ନବ୍କୁତନିତ୍ସରନ୍ ସୁନ୍ନାଲୋଙ୍ ଆ କୋଙ୍ଡାୟ୍
1 ନବ୍କୁତ୍ନିତ୍ସରନ୍ ରାଜାନ୍ ୟାକୁଡ଼ି ସନ୍ତି ଡନେଙ୍ଗାନ୍ ଡ ତୁଡ୍ରୁ ସନ୍ତି ଲନାଙନ୍ ଅବୟ୍ ସୁନ୍ନାନ୍ କୋଙ୍ଡାଜନ୍ତୁବେନ୍; ବାବିଲୋନ୍ ଡେସାଲୋଙ୍ ଦୁର୍ ଆଞୁମ୍ ବସେଙ୍ଲୋଙ୍ ତିଆତେ ତୁବେନ୍ । 2 ତିଲୋଙ୍ ନବ୍କୁତନିତ୍ସରନ୍ ରାଜାନ୍ ଅଙ୍ଗା କୋଙ୍ଡାୟ୍ ତୁବେନ୍,ତିଆତେ ସୁରୁପିଡେନ୍ ଆସନ୍ ଗବର୍ନର୍ମରଞ୍ଜି,ରାଜାନ୍ ଆସିପାଇଜି ଡ ଡେସାନ୍ ଆସୋଡାମରଞ୍ଜି,ପଚୁଆତିମରଞ୍ଜି,ଡକୋଡାବ୍ମରଞ୍ଜି,ବନାଁୟ୍ବରନ୍ ମରଞ୍ଜି, ମନ୍ତ୍ରିମରଞ୍ଜି ଡ ଅଡ଼୍କୋ ଆନ୍ନାଡେସାମରଞ୍ଜି ଅଡ଼୍କୋନ୍ ସାସନମରଞ୍ଜି ଅଡ଼୍କୋଞ୍ଜି ରୁକୁଡାଲେ ନବ୍କୁତ୍ନିତ୍ସରନ୍ ମନ୍ରାନ୍ ପଟାଏନ୍ । 3 ରାଜାନ୍ ଆରୋଡେନ୍ ଅଡ଼୍କୋନ୍ ଆମଡ୍ରାଜି ମନ୍ତ୍ରିଞ୍ଜି, ପଚୁଆତିମରଞ୍ଜି, ସାସନମରଞ୍ଜି, ଡକୋଲେବ୍ ମରଞ୍ଜି ଅଡ଼୍କୋଞ୍ଜି ଜିର୍ରାଜି, ଆରି ସୁର୍ପିବେନ୍ ଆ କାବ୍ବାଡ଼ାନ୍ ଆସନ୍ ଜିର୍ରାଜି, ଆନିଞ୍ଜି ତି ଆତୁବ୍ତୁବନ୍ ଆକୋଙ୍ଡାୟ୍ ଆମୁକ୍କାବାନ୍ ତନଙେଞ୍ଜି । 4 ତିଲୋଙ୍ ବାବାବ୍ଲେ ବର୍ରନ୍, ଏ ମନ୍ରାଞ୍ଜି, ବିରିଣ୍ତାଞ୍ଜି, ଆନ୍ନା ଆନ୍ନା ଲଙ୍ଲଙ୍ମରଞ୍ଜି, ଆମ୍ୱେଞ୍ଜି କେନ୍ ଆବନାୟ୍ ତିୟ୍ତବେନ୍, 5 ଅଙ୍ଗାଆଡିଡ୍ ଆମ୍ୱେଞ୍ଜି ଡେରିଙନ୍, ପିରୋଡୁଜନ୍, ବିଣାରାଜନ୍, ଟିଗେରାଜନ୍, ପାର୍ଡେଙ୍ରାଜନ୍ ଡ ଲେମ୍ବୋପେଡନ୍, ମୁର୍ରଦଙ୍ଗ ଡ ଅଡ଼୍କୋନ୍ ଆଡନେବ୍ ଅମ୍ଡଙେଞ୍ଜି, ତିଆଡିଡ୍ ଆମ୍ୱେଞ୍ଜି ରାଜାନ୍ ନବ୍କୁତନିତ୍ସରନ୍ ଆତ୍ରୁବେନ୍ ସୁନ୍ନାନ୍ ଆକୋଙ୍ଡାଜନ୍ ଆମୁକ୍କାଲୋଙ୍ ତୁଡୁମ୍ଲେ ଲୋମ୍ବା । 