1 ଅଡ଼୍‌କୋନ୍‌ ପୁର୍ତିନ୍‌ ଆମନ୍‌ଡ୍ରାଜି ଅଡ଼୍‌କୋନ୍‌ ଆକେଜାମର୍ରଜି, ଡେସାବାଜି ଡ ଲଙ୍‌ଲଙ୍‌ମରଞ୍ଜି ଆଡଅଙ୍‌ଜି ନବ୍‌କୁତ୍‌ନିତ୍ସରନ୍‌ ରାଜାନ୍ ଅବ୍‌ଜନାତବେନ୍‌ ଆମ୍ୱେଞ୍ଜି ସୟୁଡେତବେନ୍‌ । 2 ଅଡ଼୍‌କୋନ୍‌ ସିଲଡ୍‌ ତୋଣ୍ଡୋନ୍‌ ପରମେସ୍ୱରନ୍‌ ଅମଙ୍‌ଗଡ୍‌ ଞେନ୍‌ ଅଙ୍ଗା ଅନ୍ନମଡନ୍‌ ଡ ବର୍ରନ୍ତଙନ୍‌ ଆକାବାଡ଼ାଜି ଲୁମେନ୍‌, ତିଆତେ ଅଡ଼୍‌କୋନ୍‌ କେନ୍‌ ମନଙ୍‌ବର୍ରନ୍‌ ଲନୁମନ୍‌ ଆସନ୍‌ ଇସ୍ସୁମ୍‌ଲାୟ୍‌ । 3 ପରମେସ୍ୱରନ୍‌ ଆକାବାଡ଼ା ଅଡ଼୍‌କୋନ୍‌ ସରାନିଆଡାନ୍‌ ଆ ବୋର୍ସା, ମନୟ୍‌ଡାନ୍‌ । ଆନିନ୍‌ ଅଃନ୍ନଞିଡେନ୍‌ ଆଡିନ୍ନାଇଙ୍‌ ଜାୟ୍‌ ସାସନତେ ଡ ଆରାଜ୍ୟନ୍‌ ଆଙ୍ଗିୟ୍‌ଜା ଅଃନଞିଡେ ।

4 ଞେନ୍‌ ନବ୍‌କୁତ୍‌ନିତ୍ସରନ୍‌ ଅସିଂଞେନ୍‌ ସୟୁ ଗାମ୍‌ଲେ ଡକୋଲନାୟ୍‌ ଡ ଜାଗାଲୋଙଞେନ୍‌ ସାଆର୍ରଗିୟ୍‌ଲାୟ୍‌ । 5 ଞେନ୍‌ ଅବୟ୍‌ ଗନୁନ୍ତେନ୍‌ ଗିୟ୍‌ଲାୟ୍‌, ତିଆତେ ଞେନ୍‌ ବତଙ୍‌ଲିୟ୍‌ ଡ ଲରୁଡ୍‌ଲୁଡ୍‌ଲୋଙନ୍‌ ଅନିଃୟମ୍‌ଞେନ୍‌ ଡ ମନ୍ନଲୋଙନ୍‌ ଆତନାଲ୍‌ମଡନ୍‌ ବତଙଲିୟ୍‌ । 6 କେନ୍‌ ଆଗନୁମ୍‌ନ୍ତେ ଇନି ଆଗ୍ରାମ୍‌ଗାମ୍‌ ଜନନାନ୍‌ ଆସନ୍‌ ଅଡ଼୍‌କୋନ୍‌ ବାବିଲନ୍‌ ଜନାନ୍‌ମରଞ୍ଜି ଅମଙ୍‌ଞେନ୍‌ ଓରୋଙାୟ୍‌ବା ଗାମ୍‌ଲେ ବାୟ୍‌ଲାଜି; 7 ତିଲୋଙ୍‌ ମନ୍ତ୍ରନର୍ରଞ୍ଜି, ତନେୟ୍‌ମରଞ୍ଜି,କଲଦିଅ ଡ ମନଙ୍‌ଅନବ୍‌ଜନାମରଞ୍ଜି ଅମଙ୍‌ଞେନ୍‌ ଜିର୍ରାଜି; ଗନୁମ୍‌ନ୍ତେଞେନ୍‌ ଅବ୍‌ଜନାଲାଜି ବନ୍‌ଡ ତିଆତେ ଇନି ଆଗ୍ରାମ୍‌ଗାମ୍‌ ବର୍ରନ୍‌ ଅର୍ରପ୍ତିଲିଞ୍ଜି। 