1 ମେଣ୍ଡେ, ମାଦୀୟ ଦାରିୟାବସତେ ଅଦିକାର୍‌ତେ ପ୍ରତମ୍‌ ୱାଡ଼୍‌ସେତେ ମାମେ ଅଙ୍କ୍‌ ସୁସ୍ଥିର ନୁ ଢ଼ାଟୁମ୍‌ ମାଡ଼ାନଙ୍କ୍‌ ନିତ୍‌ତମ୍‌। 2 ଇଞ୍ଜେ, ମାମେ ନିକିଂଙ୍କ୍‌ ସତ୍‌ ଗଟ୍‌ କେତିତମ୍‌। ଉଡ଼େ, ପାରସ୍ୟତାଗ୍‌ ମେଣ୍ଡେ ମୁୱୁଡ଼୍‌ ରାଜାନଡ଼୍‌ ପେୟିତିତଡ଼୍‌ ନୁ ଚତୁର୍ଥ ରାଜାଲ୍‌ ଆ ସାରେତଡ଼୍‌ ଡ଼ାଗାଙ୍କ୍‌ ଅଦିକ୍‌ ସାଉକାରି ଆଦ୍‌ତଣ୍ଡ୍‌; ମେଣ୍ଡେ, ଅଣ୍ଡ୍‌ ନିଜେତ୍‌ ଦନ୍‌ତେ ଶକ୍ତିତାଦ୍‌ ଆତ୍‌କେ ଗ୍ରୀସ୍‌ ରାଜ୍ୟ ବିରୁଦ୍ଧତେ ସାରେତଡ଼୍‌କ୍‌ ୱେର୍‌ପ୍ପତଣ୍ଡ୍‌। 3 ଆସୁଟ୍‌ ୱେରଣ୍ଡ୍‌ ବିକ୍ରମୀ ରାଜାଲ୍‌ ପେୟିତିତଣ୍ଡ୍‌, ଅଣ୍ଡ୍‌ ବେଡ଼ିୟ୍‌ ଅଦିକାର୍‌ତେ ଶାସନ୍‌ ମାଡ଼ିତଣ୍ଡ୍‌ ନୁ ନିଜର୍‌ ଇଚ୍ଛାତେ କାମ୍‌ ମାଡ଼ିତଣ୍ଡ୍‌। 4 ମେଣ୍ଡେ, ଅଣ୍ଡ୍‌ ପେୟିକେ ଅନ୍‌ ରାଜ୍ୟ ଉର୍ଙ୍ଗିତ୍‌ ନୁ ମାବ୍‌ତେ ନାଲୁପାକା ୱେରେ ଆଦ୍‌ତେ; ମାତର୍‌ ଅନ୍‌ ପିଲୁଡ଼୍‌ ସେଙ୍ଗେ କି ଅନ୍‌ ଅଦିକାର୍‌ ଲେକାମ୍‌ ଶାସନ୍‌ ସେଙ୍ଗେ ଆୟ; ବାତେଙ୍କ୍‌ଇତ୍କେ ଅଡ଼୍‌ସେଙ୍ଗେ ଅୟ୍‌ୟ, ମାତର୍‌ ୱେରେତଡ଼୍‌ ସେଙ୍ଗେ ଅନ୍‌ ରାଜ୍ୟ ନଷ୍ଟ ଆଦ୍‌ତେ।

5 ମେଣ୍ଡେ, ଦକ୍ଷିଣ ଦେଶ୍‌ତେ (ମିସର୍‌) ରାଜାଲ୍‌ ଶକ୍ତିଶାଳୀ ଆଦ୍‌ତଣ୍ଡ୍‌ କିନ୍ତୁ ଅନ୍‌ ଅଦିପତିନଡ଼୍‌ ଆଗାଙ୍କ୍‌ ୱେରଣ୍ଡ୍‌ ଆଦିନ୍‌ ତାଗାଙ୍କ୍‌ ଅଦିକ୍‌ ଶକ୍ତିତାଦ୍‌ ଆସ୍‌ ଅଦିକାର୍‌ ପାହେମ୍‌ ଆଦ୍‌ତେ; ଅନ୍‌ ରାଜ୍ୟ ଅଣ୍ଡୟ୍‌ ବେଡ଼ିୟାଦ୍‌ ରାଜ୍ୟ ଆଦ୍‌ତେ। 6 ମାତର୍‌ ବେସ୍‌କ୍‌ ବର୍ଷତ୍‌ ପେର୍କେ ଅଡ଼୍‌ ନିଜେ ନିଜେ କାଇଲିତଡ଼୍‌ ନୁ ଦକ୍ଷିଣ ଦେଶ୍‌ତେ ରାଜାନ୍‌ ମାୟାଡ଼୍‌ ନିୟମ୍‌ ଲେକାମ୍‌ ଉତ୍ତର୍‌ ଦେଶ୍‌ତେ ରାଜାନ୍‌ ପାକେ ୱାଦ୍‌ତେ; ମାତର୍‌ ମାୟାଡ଼୍‌ ନିଜେତ୍‌ ଶକ୍ତିତଡ଼୍‌ ରକ୍ଷାମାଡ଼; ମାତର୍‌ ଆଦ୍‌ ମାୟାଡ଼୍‌ ନୁ ବେନଡ଼୍‌ ତାତ୍‌ତଡ଼୍‌ ନୁ ବେନ ଆଦିଙ୍କ୍‌ ଜନ୍ମ ମାଡ଼୍‌ତେ, ମେଣ୍ଡେ ଆଦ୍‌ ସମୟ୍‌ତେ ବେନ ଆଦିଙ୍କ୍‌ ଶକ୍ତି ଇତ୍‌ତଣ୍ଡ୍‌, ସାରେତଡ଼୍‌ ସର୍ପା ଆଦ୍‌ତଡ଼୍‌। 