1 Kwaivo chovimanya kua chiheha chino ichikala hano muiisi yani ng'huli zetu kama chiheha chobomoligwa, Mulungu koching'ha ukazi umwenga uko kuulanga kwa Mulungu, ng'anda yaizengile mwenyego iyo haibanangika mazua gose. 2 Na sambi vichikala hano muiisi, chogutilila kuno chololela kwa tamanilo kulu na kwing'higwa ukazi wetu uli kuulanga kwa Mulungu, 3 enaa, cholondeka kuvazigwa kama ivo ili seke chime haulongozi ha Mulungu bila chivalo. 4 Chahawa ching'hali mchiheha cha muuisi, chogutilila kwa mbuli nyingi zichidununza, si kwavija chonda kuuvula lukuli uno wa ifa, ila china tamanilo da kuvazigwa ugima uja haufa, ili chija chifa chimeligwe kabisa na ugima. 5 Mulungu mwenyego iyo yachitandile kwambuli iyo, nayo kaching'ha Muhe wake ili uwe muamana kwa gaja gayachikile.

6 Kwaivo chima goya mazua gose. Chovimanya kua kukala mulukuli uno tu, baho ni kukala kutali na Mndewa. 7 Kwavija chokala kwa kutogola na si kwa gaja gachiona. 8 Mbali chima goya na maza vichilonda chiuleke lukuli luno na chihamile kwa Mndewa. 9 Mbali mbuli ifaya ng'hani cholonda kumlagusila wende iwe chokala muuisi hebu uko kuulanga kwa Mulungu. 10 Kwavija chose cholondeka chime haulongozi ha chigoda cha ulamuzi cha Kilisito chilamuligwe, ili chila munhu yabokele chija chiyalondeka kwambuli ya zisang'hane chipindi chiyakalile muuisi kuno yahawa katenda ganogile hebu gehile.

11 Baho, cheye chovimanya viifaya kumfugamila Mndewa, ivo choiyoha kuwakema wanhu. Mulungu mwenyego kochimanya vinogile, na niye notumanila kua na mweye ivija mochimanya goya. 12 Si kua chogeza kaidi kuwatogoleni mweye ila cholonda kumwing'hani chija kichitenda chiigodele mweye, ili mdahe kuwalongela waja woigodela ng'huli zao vizili kubita vija viweli mmoyo. 13 Yahawa chooneka china chichala, iyo kwa mbuli ya Mulungu, na yahawa china umanyi wetu wenele, iyo ni kwambuli yenu. 14 Kwavija wende wa Kilisito wochilongoza, cheye chivimanyile kua munhu imwe tu kadanganika kwambuli ya wose, na iyo yolagusa kua wose wailumba muifa yake. 15 Kadanganika kwambuli ya wanhu wose, ili waja weli na ugima sekewakale kwa mbuli yao wenyego, mbali wakale kwambuli yake yadanganike, na kazilibuligwa kwambuli yao.

16 Kwaivo kulawa sambi, cheye hachimgeza munhu yoyose chiunhu. Hata yahawa chipindi chimwe chimgeza Kilisito chiunhu, mbali sambi hachitenda ivo kaidi. 17 Munhu yoyose yahailumba na Kilisito kokua chilumbe cha sambi, gaumwaka gabita, sambi kokua munhu wa sambi. 18 Zose ni sang'hano za Mulungu yochilumba cheye nayo kwa nzila ya Kilisito. Kaching'ha sang'hano da kuwalumba wanhu nayo. 19 Iyo kulonga Mulungu kakala yowalumba wanhu wa isi zose kwa nzila ya Kilisito, bila kugesa malozo ga wanhu wao. Iyo kaching'ha usenga wa kuwatenda wanhu wailumbe nayo.

20 Baho, cheye chawasenga wa mbuli za Kilisito, na Mulungu mwenyego kochitumila cheye chiwapule mwenye. Chino icho chiyalonda Kilisito chimpuleni mweye mchitende. 21 Kilisito hakalile na malozo, mbali Mulungu kamtenda yavale malozo kwambuli yetu, ili cheye kwa kuilumba nayo, chipate kuvala kutogoligwa na Mulungu.