1 ତି ଆ ଡିନ୍ନାଇଂ ମନ୍‌ରାବେଞ୍ଜି ସାୟନେନ୍‌ ଆସନ୍‌ ମିକାଏଲନ୍‌ ସୋଡ଼ାମର୍‌ ତନଙତେ ଡ ମନ୍‌ରାଞ୍ଜି ଆବିରିଣ୍ତାନ୍‌ଲୋଙନ୍‌ ସିଲଡ୍‌ ତି ନମିଆନ୍ତାନ୍‌ କେନ୍‌ ଏନେଲେ ଆଡଣ୍ତ ଅର୍ରଙଡେ, ଏନ୍ନେଗନ୍‌ ଆଡିଡ୍‌ ଅଡ଼ୋତାୟ୍‌, ଆରି ଅଡ଼୍‌କୋନ୍‌ ବିରିଣ୍ତାନମ୍‌ଜି ଆବଇଲୋଙନ୍‌ ଆଇଡିଡ୍‌ ଡେଡ୍‌ ଆନିଞ୍ଜି ଅମେଙ୍‌ଜି । 2 ପୁର୍ତିନ୍‌ ଉମ୍ରିଲନ୍‌ଲୋଙନ୍‌ ଆନିଞ୍ଜି ରବ୍ବୁଏଞ୍ଜି, ଆନିଞ୍ଜିଲୋଙ୍‌ ଲାଙ୍‌ଲେନେ ମବ୍‌ଲେ ଡୋତଞ୍ଜି; ଆରି ଲାଙ୍‌ଲେନେ ଅଃନ୍ନଞିଡେନ୍‌ ଆପ୍ରାନା ଡ ଲାଙ୍‌ଲେନେ ଗନ୍‌ରଜନ୍‌ ଡ ଅଃନ୍ନଞିଡେ ଆଡୁକା ଞାଙ୍‌ଲେ ତନଙ୍‌ତଜି । 3 ଆରି ଆନାଜି ଗିଆନମରନ୍‌ ଆନିଞ୍ଜି ରୁଆଙନ୍‌ ଆସ୍‌ନାଆର୍‌ ଅନ୍ତମ୍‌ ଆରି ଆନାଜି ଡରମ୍ମଗଡନ୍‌ ଅବ୍‌ୟରତାଜି, ଆନିଞ୍ଜି ତୁତୁଜନ୍ ଅନ୍ତମ୍‌ ଆଏଡ଼ର୍‌ ସାଆର୍‌ ଡକୋତଞ୍ଜି । 4 ବନ୍‌ଡ ଏ ଦାନିଏଲ୍ ଆମନ୍‌ ତିକ୍କିୟୋଙ୍‌ଜାୟ କେନ୍‌ ଆବାକ୍ୟ ଅଡ଼୍‌କୋନ୍‌ ଡଙ୍‌ଡଙଲେ କେନ୍‌ ଆ ବଇ ଏଡେଲେ ସିଲୁଅମ୍ମେଲେ ଡକ୍କୋଆ; ଜବ୍ର ଅଡ଼େତ୍ତେ ଅଡ଼େନ୍ନେ ଇର୍ତଜି ଆରି ଗିଆନ ଗୋଗୋୟ୍‌ତେ । 5 ତିଆଡିଡ୍‌ ଞେନ୍‌ ଦାନିଏଲନ୍‌ ଗିୟ୍‌ଲାୟ୍‌, ଆରି ଗିୟ୍‌ବା ଆନ୍ନା ବାଗୁ ମନ୍‌ଡ୍ରାନ୍‌ ଆତନଙ୍‌, ଅବୟ୍‌ନେ ଅଲନ୍‌ ଅନେଙନ୍‌ କେନ୍‌ଆନେଙ୍‌ବାନ୍‌ ଡ ଆରି ଅବୟ୍‌ନେ ଅଲନ୍‌ ଆ ଅଡିଗଡ୍‌ । 6 ଜେଏକାବ୍‌ ଡ ଅଲନ୍‌ ଡାଆନ୍‌ ଆତୁଣ୍ତୁଲୋଙ ଅଙ୍ଗା ମନ୍‌ରା, ଆନିନ୍‌ ଅବୟ୍‌ନେ ବର୍ରନେ, କେନ୍‌ ଅଡ଼୍‌କୋନ୍‌ ବସର୍ରାନିଆନ୍‌ ଆବିସୟ୍‌ ଆନଞିୟ୍‌ଜାୟ୍‌ ଡିଅଙ୍ଗା ବର୍ସେଙ୍‌ ଡେତେ ? 