1 Iyoheni kua na wende. Ivija iyoheni kubokela nhunza zimwenga za Muhe Mulungu, na muilonde ng'hani nhunza ya kuligula usenga wa Mulungu. 2 Ija yolonga ulonzi wa wamwenga, halonga na wanhu mbali kolonga na Mulungu. Iyo kolonga na Mulungu kwavija habule munhu yochimanya chiolonga. 3 Mbali ija yeli na nhunza ya kuligula usenga wa Mulungu, iyo kolonga na wanhu kwa mbuli ya kuwatenda wanhu wagangamale kwa kumtogola Kilisito, koweng'ha deng'o na kuwagela moyo. 4 Iyo yolonga kwa ulonzi yeng'higwe na Muhe wa Mulungu koitaza mwenyego, mbali yeli na nhunza ya kuligula usenga wa Mulungu, kowataza wamtogole Kilisito.

5 Baho, nilonda mweye mose mlonge kwa ulonzi wa mwing'higwe na Muhe wa Mulungu, mbali niwalonda ng'hani muwe na nhuza ya kuligula usenga wa Mulungu, kwa vija muhnu yeli na nhunza ya kuligula usenga wa Mulungu iyo kofaya ng'hani kubita iyo yolonga ulonzi mwing'higwe na Mulungu, mbali tu kama baho hana munhu wa kufambula mbuli izo zilongigwa ili wanhu wamtogole Kilisito wazimanye mbuli izo. 6 Ivo mweye mbwiga zangu, kama naheza kumwenu na kulonga ulonzi mwing'higwe na Muhe wa Mulungu yomtazeni choni? Hambee haiwafaya chochose, mbali nihawalongeleni gaja Mulungu gayanilongele kwambuli ya umanyi wowose hebu usenga wa Mulungu hebu ufundaji umwenga.

7 Ivoili hata kwa vinhu vilibule ugima vija volava dizi kama vija, filimbi hebu chinanda. Ivo, munhu kodahaze kuumanya wila utoigwa kama vinhu ivo vitoigwa havilava dizi kwa nzila ija ilondeka? 8 Kaidi, kama talumbeta da bung'hukila haditoigwa kwa dizi dilondeka, yelihi yonda yaitande goya kwa mbuli ya bung'hukila? 9 Ivoili, na mweye mwahalonga mbuli hazimanyika, yelihi yonda yavimanye vumlonga? Mbuli zenu zokua za chakachaka tu. 10 Muuisi hana ulonzi hakwehakwe, na habule hata imwe ilibule maana. 11 Mbali kama niye simanya chilongigwa na muhnu imwenga, niye nokua nohulika dizi sidimanyile nayo kokua kohulika dizi hadimanyile kumwangu. 12 Namweye ivija, kwavija molonda kubokela nhunza za Muhe wa Mulungu, iyoheni kubokela vija vitaza kuwagela moyo wamtogole Kilisito.

13 Kwaivo, iyo yolonga ulonzi mwing'higwe na Muhe wa Mulungu yapule yabokele udahi wa kufambula chija chiyalonga. 14 Nihapula kwa ulonzi mwing'higwe na Muhe wa Mulungu, muhe wangu uwo wopula, mbali nzewele zangu hazimanya chinhu. 15 Ivo nhendeze baho? Nokwiza kupula kwa muhe wangu, mbali ivija nokwiza kupula kwa nzewele zangu, nokwiza kwimba kwa muhe wangu, na nokwiza kwimba ivija kwa umanyi wangu. 16 Mbali wahamwing'ha nhogolwa Mulungu kwa muhe wako tu, mlihamwe kumfugamila Mulungu kodahaze kwidikila kumtogola kwako Mulungu kwa kulonga,"Pepa," kama hachimanya chuulonga? 17 Kupula kwako kwa kumwing'ha hewela Mulungu kodahika kua kweli kofaya, mbali kwa iyo munhu imwenga haimfaya chinhu.

18 Nomwing'ha hewela Mulungu kwavija niye nolonga ulonzi mwing'higwe na Muhe wa Mulungu kubita mweye mose. 19 Mbali mui mating'hanilo ga wamtogole Kilisito, nolonda ng'hani kulonga mbuli tano zimanyika ili kuwafunda wamwenga kubita kulonga mbuli elufu mwing'higwe na Muhe wa Mulungu.