7 ମାତର୍‌ ମାୟାଡ଼୍‌ତେ ମୁନେଙ୍କ୍‌ ୱେରଡ଼୍‌ ନାର୍‌କଞ୍ଚ ୱେରଣ୍ଡ୍‌ ବେନେଆୟି ପଡ଼ିୟେତାଗ୍‌ ଜନ୍ମ ଆଦ୍‌ତଣ୍ଡ୍‌, ଅଣ୍ଡ୍‌ ସୈନ୍ୟଡ଼୍‌ପାକେ ୱାସ୍‌ ଉତ୍ତର୍‌ ଦେଶ୍‌ତେ ରାଜାନ୍‌ ଲୋତ୍‌ତାଗ୍‌ ନେଙ୍ଗିତଣ୍ଡ୍‌ ନୁ ତାମ୍‌ ବିରଦିଡ଼୍‌କ୍‌ ଜିଡ଼ିତଣ୍ଡ୍‌; 8 ମେଣ୍ଡେ, ଅଣ୍ଡ୍‌ ଅଡ଼୍‌ ଡଲା ମୁର୍ତ୍ତିତଡ଼୍‌ ଅଡ଼୍‌ ଦେବଗଣଡ଼୍‌ ବନ୍ଦୀମାଡ଼ି ରୂପା ନୁ ସୁନାତେ ମନ୍‌ଦେ ସୁନ୍ଦରତେ ଗିନେତଡ଼୍‌ ମିସର୍‌ତା ଅଦ୍‌ତଣ୍ଡ୍‌ ନୁ ଅଣ୍ଡ୍‌ ବେସ୍‌କ୍‌ ୱାଡ଼୍‌ସାଯାକ ଉତ୍ତର୍‌ ଦେଶ୍‌ତେ ରାଜାନାଗାଙ୍କ୍‌ ୱେରଙ୍କ୍‌ ୱିଡ଼୍‌ସିତ୍‌ତଣ୍ଡ। 9 ମେଣ୍ଡେ, ଅଣ୍ଡ୍‌ ଦକ୍ଷିଣ ଦେଶ୍‌ତେ ରାଜାନ୍‌ ରାଜ୍ୟତା ୱାଦ୍‌ତଣ୍ଡ୍‌, ମାତର୍‌ ନିଜର୍‌ ଦେଶ୍‌ତା ଅଣ୍ଡ୍‌ ମାଲ୍ସ୍‌ଆଦ୍‌ତଣ୍ଡ୍‌।

10 ମେଣ୍ଡେ, ତାନ୍‌ ମାର୍‌କ୍‌ ଯୁଦ୍ଦ୍‌ ମାଡ଼ିତଡ଼୍‌ ନୁ ବେଡ଼ିୟ୍‌ସୈନିକ୍‌ ମାନ୍ଦେତାଗ୍‌ ଯୁଦ୍ଦ୍‌ ମାଡ଼ିତଡ଼୍‌, ଅଡ଼୍‌ ୱାସ୍‌ ଏର୍‌ ତୁପାନ୍‌ ଲେକାମ୍‌ ମିଡ଼୍‌ୟି ଆଦ୍‌ତଡ଼୍‌; ମେଣ୍ଡେ, ଅଡ଼୍‌ ମାଲ୍ସ୍‌ ଆଦିନ୍‌ ରାଜ୍ୟଯାକ ଯୁଦ୍ଦ୍‌ ମାଡ଼ିତଡ଼୍‌। 11 ଆଗାଙ୍କ୍‌ ଦକ୍ଷିଣ ଦେଶ୍‌ତେ ରାଜାଲ୍‌ କପାମ୍‌ ଆସ୍‌ ଉତ୍ତର୍‌ ଦେଶ୍‌ତେ ରାଜାନ୍‌ ବିରୁଦ୍ଧତେ ଯୁଦ୍ଦ୍‌ ମାଡ଼ିତଣ୍ଡ୍‌; ଆସୁଙ୍କ୍‌ ଅଣ୍ଡ୍‌ (ଉତ୍ତର୍‌ ଦେଶ୍‌ତେ ରାଜାଲ୍‌) ବେଡ଼ିୟେ ମାନ୍ଦେତାଗ୍‌ ଯୁଦ୍ଦ୍‌ ମାଡ଼ିତଣ୍ଡ୍‌, ମାତର୍‌ ଆଦ୍‌ ମାନ୍ଦେ ଅନ୍‌ (ଦକ୍ଷିଣ ଦେଶ୍‌ତେ ରାଜାନ୍‌) କାଇଦେ ସର୍ପା ଆଦ୍‌ତଣ୍ଡ୍‌। 