6 ଆରି ଅଙ୍ଗା ମନ୍ରା ତିଆତେ ଅଃଲ୍ଲୋମେ, ଆନିନ୍ ତଗୋଲୋଙନ୍ ସେଡ୍ତଜି ତେତ୍ତେ ଆନିନ୍ ଡଣ୍ତନ୍ ଞାଙ୍ତେ । 7 ତିଆସନ୍ ଅଙ୍ଗାଆଡିଡ୍ ଅଡ଼୍କୋନ୍ ମନ୍ଡ୍ରାନ୍ ଡେରିଙନ୍, ପିରୋଡୁଜନ୍, ବିଣାରାଜନ୍, ଟିଗେରାଜନ୍, ପାର୍ଡେଙ୍ରାଜନ୍ ଡ ଲେମ୍ବୋପେଡନ୍, ମୁର୍ରଦଙ୍ଗ ଡ ଅଡ଼୍କୋନ୍ ଆଡନେବ୍ ଅମ୍ଡଙେଞ୍ଜି, ତିଆଡିଡ୍ ଅଡ଼୍କୋ ମନ୍ଡ୍ରାନ୍, ବିରିଣ୍ତାମରଞ୍ଜି ଡ ଲଙ୍ଲଙ୍ମରଞ୍ଜି ନବ୍କୁତନିତ୍ସରନ୍ ରାଜାନ୍ ଆତ୍ରୁବେନ୍ ଆକୋଙ୍ଡାୟ୍ ତୁଡୁମ୍ଲେ ଲୁମେଞ୍ଜି ।
ଆଡୁଡୁ ତଗୋଲୋଙନ୍ ୟାଗି ବେଣ୍ତିଆନ୍
8 କେନ୍ ଆସନ୍ ତିୟ୍ଆଡିନ୍ନାଇଙ୍ ଲାଙ୍ଲେଲ୍ କଲଦିଅ ମରଞ୍ଜି ଆମଙ୍ ଜିର୍ରେ ଜିଉଦି ମରଞ୍ଜି ଆବିରୁଡଲୋଙ୍ ପାଙ୍ଲାଜି । 9 ଆନିଞ୍ଜି ନବ୍କୁତ୍ନିତ୍ସର ରାଜାନ୍ ଜାଲଙ୍ଲେ ବର୍ରେନ୍, ଏ ରାଜା, ଗୋଗୋୟ୍ ବର୍ସେଙ୍ ଅମେଙ୍ନ୍ତୁ । 10 ଏ ରାଜା ବନାୟ୍ନମ୍ ଲୁମେଞ୍ଜି ଡ ଆନ୍ନାଜାକିୟ୍ ଡେରିଙନ୍, ପିରୋଡୁଜନ୍, ବିଣାରାଜନ୍, ଟିଗେରାଜନ୍, ପାର୍ଡେଙ୍ରାଜନ୍ ଡ ଲେମ୍ବୋପେଡନ୍, ମୁର୍ରଦଙ୍ଗ ଡ ଅଡ଼୍କୋନ୍ ଆଡନେବ୍ ଅମ୍ଡଙେଞ୍ଜି, ତୁଡୁମ୍ଡାଲେ ସୁନ୍ନାନ୍ ଆକୋଙ୍ଡାଜନ୍ ଲୋମ୍ବା; 11 ଆରି ଆନାଜାକ୍କିୟ୍ ତୁଡୁମ୍ଡାଲେ ଅଲୋମେ, ଆନିନ୍ ଆଡୁଡୁ ତଗୋଲୋଙନ୍ ସେତବୋ; 12 ତେନେଲୋଙ୍ ସଦ୍ରକ, ମୟ୍ସକନ୍ ଡ ଅବେଦ୍ନଗୋ ଆଞୁମ୍ ଲାଙ୍ଲେଲ୍ ଜିଉଦିଞ୍ଜି ଡକୋ, ଆନିଞ୍ଜି ବାବିଲୋନ୍ ଡେସାନମ୍ ରାଜକାବାଡ଼ାମରଞ୍ଜି ତବ୍ନଙେଞ୍ଜି; ଏ ରାଜା ତି ଆମନ୍ଡ୍ରାଜି ଆମନ୍ ଆଡଙ୍ ଅମାନ୍ନେଲମଞ୍ଜି; ଆନିଞ୍ଜି କୋଙ୍ଡାୟ୍ନମ୍ଞ୍ଜି ଆସେବାଜି ଅଡ଼େ ଆମନ୍ ଆତ୍ରବେନ୍ ସୁନ୍ନାନ୍ କୋଙ୍ଡାଜନ୍ ନିୟ୍ ଆନିଞ୍ଜି ଅଲୋମେଜି । 13 ତିଲୋଙ୍ ନବ୍କୁତ୍ନିତ୍ସରନ୍ ଗୋଗୋୟ୍ ବର୍ରାବେନ୍ ଡ କୋପ ଲୋଙନ୍ ସଦ୍ରକ୍, ମୟ୍ସକ୍ ଡ ଅବେଦ୍ନଗୋନ୍ ଅନୋରୋଙନ୍ ଆସନ୍ ବାଙେଞ୍ଜି । ତିଲୋଙ୍ ଆନିଞ୍ଜି ମନ୍ରାଞ୍ଜି ଆମୁକ୍କାଲୋଙ୍ ଓରୋଙ୍ଲାଜି । 14 ନବ୍କୁତ୍ନିତ୍ସରନ୍ ଆନିଞ୍ଜି ଆଡଙ୍ ଜାଲଙ୍ଲେ ବର୍ରେନ୍, ସଦ୍ରକ୍, ମୟ୍ସକ୍ ଡ ଅବେଦ୍ନଗୋନ୍, ଆମ୍ୱେନ୍ ମନ୍ନଲୋଙ୍ବେନ୍ ଏଗବ୍ରିଏ ପଙ୍ କୋଙ୍ଡାୟ୍ଞେନ୍ ଏସେବାଏ, ଅଡ଼େ ଞେନ୍ ଆତ୍ରୁବ୍ଲାଞେନ୍ ଆକୋଙ୍ଡାୟ୍ ଏଲୋମେ ପଙ୍ ? 15 ନମିଞେନ୍ ଡେରିଙନ୍, ପିରୋଡୁଜନ୍, ବିଣାରାଜନ୍, ଟିଗେରାଜନ୍, ପାର୍ଡେଙ୍ରାଜନ୍ ଡ ଲେମ୍ବୋପେଡନ୍, ମୁର୍ରଦଙ୍ଗ ଡ ଅଡ଼୍କୋନ୍ ଆଡନେବ୍ ଅମ୍ଡଙେଞ୍ଜି, ଆମ୍ୱେଞ୍ଜି ଜଡି ଞେନ୍ ଆତ୍ରୁବ୍ଲାୟ୍ନ୍ ଆକୋଙ୍ଡାୟ୍ ବବ୍ରୁମ୍ଲନ୍ ଲନୁମନ୍ ଆସନ୍ ଅବ୍ଜାଡାନାବା, ତିଡେନ୍ ମନଙ୍ ଡେତେ; ବନ୍ଡ ଆମ୍ୱେଞ୍ଜି ଏ ଲୋମ୍ଲୋଡେନ୍, ତି ଆଡୁଡୁ ତଗୋଲୋଙନ୍ ପିତବେଞ୍ଜି; ଆରି ଏନେଲେ ଅଙ୍ଗା କୋଙ୍ଡାୟ୍ ଡକୋ ଡ ଅସିଂଲୋଙ୍ଞେନ୍ ସିଲଡ୍ ଅମ୍ମେଙତବେନ୍ ? 