1 Hata kama nihalonga ulonzi wa wanhu na hata za Watumigwa wa kwa Mulungu, mbali kama nabule wende niye ng'hala tu kama dizi da bati. 2 Kaidi hata nihawa na udaho wa kuligula Usenga wa Mulungu, na kuzimanya mbuli zose za Mulungu sifisigwe na kuchimanya chila chinhu umanyi wose na, hata nihawa nodaha kumtogola Mulungu ng'hani hata kuhamiza vigogo, mbali kamanabule wende niye si chinhu. 3 Nihalava chila chinhu nilinacho na kuweng'ha vikumbi muyega na kaidi nihaulava lukuli lwangu lose usomigwe moto, kama nabule wende hainifaya chinhu.

4 Yeli na wende hufunya moyo, kana nying'ha, yeli na wende kabule maya, haigoda hebu kabule udulu hebu, 5 yeli na wende hahungukigwa na utegelezi, yeli na wende haiongezela mbuli zake mwenyego, yeli na wende kabule ng'hasiliki, yeli na wende hapeta gehile, 6 munhu yeli na wende haudeng'helela ubananzi, mbali hudeng'helela kweli. 7 Yeli na wende hufunya moyo kwa gose na huwagatogola wamwenga na hufunya moyo kwa tumanilo.

8 Wende haumala mbe. Mbali nhunza zimwenga zina uhelelo wake, kama kuligula Usenga wa Mulungu, na kulonga ulonzi wa wamwenga na kua na umanyi umwenga. 9 Kwavija chogamanya madodo, kaidi usenga wa Mulungu choulonga chidodo uja chiumanyile tu,

10 mmazua gokwiza chozimanya mbuli zino kama vizili, na mbuli zija zichimanya chodogo zokwiza kumala.

11 Vinikalile ching'hele nilonga kama ching'hele, nigesa kama ching'hele, nitonga kama ching'hele, mbali sambi niye na mkulu mbuli za udodo nizileka. 12 Chiniona sambi noona kama chivulivuli cha chihanga, mbali chipindi chokwiza hachikitumanila kilole. Chokwiza kuchiona chila chinhu hazelu. Sambi chovimanya hanhu hadodo tu muikweli ya Mulungu. Mbali baho hamwande chokwiza kuvimanya vose vija viili kama vija Mulungu viyochimanya cheye kwa chila chinhu.

13 Ivo baho, gosigala gano madatu, kumtogola Mulungu, tamanilo da kubokela vinhu kulawa kwa Mulungu na wende, mbali dilikulu mwa gano madatu ni wende.