12 ମେଣ୍ଡେ, ଆଦ୍‌ ନାରୁଡ଼୍‌ମାନ୍ଦେ ପେୟିକେ, ଅନାଦ୍‌ ମାନ୍‌ ଗର୍ବିତ୍‌ ଆଦ୍‌ତେ ନୁ ହଜାର୍‌ ହଜାର୍‌ ନାରୁଡ଼୍‌କିଙ୍କ୍‌ ଯୁଦ୍ଦ୍‌ ମାଡ଼ିତଣ୍ଡ୍‌; ଆଗେକ୍‌ବା ବା ଅଣ୍ଡ୍‌ ଜିଡ଼େ ପାର୍‌ୱଣ୍ଡ୍‌। 13 ମେଣ୍ଡେ, ଉତ୍ତର୍‌ ଦେଶ୍‌ତେ ରାଜାଲ୍‌ ମାଲ୍ସ୍‌ ମୁନେତ୍‌ ଲେକାମ୍‌ ୱେରଡ଼୍‌ ବେଡ଼ିୟାଦ୍‌ ନାରୁଡ଼୍‌ ମାନ୍ଦେ ଉଡ଼ିତଡ଼୍‌; ମେଣ୍ଡେ ଅଣ୍ଡ୍‌, ସମୟ୍‌ତେ ଇତ୍କେ, ବେସ୍କ ୱାଡ଼୍‌ସେତେ ପେର୍କେ ବେଡ଼ିୟ୍‌ସୈନ୍ୟ ନୁ ଅପାର୍‌ତେ ସାମାନ୍‌ ତାତିତଡ଼୍‌। 14 ମେଣ୍ଡେ, ଆଦ୍‌ ସମୟ୍‌ତେ ନାର୍ଗେ ନାରୁଡ଼୍‌ ଦକ୍ଷିଣ ଦେଶ୍‌ତେ ରାଜାନ୍‌ ବିରୁଦ୍ଦ୍‌ତେ ତେଦିତଡ଼୍‌; ମିକା ମି ନାରୁଡ଼ାଗ୍‌ ଆୱ୍‌କାନ୍‌ ନାରୁଡ଼୍‌ ପିଲା ଇଦ୍‌ ଦର୍ଶନ୍‌ତେ ଲେକାମ୍‌ ମାକିଙ୍କ୍‌ ଉନ୍ନତ୍‌ ମାଡ଼ିତଡ଼୍‌; ମାତର୍‌ ଅଡ଼୍‌ ଆରେମ୍‌ ଆଦ୍‌ତଡ଼୍‌। 15 ଇଦ୍‌ଲେକାମ୍‌ ଉତ୍ତର୍‌ ଦେଶ୍‌ତେ ରାଜାଲ୍‌ ୱାଦ୍‌ତଣ୍ଡ୍‌ ନୁ ଡେକାଙ୍କ୍‌ ବନ୍ଦିମାଡ଼ି ଶକ୍ତି ନଗର୍‌ତଡ଼୍‌ କାଇଦେ ଇଦ୍‌ତଣ୍ଡ୍‌; ଆସୁଙ୍କ୍‌ ଦକ୍ଷିଣ ଦେଶ୍‌ତେ ସାରେତଡ଼୍‌ ନୁ ହେଞ୍ଚିମାନ୍ଦାନ୍‌ ନାରୁଡ଼୍‌ ମନା ମାଡ଼୍‌ଡ଼େ ପାର୍‌ୱଡ଼୍‌; କି ମନା ମାଡ଼ାନଙ୍କ୍‌ ବାତେବା ଶକ୍ତି ମାନ। 16 ମାତର୍‌ ବେନ ଆଦିନ୍‌ ବିରୁଦ୍ଦ୍‌ତେ ୱାଦ୍‌ତଣ୍ଡ୍‌, ଅଣ୍ଡ୍‌ ନିଜେତ୍‌ ଇଚ୍ଛାତେ କାମ୍‌ ମାଡ଼ିତଣ୍ଡ୍‌ ନୁ ଆଦିନ୍‌ ମୁନେ ବେନ ନିଲଣ୍ଡ୍‌; ମେଣ୍ଡେ, ଅଣ୍ଡ୍‌ ରୋମ୍ୟ ଇସ୍ରାଏଲ୍‌ ଦେଶ୍‌ତା ନିତିତଣ୍ଡ୍‌ ନୁ ଅନାଦ୍‌ କାଇଦେ ବିନାଶ୍ ମାନ୍ତେ। 17 ଅଣ୍ଡ୍‌ ଅନ୍‌ ସାରେପାକେତ୍‌ ରାଜ୍ୟତେ ପରାକ୍ରମ ତଡ଼୍‌ ୱାଦାନଙ୍କ୍‌ ନିମେ ମାନ୍‌ ମାଡ଼ିତିନ୍‌ ନୁ ସରଳ ନାରୁଡ଼୍‌ ଆଦିନ୍‌ ସାଙ୍ଗେତେ ୱାଦ୍‌ତଡ଼୍‌; ଅଣ୍ଡ୍‌ ତାନ୍‌ ନିଜେତ୍‌ ଇଚ୍ଛାତେ କାମ୍‌ ମାଡ଼ିତଣ୍ଡ୍‌; ଅଣ୍ଡ୍‌ ନଷ୍ଟ ମାଡ଼ାନଙ୍କ୍‌ ନାଟାକିନ୍‌ ମାୟାଡ଼୍‌ ଆଦିଙ୍କ୍‌ ଇଦ୍‌ତେ; ମାତର୍‌ ମାୟାଡ଼୍‌ କଟ ମାନନ୍‌, କି ଆଦିନ୍‌ ସେଙ୍ଗେ ଆୟ। 