16 ସଦ୍ରକ, ମୟ୍ସକନ୍ ଡ ଅବେଦ୍ନଗୋ ରାଜାନ୍ ଜାଲଙ୍ଲେ ବର୍ରେଞ୍ଜି, ଏ ନବ୍କୁତ୍ନିତ୍ସରନ୍ କେନ୍ ଆବିସୟ୍ ଜନାଲଙନ୍ ଆସନ୍ ଅମଙ୍ଲେନ୍ ଇଡ୍ନିଙ୍ତଡ୍ । 17 ତିଡେନ୍ ଏତ୍ତେଲେମା ଡେନ୍, ଞେନ୍ ଆନ୍ନା ଏସେବାତାୟ୍, ତି ଇସ୍ୱରଲେନ୍ ଆଡୁଡୁ ତଗୋଲୋଙନ୍ ସିଲଡ୍ ଡନୋବ୍ଡୋବନ୍ ଆସନ୍ ଡକୋ; ଆରି ଏ ରାଜା ଆସିଂଲୋଙନ୍ ସିଲଡ୍ ଞେନ୍ ଅମେଙ୍ତଲେନ୍ । 18 ଜଡି ଅଲୁମ୍ଲୋଜିଡେନ୍, ତିଡେନ୍ ରାଜାନ୍, ଇନ୍ଲେଞ୍ଜି କୋଙ୍ଡାଜନ ଏସେବାୟ୍, ଅଡ଼େ ଆମନ୍ ଆତ୍ରୁବେନ୍ ସୁନ୍ନାନ୍ ଆକୋଙ୍ଡାୟ୍ ଏଲୋମାୟ୍, କେନ୍ ଆତେ ଆମନ୍ ଇସ୍ସୁମ୍ପଙ୍ ।
ଦାନିଏଲନ୍ ୟାଗି ସାଙ୍ଗନ୍ ଡ ରନ୍ବୁନ୍ ଆଡଣ୍ତ
19 ତିଲୋଙ୍ ନବ୍କୁତ୍ନିତ୍ସରନ୍ ବର୍ରାବ୍ଲୋଙ୍ ଆମୁକ୍କାନ୍ ଆନ୍ନାଲନ୍ କି ସଦ୍ରକନ୍, ମୟ୍ସକନ୍ ଡ ଅବେଦନକନ୍ଞ୍ଜି ଆସନ୍ ତଗୋସିଂଲୋଙନ୍ କାଜାଡିନ୍ନାଇଙନ୍ ସିଲଡ୍ ସାତ୍ଗୁନା ତଗୋ ଅନବ୍ଗୋଗୋଜନ୍ ଆସନ୍ ଆନିନ୍ ବାଙେଞେନ୍ । 20 ଆରି ଆସିପାଇଞ୍ଜି ଲୋଙ୍ ଲାଙ୍ଲେନେ ବୋର୍ସାମରଞ୍ଜି ସଦ୍ରକନ୍, ମୟ୍ସକନ୍ ଡ ଅବେଦନକନ୍ ଜିଲେ ଆଡୁଡୁତଗୋଲୋଙନ୍ ପନିଡନ୍ ଆସନ୍ ବାଙ୍ଞେନ୍ । 21 ତିଲୋଙ୍ ଓବାମରଞ୍ଜି ଆସିଂରିନ୍ଜି, ଅଣ୍ଡ୍ରଙ୍ ତୋବେଞ୍ଜି ଆସିଂନ୍ରିଜି କାବ୍ଜି ଡ ଆନ୍ନା ଆନ୍ନା ସିନ୍ଡ୍ରିଜି ଜିଲେ ଆ ଡୁଡୁତୋଲୋଙନ୍ ସେଡେଞ୍ଜି । 