1 Sambi uja msango wa sente kwa mbuli ya wanhu wamtogole Kilisito uko Yudea. Tendeni kama viwanilagize kwa wamtogole Kilisito weli uko Galatia. 2 Mdizua da jumapili, chila munhu mmwenu yabagule chiasi cha sente kulawa mzisente zake, ili kusanga chija chiyodaha kuilinga na ganogile ga Mulungu gayabokele. Naivo hamlondeka kukunzanya hajavonda nize.

3 Kwaivo vondanize kumwenu, nokwiza kuwatuma waja muwasagule kulawa mmwenu wagale balua na magweko genu uko Yelusalemu. 4 Kama yofaya na niye niite, baho woita hamwe na niye.

5 Nokwiza kumwenu kwa kubitila Makedonia, kwavija notumanila kubitila uko makedonia. 6 Viioneka nokala kumwenu chipindi chiguhi, hebu nodaha kukala na mweye chipindi chose cha mbeho, ili mpate kunisangila sente nigendelele na mwanza wangu wa hohose haniita.

7 Niye silonda kubita kumwenu himahima na kugendelela na mwanza, notamanila kukala kumwenu kwa chipindi chitali kama Mndewa viyalonda.

8 Mbali nokala hano Efeso mbaka zua da Pentekoste. 9 Mulungu kaning'ha nyafasi ya kusang'hana sang'hano ng'hulu hano, mbali hana wanhu wengi wonilema.

10 Kama Timoteo yaheza kumwenu, mbokeleni vinogile, ivija loleni sekeyadumbe chochose haja yahawa na mweye, kwa vija kosang'hana sang'hano da Mndewa kama niye. 11 Kwaivo munhu yoyose sekeyamzeleu ila mtazeni ili yagendelele na mwanza wake kwa utindiwala ili yadahe kubwela kumwangu, kwavija niye nombeta hamwe na mbwiga zenu.

12 Baho kwa mbuli ya ndugu yetu Apolo, nimpula ng'hani yeze kumwenu hamwe na wanhu wamwenga, mbali halonda kabisa kwiza sambi. Ivo yahapata nyafasi kokwiza.

13 Kaleni meso, mwime goya kwa kumtogola Kilisito, muwe magalu na mli na ludabwa. 14 Sang'haneni chila chinhu kwa wende kwa wamwenga.

15 Mweye mbwiga zangu, movimanya kua walukolo wa Sitefana, wao wakala wanhu wa mosi kumtogola Kilisito muikae ya Akaya, na ivija wailava kuwasang'hanila wanhu wa Mulungu. Niye nompulani mweye mbwiga zangu, 16 Molondeka kuwategeleza wanhu kama wao, ivija muwategeleze wanhu wose wasang'hana sang'hano ya Mulungu hamwe na wao.

17 Nodeng'helela ng'hani kwa vija Setefana na Fotunata na Akaiko wavika, wano wanipatila chija chinihungukiligwe haja mweye hamkalile hano, 18 na waning'ha deng'o niye na mweye mwing'higwa ivija. Kwaivo yolondeka kuleka kuwasemwa wanhu kama wano.

19 Mabumbila ga wanhu wamtogole Kilisito wose weli uko Asia wowalamuseni, Akula na Pilisila hamwe na wanhu wose wa wamtogole Kilisito weli mzikae zao wowalamuseni ng'hani mwahailumba na Mndewa.

20 Wanhu wose womtogola Kilisito weli hano wowalamuseni. Na mweye muilamuse kwa wende mlaguse kua mna utindiwala.

21 Niye Paulo nowalamuseni, kuno nokwandika kwa mkono wangu mwenyego.

22 Munhu yoyose ija hamwing'ha wende Mndewa, na yenukiligwe! MALANATA-Mndewa izo!

23 Nompula Mndewa wetu Yesu yagendelele kuweng'ha ganogile gake.

24 Wende wangu ukale kumwenu muhailumba na Yesu Kilisito.