18 ତାନ୍‌ପେର୍କେ ଅଣ୍ଡ୍‌ ୱେୟ୍‌ସିନ୍‌ ବିରୁଦ୍ଦ୍‌ତାଗ୍‌ ଆଞ୍ଜ୍‌ ନାର୍ଗେ ନାରୁଡ଼୍‌ତଡ଼୍‌ କାଇ କାଲ୍‌ପିତଣ୍ଡ୍‌; ମାତର୍‌ ୱେରଣ୍ଡ୍‌ ଅଦିପତି ଆଦିନ୍‌ ପାକେ ଅପମାନ୍ ତିଆର୍‌ ମାଡ଼ିତଣ୍ଡ୍‌; ମେଣ୍ଡେ, ଅଣ୍ଡ୍‌ ଆଦିନ୍‌ ଅପମାନ୍ ଆଦିନ୍‌ ପରୁ ଲଦାମାଡ଼ିତଣ୍ଡ୍‌। 19 ଆଗାଙ୍କ୍‌ ଅଣ୍ଡ୍‌ ନିଜେତ୍‌ ଦେଶ୍‌ତେ ରାଜ୍ୟତେ ପାକେ ମାଲ୍‌ଦ୍‌ତଣ୍ଡ୍‌; ମାତର୍‌ ଆଦ୍‌ ତାଲ୍‌ଗି ରାଲି ମିଚିଆଦ୍‌ତେ; ମେଣ୍ଡେ, ତନ୍ଦଆଦ୍‌ତେ।

20 ତାନ୍‌ପେର୍କେ ବେନ୍‌ ନାରୁଣ୍ଡ୍‌ ଆଦିନ୍‌ ପେର୍କେ ଆଦ୍‌ତ, ଅଣ୍ଡ୍‌ ରାଜ୍ୟତେ ମିଟିଙ୍କ୍‌ ପଡ଼ିୟେତାଗ୍‌ ନାଡ଼୍‌ମେଙ୍କ୍‌କଞ୍ଜ୍‌ ଆଦାନଙ୍କ୍‌ ୱେରଣ୍ଡ୍‌ ଚିସ୍ତୁ ଆଦାୟ୍‌ ମାଡ଼ାନଣ୍ଡ୍‌ ମାଲ୍‌ପିତାତିତଣ୍ଡ୍‌; ମାତର୍‌ ସୁଦୁର୍‌ ଦିନେତ୍‌ ଲୋପେ ଅଣ୍ଡ୍‌ ନଷ୍ଟ ଆଦ୍‌ତଣ୍ଡ୍‌, ମାତର୍‌ କପାମ୍‌ତେ ଆୟ, କି ଯୁଦ୍ଦ୍‌ତେ ଆୟ।

21 ମେଣ୍ଡେ, ବେନଙ୍କ୍‌ ଅଡ଼୍‌ ରାଜାନ୍‌ ସମ୍ମାନ୍‌ ଇୱେ ମାତ୍‌କେ, ଇଦ୍‌ଲେକାମ୍‌ ୱେରଣ୍ଡ୍‌ ତୁଚ୍ଛ ନାରୁଣ୍ଡ୍‌ ଆଦିନ୍‌ ପେର୍କେ ଆଦ୍‌ତ; ମାତର୍‌ ଅଣ୍ଡ୍‌ ଟିକ୍‌ ସମୟତେ ୱାଦ୍‌ତଣ୍ଡ୍‌ ନୁ ମିଚ୍‌ ବାକ୍ୟତଡ଼୍‌ ରାଜ୍ୟ ପାହେମ୍‌ ଆଦ୍‌ତଣ୍ଡ୍‌। 22 ମେଣ୍ଡେ, ଗାଲ୍‌ ଦୁମ୍‌ଡ଼ାମ୍‌ ଲେକାମ୍‌ ସୈନ୍ୟମାନ୍ଦେ ତଡ଼୍‌ ଅଡ଼୍‌ ଆଦିନ୍‌ ମୁନେଙ୍କ୍‌କଞ୍ଜ୍‌ ଆଦ୍‌ତଡ଼୍‌ ନୁ ଉର୍ଙ୍ଗିତଡ଼୍‌; ହଁ ନିୟମ୍‌ତେ ଅଦିପତି ମିକା ଉର୍ଙ୍ଗିତ୍‌। 23 ମେଣ୍ଡେ, ଅନ୍‌ତଡ଼୍‌ ରାଜିନାମା ମାଡ଼୍‌ତଡ଼୍‌ ପେର୍କେ ଅଣ୍ଡ୍‌ ବୁସାମାଡ଼ାନ୍‌ ମୁନେତ୍‌ କାମ୍‌ ମାଡ଼ିତିଡ଼୍‌; ବାତେଙ୍କ୍‌ଇତ୍କେ ଅଣ୍ଡ୍‌ ୱାସ୍‌ ସୁକୁକ୍‌ ନାରୁଡ଼୍‌ତଡ଼୍‌ ପରାକ୍ରମୀ ଆଦ୍‌ତିଡ଼୍‌। 