ଡୁୱୁ ପାଡ଼୍କ୍ତାଗ୍ ଦାନିୟେଲ୍
1 ଦାରିୟାବସ ସମୁଦାୟ ରାଜ୍ୟତାଗ୍ କୁଡ଼ିଏ ଜାନ୍ତିଙ୍କ୍ ରାଜ୍ୟତ୍ ପରୁ ହେଞ୍ଚତଡ଼୍। 2 ନୁ ଆ ବୁମ୍ପାଡ଼୍ୟି ମାଡ଼ାନଡ଼୍ ବେଲାନ୍ ହିସାବ୍ ଇଦ୍ତଡ଼୍ ନୁ ରାଜାନାଦ୍ ବେଲାନ୍ ବାତେ ନଷ୍ଟ ଆୟ, ଆଦିନ୍ ସେଙ୍ଗେ ଅଡ଼୍ ପରୁ ମୁୱୁଡ଼୍ କାମ୍ ମାଡ଼ାନକ୍ ହେଞ୍ଚାନଙ୍କ୍ ଲେକେତ୍ ବୁଜେମ୍ ଆତ୍ତଣ୍ଡ୍; ଇଡ଼୍ ମୁୱୁଡ଼୍ ଡାଗ୍ ଦାନିୟେଲ ୱେରଣ୍ଡେ ମାତ୍ତଣ୍ଡ୍। 3 ଇ ଦାନିୟେଲତେ ଅନ୍ତର୍ତାଗ୍ ବେଡ଼ିୟ୍ ଆତ୍ମା ମାନ୍ନାଙ୍କ୍ ଅଣ୍ଡ୍ ଅଧ୍ୟକ୍ଷନଡ଼୍ ନୁ ପାଲନ୍ମାଡ଼ାନଡ଼୍ ୱିଡ଼୍ସି ବେଡ଼୍ୟଡ଼୍ ଆସ୍ମାତ୍ତଡ଼୍; ମେଣ୍ଡେ, ରାଜାଲ୍ ଅଙ୍କ୍ ସାରେତଡ଼୍ ରାଜ୍ୟ ପରୁ ହେଞ୍ଚାନଙ୍କ୍ ମନ୍ ମାଡ଼୍ତଣ୍ଡ୍। 4 ଆସୁଙ୍କ୍ ଅଧ୍ୟକ୍ଷ ନୁ ପାଲନ୍ମାଡ଼ାନଡ଼୍ ରାଜାନ୍ ପାଡ଼ିୟ୍ ବିଷୟତେ ଦାନିୟେଲ୍ତେ ଦୋଷ ମେଃକ୍ତଡ଼୍; ମାତର୍ ଅଡ଼୍ ବାତେବା ଦୋଷ ବା ଅପରାଦ୍ ଦର୍ସ୍କେପାର୍ୱଡ଼୍, ବାତେଙ୍କ୍ଇତ୍କେ ଅଣ୍ଡ୍ ବିଶ୍ୱାସ୍ତେ ମାତ୍ତଣ୍ଡ୍ ନୁ ଅନ୍ ବାତେବା ବୁସା କି ଅପରାଦ୍ ତନ୍ଦ। 5 ଆସୁଙ୍କ୍ ଆ ନାରୁଡ଼୍ କେତ୍ତଡ଼୍, ମାମେ ଦାନିୟେଲ୍ତେ ପରମେଶ୍ୱର୍ତେ ନିୟମ୍ ପାକେ, ଅନ୍ ଦଷ୍ ପୟ୍ୱେ ମାତ୍କେ ମେଣ୍ଡେ ବାତେବା ବିଷୟ୍ତେ ଦଷ୍ ପାହେମ୍ ଆୟ୍ୱାଡ଼୍। 6 ଆସୁଙ୍କ୍ ଅଧ୍ୟକ୍ଷନଡ଼୍ ନୁ ପାଲନ୍ମାଡ଼ାନଡ଼୍ ରାଜାନ୍ ପାକେ ଅଣ୍ଡୟତାଗ୍ ଆସ୍ ଅଙ୍କ୍ ଇଦ୍ ଲେକାମ୍ କେତ୍ତଡ଼୍, ମହାରାଜା ଦାରିୟାବସ, ଚିରଜିବି ଆୟିଣ୍ଡ୍। 