1 ବେଲଟତ୍ସରନ୍‌ ରାଜାନ୍‌ ବଅଜାର୍‌ ଅମାତ୍ୟମରଞ୍ଜି ଆସନ୍‌ ଅବୟ୍‌ ସୋଡ଼୍‌ବୋଜିନ୍‌ ତୁବେନ୍‌ । ଆରି ବଅଜାର୍‌ ମନ୍‌ରାଜି ଆତେମଡ୍‌ ଦ୍ରାକ୍ୟାଡାନ୍‌ ଗାଏନ୍‌ । 2 ଆରି ଆପ୍ପେୟନ୍‌ ନବ୍‌କୁତ୍‌ନିତ୍ସରନ୍‌ ଜିରୁସାଲମ ମନ୍ଦିରଲୋଙ୍‌ ସୁନ୍ନା, ରୁପାନ୍‌ ରାଉଲନେ, ତିଲୋଙ୍‌ ରାଜାନ୍‌ ଅମାତ୍ୟମରଞ୍ଜି, ଆରି ଆଡୁକିରିଞ୍ଜି ଡ ଆ କମ୍ୱାରି ବଜଞ୍ଜି ଏଙ୍ଗାଲ୍‌ଡେନ୍‌ ଗାତଜି, କେନ୍‌ ଆସନ୍‌ ବେଲଟତ୍ସରନ୍‌ ଆ ଦ୍ରାକ୍ୟାଡାନ୍‌ ମାୟ୍‌ମାୟ୍‌ଲେ ଡିଅଙ୍ଗା ସିମ୍ମାନ୍‌ ଅଡ଼୍‌କୋନ୍‌ ପନାଙନ୍‌ ଆସନ୍‌ ବାଞେନ୍‌ । 3 ତିଲୋଙ୍‌ ଜିରୁସାଲମ୍‌ ମନ୍ଦିରଲୋଙନ୍‌, ପରମେସ୍ୱରନ୍‌ ଆସିଂଲୋଙ୍‌ ଅଙ୍ଗା ସୁନ୍ନା,ସିମ୍ମା ରୁୟ୍‌ଲେ ପାଙ୍‌ଲାଜି,ତିଆତେ ଆମନ୍‌ରାଞ୍ଜି ପାଙ୍‌ଲାଜି; ଆରି ରାଜାନ୍‌ ଡ ଅମାତ୍ୟମରଞ୍ଜି,ଆଡୁକିରିଞ୍ଜି ଡ କମ୍ୱାରିବଜଞ୍ଜି ତିଆତେଜି ଅଡ଼୍‌କୋନ୍‌ ଆନିଞ୍ଜି ଗାଏଞ୍ଜି । 4 ଆନିଞ୍ଜି ଦ୍ରାକ୍ୟାଡାନ୍‌ ଆଗ୍ରାଏଞ୍ଜି ଆଡିଡ୍‌ ସୁନ୍ନା, ରୁପାନ୍‌, ପିତ୍ତଡ଼ନ୍‌, ଲୁଆଙନ୍‌, ଅରାନ୍‌ ଡ ଅରେଙନ୍‌ ବୟନ୍‌ ଆତୁତୁବ୍‌ ଆକୋଙ୍‌ଡାଜନ୍‌ଞ୍ଜି ସେଙ୍କେରାଏଞ୍ଜି । 5 ତି ଆଡିଡ୍‌ ତେତେନ୍‌ ମନ୍‌ରାନ୍‌ ଆ ଅଣ୍ତେର୍‌ସିନ୍‌ ଗିୟ୍‌ତାଏନ୍‌ ରାଜାସିଙନ୍‌ ଆକିନ୍ତାଲ୍‌ଲୋଙ୍‌ ପିଙ୍ଗତୋଡନ୍‌ ଆ ତୋଣ୍ତୁଲୋଙ୍‌ ଅଣ୍ତେର୍‌ସିନ୍‌ ବୟନ୍‌ ଇଡେନ୍‌, ତି ଆସିଂନ୍‌ ପିଙ୍ଗତୋଡନ୍‌ ଆତୟ୍‌ତୟ୍‌ ରାଜାସିଙନ୍‌ ଆକିନ୍ତାଲ୍‌ଲୋଙ୍‌ ଇଡେନ୍‌ ତି ଆସିଂନ୍‌ ରାଜାନ୍‌ ଗିଜେନ୍‌ । 