7 ତିଲୋଙ୍‌ ଞେନ୍‌ ଅମ୍‌ଡଙ୍‌ଲାୟ୍, ଜେଏକାବ୍‌ ଡ ଅଲଡାନ୍‌ ଆ ତୋଣ୍ତୁଲୋଙ୍‌ ତି ମନ୍‌ଡ୍ରାନ୍‌ ଅର୍ଜଡ଼ୋମ୍‌ଗଡ୍‌ ଡ ଅର୍କାବଡ଼ିଗଡ୍‌ ଆସିଂନ୍‌ ରୁଆଙ୍‌ଗଡ୍‌ ଅବ୍‌ଡୋଲେ ଆଜାଡ଼ିନ୍‌ ଆନମେଙ୍‌ ଆଞୁମ୍‌ଲୋଙ୍‌ ପର୍ମାଡ଼ାଲନ୍‌ ବର୍ରନ୍‌, କେନ୍‌ ଆତେ ୟାଗି ବର୍ସେଙ୍‌ଜାୟ୍‌ ଡେତେ; ଆରି ଆନିଞ୍ଜି ମଡ଼ିର୍‌ ମରଞ୍ଜି ଆସୋଡ଼ା ଲନବ୍‌ଗଡନ୍‌ ଆସନ୍‌ ଅବ୍‌ଞିଡେଞ୍ଜି, କେନ୍‌ ଅଡ଼୍‌କୋନ୍‌ ଆବିସୟ୍‌ ଆଜାଡ଼ିନ୍‌ ସତଙ୍‌ ଡେତେ । 8 ଆରି ଞେନ୍‌ ଅମ୍‌ଡଙ୍‌ଲାୟ୍, ବନ୍‌ଡ ଅଃଗନ୍‌ଲୁଡ୍‌ଲିଁୟ୍‌; ତିଲୋଙ୍‌ ଞେନ୍‌ ବର୍ରନାୟ୍‌, ଏ ପ୍ରବୁଞେନ୍‌ କେନ୍‌ ଅଡ଼୍‌କୋନ୍‌ ଇନି ଡେତେ ? 9 ତିଲୋଙ୍‌ ଆନିନ୍‌ ବର୍ରେନ୍, ଏ ଦାନିଏଲ୍‌ ଆମନ୍‌ ତଙର୍‌ନମ୍‌ ତଙିୟ୍‌ନା; ଇନିଆସନ୍‌ ତିକ୍କିୟୋଙ୍‌ ଜାୟ୍‌ କେନ୍‌ ଆବାକ୍ୟ ଅଡ଼୍‌କୋନ୍‌ ଡ ସିଲୁଅମ୍ମେଲେ ଆଡକୋ । 10 ଲାଙ୍‌ଲେନେ ଆମ୍ୱେଞ୍ଜି ମନଙ୍‌ ଆରି ଜେଏ ଅମ୍ମେତବେନ୍‌ କି ମଡ଼ିର୍‌ ଅମ୍ମେତବେନ୍; ବନ୍‌ଡ ପେଲ୍ଲାମରଞ୍ଜି ଆଞଡ୍ରମ୍‌ତଞ୍ଜି ଡ ପେଲ୍ଲାମରଞ୍ଜି ଆନ୍ନିଙ୍‌ ଅଃଗନ୍‌ଲୁଡେଜି; ବନ୍‌ଡ ବୁଡ଼ିମରଞ୍ଜି ଗନ୍‌ଲୁତଜି । 11 ଆରି ଅଙ୍ଗା ଆଡିଡ୍‌ ଆଏଡ଼ର୍‌ ଅନମଙନ୍‌ ଅଞିଡ୍‌ତେ କି ରନବ୍ବୁମରଞ୍ଜି ଏଡ଼ୁର୍‌ମଡନ୍‌ ଆଜନବ୍‌ଜି ତୁବେଞ୍ଜି, ତି ଆଡିଡ୍‌ ସିଲଡ୍‌ ବଅଜାର୍‌ ବାଗୁସଅ ନବେଡିନ୍ନା ଡେତେ । 12 ଅଙ୍ଗା ମନ୍‌ରା ଜଗେଲେ ଡକୋତନ ଆନିନ୍‌ ବଅଜାର ୟାଗିସ ପଞ୍ଚତିରିସି ଡିନ୍ନାନ୍‌ ଜାୟ୍‌ ଡକୋତନ୍‌, ଆନିନ୍‌ ସନେନ୍‌ସେନ୍‌ । 13 ବନ୍‌ଡ ଆମ୍ୱେଞ୍ଜି ତିକିୟୋଙ୍‌ଜାୟ୍‌ ତଙର୍‌ଲୋଙନ୍‌ ତଙିୟ୍‌ନାବା; ଇନିଆସନ୍‌ ଆମ୍ୱେଞ୍ଜି ଲୋଲୋନେନ୍‌ ଏଞାଙ୍‌ତେ ଡ ତିକିୟୋଙ୍‌ ଆମ୍ୱେନ୍‌ ଏତନଙ୍‌ତେ ।