1 Baho, mweye mlina wende na niye, chahawa ching'higwa miyadi ino yose, chiinege na chinhu chochose chilonda kichitende muhe na ng'huli zetu, zileke kutogoligwa na Mulungu, chiwe wanhu wa Mulungu kabisa na kukala kwa kumfugamila Mulungu.

2 Chompulani mching'he nyafasi mmoyo! Hachimtendele gehile munhu yoyose, hachina mulumiza hebu kumvwizila munhu yoyose. 3 Sizilonga mbuli zino kwa kumlamula munhu, kwavija kama vinikomeleze kulonga, mweye mwa mmoyo mwetu, chife hamwe hebu chikale hamwe. 4 Nomtumanilani ng'hani na noigodela ng'hani mweye! Mmadununzo getu mhata utindiwala mkulu na kudeng'helela ng'hani.

5 Hata vichivikile Makedonia hachihumule. Chila ubanzi kukala na madununzo, kunze choting'hanila ndwagi na mgati china gudemo. 6 Mbali Mulungu iyo yowagela moyo waja walekile kugendelela, na kwa kwiza kwake Tito na cheye kachigela moyo. 7 Si tu kwa kwiza kwake Tito, ila kwavija vumumgelile moyo mweye ivija. Nayo kachilongela vija vumlonda kuniona, vija vumli na giogio, na vumlonda kunigombela. Mbuli ino yoning'ha ndeng'helelo ng'hani.

8 Hata yahawa kwa balua yangu ija iwagela giogio, habule chinhu cha kunhenda nilumile. Enaa, noona kua balua iyo iwagela giogio mbali kwa chipindi chiguhi tu. 9 Sambi nodeng'helela, sio kwa vija mgwa giogio, ila kwa vija giogio jenu diwatenda muhinduke na mgalonge malozo genu na kugaleka. Mgeligwa giogio kwavija viyalondile Mulungu, na kwambuli iyo mweye hachiwalumize kwa mbuli yoyose. 10 Kuwa na giogio kama viyolonda Mulungu, kokutenda kuhinduka moyo na kuhinduka uko kotenda wanhu waleke malozo na kugala ulohozi, baho habule mbuli ya kulumila mmoyo. Mbali giogio da muuisi jogala ifa. 11 Sambi modaha kuona malawilo ganogile ga kukala na giogio kama Mulungu viyolonda. Mweye sambi mpata kua wanhu wa kuiyoha na mli na mbuli ya kulonga kua mwabule ubananzi, kua na ludoko na ubananzi na kumtegeleza Mulungu, na kuiyoha na kuona kua gamlondeka kutendeligwa gotendeka. Mweye muilagusa kwa nzila zose kua mwabule da kulamuligwa.

12 Hata yahawa nyandika balua ija, si kwa mbuli ija yabanange, hebu ya ija yabanangiligwe. Nyandika ili ioneke hazelu haulongozi ha Mulungu vija vumuiyoha kwambuli yetu. 13 Iyo mana cheye chikala chideng'helela ng'hani. Sio kua chideng'hela tu, ila ivija Tito kachitenda chideng'hele kwa dija deng'o jake diyakalile najo kwavija vumumsamhuse moyo! 14 Niye niweng'ha nhogolwa ng'hani haulongozi wake, na kwa muimbuli iyo hamnigelile chinyala. Chiwalongeleni kweli mazua gose, na vija vichiweng'ile nhogolwa haulongozi ha Tito iyo ikala mbuli ya ukweli yeka. 15 Kwaivo wende wake wa moyo kumwenu mweye wokongezeka ng'hani, chila viyokumbuka vija mweye wose vumuitandile kutegeleza, na vija vumumbokele kwa kudumba ng'hani na kugudema. 16 Nodeng'helela ng'hani kua nodaha kuwatumanila mweye ng'hani mchila mbuli.