1 Ivo, chosonga kaidi kuilondela nhogolwa wenyego? Ivo, cholonda balua ya kutambuligwa kwiza kumwenu, hebu kulawa kumwenu kwiza kumwetu kama wanhu wamwenga? 2 Mweye wenyego ni balua yetu, balua yandikigwe mmioyo yetu ili chila munhu yaimanye na kuisoma. 3 Ni kweli kua mweye mwa balua ya Kilisito yaigalile kwa makono getu. Balua yenyego haiyandikigwe kwa wino, bali kwa Muhe wa Mulungu yeli na ugima, hayandikigwe mchihande cha dibwe mbali mmioyo ya wanhu.

4 Cholonga vino kwambuli ya tamanilo jetu chilinajo kwa Mulungu kubitila gaja yachitendele Kilisito.

5 Sio kwavija cheye chodaha kusang'hana chochose kwa udaho wetu wenyego, mbali udaho chilinao wolawa kwa Mulungu. 6 Mulungu iyo yachidahize kudisang'hanila Lagano da Sambi dija si Lagano da ndagizi yandikigwe, bali Lagano da Muhe wa Mulungu. Kwavija ndagizi yandikigwe yogala ifa, mbali Muhe wa Mulungu kogala ugima.

7 Ndagizi za Musa ikigwa kwa kwandikigwa mvihande va mabwe. Hata ihawa hachikomezo ilawila ifa, ukulu wake ukala mwingi ng'hani na chihanga cha Musa chikala chobalika ng'hani mbaka wana wa Izilaeli wapotigwa kuchilola. Kaidi kubalika uko kukala kwa chipindi chiguhi tu. Baho yahawa sang'hano ya chija chigalile ifa chitendeka kwa ukulu mwingi kulinga ivo, 8 baho sang'hano ya Muhe wa Mulungu kana ukulu mwingi ng'hani!

9 Baho, kukala na ukulu mdisang'hano iyo igalile kulamuligwa, ni kweli kua sang'hano igala kutogoligwa yokua na ukulu mwingi ng'hani ugala ulohozi! 10 Baho ukulu wa lagano da mwaka uhalawa kwavija ukulu wa lagano da sambi uvika, uja mkulu ng'hani. 11 Yahawa chija chikalile cha chipindi chiguhi tu, chikala na ukulu wake, ukweli chija chokala mazua gose, chokua na ukulu mkulu ng'hani.

12 Baho kwavija dino ijo tumanilo jetu, cholonga bila kudumba. 13 Cheye hachitenda kama Musa ija yagubike chihanga chake kwa chitambala ili wanhu wa Izilaeli sekewauone uja ukomelezo wa ubung'hulo uja ukalile womala kubung'hula.

14 Mbali umanyi wao ukala ugeligwa ubozi, mbaka vino sambi chila dihasomigwa Lagano da mwaka chigubiko cha chitambala icho ching'hali baho. Chigubiko icho chosegezigwa tu munhu yahailumba na Kilisito. 15 Kwaivo mbaka vino lelo, chila vichisoma ndagizi za Musa umanyi wao wokuwa ugubikigwa. 16 Mayandiko ga Mulungu golonga kwambuli ya Musa, munhu yahamuhindukila Mndewa Mulungu, chigubiko icho chosegezigwa. 17 Baho, "Mndewa." ni Muhe wa Mulungu, na haja hayeli Muhe wa Mndewa baho hana kuilegeha. 18 Baho cheye chose waja vihanga vetu havigubikigwe choona kama mchilole, ukulu wa Mndewa, chohinduligwa chiilinge ng'hani na uwo mfano wake kulawa ukulu mbaka ukulu mwingi ng'hani. Iyo ni sang'hano yake Muhe wa Mndewa.