20 Mbwiga zangu, sekemuwe kama wana wadodo mzi nhonga zenu, kwa mbuli ya ubananzi, mkali kama ving'hele, mbali mzinhonga zenu molondeka mkale kama wanhu mkangale kumtola Mulungu. 21 Yandikigwa mMulungu Musa,

"Kubitila waja wolonga ulonzi mwing'higwe na Muhe wa Mulungu, Mndewa kolonga, ‘Nolonga na wanhu wanhu. Nolonga kubitila milomo ya nyambenyambe, hata ivo wanhu wangu hondanitegeleze."

22 Ivo baho, nhunza ya kulonga ulonzi mwing'higwe na Muhe wa Mulungu ni chilaguso, sio kwa wanhu wamtogola Kilisito, mbali kwa mbuli ya waja hawamtogole Kilisito, mbali nhunza ya kuligula usenga wa Mulungu ni kwa mbuli ya waja wamtogole Kilisito mbali sio kwa waja hawamtogole Kilisito.

23 Baho, wamtogole Kilisito wahaiting'hanila hamwe na wose wahasonga kulonga ulongi mwing'higwe na Muhe wa Mulungu, na waheza wanhu waja hawatogole hebu waja hawamtogole Kilisito, ivo, haweza kulonga mweye mna vichala? 24 Mbali wose wahauligula usenga wa Mulungu, yaheza munhu miangu na nie hebu hamtogole Kilisito, gose gonda yahulike golagusa mbuli zake zihile. Gose gonda yahulika gomlamula mwenyego, 25 Mbuli zake zifisigwe mmoyo wake zofisuligwa, nayo kotumbala mavindi na kumfugamila Mulungu yolonga, "Kweli Mulungu kahamwe na mweye."

26 Ndugu chilonge choni baho? vuumuiting'hanila hamwe kumfugamila Mulungu, imwe yembe wila, imwenga yawafunde, imwenga yawe na ugubulo kulawa kwa Mulungu, imwenga yatumile nhunza ya kulonga ulonzi mwing'higwe na Muhe wa Mulungu na imwenga yafambule golongiwa. Gose gawe kwa mbuli ya kuwagela moyo wamtogole Kilisito. 27 Wahawa baho wanhu weli na nhunza za kulonga ulonzi mwing'higwe na Muhe wa Mulungu walonge wanhu waidi waidi hebu wadatu, sio kubitiliza, kaidi yalonge imwe imwe, yawe baho munhu wa kufambula golongigwa. 28 Mbali kama habule munhu wa kufambula, baho munhu yoyose yolonga ulonzi mwing'higwe na Muhe wa Mulungu yanyamle hupi, yalonge na muhe wake mwenyego na Mulungu.

29 Na waja weli na nhunza ya kuligula usenga wa Mulungu, walonge wanhu waidi hebu wadatu, na wamwenga wawataze goya zija ziwalonga. 30 Yahawa munhu yahagendelela kulonga na imwenga mwa waja wotegelezaji kabokela ugubulo kulawa kwa Mulungu, baho iyo yolonga yanyamale. 31 Kwavija mose modaha kuligula usenga wa Mulungu, imwe imwe, ili mose mfundigwe na kugeligwa moyo. 32 Nhunza ya kuligula usenga wa Mulungu cholondeka chilongozigwe na iyo yeli na nhunza, 33 kwavija Mulungu si Mulungu wa ndwagi ila wa utindiwala.

Kama viili mwa wamtogole Kilisito wose Mzing'anda za Mulungu, 34 wanachike wolondeka wanyamale hupi mmiting'hanilo. Hawalondeka kulonga mbuli, kama ndagizi za Wayahudi vizilonga, hawalondeka kulongoza 35 Wahawa wana mbuli za kuuza, wawauze walume zao uko ukae, kwavija ni chinyala kwa mwanachike kulonga mumting'hanilo wa wamtogole Kilisito.

36 Ivo mogesa kua usenga wa Mulungu ulawa kumwenu mweye hebu uwezila mweye muiyeka? 37 Kama munhu yoyose kotonga kua iyo ni msenga wa Mulungu hebu kana nhunza ya Muhe wa Mulungu, na yavimanye kua gano ganiwandikileni mweye iyo ndagizi ya Mndewa. 38 Mbali munhu hogamanya gago, baho munhu seke mgese munhu iyo.

39 Ivo baho, mbwiga zangu molondeka kua na ng'ilu ya kuligula usenga wa Mulungu, mbali sekemumgome munhu kulongola kwa ulonzi mwing'higwe na Muhe wa Mulungu. 40 Ivo gose gatendeke vija viilondeka kwa kuwataza wanhu.