24 ଅଣ୍ଡ୍‌ ଟିକ୍‌ ସମୟ୍‌ତେ ଦେଶ୍‌ତେ ଗାଟି ସାୟେତ୍‌ ପଡ଼ିୟେତାଗ୍‌ ନେଙ୍କିତିଡ଼୍‌ ନୁ ଅନ୍‌ ଆନିଦାଦିଡ଼୍‌ ବାତେ ମାଡ଼୍‌ୱେ ମାତ୍‌ତଡ଼୍‌, ଆଦ୍‌ ଅଣ୍ଡ୍‌ ମାଡ଼ିତଣ୍ଡ୍‌; ଅଣ୍ଡ୍‌ ଅଡ଼ାଗେ ଲୁଟ୍‌ ମାଡ଼ିମାନ୍ଦାନ୍‌ ସମ୍ପତି ନୁ ଡଙ୍ଗିମାନ୍ଦାନ୍‌ ଜିନିଷ୍‌ ନୁ ଦନ୍‌ ଲିକିତଣ୍ଡ୍‌ ନୁ ଡାଟାମ୍‌ ନଗର୍‌ ବିରୁଦ୍ଧତେ ଅଣ୍ଡ୍‌ ବେସ୍‌କ୍‌ ବର୍ଷ ଆକ୍ରମନ୍‌ ଯୋଜନା ମାଡ଼୍‌ତଣ୍ଡ।

25 ମେଣ୍ଡେ, ଅଣ୍ଡ୍‌ ବେଡ଼ିୟ୍‌ସୈନ୍ୟମାନ୍ଦେ ତଡ଼୍‌ ଅସ୍‌ ଦକ୍ଷିଣ ଦେଶ୍‌ତେ ରାଜାନ୍‌ ବିରୁଦ୍ଧତେ ନିୟାଦ୍‌ ଶକ୍ତି ନୁ ସାହାସ୍‌ ତତିତିଡ଼୍‌; ଆସୁଙ୍କ୍‌ ଦକ୍ଷିଣ ଦେଶ୍‌ତେ ରାଜାଲ୍ ନାର୍ଗେ ନୁ ପରାକ୍ରାନ୍ତ ସୈନ୍ୟଡ଼୍‌ ଅସ୍‌ ଅନ୍‌ତଡ଼୍‌ ଯୁଦ୍ଧ ମାଡ଼ିତଣ୍ଡ୍‌; ମାତର୍‌ ଅଣ୍ଡ୍‌ କଟ ଆସ୍‌ ମାନଣ୍ଡ୍‌; ବାତେଙ୍କ୍‌ଇତ୍କେ ଅଡ଼୍‌ଆଦ୍‌ ବିରୁଦ୍ଦ୍‌ତେ ବାତ୍‌ବାତେ ଆକ୍ରମନ୍‌ ଯୋଜନା ମାଡ଼ିତଡ଼୍‌। 26 ବେନଡ଼୍‌ ଆଦିନ୍‌ କାଦି ତିନ୍ଦ୍‌ତଡ଼୍‌, ଅଡ଼୍‌ ଆଦିଙ୍କ୍‌ ନଷ୍ଟ ମାଡ଼ିତଡ଼୍‌, ମେଣ୍ଡେ ଆଦିନ୍‌ ସୈନ୍ୟମାନ୍ଦେ ବେଡ଼େମ୍‌ ଇନାୱାଦ୍‌ତଡ଼୍‌ ନୁ ନାର୍ଗେ ଡଲିତଡ଼୍‌। 27 ମେଣ୍ଡେ, ଇ ଇର୍‌ୱୁଡ଼୍‌ ରାଜାନ୍‌ ଗଟ୍‌ ଅନିଷ୍ଟ ମାଡ଼ାନଙ୍କ୍‌ ତିଆର୍‌ ଆଦ୍‌ତଣ୍ଡ୍‌ ନୁ ଅଡ଼୍‌ ୱେରଡ଼୍‌ ଟେବୁଲ୍‌ତାଗ୍‌ କୁଦୀ ମିଚ୍‌ଗଟି କେତିତଡ଼୍‌; ମାତର୍‌ ଆଦ୍‌ ପୁରା ଆୟୟ୍‌; ବାତେଙ୍କ୍‌ଇତ୍କେ ଆସୁଙ୍କ୍‌ କେ ପରିଣାମ୍‌ ତିଆର୍‌ ଆଦାନ୍‌ କାଲାମ୍‌ତିଙ୍କ୍‌ କେପିତେ। 28 ଆସୁଙ୍କ୍‌ ଅଣ୍ଡ୍‌ ନାର୍ଗେ ସମ୍ପତିଅସ୍‌ ତାନ୍‌ ଦେଶ୍‌ତା ମାଲ୍‌ସ୍‌ ଆଦ୍‌ତଣ୍ଡ୍‌ ନୁ ଆଦିନ୍‌ ମାନ୍‌ ପବିତ୍ର ନିୟମ୍‌ତେ କାମ୍‌ତାଦ୍‌ ଆଦ୍‌ତେ; ମେଣ୍ଡେ,ଅଣ୍ଡ୍‌ ନିଜେତ୍‌ ଇଚ୍ଛାତେ କାମ୍‌ମାଡ଼ି ନିଜର୍‌ ଦେଶ୍‌ତା ମାଲ୍‌ସ୍‌ ଆଦ୍‌ତଣ୍ଡ୍‌।

