1 Niye Paulo, mtumigwa wa Kilisito Yesu kwa wende wa Mulungu, hamwe na miangu Timoseo.

Chomwandikileni mweye mli mdibumbila da wamtogole Kilisito mli uko Kolinto, na wanhu wose wa Mulungu hohose hamwili hai isi ya Akaya.

2 Chompulileni utindiwala na unovu kulawa kwa Mulungu Tata yetu na Mndewa wetu Yesu Kilisito ukale na mweye.

3 Yatogoligwe Mulungu na Tata wa Mndewa wetu Yesu Kilisito, Tata yeli na bazi na Mulungu yoching'ha deng'o jose. 4 Nayo koching'ha deng'o mgamadununzo getu gose, ili na cheye ivija chiweng'he deng'o wamwenga mgamadununzo gao gose kwa deng'o idija ichidibokela kulawa kwa Mulungu. 5 Enaa, kama vichigendelela ku bokela madununzo kwambuli ya kumtogola Kilisito, ivo ivija vichigendelela kubokela deng'o jake. 6 Yahawa chodununzika, ni kwambuli ya deng'o na ulohozi wenu, hebu chiheng'higwa deng'o ni kwambuli yakuwatenda mgafunyile moyo madununzo igaja gachibokela cheye. 7 Kaidi tamanilo dichilinajo kwambuli yenu digangamala, chovimanya kua mwahailumba mga madununzo getu, ivija muilumba mdi deng'o jetu.

8 Mbwiga zangu, cholonda mvimanye madununzo gachipatile kuja muikae ya Asia gakala gachizamila ng'hani mbaka tamanilo da kua na ugima disegela. 9 Enaa chikala kama wanhu wobeta ifa, ili chifundigwe kumtumanila Mulungu ija yowazilibula wafile, badili ya kutumanila ludabwa lwetu wenyego. 10 Kulawa muing'ondo iyo ng'hulu ya ifa, nayo kachilohola na ivija chomtumanila kua kokwiza kochilohola kaidi, 11 na mweye mwahailumba na cheye kwambuli ya kuchipulila kwa Mulungu. Baho wanhu wengi womwing'ha hewela Mulungu kwambuli yetu.

12 Cheye choigodela chinhu chimwe, kugesa kwetu kochilagusila ugima wetu muiisi ino, na hasa kuilumba kwetu na mweye hachilongozigwe na nzewele ya chiunhu, mbali kwa unovu wa Mulungu.

13 Chowandikileni mweye mbuli zimdaha kuzisoma na kuzimanya. Mbali hata yahawa movimanya chidogo, notumanila kua mokwiza kuvimanya goya, 14 kwavija mbaka sambi mochimanya cheye chidogo tu. Chovimanya kua mdizua dija da kubwela kaidi Mndewa Yesu modaha kuigodela cheye na cheye ivija kuigodela mweye.

15 Nihawa na matamanilo gago, nilonda kwiza kumwenu baho haumwanduso ili mbokele kaidi ganogile mengi ga Mulungu. 16 Nilonda kubitila hamwenu nihawa muumwanza kuita Makedonia na chipindi cha kubwela ivija, ili mhate kutazigwa na mweye muumwanza wangu wa kuita uko Yudea. 17 Vinilondile kusang'hana vino, ivo mogesa kama niye munhu nilibule ulamuzi? Hebu mogesa kua nosang'hana vinilonda niye kama notonga chiunhu na kua nolonga,"Enaa." na "Habule" baho kwa baho? 18 Mulungu iyo ukweli uiyeka, baho chija ichiniwalongeleni mweye si mbuli ya "Enaa." hebu "Habule." 19 Kilisito Yesu, mwana wa Mulungu, ija niye Siliwano na miangu Timoseo, chimligula kumwenu na hawile munhu wa "Enaa." na "Habule" ila iyo mmazua gose ni "Enaa." ya Mulungu. 20 Kwavija mgati yake malaliko gose ga Mulungu gakala "Enaa." Kwambuli iyo,"Pepa." yetu yolongigwa kwambuli ya Kilisito kwa kumwing'ha hewela Mulungu. 21 Mulungu mwenyego iyo kochigangamiza cheye na mweye kwa kuilumba na Kilisito, na Mulungu mweyego iyo yachisagule, 22 iyo yochigela chilaguso cha kua wanhu wake na kuching'ha muhe wake mmioyo yetu ili kuchigangamizila kwa mbuli zose zija ziyachilalike.

23 Mulungu iyo mlongezi wangu, iyo koumanya moyo wangu kua nolonga kweli! Niye kwa kuwaonela bazi baho sibwelile uko Kolinto.

24 Hachilonda kuwaswangiza kwambuli ya kutogola kwenu, cheye chovimanya kua mweye mgangamala kwa kutogola Mulungu. Cheye cholondeka kusang'hana hamwe kwambuli ya deng'o jenu.