Matyu 2

Yagl kade tau Jisas kanamnedi wigwa

1 Ana yagl ta kagie Herot we digwa i king moglkwa igne, Maria ere mogl, distrik Judia suna, dumo kebra Betlehem we dimara i, Jisas kuglkwa. Igne i, Yagl tau ade umara nem bitno podo paugo, kugl kuri kandre, nomane igwa yoba meglkwa i, ede Jerusalem udre, ye yoba tau yegl di prikwa, 2 Gak ta mam erme gak kuglkwa Juda yoba kingno moglkwa i aglo moglme? digwa. No ade umara kra munga igne, kugl kuri kor ta plau dugwa kandre, ye moglmedi diu pamedi pre, ye kagie kade tenamnedi umniwe di, yegl digwa. 3 Yagl kade wagle i kira yegl pogl pre wan meglko, yoba tau ye ka digwa i prisre, king Herot di teigwa. Di teigo, Herot prisre, nomane podo sugwa. Ye nomane sugo, yoba mudu Jerusalem kipai meglkwa i ama nomane sigwa. 4 Ana Herot nomane sidre, ye tawa teigwa yoba bitno meglkwa i ya God lomo beke teigwa yoba di makai sidre, kira yegl poglkwa, God Kere Yugwa Yagle Krais unabe digwa i, mam ye dumo aglo kurabe dime? di, yegl dugwa. 5 Yegl dugo, ye di ikne ede te, yegl digwa, Ye mam dumo kebra Betlehem, distrik Judia suna i kurabe digwa. I siragl pre ka kep yoba ta yegl boglkwa,

6 Dumo Betlehem we digwa, distrik Judia suna yogwa i, kagie paugwa. Dumo tau Judia suna ama kagno paigwa ba dumo Betlehem kagie kade paugwa. I siragl pre dumo i mina Yagl Kade ta udre, yoba sipsip sugl meglmere mere na yobanama Israel yoba sugl morabiwe*2.6 Maika 5.2-4

di, ka kep yoba yegl dumiwe di, di ikne ede teigwa.

7 Di ikne ede Herot di teigo, Herot yagl ade umara kra mogl wigwa ikra yene pere ekrike mogl, ka di pramnedi agle dugo, wigwa. Wigo, Herot ye kugl kuri pre digwa i aunake plau dumedi kira pogl prukwa. 8 Kira pogl prisre, yagl wagle i ede dumo Betlehem enaiglmedi dedidre, ye yegl di togwa, Ene ede pi gak kebra i, wakai ere doko kanio! Ene doko kandre, na moglmara u, ye aglo moglkwa i di naraiglkwa. Ene ede ikne u, di naribi, na ama pi, ye kagie kade tenaglka pre diwe di, yegl dugwa.

9,10 Ana yagl kade wagle i king kamo prisre, ede eigwa. Ye pi moglsre, kugl kuri ta ye okna ade umara kra moglsre, kanigwa ikra aglke kor kandre, gun podo kide kaima yeigwa. Gun podo kide kaima yeigo, kugl kuri i ede okna pidre, gak kebra pai moglmara mitna ibo pi pai moglkwa. 11 Pai moglko, yagl wagle i ede yugugl pi, yagl gak mam Maria bogl miurko, kanigwa. Kandre, ye yage goglkono bodugl, bitno i pi makan mina yedre, yagl gak Jisas kagie kade teigwa. Kagie kade tedre, ye taragl mige podo boglkwa tau gre yuigwa i, i meda edidre, ye teigwa. Ye taragl tau teigwa i, gol ya ede suo nuglo demene wakai erukwa teigwa. Ede nuglo ta, kagie frankinsens we digwa. Te, ta, kagie myr we digwa. 12 Ana ye taragl i Jisas tedre, ye ede ikne Herot moglmara pikre, konbo pere ta mina ede ikne yugunomugl eigwa. God okna ugl kubu mina ye di te, Ede ikne Herot moglmara pikrio! dugwa pre yegl erikwa.