1 Mvimanya kua niye si mtumwa? Mvimanya kua niye sio msenga wa Mulungu? Ivo nie simuonile Mndewa wetu Yesu? Kaidi sang'hano yangu inisang'hane haimtendani mweye kumtogola Mndewa? 2 Hata kama kwa wanhu wamwenga woniona nie sio msenga wa Mulungu, mbali kumwenu mweye niye ni msenga wa Mulungu, kwavija kumtogola Kilisito kwenu ni chilaguso kua nie nhumigwa na Mndewa.

3 Kwaivo kwa waja wonilonga nie sio msenga chino icho chinimila. 4 Ivo, nie kwa sang'hano yangu silondeka kwing'higwa ndia kuja na kung'wa? 5 Ivo, mogesa nie nopotigwa kugenda mwanza na mwehe yamtogole Kilisito kama viwogenda nao wasenga wamwenga na wadodo zake Mndewa na Kefa yokemigwa Petulo ivija? 6 Hebu niye na Balaba tu iyo hachilondeka kwing'higwa chakuja kwa sang'hano ichisang'hana? 7 Ivo, mmilizi gani yoilihila sang'hano yake mdi jeshi? Mlimi gani honda yaje manhunda ga mgunda wake wa mizabibu? Msusilaji gani honda yang'we maziwa ga wanyama wake?

8 Ivo, nolonga mbuli zino kama chiunhu tu? Ivo, ndagizi za Mulungu yeng'higwe Musa nazo hazilonga ivo? 9 Yandikigwa muindagizi, "Sekeumfumbe mulomo ng'ombe yahapiga ngano." Ivo, kwa ulonzi uno iyo kulonga Mulungu kohunganikila ng'ombe waiyeka? 10 Ivo, hakalile yochitonga cheye viyakalile yolonga ivo? Ena, gano gandikigwa kwa mbuli yetu, kwavija ija yolima na ija yobiga, wose waidi wolondeka kubokela mgelo wake. 11 Sambi cheye chiligula Usenga Unogile kumwenu kama munhu yohanda mbeyu, ivo, ni mbuli ng'hulu kwing'higwa vinhu kulawa kumwenu va kuchitaza kwakuja na kung'wa kama munhu yogobola? 12 Yahawa wamwenga wolondeka kulolela gago kulawa kumwenu, ivo, cheye vilihi hachilondeka kubokela ng'hani kubita wao? Mbali, cheye hachisang'hane kama vichilondeka. Badili yake, chifunya moyo kwa chila chinhu ili sekechike udala wowose mu Usenga Unogile wa Kilisito. 13 Ivo, hammanyile kua iyo yosang'hana Muing'anda ya Mulungu kopata ndia yake mui nganda iyo, na yosang'hana mchilemela kopata ndia kulawa muiyo nhosa? 14 Mndewa kalagiza ivo ivo, woligula Usenga Unogile wapate ndia yao kwa sang'hano iyo.

15 Mbali, niye sipulile hata mala lumwe mwa gaja ganilondeke kusang'haniligwa. Ivija sandika gano ili nhendeligwe ivo, kumwangu niye noona yofaya nidanganike kubita munhu yoyose kunikimila kuikunga kuligula Usenga Unogile bila kulihigwa. 16 Nie silondeka kuikunga kwambuli ya kuligula Usenga Unogile, kwavija ijo ijo nilagizigwe kudisang'hana, kaidi noluona kama siligula Usenga Unogile! 17 Kama nihaisagule mwenyego sang'hano ino, baho nihatumanile kulihigwa, mbali sambi nolondeka kuisang'hana kwavija iyo sang'hano yangu ining'higwe na Mulungu niisang'hane kama viyalonda. 18 Chitumetume changu ni chilihi baho? Chitumetume changu ni nyafasi ya kuuligula Usenga Unogile bila kulonda chochose chilondeka kwa mbuli ya kuligula usenga uno.

19 Kwaivo, niye sio mtumwa wa munhu yoyose, niitenda kua mtumwa wa chila munhu ili niwatende wanhu wengi kama viidahika wamtogole Kilisito. 20 Vinikalile nosang'hana kwa Wayahudi, nikala kama Myahudi ili niwapate Wayahudi, hata kama niye si munhu wa kulongozigwa na ndagizi, mbali niika mwenyego kama munhu wa ndagizi ili niwapate wao wolongozigwa na ndagizi.

21 Kwa waja haweli Wayahudi, nikala kama wao bila kuzitogola ndagizi, ili niwapate waja haweli Wayahudi wamtogole Kilisito. 22 Kwa waja vikumbi muyega nanie niitenda kama wao ili niwapate wao vikumbi muyega wamtogole Kilisito. Nitenda chila chinhu kwa wose ili kwa chila nzila mhate kuwalohola wamwenga wao.

23 Nogasang'hana gano gose kwambuli ya Usenga Unogile ili mhate kuilumba na wamwenga kwa kubokela ganogile ga Mulungu gayachilalike. Kimbileni vija kila munhu vonda yabokele gweko 24 Ivo, hamvimanyile kua waja woihuma kukimbila mbio, wose wokimbila mbio, mbali imwe tu mmwao iyo yobokela gweko? 25 Wose wokwingila kuihuma wokimbila mazua gose, wosang'hana kwa kuiyoha ili wadahe kuhuma na kupata gweko dija dibanangika. Gweko diwabokela hazikala mazua gose dobanangika, mbali gweko jetu dokala mazua gose hadibanangika. 26 Ivo nokimbila kama munhu yeli na nhamanilo da kuhuma. Noitoa ng'onde kama munhu yotoa mbeho, sio kama munhu yotoa beho. 27 Noukimila lukuli lwangu kwa kuutenda unitegeleze kwa chila mbuli inilonda kuisang'hana. Nosang'hana ivo ili nie mwenyego sekeniihonye nhunza haja inihawaligulila wayangu Usenga Unogile.