7 ରାଜ୍ୟତେ ଅଧ୍ୟକ୍ଷନଡ଼୍, ରାଜପ୍ରଚାଦ୍ତାଗ୍ ମାନ୍ଦାନଡ଼୍ ନୁ ବୁମ୍ପାଡ଼୍ୟି ମାଡ଼ାନଡ଼୍, ମନ୍ତ୍ରୀ ନୁ ଦେଶତିଙ୍କ୍ କେପାନଡ଼୍ ସାରେତଡ଼୍ ମନ୍ତ୍ରଣା ମାଡ଼ି ଇଦ୍ଲେକାମ୍ ଅଣ୍ଡୟ୍ ରାଜଜ୍ଞା ନୁ ଢ଼ାଟୁମ୍ତେ ମାନ୍ଦାନ୍ ନିୟମ୍ ତିଆର୍ ମାଡ଼ାନଙ୍କ୍ ବିଚାର୍ ମାଡ଼ିମିନ୍ଦେଡ଼୍ ଯେ, ଯଦି ବେନ ତିରିଶ୍ ଦିନ୍ ଯାକ ମହାରାଜାଙ୍କ୍ ୱିଡ଼୍ସି ବାତେବା ଦେୟାକ୍ ବା ନାରୁନଡ଼୍ ପାକେ ପ୍ରାତନା ମାଡ଼ିତିଡ଼୍, ଅଣ୍ଡ୍ ଡୁୱୁକିନ୍ ଗୁଇନ୍ଦେତାଗ୍ ହେସିତଡ଼୍। 8 ଇଞ୍ଜେ ହୋ ମହାରାଜା, ମାଦୀୟ ନୁ ପାରସିକ୍ନଡ଼୍ ଡାଟୁମ୍ ନିୟମ ଲେକାମ୍ ଇଦ୍ ମାଡ଼୍ତେ ନିୟମ୍ ବେଲାନ୍ ପରିବର୍ତ୍ତନ୍ ଆୟ୍ମା କି, ଆଦିନ୍ ସେଙ୍ଗେ ଆଦ୍ ତିଆର୍ ମାଡ଼ାଟ୍ ନୁ ଇଦ୍ ଲେକାତେ ସାଇନ୍ ମାଡ଼ାଟ୍। 9 ଆଦିଙ୍କ୍ ରାଜା ଦାରିୟାବସ ଆଦ୍ ଲେକା ନୁ ମାଡ଼୍ତେ ନିୟମ୍ତାଗ୍ ସାଇନ୍ ମାଡ଼୍ତଣ୍ଡ୍। 10 ଆଦିନ୍ସେଙ୍ଗେ ଇଦ୍ ଲେକା ସାଇନ୍ ଆସ୍ମିନ୍ଦେ ଇଞ୍ଜ ମାଡ଼୍ତେ ପେର୍କେ ଦାନିୟେଲ୍ ତାନ୍ ଲୋନ୍ ଆତ୍ତଣ୍ଡ୍; ତାନ୍ ଲୋତ୍ତେ ଜର୍କା ଯିରୁଶାଲମ୍ ପାକେ କଲା ମାତ୍ତେ; ମେଣ୍ଡେ, ଅଣ୍ଡ୍ ମୁନେଙ୍କ୍ ବେଲାନ୍ ମାଡ଼ିମାନେଣ୍ଡ୍, ଆଦିନ୍ ଲେକାମ୍ ଦିନାମ୍ ମୁଣ୍ଡ୍ଦାମ୍ ମର୍ମିଣ୍ଡାଉଃସ୍ ପ୍ରାର୍ଥନା ମାଡ଼୍ତଣ୍ଡ୍ ନୁ ତାନ୍ ପରମେଶ୍ୱର୍ତେ ମୁନେ ଧନ୍ୟବାଦ୍ ଇତ୍ତଣ୍ଡ୍।