6 ତିଲୋଙ୍‌ ରାଜାନ୍‌ ଆମୁକ୍କା ଅସର୍‌ମୁଏନ୍‌ ଆନିନ୍‌ ଆନିଃୟମନ୍‌ କଲାୟ୍‌ବିଲାୟ୍‌ ଡେଲୋ; ଆରି ଆଜଙନ୍‌ ୟୁଲନ୍‌ ଆମେଡଡ଼ି ଜଙନ୍‌ ଡ ଆମେଡଡ଼ି ଜଙନ୍‌ ଗତରେନ୍‌ । ଆରି ଆଜଙନ୍‌ ଅଃବୋର୍ସାଲନ୍‌ ଆସନ୍‌ ଆନିନ୍‌ ତନଙ୍‌ଲେ ଅର୍ରପ୍ତିଲୋ 7 ରାଜାନ୍‌ ତନେୟ୍‌ମର୍ର, କଲଦିଅଞ୍ଜି ଡ ମନ୍ତ୍ରମରଞ୍ଜି ଡ ମନଙ୍‌ମରଞ୍ଜି ଅନୋରୋଙନ୍‌ ଆସନ୍‌ ସୋଡ଼ା ସର୍ରଙନ୍‌ ବାତ୍ତେ ଓଡେନ୍‌ । ବାବିଲନ୍ ଆରାଜା ଜନାମରଞ୍ଜି ବର୍ରନେ, ଆନାଜାକ୍କିୟ୍‌ କେନ୍‌ ଆଇଡଲ୍‌ ପଡେନାବା, କେନ୍‌ ଆତେ ଇନି ଞେନ୍‌ ଆଡଙ୍‌ ଅବ୍‌ଜନାଇଙ୍‌ଁଁବା ଆନିନ୍‌ କୋର୍‌ଗଡ୍‌ଗୁରନ୍‌ ଆସିନ୍‌ଡ୍ରିନ୍‌ ତିୟ୍‌ତାୟ୍‌ ଡ ଆସଙ୍ଗାଲୋଙନ୍‌ ସୁନାନ୍‌ ଆର ଞାଙ୍‌ତେ, ଆରି ଆନିନ୍‌ ୟାଗି ରାଜ୍ୟନ୍‌ ଡନେମର୍ରଡେତେ । 8 ତିଲୋଙ୍‌ ରାଜାନ୍‌ ଅଡ଼୍‌କୋନ୍‌ ଜନ୍‌ନାମରଞ୍ଜି ଅମ୍ମନ୍‌ ଜିର୍ରାଜି; ବନ୍‌ଡ ଆନିଞ୍ଜି ଇଡଲନ୍‌ ପଡ଼େଲନ୍‌ ଅଃର୍ରପ୍ତିଲଜି, ଅଡ଼େ ତି ଆତେ ଇନିଆଗ୍ରାମ୍‌ଗାମ୍‌ ଅବ୍‌ଜନାଲେ ଅଃର୍ରପ୍ତିଲଜି । 9 ତିଆସନ୍‌ ରାଜାନ୍‌ ବେଲଟତ୍ସରନ୍‌ କଲାୟ୍‌ବଲାୟ୍‌ ଡେଲୋ କି ଆମୁକ୍କାନ୍‌ ଅସର୍‌ମୁଏନ୍‌, ଆରି ଅମାତ୍ୟମରଞ୍ଜି ସାନିଆଡେଞ୍ଜି । 10 କେନ୍‌ ସିଲଡ୍‌ ଗାଗାନେସିଂନ୍‌ ଜିର୍ରାୟ୍‌ । ରାଜାନ୍‌ ଡ ଅମାତ୍ୟମରଞ୍ଜି ଆବର୍ନେ ଅମ୍‌ଡଙେନ୍‌; ରାଣିନ୍‌ ବର୍ରନେ, ଏ ରାଜାନ୍‌ ଗୋଗୋୟ୍‌ ବର୍ସେଙ୍‌ ଅମେଙେତୋ; ଅଃନିୟ୍ୟମନ୍‌ ବୟନ୍‌ କଲାୟ୍‌ବିଲାୟ ଡେଡଙମ୍‌ତଡ୍‌, ଅଡ଼େ ମୁକ୍କାନମ୍‌ ଅବ୍‌ସର୍ରଡଙେ । 