1 Baho mwiga zangu, kwa mbuli ya nhunza za muhe wa Mulungu nolonda mzimanye goya mbuli zino. 2 Movimanya kua, vumkalile mng'hali hamnammanya Mulungu, mukala mlongozigwa na kufugamila milungu ya nyang'iti ilibule ugima.

3 Baho mvimanye kua, munhu yoyose yolongozigwa na Muhe wa Mulungu hadaha kulonga, "Yesu yenukiligwe! Na ivija munhu yoyose ija halongozigwa na Muhe wa Mulungu hadaha kulonga, "Yesu ni Mndewa," kama halongozigwe na Muhe wa Mulungu.

4 Hana nhunza hakwehakwe, mbali yoolava ni Muhe wa Mulungu ni iyoiyo imwe. 5 Kaidi hana nzila nyingi za kumsang'hanila Mndewa, mbali Mndewa yosang'haniligwa ni iija imwe. 6 Hana nzila hakwehakwe za kusang'hana sang'hano za Mulungu, mbali Mulungu iija imwe yodahiza kusang'hana mbuli zose. 7 Chila munhu Muhe wa Mulungu komwing'ha nhunza ya komtaza kusang'hana sang'hano ili chila munhu yawataze wamwenga. 8 Muhe wa Mulungu komwing'ha munhu imwe kulonga kwa nzewele, na imwenga kulonga kwa umanyi, nhunza zino zolavigwa na Muhe wa Mulungu iyoiyo kama viyalonda. 9 Muhe iyoiyo komwing'ha munhu imwe udaho mkulu wa kumtogola Mulungu, na Muhe iyoiyo komwing'ha imwenga nhunza ya kuhonya. 10 Muhe komwing'ha munhu udaho wa kusang'hana mbuli za uzonza, imwenga kulonga Usenga wa Mulungu, imwenga udaho wa kufambula nhunza zija zilawa kwa Muhe wa Mulungu na zija hazilawa kwa Muhe wa Mulungu, komwing'ha imwe udaho wa kulonga ulonzi wa wanhu wamwenga, na imwenga udaho wa kufambula ulonzi uwo. 11 Zose izo ni sang'hano za Muhe iija imwe, ija yomwing'ha chila munhu nhunza hakwehakwe kama viyolonda mwenyego.

12 Lukuli una vilungo vingi, mbali vilungo ivo vingi wotenda lukuli umwe, baho kama lukuli vuwili ivo vuwili kwa Kilisito. 13 Cheye chahawa Wayahudi, hebu Wayunani, watumwa hebu wanhu hawali watumwa, chose chibatizigwa kwa Muhe iyo umwe mulukuli uwo umwe, na chose ching'higwa Muhe iyo imwe.

14 Kwavija lukuli hauli chilungo chimwe tu, mbali vilungo vingi. 15 Kama mgulu wahailongela, "Kwa vija niye sio mkono, baho niye sio walukuli," ivo, kwakulonga ivo, iyo yotenda mgulu sio lukuli? 16 Najo gutwi dahalonga, "Kwa vija niye sio siso, ivo,kwa kulonga ivo, iyo kulonga sio lukuli," ? 17 Kama lukuli wose wahawa siso, ihawilize kuhulika? Na kama lukuli wose wahawile gutwi, ihawileze kunusa? 18 Mbali kama viili, Mulungu kavika vilungo hakwehakwe valukuli kama viyalondile. 19 Kama vilungo vose vahawile chilungo chimwe, lukuli wahawile kulihi! 20 Ukweli uo uno vilungo ni vingi ila lukuli lumwe.

21 Kwaivo, siso hadidaha kuulongela mkono, "Gweye uko sikulonda," hebu ditwi hadidaha kugalongela magulu, "Mweye uko siwalonda!" 22 Ila vilungo vioneka havidaha kutaza ivo vilondeka ng'hani, 23 kaidi vija vilungo va lukuli vioneka ni vakuzeleuligwa ivo choving'ha nhogolwa, navo vilungo vetu va lukuli vija vooneka vogala chilanya, ivo chovika goya ng'hani, 24 vilungo vetu vili na nhogolwa havilonda kwin‘igwa goya kama vimwenga. Mbali Mulungu mwenyego kawika goya vilungo va lukuli, vilungo vija vozeleuligwa koving'ha nhogolwa. 25 Ili sekekulawile kuibagula muulukuli, mbali vilungo vose vitende sang'hano hamwe. 26 Kama chilungo chimwe chhalumila, vose volumila hamwe na icho. Kaidi chilungo chimwe chiheng' higwa nhogolwa, vose vodeng' helela hamwe na icho.

27 Baho, mweye wose ni lukuli lwa Kilisito, chila munhu ni chilungo cha uwo lukuli. 28 Mdibumbila da wamtogole Kilisito, Mulungu keka chila chinhu goya, mosi wasenga wa Mulungu, kaidi waligulaji Usenga wa Mulungu, amala keka wafundaji, hamwande keka waja wosang'hana uzonza, weli na nhunza ya kuhonya watamu, weli na nhunza ya kuwataza wamwenga, weli na nhunza ya kulongoza na weli na nhunza ya kulonga ulonzi wa wamwenga. 29 Ivo, wanhu wose ni wasenga wa Mulungu? Hebu wose ni waligulaji wa usenga wa Mulungu? Hebu wose ni wafundaji? Hebu wose ni weli na nhunza ya kusang'hana uzonza? 30 Hebu wose wana nhunza ya kuhonya? Hebu kulonga ulonzi wa wamwenga? Hebu kufambula ulonzi? 31 Baho muiyohe kulonda nhunza ng'hulu. Kaidi nolonda kuwalongela vija viifaya kusang'hana vinogile ng'hani.