11 ଆସୁଙ୍କ୍ ଆ ନାରୁଡ଼୍ ଅଣ୍ଡୟ୍ତାଗ୍ ଆସ୍ ଦାନିୟେଲ୍ତିଙ୍କ୍ ତାମ୍ ପରମେଶ୍ୱର୍ତେ ପାକେ ପ୍ରାତନା ନୁ ଅନୁରଦ୍ ମାଡ଼ାନାଦ୍ ଉଡ଼୍ତଡ଼୍। 12 ଆସୁଟ୍ ଅଡ଼୍ ରାଜାନ୍ ପାକେ ଆଞ୍ଜ୍ ରାଜାନାଦ୍ ମନା ମାଡ଼ାନ୍ ନିୟମ୍ ବିଷୟ୍ତେ ଅନ୍ ମୁନେ କେତ୍ତଡ଼୍, ହୋ ମହାରାଜା, ବେନ୍ଆୟି ନାରୁନ୍ ତିରିଶ୍ ଦିନେତେ ତାନ୍ ୱିଡ଼୍ସି ବାତେଆୟି ଦେୟାକ୍ କି ନାରୁନଡ଼୍ ପାକେ ପ୍ରାତନା ମାଡ଼ିତିଡ଼୍, ଅଣ୍ଡ୍ ଡୁୱୁକିନ୍ ପାଡ଼୍କ୍କିନାଗ୍ ହେସିତଡ଼୍, ଇଦ୍ଲେକାମ୍ ୱେରଡ଼୍ ୱିଡ଼୍ସ୍ତେ ଚିଟିତାଗ୍ କି ନି ସାଇନ୍ ମାଡ଼ନ୍ ? ରାଜାଲ୍ ଉତ୍ତର୍ ଇସ୍ କେତ୍ତଣ୍ଡ୍, ମାଦୀୟ ନୁ ପାରସିକନଡ଼୍ ବିଶ୍ୱାସ୍ତେ ନିୟମ୍ତେ ଆଦ୍ ତିଆର୍ ଆସ୍ମିନ୍ଦେ। 13 ଆସୁଙ୍କ୍ ଅଡ଼୍ ରାଜାନ୍ ମୁନେ ଉତ୍ତର୍ ଇସ୍ କେତ୍ତଡ଼୍, "ହୋ ମହାରାଜା, ନିର୍ବାସିତ୍ ଯିହୁଦାପିଲାକି ତାଗାଙ୍କ୍ ୱେରଣ୍ଡ୍ ଯେ ଦାନିୟେଲ୍, ଅଣ୍ଡ୍ ନିକିଙ୍କ୍ କି ନିଇ ସାଇନ୍ ପାର୍ୱେ ଚିଟିତିଙ୍କ୍ ମନା ମାଡ଼୍ଡ଼ଣ୍ଡ୍, ମାତର୍ ଅଣ୍ଡ୍ ଦିନ୍ତିଙ୍କ୍ ମୁଣ୍ଡ୍ଦାମ୍ ପ୍ରାତନା ମାଡ଼ିତଣ୍ଡ୍।"