11 ରାଜ୍ୟଲୋଙ୍‌ନମ୍‌ ଅବୟ୍‌ ମନ୍‌ଡ୍ରାଡକୋ, ଆପୁଡ଼ାରାଲୋଙନ୍‌ ମଡ଼ିର୍‌ କୋଙ୍‌ଡାୟ୍‌ଞ୍ଜି ଡକୋ; ଆରି ଆପେୟ୍‌ନମ୍‌ ଆଡିନ୍ନାଇଙ୍‌ କୋଙ୍‌ଡାଞ୍ଜି ଆବୁଡ୍ଡି ଅନ୍ତମ୍‌ ବୁଡ୍ଡିନ୍‌ତର୍ରତେ ବୁଡ୍ଡିନ୍‌ ଡ ଗିଆନ ଆମଙ୍‌ବାନ୍‌ ଗିୟ୍‌ତାଏନ୍‌; ଆରି ଆପେୟ୍‌ନମ୍‌ ନବ୍‌କୁତ୍‌ନିତ୍ସରନ୍‌ ରାଜାନ୍‌ ତୁମ୍‌ ଆପେୟ୍‌ନମ୍‌ ଆରାଜା, ଆନିନ୍‌ ମନ୍ତ୍ରଜନା,ତନେୟ୍‌ଜନା,କଲଦିଅ ଡ ମନ୍‌ମରଞ୍ଜି ଆ ତୋଣ୍ତୁଲୋଙ୍‌ ସୋଡ଼ା ତବ୍‌ନଙେନ୍‌ । 12 ଇନିଆସନ୍‌ଗାମେଣ୍ଡେନ୍‌ ଦାନିଏଲନ୍‌ ଇସ୍ୱରନ୍‌ ପୁରାଡ଼ା,ବୁଡିନ୍‌, ଗନୁନ୍ତେନ୍‌ ଇନି ଅବ୍‌ଜନାତମ୍‌ ଡ ଜରୁବର୍ରନ୍‌ ଆନିନ୍‌ ବର୍ରତନେ ଏର୍ରଡାଲ୍‌ଗଡ୍‌ ଆ ବୋର୍ସା ଗିତାଏନ୍, ରାଜାନ୍‌ ଆନିନ୍‌ ବେଲଟଚରନ୍‌ ଗାମ୍‌ଲେ ଆଞୁମନ୍ ‌ତିଏନ୍‌ । ନମି ଦାନିଏଲ୍‌ ଓଡ୍ଡେତଜି ଆନିନ୍‌ ଅବ୍‌ଜନାଲେ ରପ୍ତିତମ୍‌ ।

13 ଦାନିଏଲନ୍‌ ରାଜାନ୍‌ ଆମୁକ୍କାବାନ୍‌ ଓରୋଙ୍‌ଲାଜି । ରାଜା ଦାନିଏଲନ୍‌ ବର୍ରେନ୍‌, ଆପେୟ୍‌ଞେନ୍‌ ଜିଉଦାନ୍‌ ଆରାଜା ଡେସାଲୋଙ୍‌ ସିଲଡ୍‌ ଅଙ୍ଗା ମନ୍‌ରାଜି ଓରୋଙ୍‌ଲାଜି,ତି ଜିଉଦାନ୍‌ ଆମନ୍‌ରାଜିଲୋଙ୍‌ ନିୟ୍‌ ଦାନିଏଲନ୍‌ ଡକୋଲନ୍, ଆନିମ୍‌ ପଙ୍‌ ଆମନ୍‌ ? 14 ଞେନ୍‌ ବର୍ରନେନମ୍‌ ଅମ୍‌ଡଙ୍‌ଲାୟ୍‌, ଆମଙ୍‌ନମ୍‌ କୋଙ୍‌ଡାଜଞ୍ଜି ଆପୁଡ଼ାରାନ୍‌ ଡକୋ, ଆରି ବୁଡିନ୍‌, ସନାଆରନ୍‌, ଜନ୍‌ନାନ୍‌ ଡ ସତଙ୍‌ ବନୁଡିନମ୍‌ ଅମଙ୍‌ନମ୍‌ ଗିୟ୍‌ତାତେ । 