8 ବନ୍‌ଡ ଆତିନିକି କୋଙ୍‌ଡାୟ୍‌ଞେନ୍‌ ଅନ୍ତମ୍‌ ବେଲଟଚରନ୍‌ ଆଞୁମ୍‌ ଦାନିଏଲନ୍‌ ଆମଙ୍‌ ଞେନ୍‌ ଜିର୍ରାୟ୍‌ଡେନ୍‌, ଆମଙ୍‌ବାନ୍‌ ମଡ଼ିର୍‌ ପୁଡ଼ାରନ୍‌ ଡକୋ; ଆରି ଗନୁମ୍‌ନ୍ତେଞେନ୍‌ ଆନିନ୍‌ ଅବ୍‌ଜନାଲେ ବର୍ରାୟ୍‌, 9 ଏ ତନେୟ୍‌ମରଞ୍ଜି ବେଲଟଚରନ୍‌, ଞେନ୍‌ ଜନା ମଡ଼ିର୍‌ ପୁଡ଼ାରାନ୍‌ ଉଗର୍ରଲୋଙ୍‌ବେନ୍‌ ଡକୋତନେ, ଇନ୍ନିଙ୍‌ଜାକିୟ୍‌ ସସବର୍ରଞ୍ଜି ଆମନ୍‌ ଆସନ୍‌ ଡଣ୍ତତଡ୍‌ କେନ୍‌ ଆସନ୍‌ ଞେନ୍‌ ଗନୁନ୍ତେନ୍‌ ଡ ତନାଲ୍‌ମଡନ୍‌ ଞାଙ୍‌ଲାୟ୍‌, ତିଆତେ ଇନିଆଗ୍ରାମ୍‌ଗାମ୍‌ ଇନି ଞେନ୍‌ ଅବ୍‌ଜନାଇଙ୍‌ଁ । 10 ଲରୁଲୁଲୋଙନ୍‌ ମନ୍ନଲୋଙ୍‌ ଞେନ୍‌ କେନ୍‌ ଏନେଲେ ତନଲ୍‌ମାଡନ୍‌ ଡକୋଏନ୍‌; ଞେନ୍‌ ଆଙାଲାୟ୍‌ ମଡିଲବନ୍‌ ଡ ମଡିନ୍‌ ଅବୟ୍‌ ଅରାନୁବନ ଏସାମାଡନ୍‌ ଆ ଡେଙ୍ଗା । 11 ତି ଆରାନୁବ୍‌ ସୋଡ଼ାଏନ୍‌ କି ବୋର୍ସାଏନ୍‌, ତିଲୋଙ୍‌ ଆ ଡନେଙ୍ଗାନ୍‌ ରୁଆଙନ୍‌ ସୁଙେନ୍‌, ଆରି ସମ୍ପର୍ରପୁର୍ତିନ୍‌ ଜାୟ୍‌ ତିଆତେ ଗିୟ୍‌ତାଏନ୍‌ । 12 ତି ଆ ଅଲାନ୍‌ ମନଙ୍‌ ଡ ତି ଆଜଅନ୍‌ ଗୋଗୋୟ୍‌ ଡକୋଏନ୍‌ ତିଆତେ ଅଡ଼୍‌କୋ ମନ୍‌ରାନ୍‌ ଆଗାଗାନେ ଆସନ୍‌ ଡକୋଏନ୍‌; ବସେଙ୍‌ରେଙନ୍‌ ଆ ଜନ୍ତୁଜି ତି ଆ ଜାୟ୍‌ତା ଲୁମୁଏଞ୍ଜି ଡ ରୁଆଙ୍‌ରେଙନ୍‌ ଆ ଅନ୍ତିଜି ଆ କେଣ୍ତାର୍‌ରେଙନ୍‌ ଡକୋଲଞ୍ଜି କି ଅଡ଼୍‌କୋନ୍‌ ଆପ୍ରାନ୍ନାଞ୍ଜି ଗାଗାନେନ୍‌ ଞାଙେଞ୍ଜି । 