1 Baho, nilonda sekenibwele kumwenu kaidi kuwagela giogio. 2 Nilonda ivo kwavija nihaweng'heni mweye giogio, baho yelihi yonda yaning'he deng'o? Iwaja niweng'ile giogio. 3 Iyo mbuli nimwandikileni, silondile kwiza kumwenu ili sekemning'he giogio, kwavija mweye iyo molondeka kuning'ha deng'o. Niye nivimanya kweli kua nihadeng'helela na mweye mose ivija modeng'helela.

4 Haichanduso nimwandikileni nili mdigiogio na kulumila mmoyo wangu na mahozi mengi ganilawa, haiwile kwa mbuli ya kuweng'ha mweye giogio, ila kwa mbuli ya kuwalagusileni kua nina wende ng'hani na mweye.

5 Ihawa hana munhu yoyose kamtenda munhu imwe yawe na giogio, hanhendele niye, mbali kamwing'hani giogio mweye mose na ivo silonda kua mbwakilaji ng'hani.

6 Viyenukiligwe na wengi kulawa mmwenu imala. 7 Chisigale mmwenu, molondeka kumlekesela na kumgela moyo ili sekeyawe na giogio ng'hani na kuleka kugendelela. 8 Kwaivo, nompulani mulagusileni kaidi kua mna wende nayo. 9 Chinigesile kwandika balua ija nilonda kuvimanya kama mkala tiyali kunhegeleza chila chinilonga.

10 Mwahamlekesela munhu na niye nomlekesela. Kwavija nihamlekesela munhu, kama nahawa na mbuli ya kumlekesela, nomlekesela ha meso ha Kilisito kwa mbuli yenu, 11 ili sekechimleke Mwenembago kuchivwizila, kwavija chovimanya vija mbuli zake vizili.

12 Baho vinivikile uko Tiloa kuligula Usenga Unogile wa Kilisito, nivika Mndewa kaitanda nzila nisang'hane sang'hano yake. 13 Mbali nigwa giogio ng'hani kwavija simvikile mbwiga yangu Tito. Baho niwalaga wose haja na kusegela kuita Makedonia.

14 Mbali nomwing'ha hewela Mulungu yochilongoza mazua gose galibule uhelelo muumwanza wa kuilumba na Kilisito. Iyo yochitenda chiuligule ukweli wa Kilisito kama chinhung'ila vichinugila goya chila hanu.

15 Kwavija cheye ni kama chinung'ila goya cha ubani chija Kilisito chiyamlavila Mulungu, chinung'ila goya chiwavikila wose, waja woloholigwa na waja wokwaga.

16 Kwa waja wokwaga, chinung'ila icho ni ifa, mbali kwa waja woloholigwa chinung'ila icho ni ugima. Yelihi baho yodaha kusang'hana sang'hano ya kulinga ivo? 17 Cheye si kama wanhu wamwenga waja wogula usenga wa Mulungu, mbali kwavija cheye chitumigwa kuligula kwa nzila ilondeka na Mulungu, kama watumigwa wa Mulungu kuno chiilumba na Kilisito.