14 ଆସୁଙ୍କ୍ ରାଜାଲ୍ ଇଦ୍ ଗଟ୍ କେଞ୍ଜି ଗାଟି ଅସନ୍ତୁଷ୍ଟ ଆତ୍ତଣ୍ଡ୍, ମେଣ୍ଡେ ଦାନିୟେଲ୍ତିଙ୍କ୍ ଉଦ୍ଦାର୍ ମାଡ଼ାନ୍ ସେଙ୍ଗେ ଅନ୍ ବିଷୟତେ ମାନ୍ ଇତ୍ତଣ୍ଡ୍; ମେଣ୍ଡେ, ଅଙ୍କ୍ ରକ୍ଷା ମାଡ଼ାନ୍ ସେଙ୍ଗେ ପଡ଼ଦ୍ପେଇନା ଜାକ ଚେଷ୍ଟା ମାଡ଼୍ତଣ୍ଡ୍। 15 ଆସୁଙ୍କ୍ ଆ ନାରୁଡ଼୍ ରାଜାନ୍ ପାକେ ଅଣ୍ଡୟାଗ୍ ଆସ୍ ରାଜାଙ୍କ୍ କେତ୍ତଡ଼୍, ହୋ ମହାରାଜା, ନିମେପୁନ୍, ରାଜାଲ୍ ବେନ୍ ମନା ମାଡ଼ାନ୍ ଆଦେଶ୍ କି ନିୟମ୍ ତିଆର୍ ମାଡ଼୍ତଣ୍ଡ୍, ଆଦ୍ ଯେ ବଦଲ୍ଆଦ୍ଦେ ପାର୍ୱ, ମାଦୀୟ ନୁ ପାରସିକନଡ଼୍ ଇଦ୍ଲେକାମ୍ ଅଣ୍ଡୟ୍ ନିୟମ୍ ମିନ୍ଦେ।
16 ଆସୁଙ୍କ୍ ରାଜାଲ୍ ଆଦେଶ୍ ମାଡ଼ାନ୍ୱେଲେ, ଅଡ଼୍ ଦାନିୟେଲ୍ତିଙ୍କ୍ ତାସ୍ ଡୁୱୁକିନ୍ ପାଡ଼୍କିନାଗ୍ ହେସ୍ତଡ଼୍। ମେଣ୍ଡେ, ରାଜାଲ୍ ଦାନିୟେଲ୍ତିଙ୍କ୍ କେତ୍ତଣ୍ଡ୍, ନିମେ ସତ୍ ବେନ୍ ପରମେଶ୍ୱର୍ତିଙ୍କ୍ ସେବା ମାଡ଼ୁତିନ୍, ଅଣ୍ଡ୍ ନିକିଙ୍କ୍ ଉଦ୍ଦାର୍ ମାଡ଼ିତଣ୍ଡ୍। 17 ମେଣ୍ଡେ, ୱେରଡ଼୍ କାଲ୍ତାସ୍ ପାଡ଼୍କିନାଗ୍ ମିସିତ୍ତଡ଼୍; ମେଣ୍ଡେ, ଦାନିୟେଲ୍ତେ ବିଷୟ୍ତେ ବେଲାନ୍ ବାତେବା ପରିବର୍ତ୍ତନ୍ ଆୟ, ଅଦିନ୍ ସେଙ୍ଗେ ରାଜା ନିଜେତ୍ ମୁଦ୍ରାତେ ନୁ ତାନ୍ ନାରୁଡ଼୍ମାନେମ୍ ଆଦାନ୍ ସିଲ୍ ରେତ୍ତଣ୍ଡ। 18 ଆଲାନ୍ ଆତ୍ତେ ପେର୍କେ ରାଜାଲ୍ ତାନ୍ ଅଟ୍ଟାଳିତାକ୍ ଆଞ୍ଜ୍ ଉପବାସ୍ତେ ନାର୍କା ମାତ୍ତଣ୍ଡ୍ ନୁ ପେଞ୍ଚାନ୍ ଜିନିଷ୍ ଅନ୍ ପାକେ ତାଡ଼ଡ଼୍; ମେଣ୍ଡେ, ଅଙ୍କ୍ ଉସ୍କାଡ଼୍ ୱାଡ଼୍ଡ଼।