13 ‌ଲରୁଲୁଲୋଙ୍‌ଞେନ୍‌ ମନଞେନ୍‌ ତନାଲ୍‌ମଡ୍‌ ଗିୟ୍‌ଲାୟ୍‌, ଅବୟ୍‌ ଆଜ୍ରଗେତେନ୍‌ ଆମନ୍‌ଡ୍ରା ଡ ମଡ଼ିର୍‌ ଆମନ୍‌ଡ୍ରା ରୁଆଙନ୍‌ ସିଲଡ୍‌ ପଡ୍‌ଲନାୟ୍‌ । 14 ଆନିନ୍‌ ସୋଡ଼ା ସର୍ରଙନ୍‌ ବାତ୍ତେ କେନ୍‌ ଆବର୍ନେ ବର୍ରନ୍‌, କେନ୍‌ ଆର୍ରାନୁବ୍‌ ଅଲ୍ଲ୍‌ଲେସେବା ଡ ତି ଆକେଣ୍ତାରନ୍‌ ଅଡ଼୍‌କୋନ୍‌ ଡୟ୍‌ବା, ତି ଆ ଅଲାନ୍‌ ୟୁର୍ରବା ଡ ଆଜନ୍‌ ଅଡ଼୍‌କୋନ୍‌ ସେଡ୍‌ ସେଡ୍‌ବା; ତିଲୋଙ୍‌ ଜନ୍ତୁଜି ଆଡାଲାଲୋଙନ୍‌ ଆ ଅନ୍ତିଡ୍‌ଜି ଜିର୍ରେତଜି । 15 ଏଲେଜାକିୟ୍‌ ଡେନ୍‌ ଲବଲୋଙନ୍‌ ଆମୁଡ଼ା ଗଣ୍ତିନ୍‌ ଲୁଆଙନ୍‌ ଡ ପିତ୍ତଡ଼ନ୍‌ ବୟନ୍‌ ଜିବା ବସେଙନ୍‌ ଆଗାବ୍‌ରେଙ୍‌ ନିୟ୍‌ ଡକ୍କୋବା ଡ ତିଆତେ ରୁଆଙନ୍‌ ଆସସିରା ଡାଡାଏତୁ, ଆରି ଜନ୍ତୁଜି ବୟନ୍‌ ପୁର୍ତିନ୍‌ ଆଗାବ୍‌ ଆବନ୍ତାଞ୍ଜି ଡେତେ; 16 ଆରି କେନ୍‌ଆତେ ଆଉଗ୍ଗରନ୍‌ ମନ୍‌ଡ୍ରାନ୍‌ ଅନ୍ତମ୍‌ ଡେଡଙ୍‌ ତଡ୍‌ ବନ୍‌ଡ ଆଉଗ୍ଗରନ୍‌ ଜନ୍ତୁନ୍‌ ଅନ୍ତମ୍‌ ଡେଏତୁ । ଆରି ଆଉପ୍ରେଙ୍‌ଲୋଙନ୍‌ ସାତ ବର୍ରସେଙ୍‌ ଡକୋନେତୁ । 