22 ରାଜାନ୍ ଆବନାୟ୍ବର୍ର ଲଜିର୍ ଡ ତଗୋସିଂଙନ୍ ଗୋଗୋୟ୍ ତଗୋଡକୋଏନ୍ । ତିଆସନ୍ ଅଙ୍ଗା ମନ୍ରା ସଦ୍ରକନ୍, ମୟ୍ସକନ୍ ଡ ଅବେଦନକନ୍ ତେକେଲେ ଞମେଞ୍ଜି, ଆନିଞ୍ଜି ଆଉଲାଙ୍ ତଗୋଲୋଙନ୍ ଅସେଲେ ରବ୍ବୁଏଞ୍ଜି । 23 ଆରି ସଦ୍ରକନ୍, ମୟ୍ସକନ୍ ଡ ଅବେଦନକନ୍ କେନ୍ ୟାଗିଞ୍ଜି ଜିଲେ ଆ ଡୁଡୁତୁଲୋଙନ୍ ସେଡେଞ୍ଜି । 24 ତେତେନ୍ ନବ୍କୁଦନିତ୍ସରନ୍ ଓଙ୍ଲେ ଲଜିର୍ ଡୁଲନ୍ କି ଆ ମନ୍ତ୍ରିରିଞ୍ଜି ବର୍ରେନ୍, ଇନ୍ଲେଜି ୟାଗିମନ୍ଡ୍ରାନ୍ ଜିଲେ ତଗୋଲୋଙନ୍ ଅସ୍ସେଲବୋ ପଙ୍ ? ଆନିଞ୍ଜି ରାଜାନ୍ ଜାଲଙ୍ଲେ ବର୍ରେଞ୍ଜି, ଆଜାଡ଼ିନ୍ ରାଜାନ୍ । 25 ରାଜାନ୍ ଜାଲଙ୍ଡାଲେ ବର୍ରେନ୍, ଗିୟ୍ବା, ଞେନ୍ ତଗୋଲୋଙ୍ ଉଞ୍ଜି ମନ୍ଡ୍ରାନ୍ ଅଡ଼େତ୍ତେ ଅଡ଼େନ୍ନେ ବୁଲେତଜି କେନ୍ ଆତେ ଗିୟ୍ଲାୟ୍ ଡ ଆନିଞ୍ଜି ଇନ୍ନିଙ୍ଜା ଅରଙ୍ଡେଜି ଆରି ଉଞ୍ଜିମନ୍ଡ୍ରାନ୍ ପରମେସ୍ୱରନ୍ ଆ ଅନ୍ ଅନ୍ତମ୍ । 26 ତିଆଡିଡ୍ ନବ୍କୁତ୍ନିତ୍ସରନ୍ ଆ ଡୁଡୁ ତଗୋଲୋଙନ୍ ଆ ଡୁଆରାଲୋଙନ୍ ଜିର୍ରେ ବର୍ରନେ, ଏ ପରମେସ୍ୱରନ୍ ଆମନଡ୍ରାଜି, ସଦ୍ରକନ୍, ମୟ୍ସକନ୍ ଡ ଅବେଦନକନ୍, ଆମ୍ୱେଞ୍ଜି ଡୁଙ୍ଲନ୍ ତେନେ ଜିର୍ରାୟ୍ବା । ତିଲୋଙ୍ ସଦ୍ରକନ୍, ମୟ୍ସକନ୍ ଡ ଅବେଦନକନ୍ ତଗୋଲୋଙନ୍ ସିଲଡ୍ ଡୁଙ୍ଲନ୍ ଜିର୍ରାଜି । 