1 Niye Paulo mwenyego ija nooneka kua muhole nihawa hamwe na mweye, mbali mkali nahawa kutali na mweye. Ila nie nomfugamileni mavindi na unovu wake Kilisito. 2 Nompulani sekemnhende niwe na ludoko haja niheza, kwavija novimanya kua nodaha kua na ludoko kwa wose waja wochigesa kua chokala kama viwokala wanhu wa muuisi. 3 Kweli chokala muuisi, mbali hachiitoa bung'hukila kama viwaitoa wanhu wa muuisi. 4 Kwavija migoha ichitumila mzibung'hukila sio migoha ya muuisi, ila ni udaho wa Mulungu uja wobananga ng'huta ng'hulu zose, chozibananga nhonga zose za uvwizi, 5 na kubomola chila ngwamo ya magoda chikingwe kwambuli ya kuulema umanyi wa Mulungu, chozisola nhonga zao za ubananzi na kuwafunda wamtegeleze Kilisito. 6 Mwahategeleza kama viilondeka na Kilisito, cheye chowatoa waja hawategeleze.

7 Mloleni munhu kwa zija mbuli zimuona kwa meso genu kumwake. Ivo, hana munhu yoyose yogesa kua iyo wa Kilisito? Ena, baho yagese kua na cheye ivija ni wa Kilisito kama iyo viyeli wa Kilisito. 8 Hata yahawa niigoda kubitiliza kwa ija mbuli ya udaho yaching'ile, udaho wa kuwadahiza wanhu na sio kuwabananga, hata ivo siona chinyala hata chidogo. 9 Silonda mtonge kua nonda niwatende mdumbe kwa balua zangu. 10 Munhu kodaha kulonga, "Balua za Paulo za ludoko na ivija ndala, mbali iyo mwenyego yahawa hamwe na cheye ni munhu muhole, hata yahalonga mbuli zake zokua kama si chinhu." 11 Munhu yolonga ivo kolondeka yakumbuke kua habule tafauti kwa gaja gachandika muibalua haja chahawa kutali, na gaja gondachigasang'hane chahawa na mweye.

12 Kwa vovose hachilonda kuitenda hebu kuilinga na waja wanhu woing'ha nhogolwa wenyego. Wanhu woitenda kua wao iyo chipimo cha kuipimila hebu wanhu woilinga wenyego kwa wenyego, ni wabozi! 13 Mbali cheye hachiikunga kubita chiasi, kuikunga uko kosigala mja mchipimo cha sang'hano iyaching'ile Mulungu, sang'hano ija choisang'hana kumwenu ivija. 14 Cheye hachibitilize kusang'hana gaja gachikiligwe haja vichizile kumwenu. Cheye iyo chilongole kwiza kumwenu kuwagalileni Usenga Unogile kwa mbuli ya Kilisito. 15 Baho, cheye hachiikunga kwa kubitiliza kwambuli ya sang'hano ziwasang'hane wanhu wamwenga, mbali chotumanila kua kutogola kwenu Mulungu kokongezeka, na sang'hano yetu kumwenu yokua ng'hulu kwa kuwinza goyolonda Mulungu. 16 Baho chodaha kuligula Usenga Unogile mziisi zimwenga, mbali na mweye sekeiwe mbuli ya kuikunga kwa sang'hano ziwatendile wanhu wamwenga hanhu hamwenga.

17 Mbali kama Mayandiko vigandikwe, "Munhu yoikunga, kolondeka yaikunge kwa sang'hano ya Mndewa." 18 Yotogoligwa si ija munhu yoing'ha nhogolwa mwenyego, ila ija yokwing'higwa nhogolwa na Mndewa.