1 Baho, noikunga hata yahawa haifaya! Mbali sambi noilonga mbuli ya ulolesi na ugubulo yanilagusile Mndewa. 2 Nommanya munhu imwe mtogola Kilisito, mmilao kumi na mine ibitile viyanyamuligwe mbaka kuulanga kuchanha ng'hani. Sivimanyile kama kakala uko kilukuli hebu kwa muhe, Mulungu kovimanya. 3 Nobwelela, novimanya kua munhu ino kanyamuligwa mbaka kuulanga kwa Mulungu, mbali sivimanya kama kakala uko kilukuli hebu ki muhe, Mulungu kovimanya. 4 Uko kahulika mbuli zija ndala kuzilongelela zija hata munhu halondeka kuzilonga. 5 Baho, noikunga kwa munhu kama ino, na si kwambuli yangu niye mwenyego, mbali tu kwambuli ya uzidilwa wangu. 6 Mbali kama nihalondile kuikunga, sekeniwe mbozi hata chidogo, kwavija nahalongile kweli yeka. Mbali siikunga, silonda munhu yanitonge ng'hani kubita vija viyaniona na kuhulika kulawa kumwangu.

7 Mbali, mbuli zino ng'hulu inilagusigwe sekezinhende niikunga ng'hani, ivo ning'higwa madununzo mlukuli kama mwiwa, msenga wa Mwenembago ija yonitoa niye sekeniikunge kubitiliza. 8 Nimpula ng'hani Mndewa mala nhatu ili mbuli ino inilawe. 9 Mbali kanilongela,"Unovu wangu wokwenela kwa mbuli yako, kwavija udaho wangu wooneka muuzidilwa." Baho vinoga ng'hani kuikunga uzidilwa wangu ili udaho wake Kilisito ukale kumwangu. 10 Kwaivo notogola kwa mbuli ya uzidilwa na zeleu na udala na uonezi na madununzo, kwambuli ya Kilisito. Kwavija nihawa mzidilwa, ivo nokua na ludabwa.

11 Nikala kama mbozi, mbali mweye iyo mniswangize niwe ivo. Mweye iyo mlondeka kuning'ha nhogolwa. Hata yahawa niye si chinhu, kwa vovose, niye si mdodo kubita wao "Wasenga wakulu." 12 Vinikalile kumwenu nie nikala nofunyamoyo, na kusang'hana miujiza na uzonza ilagusa kua nie na msenga wa Mulungu. 13 Ivo, mhungukiligwa choni ng'hani kubita mabumbila gamwenga ga wamtogole Kilisito? Ivo, niye kwa ubanzi wangu siwatendile mgae kupata cha kunitaza? Yahawa nibananga kusang'hana ivo, nompulani nisameheni!

14 Sambi, nodaha kwiza kumwenu mala ya nhatu na simgazani. Chinizambwila kumwenu si vinhu venu bali mweye wenyego. Ni mazoela ga tata na mama kuwekila wana wao usigavu, mbali si wana kuwekila usigavu tata na mama zao. 15 Niye nhogola kutumila chinili nacho, na hata kuilava kabisa niye mwenyego, kwambuli ya muhe zenu. Ivo, moning'ha wende chidogo kwavija niye nomwing'hani wende ng'hani?

16 Baho, motogola kua niye siwile mzidilwa kumwenu. Mbali munhu imwenga kodaha kulonga kua, "Kwa vija Paulo ni mbala kawavwizileni." 17 Ivo, niye nimnyonyani chochose kubitila msenga yoyose nimtumile kumwenu? 18 Niye nimpula Tito, nimlagiza kumwenu hamwe na mbwiga yetu imwenga. Ivo, chimyonyani Tito kamnyonyani chochose mmwenu? Ivo, hamvimanya kua cheye chikala chilongozigwe na muhe iija, na chosang'hana hamwe?

19 Motonga kua mbaka sambi cheye choigombela hamwenu! Ila chozilonga mbuli zino haulongozi ha Mulungu, kuno chiilumba na Kilisito. Mbuli zino zose mbwiga zangu, ni kwambuli ya kuwagangamizeni mweye. 20 Nodumba, hengine vonda nize kumwenu nomvikani hamwili na vija vinilondile niwavike, na mweye hamniona kama vimlonda kuniona. Nodumba hengine hokua na kugomba na maya na kuihasanya na kuibishila na kuilonga na kunyong'onya na kuikunga na ndwagi hamwenu. 21 Nodumba kwa vija baho naheza mwanza umwenga Mulungu konhenda niwe muhole kumwenu, na niye nokwiza kuwalilila wengi waja watendile malozo mbali hawalondile kuleka malozo, wang'hali wotenda maya zihile za luhadu na ugoni.