27 ଆରି ଡନେ ମରଞ୍ଜି, ରାଜାନ୍ ଆସାସନମରଞ୍ଜି ଡ ଡେସାନ୍ ଆକାବାଡ଼ାମରଞ୍ଜି ଡ ରାଜାନ୍ ଆମନ୍ତ୍ରିଜି ଅବୟ୍ ଅମ୍ମେଲନ୍ ତି ୟାଗିମନ୍ଡ୍ରାଞ୍ଜି ଆଙାଙ୍ଲେ ସେଡେଞ୍ଜି । ତଗୋନ୍ ଆ ବୋର୍ସା ଆନିଞ୍ଜି ଆଡଅଙ୍ଲୋଙ୍ଞ୍ଜି ଇନ୍ନିଙ୍ଜା ଅଃଡ୍ଡେଲଜି, ଅଡ଼େ ଆବ୍ବବ୍ଲୋଙନ୍ ଆ ଉଉ ଇନ୍ନିଙ୍ ଅଃଡ୍ଡେଲଜି, ଆସିଂନ୍ଡ୍ରିଞ୍ଜି ଇନ୍ନିଙ୍ ଅଃଡ୍ଡୁଡୁଲୋ, ଆଡଅଙ୍ଲୋଙ୍ଞ୍ଜି ଅଜିଡ୍ଜାକିଁୟ୍ ତଗୋନୁର୍ତଡ୍ । 28 ନବ୍କୁତ୍ନିତ୍ସରନ୍ ବର୍ରନ୍, ସଦ୍ରକନ୍, ମୟ୍ସକନ୍ ଡ ଅବେଦନକନ୍ ପରମେସ୍ୱରନ୍ ସନେନ୍ସେନ୍ ଡେଏତୁ, ତିଆସନ୍ ପାଙ୍ଲଙ୍ବର୍ମରନ୍ ପଟାୟ୍ଲାୟ୍ ଡ ଆମନ୍ଡ୍ରାଞ୍ଜି ଅଙ୍ଗା କମ୍ୱାରିଜି ଆମଙଞ୍ଜି ଡର୍ରଞ୍ଜି ଡ ପରମେସ୍ୱରଞ୍ଜି ଅମ୍ରେଙ୍ଲେ ଏଙ୍ଗାଲେ ଆନ୍ନା ଆନ୍ନା ଇନିଙ୍ଜାକିୟ୍ କୋଙ୍ଡାୟ୍ ସେବା ଅଲୋମ୍ଲଜିଡେନ୍, କେନ୍ ଆସନ୍ ରାଜାନ୍ ଆବର୍ନେ କାଜ୍ଜାନ୍ ଏମ୍ମେଲେ ରମ୍ମଙ୍ ଆଡଙ୍ ତିୟ୍ଡମ୍ଲଞ୍ଜି, କି ଆନିଞ୍ଜି ଆଡଙ୍ ଡୋବେନ୍ । 29 ତିଆସନ୍ ଞେନ୍ କେନ୍ ଆବନାୟ୍ ଲୁମ୍ତାୟ୍ ଡ, ଅଡ଼୍କୋନ୍ ଆବିରିଣ୍ତା,ଡେସାବାଜି ଡ ଲଙ୍ଲଙ୍ ମରଞ୍ଜି, ସଦ୍ରକନ୍, ମୟ୍ସକନ୍ ଡ ଅବେଦନକନ୍ ପରମେସ୍ୱରନ୍ ଇନ୍ନିଙ୍ଜା କଣ୍ତାୟ୍ନ୍ ବର୍ରଞ୍ଜି ଡେନ୍, ଆନିଞ୍ଜି ଡୟ୍ ଡେୟ୍ଲେ ସେତ୍ତଜି କି ଆସିଂଙଞ୍ଜି ଗୁରୁଡେଆୟ୍ତେ; ଇନିଆସନ୍ କେନ୍ ଅନ୍ତମ୍ ଆକୋଙ୍ଡାୟ୍ ଡଙନେନ୍ ଆସନ୍ ଆରି ଅବୟ୍ ତଡ୍ । 30 କେନ୍ଲୋଙନ୍ ରାଜା ସଦ୍ରକନ୍, ମୟ୍ସକନ୍ ଡ ଅବେଦନକନ୍ ବାବିଲନ୍ ଆଡେସାଲୋଙ୍ ବର୍ରନେନ୍ ଗୋଗୋଜେନ୍ ।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)