1 Baho si lazima niye kwandika mbuli ya kutaza sang'hano yenu ino kwambuli ya wanhu wa Mulungu wa uko Yelusalemu. 2 Nowamanya vija vumli na moyo wa kutaza, na niigodela mweye kwa mbuli iyo haulongozi ha wanhu wa Makedonia. Niwalongela, "Mbwiga zetu wa Akaya wamala kuitanda kuchitaza kulawa mlao ubitile." Kwaivo kuiyoha kwenu kumala kuswangiza wanhu wengi ng'hani. 3 Baho niwalagiza bwiga zetu kina Tito na wao wamwenga waidi, ili kuigoda kwetu kwambuli yenu kuoneke sio mbuli ziiyeka, na kua muitanda goya kabisa na kutaza kwenu kama vinilongile.

4 Seke iwe kua wanhu wa Makedonia waheza hamwe na niye chowavika hamna itanda, baho cheye chopata chinyala, bila kuchilonga chinyala chonda mchipate mweye wenyego, kwa vija chokua chiwatumanile kubita chiasi. 5 Kwaivo, niona yolondeka kuwapula mbwiga wano wachilongolele kwiza kumwenu, wapate kwika goya dija gweko jenu kulu mdilalike, najo dilaguse kweli kua ni gweko mdilavile mweye wenyego bila kuswangizigwa.

6 Sekemuisemwe, yohanda mbeyu ndodo kogobola hadodo, yohanda mbeyu nyingi kogobola hakulu. 7 Chila munhu baho, na yalave kama viyalonda mwenyego, mmoyo na wala sio kwa ugila hebu kwa kuswangizigwa, kwavija Mulungu komwing'ha wende ija yolava kwa deng'o. 8 Mulungu kodaha kumwing'hani mweye vingi kubita vija vumlonda, mmazua gose mweye mpate chila chinhu chimlonda, na baho mgendelele kutaza mui kila sang'hano inogile. 9 Kama Mayandiko ga Mulungu vigandikigwe,

"Nayo hulava kwa nying'ha

huweng'ha vikumbi muyega, utogoligwa wake ukale mazua gose galibule uhelelo."

10 Mulungu iyo yomwing'ha mlimi mbeyu ya kuhanda na ndia ya kuja. Komwing'hani ivija mbeyu zimlonda, kozitenda zote na zikule, na kuwatenda mgobole ng'hani kwa nying'ha yenu. 11 Iyo komwing'hani uzenzi mkulu wa chila chinhu mmazua gose ili mweye mpate kumwing'ha hewela Mulungu kwambuli ya gweko jenu wadibokele kulawa kumwetu. 12 Yokua ivo, kwavija sang'hano ino ya Mulungu imuisang'hana sio kua yotaza vinhu vilondeka kwa mbuli ya wanhu wa Mulungu waiyeka, bali ivija yowatenda wanhu wengi wamwing'he hewela Mulungu. 13 Kwambuli ya kuilonga ija kweli na kulagusa sang'hano yetu ino, wanhu womfugamila Mulungu kwa vija vumsang'hane vinogile Usenga Unogile kwambuli ya Kilisito na vumuufugamile, na ivija kwa mbuli ya nying'ha muweng'ile wao na wamwenga wose.

14 Kwaivo wowapulileni mweye kwa moyo, kwambuli ya unovu uiyeka uja mwing'higwe na Mulungu. 15 Chomwing'ha hewela Mulungu kwa mbuli ya gweko jake dilibule ulinganyi!