17 ଅଡ଼୍‌କୋନ୍‌ ସିଲଡ୍‌ ତୋଣ୍ତୋନ୍, ଆନିନ୍‌ ମନ୍‌ରାଞ୍ଜି ଆ ରାଜ୍ୟଲୋଙ୍‌ ସାସନତେ ଆରି ଆନି ଆନା ଇସ୍ସୁମ୍‌ତେ ଆନିନ୍‌ ‌ତିୟ୍‌ତେ, ଆରି ଇନିଙ୍‌ତଡନ୍‌ ଆ ମନ୍‌ରାଜି ତୁମ୍‌ ଆନିନ୍‌ ତବ୍‌ନଙ୍‌ତେ, ଆମେଙ୍‌ ମରଞ୍ଜି କେନ୍‌ ଆତେ ଜନାତଜି, କେନ୍‌ ଆତେ ପୁର୍ତିନ୍‌ ଆମେଙ୍‌ମରଞ୍ଜି କେନ୍‌ ଜନାତଜି, କେନ୍‌ ଆସନ୍‌ ଜନଗେମରଞ୍ଜି ବାଁୟ୍‌ତଜି ଡ କେନ୍‌ ଆତେ ମଡ଼ିର୍‌ମରଞ୍ଜି ଆବର୍ନେ ଡେତେ । 18 ନବ୍‌କୁତ୍‌ନିତ୍ସର ରାଜାନ୍‌ ଞେନ୍‌ କେନ୍‌ ଆଗୁନୁନ୍ତେ ଗିୟ୍‌ଲାୟ୍‌; ନମିଞେନ୍‌ ଏ ବେଲଟଚରନ୍‌, ଆମନ୍‌ କେନ୍‌ ଇନିଆଗନାମ୍‌ ଅବ୍‌ଜନାଇଙ୍‌ଁ, ଇନିଆସନ୍‌ ରାଜ୍ୟଞେନ୍‌ ଅଡ଼୍‌କୋ ଜନାମରଞ୍ଜି ତିଆତେ ଅଃନ୍ନବ୍‌ଜନାଲିଁୟ୍‌ଜି; ବନ୍‌ଡ ଆମନ୍‌ ଅନବ୍‌ଜନାନ୍‌ ଆସନ୍‌ ଡକୋ, ଇନିଆସନ୍‌ ଆମନ୍‌ ମଡ଼ିର୍‌ କୋଙ୍‌ଡାଜନ୍‌ ଆପୁରାଡ଼ା ଡକୋ ।

19 ତିଲୋଙ୍‌ ବେଲଟଚରନ୍‌ ଆଞୁମର୍ର ଦାନିଏଲନ୍‌ ବସନ୍ନେଡ୍‌ ଆସନ୍‌ କଡ଼ିଙ୍‌ଲେ ଡକୋଲନ୍‌ ଆନିଃୟମନ୍‌ ଆନିନ୍‌ ଗୋଗୋୟ୍‌ ସିନ୍ତାଏନ୍‌ । ରାଜାନ୍‌ ଜାଲଙ୍‌ଡାଲଙ୍‌ଲେ ବର୍ରେନ୍, ଏ ବେଲଟସତ୍ସରନ୍‌ କେନ୍‌ ଆଗୁନୁନ୍ତେ ଇନି ଗାମ୍‌ଲେ ଗୋଗୋୟ୍‌ ସିନ୍ତାଡଙ୍‌ନେତଡ୍‌ । ବେଲଟସତ୍ସରନ୍‌ ଜାଲଙ୍‌ଲେ ବର୍ରେନ୍, ଏ ସାଓକାର ଆନାଜି ଆମନ୍‌ କେୟ୍‌ତମଜି, ଆନିଞ୍ଜି ଆସନ୍‌ କେନ୍‌ ଗନୁନ୍ତେନ୍‌ ଡେଏତୁ ଡ ବନେରାମରଞ୍ଜି ଆଡଙ୍‌ କେନ୍‌ଆତେ ଡେଏତୁ । 