‌ଜା ତନାଲ୍‌ମାଡନ୍‌ ଅଃଗନ୍‌ଲୁଡ୍‌ଲଜି ।