19 ତାନ୍ପେର୍କେ ରାଜାଲ୍ ନାର୍କୁକ୍ ତେଦି ଯାପେ ଡ଼ୁୱୁକିନ୍ ପାଡ଼୍କିନାଗ୍ ଆତ୍ତଣ୍ଡ୍। 20 ମେଣ୍ଡେ, ଅଣ୍ଡ୍ ଗୁଇନ୍ଦେତ୍ ଗାରେ ଦାନିୟେଲ୍ତେ ପାକେ ହେଉସ୍ ଗାଟି ଲେଙ୍ଗ୍ଦେ କାର୍ଙ୍ଗ୍ତଣ୍ଡ୍; ରାଜା ଦାନିୟେଲ୍ତିଙ୍କ୍ କେତ୍ତଣ୍ଡ୍, ହୋ ଜିଉମନ୍ଦାନ୍ ପରମେଶ୍ୱର୍ତେ ସେବକ ଦାନିୟେଲ୍, ନିମେ ସତ୍ ବେନନ୍ ସେବା ମାଡ଼ୁତିନ୍, ନି ଆ ପରମେଶ୍ୱର୍ ଡ଼ୁୱୁକିନାଗାଙ୍କ୍ ନିକିଙ୍କ୍ ଉଦ୍ଦାର୍ ମାଡ଼ାନଙ୍କ୍ କି ପାର୍ତଣ୍ଡ୍ ?
21 ଆସୁଙ୍କ୍ ଦାନିୟେଲ୍ ରାଜାଙ୍କ୍ କେତ୍ତଣ୍ଡ୍, ହୋ ମହାରାଜା, ସାରେ ଦିନା ବାଦ୍କିଣ୍ଡ୍। 22 ନା ପରମେଶ୍ୱର୍ ତାନ୍ ଦୂତକିଙ୍କ୍ ରଇସ୍ ଡ଼ୁୱୁକିନ୍ ମକମ୍କିଙ୍କ୍ ବନ୍ଦ ମାଡ଼ିମିନ୍ଦେଣ୍ଡ୍ ନୁ ଆୱୁ ନାକିଂଙ୍କ୍ ଚିହ୍ନା ମାଡ଼୍ଡ଼; ବାତେଙ୍କ୍ଇତ୍କେ ଅନ୍ ମୁନେ ନାୟାଦ୍ ନିର୍ଦ୍ଦୋଷ୍କି ତନ୍ଦ୍ତା; ମେଣ୍ଡେ, ହୋ ମହାରାଜା, ନାନେ ନି ପାକେ ବାତେବା ବୁଲ୍ ମାଡ଼ନ୍।
23 ଆସୁଙ୍କ୍ ରାଜାଲ୍ ଗାଟି ୱେଡ଼୍କେ ଆସ୍ ଦାନିୟେଲ୍ତିଙ୍କ୍ ଗୁଇନ୍ଦେତାଗାଙ୍କ୍ ତେସ୍ ତାତାନଙ୍କ୍ ଆଦେଶ୍ ଇତ୍ତଣ୍ଡ୍। ଆସୁଙ୍କ୍ ଦାନିୟେଲ୍ ପାଡ଼୍କିନାଗ୍ ତେତ୍ତଡ଼୍ ନୁ ଅନ୍ ମେନ୍ଦୁଲ୍ତାଗ୍ ବାତେବା ଚିହ୍ନେ ତନ୍ଦ, ବାତେଙ୍କ୍ଇତ୍କେ ଅଣ୍ଡ୍ ତାନ୍ ପରମେଶ୍ୱର୍ତାଗ୍ ବିଶ୍ୱାସ୍ ମାଡ଼ିମାତ୍ତଣ୍ଡ୍। 