20 ଆମନ୍‌ ଅଙ୍ଗା ଅର୍ରାନୁବ୍‌ ଗିଜେନ୍‌, ଏଙ୍ଗାଲେ ସୋଡ଼ାଏନ୍‌ ଏତ୍ତେଲେ ବୋର୍ସାଏନ୍, ତି ଆଡନେଙ୍‌ଙ୍ଗାନ୍‌ ରୁଆଙନ୍‌ ସୁଙେନ୍‌ ଡ ଅଡ଼୍‌କୋନ୍‌ ପୁର୍ତିଲୋଙନ୍‌ ଗିୟ୍‌ତାଏନ୍; 21 ଆ ଅଲାନ୍‌ ଅଡ଼୍‌କୋନ୍‌ ମନଙ୍‌ ଡ ଆଜଅନ୍‌ ଗୋଗୋୟ୍‌ ଡକୋଏନ୍‌ ତି ଅଡ଼୍‌କୋଞ୍ଜି ଆସନ୍‌ ଗାଗାନେନ୍‌ ଡକୋଏନ୍‌; ତି ବସେଙନ୍‌ ଆଜାୟ୍‌ତାନ୍‌ ଆ ଜନ୍ତୁଜି ଡକୋଲଞ୍ଜି । ଆ କେଣ୍ତାର୍‌ଲୋଙନ୍‌ ଅନ୍ତିସିଂଙନ୍‌ ଡକୋଲନ୍‌; 22 ଏ ରାଜାନ୍‌ ଆମନ୍‌ ନା ତି ଆରନୁବନ୍‌, ଆମନ୍‌ ସୋଡ଼ାଲେ ବୋର୍ସାଲମ୍‌; ଇନିଆସନ୍‌ ଆମନ୍‌ ମତ୍ତନମ୍‌ ଗୋଗୋୟ୍‌ ଞାଙେନ୍‌ ଡ ତିଆତେ ରୁଆଙନ୍‌ ସୁଙେତେ ଡ ବୋର୍ସାନମ୍‌ ପୁର୍ତିନଜାୟ୍‌ ଆସନେସଜାୟ୍‌ ଜନାତଜି । 23 ଆରି ଆମନ୍‌ ଗିଜେନ୍‌, ରୁଆଙନ୍‌ ସିଲଡ୍‌ ଅବୟ୍‌ ଜନଗେମର୍ରନ୍‌ ଡ ମଡ଼ିର୍‌ କବରପାଙ୍‌ଲଙ୍‌ମର୍ରନ୍‌ ପଡ୍‌ଲନାୟ୍‌ କି ବର୍ରନେ, କେନ୍‌ ଆର୍ରାନୁବ୍‌ ଅଡ୍‌ଲେ ଅବ୍‌କୁଡ୍ଡ୍‌ବା; ଡେଲୋଜନଙ୍‌ଡେନ୍‌ ଲବଲୋଙନ୍‌ ତି ଆମୁଡ଼ା ଗଣ୍ତିନ୍‌ ଲଆଙ୍‌ ଡ ପିତ୍ତଡ଼ନ୍‌ ବାତ୍ତେ ତର୍ରରେ ତି ବସେଙନ୍‌ ଆଲେଡେଙ୍‌ଗାବ୍‌ଲୋଙନ୍‌ ଡକ୍କୋବା; ଆରି ରୁଆଙନ୍‌ ଆସସିରାଡାନ୍‌ ଡାଡାଏତୁ ଡ ଆତୋଣ୍ତୋନ୍‌ ସାତ ବର୍ରସେଙ୍‌ ବୟ୍‌ଲେ ଆଜିର୍ରତେନ୍‌ ଅନ୍ତମ୍‌ ବସେଙ୍‌ରେଙନ୍‌ ଆ ଜନ୍ତୁଜି ସରିନ୍‌ ଆବୟ୍‌ନ୍‌ ଆବନ୍ତାନ୍‌ ଡେଏତୁ । 24 ଏ ରାଜା କେନ୍‌ ଆଗ୍ରାମ୍‌ଗାମ୍‌ ଆରି ପ୍ରବୁଞେନ୍‌ ରାଜା ଆବିସୟ୍‌ ଇସ୍ୱରନ୍‌ ଗବ୍‌ରିଏନ୍‌ । 