1 Mbwiga zetu, cholonda kuwalongela mbuli ya unovu uja Mulungu yaulavile mmabumbila ga wamtogole Kilisito wa uko Makedonia. 2 Wamtogole Kilisito wa uko wagezigwa ng'hani kwa madununzo, mbali deng'o jao dikala kulu mbaka wakala wailava kubitiliza, ingawa wakala vikumbi muyega ng'hani. 3 Nodaha kulongelela kweli kua wakala na nying'ha kama ludabwa lwao vuwili na kubitiliza. Kwa vija viwalondile wenyego,

4 wachipula ng'hani kua weng'higwe nyafasi ya kwingila muisang'hano ya kuwataza wanhu wa Mulungu uko Yelusalemu. 5 Iyo ikala mbuli hachiitumanile kabisa! Mosi wailava wao wenyego kwa wenyego kwa Mndewa, amala wailava wenyego na kumwetu ivija kwa nzila ya wende wa Mulungu. 6 Kwambuli iyo chimpula Tito yaisongile mbuli iyo yawataze ili muisang'hane sang'hano ino ya wende mmwenu ivija. 7 Mweye muna chila chinhu, kumtogola Mulungu, ugalu wa kulonga, umanyi, udahi wose kutenda ganogile, na wende wenu kumwetu. Kwaivo, chotamanila muwe na nying'ha muisang'hano ino ya wende. 8 Niye simwing'hani mweye ndagizi, mbali nolonda tu kulagusa vija wamwenga viwogangamala kwa mbuli ya kutaza ili mhate kuvimanya vija wende wenu vuuli wa kweli. 9 Mweye moumanya unovu wa Mndewa wetu Yesu Kilisito, iyo hata yahawa kakala na chila chinhu, ila kaitenda chikumbi muyega kwa mbuli yenu, ili kwa uchikumbi muyega wake, yamwing'heni uzenzi.

10 Kwa mbuli ino baho, nomlongeleni kua yofaya kumwenu sambi kusang'hana gaja mgasongile mlao ubitile. Mweye mkala wa mosi kusonga kulonda kusang'hana ivo. 11 Baho, komelezeni mbuli iyo kama vuumkalile na moyo mkulu wa kutaza, baho sang'haneni kwa kuiyoha ivo kama vija vumdaha na kuikomeleza. 12 Hata yahawa hana munhu kana moyo wa kutaza, Mulungu kobokela chila chiyodaha kulava na halonda chimwenga. 13 Vinigesa hailondeka wamwenga watazigwe kuno mweye modununzika, mbali yolondeka hawe na ulinganyo. 14 Chija chimli nacho chongezeke, chiwataze waja walibule chinhu, ili nao chipindi vonda wawe na chinhu chongezeke wamtazeni mweye kwa vija vumulibule, na baho hawe na ulinganyo. 15 Kama Mayandiko ga Mulungu vigandikigwe,

"Yakunzanye vingi hawile na chongezeke,

na ija yakunzanye chidodo haungukiligwe."

16 Nomwing'ha hewela Mulungu yamwing'ile Tito moyo wa kutaza kama unilinao niye wa kumtazeni! 17 Sio tu katogola vichimpulile, ila kakala na moyo mkulu wa kutaza ivija, mbaka kalonda mwenyego kwiza kumwenu.

18 Baho chomlagiza munhu imwe hamwe nayo, nhogolwa zake za kuligula Usenga Unogile zenela mgamabumbila gose ga wamtogole Kilisito. 19 Na kubita gago, iyo kasaguligwa na mabumbila gose ga wamtogole Kilisito, yawe mietu muumwanza wakugala nhosa ino ya wende, muisang'hano chiitenda kwambuli ya ukulu wa Mndewa na kugangamiza kwa kugesa goya kwetu.

20 Cholonda kuinega na mbuli za kunung'hunikiligwa zija zonda kulawilila muuwimilizi wetu kwa mbuli ya nhosa ino ya nying'ha. 21 Vichigesa ni kusang'hana ganogile, si haulongozi ha Mndewa yaiyeka, mbali haulongozi ha wanhu ivija.

22 Baho, hamwe na ndugu wao, chimtuma ndugu yetu imwenga ija mala nyingi chimgeza mala nyingi, na chimuona kua kana moyo mkulu wa kutaza, hata sambi kana moyo ng'hani kwa vija viyomtogolani ng'hani mweye.

23 Tito iyo miangu, chosang'hana sang'hano hamwe kwambuli yenu, mbali kama hana munhu kolonda kumanya mbuli ya wano mbwiga zetu wamwenga, wokwiza hamwe nayo, wao ni wasenga wa mabumbila ga wamtogole Kilisito, nao womwing'ha nhogolwa Kilisito. 24 Baho walagusileni ukweli wa wende wenu, mabumbila ga wamtogole Kilisito wadahe kuona kweli kua chiniigodela kumwenu chofaya.