1 Munhu yachione cheye kua wasenga wa Kilisito ching'higwe sang'hano ya kuligula usenga uja Mulungu yang'hali hanawalongela wanhu. 2 Munhu yoyose ija yeng'higwe kusang'hana sang'hano za Mulungu kolondeka yawe wakutogoligwa. 3 Hamwangu niye sio chinhu nihalamuligwa na mweye kama nisang'hana sang'hano vinogile hebu vihile na chitala cha wanhu, siilamula mwenego ila noiona kua nabule mbuli, 4 kwavija silamuligwa kwa jojose, mbali ijo hadinitenda kua nabule mbuli. Mndewa iyo yonilamula. 5 Baho sekemumlamule munhu yoyose yahawa chipindi chake ching'hali. Lekeni mbaka vonda yeze Mndewa, iyo kozifisula mbuli zili mdiziza na kulagusa hazelu vija wanhu viwogesa. Baho chila munhu kobokela nhogolwa ilondeka kulawa kwa Mulungu kwa gayasang'hane.

6 Mbwiga zangu, gago gose ganilongile kwa mbuli ya Apolo na gangu mwenyego ili gawataze, icho chilaguso kumwenu, nisang'hana vino ili mpate kufundigwa na cheye ili muumanye ulonzi uno vuulonga, "Mgagoge goya gaja gandikigwe." Yoyose mmwenu seke yaikunge kwa munhu imwe na kumzeleu imwenga. 7 Yelihi yakutendile kofaya kubita wamwenga? Ivo, hana chinhu gani chija gweye hwing'higwe? Kama kwing'higwa habali koigodela kama vija hwing'higwe?

8 Ena, moiona kua mwiguta? Moiona kua wazenzi? Moiona kua wafaume bila cheye, maza yahawile goya kama mwahawile kweli wafaume ili na cheye chihalongoze hamwe na mweye. 9 Nogesa Mulungu kachitenda cheye watumigwa chiwe wanhu wa chikomelezo kabisa, kama wanhu walamuligwe kukomigwa, kwavija cheye chooneka wanhu wa wakuzehigwa wa kuloligwa na wanhu wa isi zose, na ha watumigwa wa kwa kuulanga kwa Mulungu na wanhu. 10 Wanhu wochiona cheye chawabozi kwa mbuli ya Kilisito, mbali mweye iyo mli na nzewele vumuuilumbile na Kilisito! Cheye china uzidilwa, mbali mweye moiona mna ludabwa. Cheye wochizeleu mbali mweye moiona wakutogoligwa. 11 Mbaka vino sambi cheye china nzala na ng'ilu, chabule chivalo, chotoigwa mang'hua na chabule hakuwasa, 12 choiyoha kusang'hana sang'hano zetu kwa makono getu wenyego. Chahaligigwa, chowapulila ganogile ga Mulungu wao wochiliga, chahaoneligwa cheye chofunya moyo, 13 chahalongwa vihile kwa gaja hachigatendile, chowedika goya. Mbaka sambi chitendigwa kama unyolodo wa muuisi na chila munhu kuchiona cheye hachifaya chinhu!

14 Sizandika mbuli zino kwa kuwagela chinyala, mbali kwa mbuli ya kuwafunda mweye wanangu wa wende. 15 Hata mwahawa na maelufu ya wanhu wa kuwagalila Usenga Unogile, Tata yenu ni imwe tu. Kwa vija kubitila kuilumba na Kilisito niye iyo niwalelile kubitila kuligula Usenga Unogile. 16 Ivo, nompuleni mnige niye vinisang'hana. 17 Kwa mbuli iyo nimlagiza Timoteo kumwenu, iyo mwanangu wa wende na yotogolingwa kubitila kuilumba na Mndewa. Nimtuma ili yawe kowakumbusa gaja ganiwinza kubitila Kilisito Yesu, gaja ganifunda wanhu mmabumbila gose ga wamtogole Kilisito.

18 Wamwenga wenu wasonga udulu wagesa kua niye siza kaidi kumwenu. 19 Mbali Mndewa yahalonda, nolopola nokwiza kumwenu, na baho honda niionele mwenyego sio tu chija chowodaha kulonga wao wadulu, mbali ivija kuumanya udaho wao wakumtogola Kilisito. 20 Ufaume wa Mulungu sio tu mbuli ya kulonga kuiyeka, ila kua na udaho wa Mulungu ivija. 21 Molonda nhende choni? Nize na luboko hebu nize kwa moyo wa wende na uhole?