25 ଆମନ୍‌ ମନ୍‌ରାଜି ଆମଙ୍‌ ସିଲଡ୍‌ ସବ୍‌ଙାୟ୍‌ତନ୍‌ ଡ ବସେଙ୍‌ରେଙନ୍‌ ଆ ଜନ୍ତୁଜି ବୟନ୍‌ ଡକୋତନ୍‌, ତାଙ୍‌ଲିୟନ୍‌ ଆପନ୍‌ସୁଆତିଲୋଙ୍‌ ଆମନ୍‌ ଅଗାବନ୍‌ ଜୋମ୍‌ତେ, ଆରି ରୁଆଙନ୍‌ ଆସସିରାଲୋଙନ୍‌ ଡାଡାତମ୍‌, କେନ୍‌ ଅନ୍ତମ୍‌ ଆମନ୍‌ ସାତ ବର୍ସେଙ୍‌ଜାୟ୍‌ ଜିର୍ରତେ; ଆତିନିକି ପରମେସ୍ୱରନ୍‌, ଆନିନ୍‌ ମନ୍‌ରାଞ୍ଜି ଆରାଜା ସାସନତେ ଡ ଆନିନ୍‌ ଆନା ତନିୟ୍‌ ଇସ୍ସୁମ୍‌ତେ ଆନିନ୍‌ ତିଆତେ ତିୟ୍‌ତେ, କେନ୍‌ ଆତେ ଆମନ୍‌ ଜନାତମ୍‌ । 26 ଆରି ଅର୍ରାନୁବନ୍‌ ଆମୁଡ଼ ଗଣ୍ତିନ୍‌ ଅନମ୍‌ରେଙନ୍‌ ଆଗ୍ରାମ୍‌ଗାମ୍‌, କେନ୍‌ ରୁଆଙନ୍‌ ତୁମ୍‌ ସାସନତେ, କେନ୍‌ ଆତେ ଆମନ୍‌ ଜନାଲମ୍‌ କି ରାଜ୍ୟନମ୍‌ ଆଜାଡ଼ିନ୍‌ ଡେତେ । 27 କେନ୍‌ ଆସନ୍‌ ରାଜା ବର୍ରନେଞେନ୍ ଅମ୍‌ଡଙ୍‌ବା, ଆରି ଆମନ୍‌ ମନଙ୍‌ କାବ୍ବାଡ଼ାନ୍‌ ବାତ୍ତେ ଇର୍ସେନମ୍‌ ଅଡ଼୍‌କୋନ୍‌ ଡ ଡୋଲେୟ୍‌ମରଞ୍ଜି ଆଡଙ୍‌ କାନ୍‌କାରମ୍‌ ଅନବ୍‌ତୁଜନ୍‌ ବୟନ୍‌ ଆମନ୍‌ ମନଙ୍‌ତଡନ୍‌ ଆକାବାଡ଼ାଜି ଅମ୍‌ରେଙ୍‌ବା ତିଡେନ୍‌ ଆମନ୍‌ ସନୟୁନ୍‌ ଗୋଗୋୟ୍‌ ଞାଙ୍‌ତେ ।

28 ନବ୍‌କୁତ୍‌ନିତ୍ସରନ୍‌ ରାଜାନ୍‌ ଆଡଙ୍‌ କେନ୍‌ ଅଡ଼୍‌କୋନ୍‌ ଡେନ୍‌ । 29 ବାର୍‌ ଆଙ୍ଗାୟ୍‌ ଆତିକି ଆନିନ୍‌ ବାବିଲନ୍‌ ଆରାଜା ସିଂଙ୍‌ଲୋଙ୍‌ ବୁଲେଲେ ଡକୋଲନ୍‌ । 