24 ତାନ୍ପେର୍କେ ରାଜାଲ୍ କେତ୍ତଣ୍ଡ୍, ନାରୁଡ଼୍ ଦାନିୟେଲ୍ତେ ଅପବାଦ୍ ମାଡ଼ାନଡ଼୍କିଙ୍କ୍ ତାସ୍, ଅଡ଼୍କିଂଙ୍କ୍, ଅଡ଼୍ ପେକଡ଼୍ ନୁ ପିକିଙ୍କ୍ ଅଡ଼୍ ମୁତେକିଙ୍କ୍ ଡ଼ୁୱୁକିନ୍ ପାଡ଼୍କିନାଗ୍ ହେସ୍ତଡ଼୍; ମେଣ୍ଡେ, ଅଡ଼୍ ପାଡ଼୍କିନାଗ୍ ମଦଲ୍ ରାଲ୍ୱାକେ ଡ଼ୁୱୁକ୍ ଅଡ଼୍କିଂଙ୍କ୍ ଆକ୍ରମନ୍ ମାଡ଼ି ଅଡ଼ାୱୁ ମେନ୍ଦୁତିଙ୍କ୍ ଗୁଣ୍ଡାଲ୍ ମାଡ଼୍ତା। 25 ଆସୁଙ୍କ୍ ଦାରିୟାବସ ସାରେ ପୃଥିବୀତେ ନାରୁଡ଼୍, ସାରେ ଗୋଷ୍ଠି, ଦେଶ୍ବାସୀଡ଼୍ ନୁ ବାଷାବାଦିନଡ଼୍ ପାକେ ଚିଟି ଲେକ୍ତଣ୍ଡ୍; "ମି ପରୁ ନାର୍ଗେ ଲେକାମ୍ ଶାନ୍ତି ଆୟି।" 26 ନାନେ ଇଦ୍ ଆଦେଶ୍ କେତୁତାନ୍ ଯେ, ନା ରାଜ୍ୟତେ ସାରେ ଦେଶତେ ନାରୁଡ଼୍ ଦାନିୟେଲ୍ତେ ପରମେଶ୍ୱର୍ତେ ମୁନେ ୱାଡ଼୍କିଡ଼୍ ନୁ ୱେର୍ୟିଡ଼୍;
ବାତେଙ୍କ୍ଇତ୍କେ ଅଣ୍ଡ୍ ଜିୱେ ପରମେଶ୍ୱର୍ ନୁ ସାରେ ଦିନାତଣ୍ଡ୍ ନୁ ଅନ୍ ରାଜ୍ୟ ବେସୁଙ୍କ୍ ବା ନଷ୍ଟ ଆୟ; ମେଣ୍ଡେ ଅନ୍ ଅଦିକାର୍ ଶେଷ ଯାକ ହିଁ ମାନ୍ତେ। 27 ଅଣ୍ଡ୍ ଉଦ୍ଦାର୍ ମାଡ଼ିତଣ୍ଡ୍ ନୁ ରକ୍ଷା ମାଡ଼ିତଣ୍ଡ୍, ମେଣ୍ଡେ ଅଣ୍ଡ୍ ସ୍ୱର୍ଗତାଗ୍ ନୁ ପୃତିବିତାଗ୍ ଚିହ୍ନେ ନୁ ବାକ୍ୱା କାମ୍ ମାଡ଼୍ତଣ୍ଡ୍; ଅଣ୍ଡ୍ ଦାନିୟେଲ୍ତିଙ୍କ୍ ଡ଼ୁୱୁକିନାଗାଙ୍କ୍ ଉଦ୍ଦାର୍ ମାଡ଼ିମିନ୍ଦେଣ୍ଡ୍। 28 ଇଦ୍ଲେକାମ୍ ଦାନିୟେଲ୍ ଦାରିୟାବସତେ ରାଜତ୍ୱ ସମୟତେ ନୁ ପାରସୀକ ନୁ କୋରସ୍ତେ ରାଜ୍ ସମୟତେ ନାର୍ଗେ ଲାବ୍ ମାଡ଼୍ତଡ଼୍।
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)