1 Mbwiga zangu, niye vinizile kumwenu niwalongela mbuli ya kweli ifunuligwe na Mulungu mbali sizile kama munhu yali na ugalu mkulu wa kulonga hebu yali na nzewele ng'hani. 2 Vinizile kumwenu silondile kuchimanya chochose ila tu kummanya Yesu Kilisito na chikulu mbuli ya ifa yake muumsalaba. 3 Vinikalile kumwenu ng'hala noiona sidaha kusang'hana gaja Yesu gayalonda nisang'hane, nikala nogudema kwa kudumba ng'hani kua sidaha kusang'hana ivo, 4 mafundo gangu na kuligula kwangu sigalavile kwa mbuli ya umanyi na nzewele na mbuli za kuwanogeza wanhu, mbali kungangamiza gago ni kubitila udaho wa muhe wa Mulungu. 5 Nisang'hana ivo ili kutogola kwenu kutumanile udaho wa Mulungu na sio nzewele ya chiunhu.

6 Hata ivo, cheye chofunda kwa kutumila ulonzi uli na nzewele kwa waja wanhu wakangale kumtogola Kilisito. Mbali nzewele iyo sio ya wanhu wa muuisi, hebu sio ya vilongozi wa muiisi ino waja ulongozi wao wovika muuhelo.

7 Nzewele ichiligula ni nzewele ya Mulungu ija ya kweli, Mulungu kulawa haumwanduso kalonda kuching'ha deng'o jetu ing'hali kulumbigwa isi. 8 Ni nzewele ija Vilongozi wa isi ino hawaimanyile, maza waimanyile wahalekile kumuwamba mumsalaba Mndewa wetu yeli na ukulu. 9 Mbali kama Mayandiko vigandikigwe,

"Habule hata imwe yagaonile na kugahulika,

habule hata imwe yatongile mmoyo wake kua golawila,

gago iyo gaja Mulungu gayawatandile waja wamtogole."

10 Izo izo mbuli zija Mulungu yachidahize kuzimanya kubitila muhe wake. Kwavija Muhe iyo yochimanya chilimgati ng'hani cha Mulungu. 11 Habule munhu yovimanya viyatonga munhu imwenga, ila Muhe wa munhu mwenyego. Ivija habule munhu yozimanya mbuli za Mulungu ila Muhe wa Mulungu wenyego.

12 Cheye hachibokele muhe wa isi ino, mbali chibokela Muhe kulawa kwa Mulungu ili yachidahize kugamanya gaja gayaching'ile Mulungu.

13 Baho cheye chofunda, sio kwa mbuli chifundizigwe na nzewele ya chiunhu, mbali kwa mbuli chifundizigwe na Muhe kwa kufambula mbuli za muhe kwa weli na muhe iyo. 14 Munhu ija hamtogola Mulungu habokela mbuli za Muhe wa Mulungu. Munhu iyo kumwake mbuli izo ni ubozi yeka, mbuli izo zobita ubala wake, kwavija yodahika tu kumanyika kwa kutazigwa na Muhe wa Mulungu. 15 Mbali munhu yolongozigwa na Muhe wa Mulungu kodaha kugeza na kulamula vija viilondeka, na hawadaha kulamuligwa na wamwenga. 16 Mayandiko ga Mulungu gandikigwa, "Yelihi yodaha kuzimanya nzewele za Mndewa? Yelihi yodaka kumlongela Mulungu da kulonga?" Mbali cheye chimtogole chinayo nzewele ya Kilisito.