30 ରାଜାନ୍‌ କେନ୍‌ ଆବର୍ନେ ବର୍ରେନ୍, ବୋର୍ସାଞେନ୍‌ ଡ ବୁଡିଞେନ୍‌ ବୟନ୍‌ କେନ୍‌ ରାଜଦାନି ତୁବ୍‌ଲାୟ । କେନ୍‌ ଆତେ ବୋର୍ସା ବାବିଲନ୍‌ ତଡ୍‌ ପଙ୍‌ ? 31 ରାଜାନ୍‌ ଅମ୍ମୁକାଲୋଙନ୍‌ କେନ୍‌ ଆବର୍ନେ ଡକୋନ୍‌ ଡକୋନ୍‌ କେନ୍‌ ରୁଆଙନ୍‌ ସର୍ରଙନ୍‌ ଜିର୍ରାୟ୍‌, ଏ ନବ୍‌କୁତ୍‌ନିତ୍ସରନ୍ ରାଜା, ଆମନ୍‌ କେନ୍‌ ଆବର୍ନେ ବର୍ରତମ୍‌ ଅମଙ୍‌ନମ୍‌ ସିଲଡ୍‌ ରାଜ୍ୟନମ୍‌ ଜିର୍ରେନ୍‌ । 32 ଆରି, ଆମନ୍‌ ମନ୍‌ଡ୍ରାଞ୍ଜିଲୋଙ୍‌ ସିଲଡ୍‌ ସବ୍‌ଙାୟ୍‌ତନ୍‌ ଡ ବସେଙ୍‌ରେଙନ୍‌ ଆ ଜନ୍ତୁଜି ବୟନ୍‌ ଡକୋତନ୍‌, ତାଙ୍‌ଲିୟନ୍‌ ଆପଞ୍ଚୁଆତିଲୋଙ୍‌ ଆମନ୍‌ ଅଗାବନ୍‌ ଜୋମ୍‌ତେ, କେନ୍‌ ଅନ୍ତମ୍‌ ଆମନ୍‌ ସାତ ବର୍ସେଙ୍‌ଜାୟ୍‌ ଜିର୍ରତେ; ଆତିନିକି ଡ ପରମେସ୍ୱରନ୍‌, ମନ୍‌ରାଞ୍ଜି ଆରାଜ୍ୟ ସାସନତେ ଡ ଆଇସ୍ସୁମନ୍‌ ଆନା ଆନିନ୍‌ ତିଆତେ ତିୟ୍‌ତେ, କେନ୍‌ ଆତେ ଆମନ୍‌ ଜନାତମ୍‌ । 33 ତି ଆଡଣ୍ତଲୋଙ୍‌ ନବ୍‌କୁତ୍‌ନିତ୍ସରନ୍‌ ଆଡଙ୍‌ କେନ୍‌ ଆବର୍ନେ ଆଜାଡ଼ିନ୍‌ ଡେନ୍‌; ଆରି ଆନିନ୍‌ ମନ୍‌ଡ୍ରାଞ୍ଜିଲୋଙ୍‌ ସବ୍‌ଙାୟ୍‌ଲନ୍‌ ତାଙ୍‌ଲିଅଞ୍ଜି ଆଗାବ୍‌ ଜୁମେନ୍‌, ଆରି ଆଡଅଙନ୍‌ ସସିରାଡାନ୍‌ ବାତ୍ତେ ଡାଡାଏନ୍, ଆତିନିକି ଆଉଉନ୍‌ ଉତ୍କ୍ରୋସ ଅନ୍ତିଡନ୍‌ ଅନ୍ତମ୍‌ ଡ ଆକାର୍ରସିନ୍‌ ଅନ୍ତିଡନ୍‌ ଅନ୍ତମ୍‌ ସୋଡ଼ାଏନ୍‌ ।