29 ଏଞ୍ଚିମାତ୍‌ତେ କାଲାମ୍‌ତେ ଅଣ୍ଡ୍‌ ମାଲ୍‌ସ୍‌ ଦକ୍ଷିଣ ଦେଶ୍‌ତେ ନେଙ୍ଗିତଣ୍ଡ୍‌; ମାତର୍‌ ମୁନେତ୍‌ କାଲାମ୍‌ତେ ବେଲାନ୍‌ ଆସ୍‌ମାତ୍‌ତେ, ଶେଷ କାଲାମ୍‌ତେ ଆଦ୍‌ଲେକାମ୍‌ ଆୟ। 30 ବାତେଙ୍କ୍ଇତ୍କେ କିତ୍ତୀମର ଜାହାଜସାରେ ଅନ୍‌ ବିରୁଦ୍ଧତେ ୱାଦ୍‌ତଡ଼୍‌, ଆଦିନ୍‌ ସେଙ୍ଗେ ଅଣ୍ଡ୍‌ ଦୁଃକାମ୍‌ ଆସ୍‌ ମାଲ୍ସ୍‌ ଆଦ୍‌ତଣ୍ଡ୍‌ ନୁ ପବିତ୍ର ନିୟମ୍‌ତେ ପାକେ କପାମ୍‌ ମାଡ଼ି ମନ୍‌ଇଚ୍ଛା କାମ୍‌ମାଡ଼ିତି; ଅଣ୍ଡ୍‌ ମାଲ୍‌ସ୍‌ ଆଦ୍‌ତଣ୍ଡ୍‌ ନୁ ପବିତ୍ର ନିୟମ୍‌ ୱିଡ଼୍‌ସ୍‌ତେ ନାରୁଡ଼୍‌ପରୁ ମନ୍‌ ମାଡ଼ାଟ୍‌। 31 ମେଣ୍ଡେ, ଆଦିନ୍‌ ପାକେ ସୈନ୍ୟନଡ଼୍‌ ତେଦି ମନ୍ଦିର୍‌, ଇତ୍କେ, ଡେଙ୍ଗ୍‌ ପଡ଼ିୟେ ଅଶୁଚି ମାଡ଼ିତଡ଼୍‌ ନୁ ନିତାଲ୍‌ତେ ନୈବେଦ୍ୟ ସୃଷ୍ଟି ମାଡ଼ିତଡ଼୍‌, ମେଣ୍ଡେ ଦଂସ ମାଡ଼ାନଡ଼୍‌ ପାସ୍‌କାନ୍‌ଲେକାତ୍‌ ଜିନିଷ୍‌ ସୃଷ୍ଟି ମାଡ଼ିତଡ଼୍‌। 32 ମେଣ୍ଡେ, ବେନଡ଼୍‌ ନିୟମ୍‌ତେ ପରୁ ଦୁଷ୍ଟନ୍‌ ଲେକାମ୍‌ ବ୍ୟବହାର୍‌ ମାଡ଼ିତଣ୍ଡ୍‌, ଅଣ୍ଡ୍‌ କାରାପ୍‌ ବାକ୍ୟ ତଡ଼୍‌ ଅଡ଼୍‌କିଂଙ୍କ୍‌ ଆର୍‌ କାୱୁଡ଼୍‌ ମାଡ଼ିତଣ୍ଡ୍‌; ମାତର୍‌ ବେନ୍‌ ନାରୁଡ଼୍‌ ନିଜେତ୍‌ ପରମେଶ୍ୱର୍‌ତିଙ୍କ୍‌ ପୁନ୍ଦ୍‌ତନ୍‌, ଅଡ଼୍‌ ଶକ୍ତିତାଦ୍‌ ଆଦ୍‌ତଡ଼୍‌ ନୁ ଆଶ୍ଚର୍ଯ୍ୟ କାମ୍‌ ମାଡ଼ିତଡ଼୍‌। 33 ମେଣ୍ଡେ, ନାରୁଡ଼୍‌ଡ଼ାଗାଙ୍କ୍‌ ଜ୍ଞାନୀନଡ଼୍‌ ନାର୍ଗେନାରୁଡ଼୍‌କ୍‌ ଉପଦେଶ୍‌ ଇଦ୍‌ତଡ଼୍‌; ଆଗେକ୍‌ବା ବା ନାର୍ଗେ ଦିନାମ୍‌ ଯାକ ଅଡ଼୍‌ ଗର୍‌କେ, କିସ୍‌ତାଡ଼୍‌ମିନାଗ୍‌, ବନ୍ଦିଲତ୍‌ତାଗ୍‌ ନୁ ଲୁଟ୍‌ ଡଙ୍ଗାଲ୍‌ କାମ୍‌ତେ ଡଲିତଡ଼୍‌। 34 ଆସୁଙ୍କ୍‌ ଅଡ଼୍‌ ଡଲିତଡ଼୍‌, ଆସୁଙ୍କ୍‌ ଅଡ଼୍‌ ଇସୁର୍‌ ସାହାଯ୍ୟ ପାହେମ୍‌ ଆଦ୍‌ତଡ଼୍‌; ମାତର୍‌ ନାର୍ଗେ ମିଚ୍‌ଗଟି କେତାନଡ଼୍‌ ଅଡ଼୍‌ତଡ଼୍‌ କାଇଲିତଡ଼୍‌। 35 ମେଣ୍ଡେ, ଅଡ଼୍‌ ଲୋପେଙ୍କ୍‌ ଜ୍ଞାନୀନାରୁଡ଼୍‌ ଡ଼ାଗାଙ୍କ୍‌ ବେସ୍କ୍‌ତୁଡ଼୍‌ ତାଲ୍‌ଗି ରାଲିତଡ଼୍‌ ନୁ ଅଡ଼୍‌କିଂଙ୍କ୍‌ ନିର୍ମଳ, ପରିଷ୍କାର୍‌ ନୁ ମେଣ୍ଡେ ଅଦିକ୍‌ ପରିଷ୍କାର୍‌ ମାଡ଼ାନଙ୍କ୍‌ ପରିଣାମତେ ସମୟ ଯାକ ଡଲିତଡ଼୍‌; ବାତେଙ୍କ୍‌ଇତ୍କେ ଆଦ୍‌ ନିୟମ୍‌ତେ କାଲାମ୍‌ କେପିତେ।

36 ରାଜାଲ୍‌ ନିଜେତ୍‌ ଇଚ୍ଛାଲେକାମ୍‌ କାମ୍‌ ମାଡ଼ିତଣ୍ଡ୍‌ ନୁ ସାରେ ଦେବ୍‌ତା ୱିଡ଼୍‌ସି ନିକିଂଙ୍କ୍‌ ବେଡ଼ିୟେ ମାଡ଼ି ଗର୍ବ ମାଡ଼ିତେ, ମେଣ୍ଡେ ଇଶ୍ୱର୍‌ତେ ନାରୁଡ଼୍‌ ଇଶ୍ୱର୍‌ତେ ବିରୁଦ୍ଦ୍‌ତେ କେଲ୍‌ୱେ ଗଟି କେତିତେ ନୁ କପାମ୍‌ ତେର୍‌ନା ଜାକ ଶାନ୍ତି ଆଦ୍‌ତେ; ବାତେଙ୍କ୍‌ଇତ୍କେ ବାତ୍‌ ନିୟମ୍‌ ଆସ୍‌ମିନ୍ଦେ, ଆଦ୍‌ ମାଡ଼ିତଡ଼୍‌। 37 ଅଣ୍ଡ୍‌ ନିଜେତ୍‌ ଆନିଦାଦିଡ଼୍‌ନଡ଼୍‌ ଦେୟାକିଂଙ୍କ୍‌ ମାନେମ୍‌ ଆୟ୍‌ୟଣ୍ଡ୍‌; କି ନାଟାକିନ୍‌ ଚିନ୍ତାତିଙ୍କ୍‌ କି ବେନ୍‌ ଦାୟାମ୍‌ତିଙ୍କ୍ ମାନେମ୍‌ ଆୟ; ବାତେଙ୍କ୍‌ଇତ୍କେ ଅଣ୍ଡ୍‌ ସାରେତଡ଼୍‌କ୍‌ ୱିଡ଼୍‌ସି ନିକିଂଙ୍କ୍‌ ବେଡ଼ିୟେ ମାଡ଼ିତଣ୍ଡ୍‌। 38 ମାତର୍‌ ନି ପଡ଼ିୟେତାଗ୍‌ ତାମ୍‌ ଦେଶ୍‌ତେ ଦେୟାମ୍‌ତିଙ୍କ୍‌ ସମ୍ମାନ୍‌ ମାଡ଼ିତଣ୍ଡ୍‌ ନୁ ଅନ୍‌ ମୁନେତଡ଼୍‌ ପୁନ୍‌ୱେ ଦାୟାମ୍‌ତିଙ୍କ୍‌ ସୁନା, ରୂପା, ନାର୍ଗେଦାମିନ୍‌ ମଣି ନୁ ମାନ୍‌ଇଚ୍ଛାତେ ଜିନିଷ୍ ଇସ୍‌ ସମ୍ମାନ୍‌ ମାଡ଼ିତିଡ଼୍‌। 39 ମେଣ୍ଡେ, ଆଦ୍‌ ବିଦେଶିତେ ଦେୟାମ୍‌ ସାହାଯ୍ୟ ବିଶ୍ୱାସ୍‌ତେ ଡ଼ୁଟାଙ୍କ୍‌ କାଲ୍‌ପାକେ କାମ୍‌ ମାଡ଼ିତେ, ବେନଆୟି ଆଦିଙ୍କ୍‌ ସ୍ୱିକାର୍‌ ମାଡ଼ିତଣ୍ଡ୍‌, ଅଣ୍ଡ୍‌ ଆଦିନ୍‌ ଗୌରବ୍‌ ନାର୍ଗେ ମାଡ଼ିତେ ନୁ ସାରେତଡ଼୍‌ ପରୁ ଅଡ଼୍‌ପରୁ ଅଦିକାର୍‌ ପଦ ଇଦ୍‌ତଣ୍ଡ୍‌ ନୁ ପୁରସ୍କାର ଲେକାମ୍‌ ବୁମ୍‌ ୱେରେ ମାଡ଼ିତିଡ଼୍‌।

