1 Yodahikaze mtogola Kilisito yahagomba na miage kumlongeleza mtogola Kilisito miage mchitala cha wanhu hawammanyile Mulungu? Ivo halondeka kumgala kwa wamtogole Kilisito wayage ili wamlamule?

2 Ivo, hamvimanya kua wanhu wamtogole Kilisito iyo wowalamula wanhu wa isi ino? Kama mweye mumtogola Kilisito modaha kulamula wanhu wa isi ino mopotwaze kulamula mbuli ndodo mmwenu? 3 Ivo, hamvimanyile kua, hata kama chihalamula mbuli za chila zua, chowalamula hata watumigwa wa kwa Mulungu? 4 Mwahagomba kwa mbuli za mazoela, na habali mozigala mbuli zenu kwa walamuzi waja hawatogoligwa na wamtogole Kilisito? 5 Chinyala kumwenu! Iyo kulonga habule hata muhnu imwe mmwenu yeli na nzewele yadahile kulamula mbuli za wamtogole Kilisito? 6 Mbali mweye muna mazoela ga munhu kumlongeleza mtogola Kilisito miage kwa waja hawamtogole Kilisito.

7 Kweli, vumuilongeleza wenyego kwa wenyego kolagusa kua mpotigwa kabisa! Ivo, ihawile goya ng'hani kumwenu kutendiligwa gehile? Ivo, ihawile goya ng'hani kumwenu kubunzigwa vinhu venu? 8 Mbali, badili yake, mweye iyo mowabunza wanhu na kuwaboka kaidi gago mowatendela wamtogole Kilisito wayenu! 9 Sekemuivwizile, hammanyile kua wanhu wowatendela gehile wabule nyafasi ya muufaume wa Mulungu. Nolonga kwa mbuli ya weli na luhadu, wofugamila milungu ya nyang'iti hebu wagoni hebu woisola walume kwa walume 10 hebu wabavi na wamelo na wakoligwe na vibilikizi na wabokaji wose hondawengile muufume wa Mulungu. 11 Wamwenga wenu mkala ivo, mbali sambi msunhigwa ubananzi wenu na mtendigwa wanhu wa Mulungu, na kutendigwa wana wanogile na mulumbigwa na Mulungu kwa kubitila Mndewa Yesu Kilisito na kwa Muhe wa Mulungu wetu.

12 Munhu imwe mmwenu kodaha kulonga, "Kumwangu niye chila chinhu chofaya." Ena, mbali sio chila chinu chofaya kumwenu. Ena chila chinhu chofaya kumwangu, mbali silonda nilongozigwe na chinhu chochose. 13 Munhu imwenga mmwenu kolonga, "Haja chihawa na nzala cholondeka kuja, kwavija ng'huli zolonda ndia." Ena ivoili, mbali chokwiza chipindi Mulungu kohindula ng'huli zetu zokua hazilonda ndia. Mbali sambi sekemulonge kua molondeka kutenda ugoni. 14 Baho, Mulungu kokwiza kuchizilibula na cheye kwa udaho wake kama viyamzilibule Mndewa Yesu kulawa muiifa.

15 Ivo, hammanyile kua ng'huli zenu ni vilungo va lukuli lwa Kilisito? Ivo, chilungo cha lukuli lwa kilisito kodaha kwika lukuli lumwe na munhu yeli na luhadu? Habule! 16 Munhu yotenda ugoni kokua lukuli lumwe na yeli na luhadu. Kama Mayandiko vigandikigwe, "Waidi wano wokua lukuli lumwe." 17 Mbali munhu yoyose yailumbile na Mndewa kokua muhe umwe na Mndewa.

18 Inegeni kabisa na ugoni. Malozo gamwenga gose gotendigwa muinzewele ya munhu na sio mulukuli mbali mgoni kotenda malozo mulukuli lwake mwenyego. 19 Ivo, hammanyile kua ng'huli zenu ni ng'anda ya Muhe wa Mulungu yokala mgati yenu, ija imumbokele kulawa kwa Mulungu? Ng'uli zenu sio yenu wenyewe ila mwenyego ni Mulungu, 20 mguligwa kwa bei ng'hulu. Kwaivo, zisang'hanileni ng'huli zenu kwa mbuli ya kumfugamila Mulungu.