34 ତି ଆସନେସଡିନ୍ନାଇଙ୍‌ ଞେନ୍‌ ନବ୍‌କୁତ୍‌ନିତ୍ସରନ୍‌ ରୁଆଙନ୍‌ ଗଡ୍‌ ତୋଣ୍ତୁନ୍‌ ଆଙାଙ୍‌ଲାୟ୍‌, ତିଲୋଙ୍‌ ବୁଡିଞେନ୍‌ ଡ ଅସୁଞେନ୍‌ ଅମଙ୍‌ଞେନ୍‌ ୟର୍ରନାୟ୍‌, ତିଲୋଙ୍‌ଞେନ୍‌ ଇସ୍ୱରନ୍‌ ସନେନ୍‌ସେନ୍‌ ତିୟ୍‌ଲାୟ୍‌ ଡ ଅଃନ୍ନଞିଡେନ୍‌ ଆସେଙ୍କେରାନ୍‌ ଲୁମ୍‌ଲାୟ୍‌; ଇନିଆସନ୍‌ ଆସାସନ ଅଃନଞିଡେ ଡ ଆରାଜ୍ୟନ୍‌ ପୁର୍ରବାନ୍‌ ସିଲଡ୍‌ ନମିଆନ୍ତାନ୍‌ ଡକୋତନ୍‌ । 35 ଆରି ପୁର୍ତିନ୍‌ ଆ ମନ୍‌ରାଜି ଇଡ୍‌ନିଙ୍‌ତଡ୍‌; ଆରି ରୁଆଙନ୍‌ ପାଙ୍‌ଲଙ୍‌ବର୍ରମରଞ୍ଜି ଡ ପୁର୍ତିନ୍‌ ଆ ମନ୍‌ରାଜି ଆ ଇସ୍ସୁମ୍‌ନମ୍‌ ବାତ୍ତେ କାବ୍ବାଡ଼ାତଞ୍ଜି; ଆରି ଆନିଙ୍‌ଜା ଆସିଂନ୍‌ ଡଙ୍‌ଡଙ୍‌ଲେ ଅଃର୍ରପ୍ତିଏ ଡ ଆମ୍ୱେନ୍‌ ଇନିଏଙ୍ଗାତନ୍‌ କେନ୍‌ ଆତେ ବର୍ରନେ ଏର୍ରପ୍ତିଏ । 36 ତିଆଡିନ୍ନା ମନଙ୍‌ ବୁଡିଞେନ୍‌ ଅମଙ୍‌ଞେନ୍‌ ୟର୍ରନାୟ୍‌ ଡ ରାଜ୍ୟଞେନ୍‌ ସନେନ୍‌ସେନ୍‌ ଆସନ୍‌ ସନାଆର୍ରଞେନ୍‌ ଡ ସନାଆର୍ରନ୍‌ ଅମଙ୍‌ଞେନ୍‌ ୟର୍ରନାୟ୍‌; ତିଲୋଙ୍‌ ମନ୍ତ୍ରିଞେନ୍‌ ଡ ପଞ୍ଚୁଆତିମରଞ୍ଜି ସାୟ୍‌ଲିଞ୍ଜି; ଆରି ରାଜ୍ୟନ୍‌ଞେନ୍‌ ଜିର୍ରାୟ୍‌ ଡ ସନେନ୍‌ସେନ୍‌ଞେନ୍‌ ଗୋଗୋୟ୍‌ ପାଙେନ୍‌ । 37 ତିଆସନ୍‌ ଞେନ୍‌ ନବ୍‌କୁତ୍‌ନିତ୍ସରନ୍‌ ତି ରୁଆଙନ୍‌ ରାଜାନ୍‌ ସେନ୍ନ୍‌ତାୟ୍‌, ଡ ଡୁଙ୍‌ୟୁମ୍‌ତାୟ୍‌; ଇନିଆସନ୍‌ଗାମେଣ୍ଡେନ୍‌ ଅଡ଼୍‌କୋନ୍‌ ଆକାବାଡ଼ା ଆଜାଡ଼ିନ୍‌ ଡ ଆ ତଙରନ୍‌ ଆଜାଡ଼ିନ୍‌, ଆଡ଼େ ଆନାଜି ଗର୍ବତଜି ଆନିଞ୍ଜି ଅବ୍‌ସ୍ସନାତେ ତିଆସନ୍‌ ଆମଙନ୍‌ ରନପ୍ତିଡକୋ ।