1 Maza mwahafunyile moyo chidogo, hata yahawa niye na mbozi chidogo! Enaa, nifunyileni moyo chidogo. 2 Nowagesani ng'hani mweye, kama Mulungu viyowagesa, kwavija mweye mhambe safi mposigwe kwambuli ya mulume imwe tu iyo ija Kilisito. 3 Mbali nodumba kua, kama vija nyoka kwa ubala wake wa uvwizi, kamvwizila Hawa, ivo nhonga zenu zodaha kwagizigwa, na kuulema utogoligwa wenu wa kweli kwa Kilisito. 4 Kwavija munhu yoyose yokwiza na kumligula Yesu ija hailingile na ija chimligule cheye, mweye mombokela kwa mikono midi, hebu motogola Muhe hebu usenga tafauti kabisa na uja muubokele kulawa kumwetu!

5 Siigesa kama niye iyo mdodo kubita wao, "Wasenga wakulu" 6 Yodahika nabule ulonzi ugoloke, mbali nili na umanyi, mbuli ino chiilagusa hazelu kumwenu, chila hanhu na chila chipindi.

7 Niye niligula Usenga Unogile wa Mulungu bila kulonda chitumetume, nikala muhole ili mhate kuwenula mweye. Ivo, nhenda vihile? 8 Vinisang'hane sang'hano mmwenu, ganilonda kusang'haniligwa gasang'haniligwa na mabumbila gamwenga ga wamtogole Kilisito. Kwa mbuli imwenga nikala kama niwaboka uzenzi wao mhate kuwatumikila mweye. 9 Vinikalile na mweye, simgazile munhu yoyose vija vinilondile sente, wamtogole Kilisito wayenu kulawa Makedonia wanigalila chila chinhu chinilondile. Nilola goya ng'hani ili sekeniwe sekeniwatumanile wanhu kwa vovose vija, na nogendelela kutenda ivo. 10 Habule munhu hata imwe mui isi ya Akaya, yonda yanikimile seke niikunge kwa mbuli iyo. Nolonga ivo kwavija ukweli wa Kilisito wa mgati yangu. 11 Habali nolonga ivo? Kwavija eti nabule wende na mweye? Mulungu kovimanya kua nina wende na mweye!

12 Nogendelela kusang'hana kama vinisang'hana sambi, ili seke niweng'he nyafasi waja wozambwila nyafasi, nyafasi ya kuikunga kua wosang'hana sang'hano kama vichisang'hana cheye. 13 Wanhu wao ni wasenga wa uvwizi, watenda sang'hano za uvwizi waja woivwizila kua wasenga wa kweli wa Kilisito. 14 Baho sekemkanganye, kwa vija hata Mwenembago nayo koivwizila mwenyego kua iyo mtumigwa wa kwa Mulungu wa bung'hulo! 15 Kwaivo, si mbuli ya kukanganya yahawa na wao watumigwa wake woivwizila kua watumigwa wa kutogoligwa na Mulungu. Muukomelezo wao wobokela chija chiolondeka kuilinga na mbuli zao.

16 Kaidi nolonga, munhu sekeyanigese kua niye mbozi. Mbali kama motonga ivo, baho nhendeni kama mbozi ili na niye mhate cha kuikunga hata chidogo. 17 Chinilonga sambi si chija chiyanilagize Mndewa, kwa mbuli ino ya kuikunga, nolonga tu kama munhu mbozi na halonda kuvimanya. 18 Wanhu wengi woikunga kwambuli za Muiisi, na niye ivija noikunga. 19 Mweye mna nzewele, lekaivo mowafunyila moyo hata wabozi na waja hawalonda kuvimanya! 20 Momfunyila moyo hata munhu yomtendani mweye watumwa, munhu yombokani, ija yomnyonyani, ija yowazeleu na yowazabula mchihanga. 21 Kwa chinyala notogola kua cheye chikala na uzidilwa wa kusang'hana mbuli izo!

Mbali kama hana munhu yoyose yodaha kuikunga kwa chinhu nolonga kama mbozi, niye noikunga ivija. 22 Ivo, wao ni Waebulania? Hata niye ivija. Ivo, wao ni Waizilaeli? Hata niye ivija. Wao ni ulelo wa Ibulahimu? Hata niye ivija. 23 Wao ni watumigwa wa Kilisito? Hata niye ivija, nolonga gago kama chichala, niye ni mtumigwa wa Kilisito kubita wao. Niye nisang'hana sang'hano ndala ng'hani, nikala mdigeleza mala nyingi ng'hani, nitoigwa mala nyingi ng'hani na mala nyingi nikala behi na ifa kubita wao. 24 Mala tano nitoigwa na Wayahudi zija mbalati salasini na tisa, 25 nitoigwa mbalati mala nhatu na Walumi, nitoigwa mabwe mala imwe, mala nhatu nibenekiligwa meli muibahali, na umo niwasa meso chilo yose na kusinda misi yose mmazi.

26 Mmiyanza yangu mingi mhatigwa na bung'hukila ya mazi ya lwanda na bung'hukila za wanyama na bung'hukila kulawa kwa wayangu muiisi na kulawa kwa wanhu wa isi zimwenga na bung'hukila za mzikae na bung'hukila kulawa kwa mbwiga wa uvwizi. 27 Nisang'hanika kwa kudununzika, mala nyingi niwasa meso, nikala na nzala na ng'ilu, mala nyingi nisinda nzala na kukala muimbeho bila chivalo. 28 Mbali ya mbuli zimwenga nyingi, mazua gose ng'hala notonga sang'hano za mabumbila gose ga wamtogole Kilisito. 29 Kama munhu yoyose ni mzidilwa, na niye ivija mzidilwa, munhu yoyose yahatendigwa kutenda malozo, na niye ivija nogwa ludoko.

30 Nihalondeka kuikunga, baho noikunga kwa uzidilwa wangu. 31 Mulungu na Tata wa Mndewa Yesu, ija yolondeka kwing'higwa nhogolwa bila uhelelo, nayo kovimanya kua sivwiza. 32 Ving'halile Damasiko, mkulu wa kae, yakalile yomtaza mfaume Aleta, na kakala keka wamilizi muikae iyo ili yanigele mmakono. 33 Mbali, nimkimbila kwa kutelemsigwa kunze kubitila mgelo mkulu mdizonzo da nhuta.