40 ମେଣ୍ଡେ ତେରାନ୍‌ କାଲାମ୍‌ତେ ଦକ୍ଷିଣ ଦେଶ୍‌ତେ ରାଜାଲ୍‌ ଆଦିନ୍‌ ସାଙ୍ଗେ ରାମ୍‌କ ମାଡ଼ିତଣ୍ଡ୍‌ ନୁ ଉତ୍ତର୍‌ ଦେଶ୍‌ତେ ରାଜାଲ୍‌ ରତ, ଗୁରାକିନ୍‌ତଡ଼୍‌ ମିରାନଡ଼୍‌ ନୁ ନାର୍ଗେ ଜାହାଜ୍‌ ଅସ୍‌ ଆଦିନ୍‌ ବିରୁଦ୍ଦ୍‌ତେ ଉର୍‌ଗାଲ୍‌ ଲେକାମ୍‌ ୱାଦ୍‌ତେ ନୁ ଆଦ୍‌ ବେନାବେନ୍‌ ଦେଶ୍‌କିନାଗ୍‌ ନେଙ୍ଗିମିକା ମିଡ଼୍‌ୟି ଆଦାନ୍‌ ଗାଲ୍‌ ଦୁମ୍‌ଡ଼ାମ୍‌ ଲେକାମ୍‌ ଆଦ୍‌ତେ। 41 ଆଦ୍‌ମିକା ସୁନ୍ଦର୍‌ (ଇସ୍ରାଏଲ୍‌) ଦେଶ୍‌ତାଗ୍‌ ନେଙ୍ଗିତ୍‌, ଆଗେ ନାର୍ଗେ ଦେଶ୍‌କ୍‌ ଆରେମ୍‌ ଆଦ୍‌ତେ; ମାତର୍‌ ଇଦୋମ୍‍ ନୁ ମୋୟାବ ନୁ ଅମ୍ମୋନ ପିଲାକିନ୍‌ ବେଡ଼୍‌ୟାଦିନ୍‌ କାଇଦାଗାଙ୍କ୍‌ ରକ୍ଷା ଆଦ୍‌ତଡ଼୍‌। 42 ମେଣ୍ଡେ, ଆଦ୍‌ ୱେରେୱେରେ ଦେଶ୍‌କିନ୍‌ ପରୁ ନିଜେତ୍‌ କାଇ ଆତିତଣ୍ଡ୍‌ ନୁ ମିସର୍‌ ଦେଶ୍‌ ରକ୍ଷା ପାହେମ୍‌ ଆୟ। 43 ମାତର୍‌ ମିସର୍‌ତେ ସୁନା ନୁ ରୂପାତେ ଗୁଦାମ୍‌ ସାରେ ନୁ ନାର୍ଗେଦାମିନ୍‌ ଜିନିଷ୍‌ସାରେ ଆଦିନ୍‌ କାଇଦାଗ୍‌ ଆଦ୍‌ତା; ମେଣ୍ଡେ, ଲୂବୀୟ ନୁ କୂଶୀୟନଡ଼୍‌ ଆୱିନ୍‌ ପେର୍କେ ଆଦ୍‌ତଡ଼୍‌। 44 ମାତର୍‌ ପୂର୍ବ ନୁ ସିରିଆ ଦେଶ୍‌ତେ ୱାଦାନ୍‌ କାବୁର୍‌ ଅଙ୍କ୍‌ ଗାବ୍‌ରାମାଡ଼ିତ୍‌; ଆସୁଙ୍କ୍‌ ଆଦ୍‌ ନାର୍ଗେନାରିଡ଼୍‌ ବିରାବାରା ନୁ ସାରେଲେକାମ୍‌ ବିନାଶ୍ ମାଡ଼ାନଙ୍କ୍‌ ନାର୍ଗେକପାମ୍‌ତେ ଆଦ୍‌ତେ। 45 ମେଣ୍ଡେ, ଆଦ୍‌ ସମୁଦ୍ର ନୁ ପବିତ୍ର ସୁନ୍ଦର୍‌ ମେଟେତ୍‌ ପାକେ ଆଦିନ୍‌ ରାଜକୀୟ ତମ୍ୱୁ ତିଆର୍‌ ମାଡ଼ିତେ; ଆଗେକ୍‌ବା ବା ଆଦିନ୍‌ ତେରାନ୍‌ କାଲାମ୍‌ ଗାରେ ହେଉଦ୍‌ତେ, ମେଣ୍ଡେ ବେନ ଆଦିନ୍‌ ସାହାଯ୍ୟ ମାଡ଼ଡ଼୍‌।