1 Yolongeleka kua hana mbuli ya luhadu mmwenu, kaidi ni luhadu wihile uja haunalawilila hata kwa wanhu waja hawammanyile Mulungu. Nilongiligwa kua imwe mmwenu kowasa na mwehe wa tata yake! 2 Modahaze kuikunga? Maza yahawile yofaya ng'hani kumwenu kua na giogio na kumsegeza mmwenu munhu iyo. 3 Hata kama nahatali na mweye kumli, mbali kwa Muhe na hamwe na mweye, kama vija nikala baho na nimala kumlamula munhu yatendile mbuli iyo ya chinyala. 4 Chipindi vonda muilumbe hamwe kwa kumfugamila Mndewa Yesu, na niye nahamwe na mweye kwa muhe, baho kubitila muhe wa Mndewa wetu Yesu, 5 mwing'heni Mwenembago munhu iyo ili lukuli lwake ubanangingwe na muhe wake udahe kuloholigwa mdizua dija da Mndewa.

6 Kuikunga kwenu hakufaya! Ivo, hammanyile kua, "Hamila chidogo yosasula bulunge jose da usage wa ngano." 7 Ivo muwe moinang'hana mmoyo kwa kumbagula munhu mbananzi mmwenu kama kulava hamila ya mwaka, mbali muwe kama bulunge da ngano da sambi dilibule hamila. Vino ivo mwili, kwavija Mulungu kamlava Kilisito yawe kama mwana bung'hukilalo wetu wa Pasaka kalavigwa yawe nhosa ili yachilohole. 8 Sambi chileke kuja ndia ya Pasaka kwa hamila ya mwaka, manake ubananzi na malozo, mbali chije ndia kwa migate ilibule hamila iyo moyo unang'hane na kweli.

9 Muibalua yangu iniwandikile sekemuilumbe na wagoni. 10 Sio kama mleke kuilumba na wanhu wose muiisi, na wamwenga kama wagoni hebu wamelo na wavwizi, hebu waja wofugamila milungu ya nyang'iti. Kwavija kwa kusang'hana ivo mkala molondeka kuhalawa muiisi ino dimwe kwa dimwe. 11 Chinyandike ni chino sekemuilumbe na munhu mkilisito yeli mgoni hebu mgila hebu yofugamila milungu ya nyang'iti hebu msovula ndwagi hebu munhu yokoligwa na mvwizi. Munhu kama iyo hata ndiya sekemje nayo. 12 Ivo, sio sang'hano yangu kuwalamula bumbila da wanhu wamwenga wamtole Kilisito? Baho Mulungu mwenyego kowalamula, mbali nolondeka niwalamule wanhu waja weli mdimbula jenu. Kama Mayandiko vigandikigwe,

13 "Muwingeni mmwenu munhu mbananzi."