Lucas 15

Yagl ta wam wau bogl, ede ikne yugomugl ugwa ka ebrie

11 Ana Jisas ka yegl di pai moglsre, ta ama yegl dugwa, Aglke ta yagl ta moglkwa, ye wam suo miuriwe dugwa. 12 Ye wam suo miurka ba wam okuo ye pi nem di te, yegl dugwa, Nina yo, ene gogln, na ene makanen ya taraglnen inaglka panabere i, erme yubu si naro! di, yegl dugwa. Yegl dugo, yagl i kanige ere, taraglmo mudu yubu si, wam suo i tomiwe dugwa.

13 Ana yubu si togo, ye wam okuo ege sugunagle keme mogl, ye nem makanmo ya taraglmo togwa ikra, mudu topo bogl idre, ede kantri eglke ta enagledi ede ogwa. Ye kantri eglke ta omara i, ye migemo mabuno gua gua mina ere ede ogwa, dudugwa. 14 Ye migemo dudugwa igne, ye kantri ta moglmara i, ama kidan podo yogwa. Kidan podo yogo, ye migemo ta yoko yenan, ye kaya mokna i nenabuka ta manugo, kidan podo goglkwa. 15 Ye kidan goglsre, ede pi makan nem ta moglmara pidre, kogon eragledi di pruko, makan nem i ye bugla ere kuglmara buglamo kaya mokna tenabedi dedugwa. 16 Ye dedugo, pi kaya mokna kie bugla te moglsre, kidan podo goglkwa pre ye ama kie i nenagledi prukwa. Prukwa ba makan nem swara ta ye kaya mokna nenabedi ta tekrime dugwa.

17 Ana wam okuo i kidan yegl goglsre, kogon ere moglmara i, nomane kor ta yugwa. Nomane kor ta idre, yegl kina gudu prukwa, Na nina niglmo kogonmo yoba i, ege ege kaya mokna podo nedre, dano eruko, ikne moglade yei, yegl erikwa ba na po pai, goraglka pamiwe di, yegl di kina gudu prukwa. 18 Yegl prisre, ye, Na ede ikne nina moglmara pidre, na yegl dinaluwedi prukwa, Nina yo, erme God gumuglo mina ya ene gumugln mina na tadaglme eriwa. 19 Ene erme na wana we dinatnga i, kuno ta erekrukwa pre ene na wana we dikitn, na nigl kogonen yoba mere yegl moraluwe di, yegl dinagledi kina gudu prukwa. 20 Yegl prisre, ye ede ikne nem moglmara enagledi ede ome dugwa.

Ana wam ikra ede ikne nem moglmara enagledi ede ogwa. Ye nem kipamara ede magigl ogo, nem kan eglke iro ede, wam i ugo, kandre, mirie gogl, muku di ede pi ye wam umara pidre, kogl kare di, nugu kugro, pauna si nogwa. 21 Yegl eruko, wam ye nem di tedre, Nina yo, na God gumuglo mina ya ene gumugln mina tadaglme erika pre ene erme Na wana we dinatnga i, kuno ta erekrumiwe di, yegl dugwa. 22 Wam yegl dugwa ba nem mirie goglkwa pre ye niglmo kogonmo yoba meglkwa i di te, yegl dugwa, Ene tabre pidre, ir gagl olto wakai kaima ta yenabuka i, yu na wana ede tedre, ogo ring ya kagle towo ta yenabuka i yu ede teo dugwa. 23 Yegl didre, ama yegl di togwa, Ene pi kau nagigle gumamugl ta kuglka moglkwa i, yu si kebi, nono pra pra nedre, gun yenamniwe dugwa. 24 I siragl pre na wana i, goglmedi prika ba adigl u kor ogwa mere yegl paugwa. Te, ye wau boglkwa ba erme aglke ede ikne umiwe dugwa. Yegl dugo, niglmo kogonmo yoba bogl akie makai si, kaya mokna kei, gun yemiwe di, Jisas yegl dugwa.

25 Ana kaya mokna ne, gun yei meglko, yagl i wam komono kaya mokna ere yaiglmara wan moglkwa. Ye kogon ere wan ede ikne kipamara magigl udre, prukwa i, ye gigagle di, katno egre meglkwa prisre, 26 ye nigl kogon yoba ta magigl moglkwa i ye di pre, siragl taragl plau dugwa i pragledi kira pogl prukwa. 27 Kira pogl pruko, nigl kogon yagl i ere mogl, agigle komono i di te, Ene agitn okuo ikra we, kor mogl, ede ikne umiwa. Yegl pre ene nen, gun yei, kau nagigle gumamugl ta kuglkwa ikra si keigo, nedre, gun yeimiwe di, nigl kogon yoba yegl dume dugwa.

28 Jisas ka yegl didre, ama yegl dugwa, Yoba i kaya mokna ne, gun yei ere meglkwa ba ye wam komono dem kubro, ede yugugl enakiurukwa. Yegl erukwa pre ye nem ede meda u, wam komono dem muduo aragan erabedi ka wakai di togwa 29 ba ye wam komono nem di te, yegl dugwa, Nina yo, ene pro! Na bugla yugu tau mere ene kogonen ere tedre, ege swara ta kanen sedekriwa. Yegl erika ba ene ege swara ta taragl kebra, meme nagigle mere yegl ta na kabaglena bogl si kei ne, gun yenaiglmedi pre ta narekitnga. 30 Ba ene wan okuo ene migenen mudu i pi, konbauna abu te ede ogo, dudugo, ye aglke ede ikne ugwa ba ene kau nagigle gumamugl ta kuglnga ikra si kei teniwe dugwa. 31 Yegl dugo, ye nem wam komono di te, yegl dugwa, Wana yo, ene ege ege akie mugliwa. Te, na taraglnana ta yogwa i, mudu ene pre yomiwa. 32 Yogwa ba erme we, nono kaya mokna kedre, gun yenabuglka pamiwe dugwa. I siragl pre agitn okuo wau bogl, gorabuka ba erme ede ikne ugwa i, adigl u kor ogwa mere yegl pamiwe di, yagl i wam komono yegl di tomiwe di, Jisas yegl dugwa.