15 ନମିଞେନ୍‌ କେନ୍‌ ଆଇଡଲ୍‌ ପଡେନେ ଆସନ୍‌ ଡ ଇନି ଆଗ୍ରାମ୍‌ଗାମ୍‌ ଞେନ୍‌ ଅନବ୍‌ଜନାନ୍‌ ଆସନ୍‌ ଜନ୍‌ନାମରଞ୍ଜି ଡ ତନେୟ୍‌ ମରଞ୍ଜି ଅମଙ୍‌ଞେନ୍‌ ଓରୋଙ୍‌ଲାଜି; ବନ୍‌ଡ ଆନିଞ୍ଜି କେନ୍‌ ଆତେ ଇନି ବର୍ରନ୍‌ ଅଃର୍ରପ୍ତିଲଜି । 16 ବନ୍‌ଡ ବର୍ରନେନମ୍‌ ଞେନ୍‌ ଅମ୍‌ଡଙ୍‌ଲାୟ୍,ଆମନ୍‌ ବର୍ରନ୍‌ ରପ୍ତିତେ ଡ ଏର୍ରଡାଲ୍‌ଗଡ୍‌ଲେ ତଡ୍‌; ନମିଞେନ୍‌ ଜଡି ଆମନ୍‌ କେନ୍‌ ଇଆଡଲ୍‌ ଇନିଆଗ୍ରାମ୍‌ଗାମ୍‌ ଞେନ୍‌ ଅବ୍‌ଜନାଲିୟ୍‌ଡେନ୍‌, ଆମନ୍‌ କୋର୍‌ଗଡ୍‌ଗୁରନ୍‌ ଆସିନ୍‌ଡ୍ରି ଅବ୍‌ରତମ୍‌ ଡ ସଙ୍ଗାଲୋଙ୍‌ନମ୍‌ ସୁନ୍ନା ଆରନ୍‌ ତିୟ୍‌ତମ୍‌ ଡ ଆମନ୍‌ ରାଜ୍ୟାନ୍‌ ୟାଗି ସାଉକାରନ୍‌ ଡେତମ୍‌ । 17 ତିଆଡିଡ୍‌ ଦାନିଏଲନ୍‌ ରାଜାନ୍‌ ଆମୁକ୍କାଲୋଙ୍‌ ଜାଲଙ୍‌ଲେ ବର୍ରେନ୍‌, ତନିୟ୍‌ତିୟ୍‌ନମ୍‌ ଅମଙ୍‌ନମ୍‌ ଡକୋନେତୁ ଡ ଓଞୋଲ୍‌କୋୟ୍‌ନମ୍‌ ଆନ୍ନାମର୍ର ତିୟା; ଏଲେଜାକିୟ୍‌ ଡେନ୍‌ ରାଜାନ୍‌ ଆମୁକ୍କାଲୋଙ୍‌ କେନ୍‌ ଆଇଡଲ୍‌ ପଡେତନୟା ଡ କେନ୍‌ ଆତେ ଇନି ଆଗ୍ରାମ୍‌ଗାମ୍‌ ଅବ୍‌ଜନାତମ୍‌ । 18 ଏ ରାଜା, ପରମେସ୍ୱରନ୍‌ ଆପେୟ୍‌ନମ୍‌ ନବ୍‌କୁତ୍‌ନିତ୍ସରନ୍‌ ଆ ରାଜ୍ୟାନ୍‌, ଗନୁଗୁପନେମେଙନ ତିଏନ୍‌; 19 ଆରି ଆନିନ୍‌ କେନ୍‌ ଅନ୍ତମ୍‌ ଗୁନୁଗୁନ୍‌ ଆତ୍ରିଏନ୍‌ ଅଡ଼୍‌କୋନ୍‌ ଆବିରିଣ୍ତା,ଆନ୍ନା ଡେସାବାଜି ଡ ଲଙ୍‌ଲଙ୍‌ମରଞ୍ଜି ଆମୁକ୍କାବାନ୍‌ ଓଙ୍‌ଲେ ବତଙେଞ୍ଜି; ଆନିନ୍‌ ଆନା ଇସ୍ସୁମେନ୍‌ ରବୁଏନ୍‌ ଆରି ଆନିନ୍‌ ଆନା ଇସ୍ସୁମେନ୍‌ ଆନିନ୍‌ ଆମେଙ୍‌ଲେ ଡକୋଏନ୍‌; ଆରି ଆ ଇସ୍ସୁମନ୍‌, ଆନିନ୍‌ ଅବ୍‌ସୋଡ଼ାଏନ୍‌ ଡ ଆ ଇସ୍ସୁମନ୍‌ ବୟନ୍‌ ଅବ୍‌ସନାଏନ୍‌ । 20 ବନ୍‌ଡ ଆନିନ୍‌ ଆଉଗ୍ଗରନ୍‌ ବର୍ରାବେନ୍‌ ଡ ଆ ପୁଡ଼ାରାନ୍‌ ରବ୍‌ଡୋଡାଲନ୍‌ ଞନଡ୍ରମଲନ୍‌, ତିଆସନ୍‌ ଆନିନ୍‌ ରାଜାଆତ୍ରଙ୍ଗୁମ୍‌ ସିଲଡ୍‌ ଡୁଙ୍‌ଲନ୍‌ ଡ ଆପେନେମେଙନ୍‌ ସିଲଡ୍‌ ମନ୍‌ରାଜି ଅମ୍‌ଡୁଞେଞ୍ଜି, 21 ଆରି ଆନିନ୍‌ ମନରାଲୋଙନ୍‌ ସିଲଡ୍‌ ସବ୍‌ଞାୟ୍‌ଲନ୍‌; ଆ ଉଗରନ୍‌ ଜନ୍ତୁଜି ଅନ୍ତମ୍‌ ଡେନ୍‌ ଡ କ୍ୱିନ୍‌ଡ୍ରେଙନ୍‌ ଆ ଗୋଡୋଁୟନ୍‌ ବୟନ୍‌ ଡକୋଲନ୍; ଆନିନ୍‌ ତାଙ୍‌ଲିୟନ୍‌ ଅନ୍ତମ୍‌ ଅଗାବନ୍‌ ଜୋମେନ୍‌ ଡ ଆନିନ୍‌ଆଡଙ୍‌ ରୁଆଙନ୍‌ ଆ ସସିରା ଡାଡାଏନ୍‌; ଆତିନିକି ଆନିନ୍‌ ଜନାଏନ୍‌, ପରମେସ୍ୱରନ୍‌ ମନ୍‌ରାଞ୍ଜି ଆ ରାଜ୍ୟ ସାସନତେ ଡ ତି ଆଉପ୍ରେଙନ୍‌ ଆଇସ୍ସୁମନ୍‌ ଡେତେ, ଆନିନ୍‌ ତିଆତେ ତବ୍‌ନଙ୍‌ତେ । 22 ଆରି ଏ ବେଲଟତ୍ସରନ୍‌ ଆଡାଙ୍ଗଡାଅନନ୍‌ ଆମନ୍‌, କେନ୍‌ ଆତେ ଅଡ଼୍‌କୋନ୍‌ ଜନାଜାକିଡେନ୍‌ ଆଉଗ୍ଗରନ୍‌ ଲବ୍‌ଗଡ୍‌ ଅନ୍ନମେଲନ୍‌; 23 ବନ୍‌ଡ ଇସ୍ୱରନ୍‌ ଆବିରୁଡଲୋଙନ୍‌ ଆମନଙ୍‌ ଅବ୍‌ସୋଡ଼ାଲିୟ୍‌ କି ଆସିଂନ୍‌ ଏର୍ରଜାଡ଼ିକାନ୍‌ ଆସିମ୍ମା ମୁକାଲୋଙନମ୍‌ ପାଙ୍‌ଲାଜି ତିଆତେ ଆମନ୍‌ ଅମାତ୍ୟମରଞ୍ଜି, ଡୁକରିନମ୍‌, କମ୍ୱାରିୟ୍‌ବୟନମ୍‌ ତି ଅଡ଼୍‌କୋନ୍‌ ଆସିମ୍ମାଲୋଙ୍‌ ଦ୍ରାକ୍ୟାଡାନ୍‌ ଗାଏଞ୍ଜି; ଆରି ରୁପାନ୍‌, ସୁନ୍ନାନ୍‌, ପିତ୍ତଡ଼ନ୍‌, ଲୁଆଙନ୍‌, ଅରାନ୍‌ ଡ ଅରେଙନ୍‌ କୋଙ୍‌ଡାୟ୍‌ ଅଃଗିଜେ, ଅନ୍ନମ୍‌ଡଙେ କି ଅଃଜ୍ଜନାଏଜି ଆନିଞ୍ଜି ଆମନ୍‌ ସେଙ୍କେରାତେ; ଆରି ଅନମେଙ୍‌ନମ୍‌ ଆନାସିଂଲୋଙ୍‌ ଡକୋ ତଙର୍‌ନମ୍‌ ଅଡ଼୍‌କୋନ୍‌ ଆସିଂଲୋଙନ୍‌, ଆନିନ୍‌ ଇସ୍ୱରନ୍‌ ଆମଙ୍‌ ଅସ୍ସେନ୍‌ଲୋ। 24 କେନ୍‌ ଆଡିନ୍ନାଇଙନ୍‌ ସିଲଡ୍‌ ଆସିଂଲୋଙନ୍‌ ଅନାପ୍ପାୟନ୍‌ ଡେଲୋ, ଆରି କେନ୍‌ ଆତେ ଇଡଲନ୍‌ ଡେଲୋ। 25 ଆରି ଇନି ଇଡଲନ୍‌ ଡେଲୋ କେନ୍‌ ଆତେ ମିନେ ମିନେ, ତକେଲ୍‌, ଉପାରସିନ । 26 କେନ୍‌ ଆତେ କେନ୍‌ ମିନେ, ପରମେସ୍ୱରନ୍‌ ଆରାଜ୍ୟନ୍‌ ଡିଡିଲେ ସାଡେନ୍‌ ଡ ତିଆତେ ଅବ୍‌ସୁଜେନ୍‌ । 27 ତକେଲ୍‌, ଆମନ୍‌ ତନୁଡେଲୋଙନ୍‌ ତୁଡେଲମଞ୍ଜି ଡ ଅସୋୟ୍‌ ଉନା ଗିୟ୍‌ତାତମ୍‌ । 28 ପିରସ୍‌; ରାଜ୍ୟାନମ୍‌ ଆନ୍ନାଲନ୍‌ ଆରି ମାଦିୟ ଡ ପାରସିକମରଞ୍ଜି ତନିୟନ୍‌ ଡେଞ୍ଜି । 29 ତିଆବେଡ଼ା ବେଲଟତ୍ସରନ୍‌ ବାଞେନ୍‌ ଡେନ୍‌, ମନ୍‌ରାଜି ଦାନିଏଲନ୍‌ କୋର୍‌ଗଡ୍‌ଗୁରନ୍‌ ଆସିନ୍‌ଡ୍ରିନ୍‌ ଅବ୍‌ଜିଜିଏଞ୍ଜି ଡ ଆ ସଙ୍ଗାଲୋଙନ୍‌ ସୁନ୍ନାଆରନ୍‌ ତିଏନ୍‌ ଡ ଆନିନ୍‌ ଡ ରାଜ୍ୟାନ୍‌ ୟାଗି ସାଉକାର୍‌ ଡେତେ,କେନ୍‌ ଆବର୍ନେ ଅଃବ୍‌ଜନାଜେନ୍‌ । 30 ତି ଆତଗଲ୍‌ କଲଦିଅମରଞ୍ଜି ରାଜା ବେଲଟତ୍ସରନ୍‌ ରବୁଏଞ୍ଜି । 31 ଆରି ମାଦିୟନ୍‌ ଦାରିଆବସ ଆରାଜ୍ୟ ଞାଙେ, ତି ଆଡିନ୍ନାଇଙ୍‌ ଆବୟସନ୍‌ ୟାକୁଡ଼ିବାଗୁ ବର୍ସେଙ୍‌ ଡେନ୍‌ ।