Efésios 5

22 Wehe na wawategeleze walume zao kama kumtegeleza Mndewa. 23 Mulume kanao undewa kwa mwehe wake, kalinga Kilisito viyali na Undewa kwa bumbila da wamtogole Kilisito, nayo Kilisito mwenyego kodikombola bumbila da wamtogole Kilisito uwo lukuli lwake. 24 Kama vija bumbila da wamtogole Kilisito viwomtegeleza Kilisito, ivija wehe na wawategeleze walume zao kwa chila mbuli.

25 Na mweye walume weng’heni wende wehe zenu kama vija Kilisito viyali na wende na bumbila da wamtogole Kilisito, kailava mwenyego nhosa kwambuli yao. 26 Kasang’hana ivo ili kwa usenga wake yawabagule kwambuli ya Mulungu, badili ya kudibatiza kwa kudisunha mmazi, 27 ili yapate bumbila dikigwe kwambuli ya Mulungu da wamtogole Kilisito dibung’huke kabisa, bumbila da wamtogole Kilisito welibule ng’ovu na nhale hebu chochose chiliivo. 28 Baho, walume wolondeka kuweng’ha wende wehe zao kama nhuli zao wenyego. Yomwing’ha wende mwehe wake iyo koing’ha wende mwenyego. 29 Habule munhu yoyose yowihila lukuli lwake, badili ya kuwihila, koulisa na kuuvaza. Ivo ivija Kilisito viyawasang’hanila goya bumbila da wamtogole Kilisito, 30 kwavija cheye cha vilungo va lukuli lwake. 31 Kama Mayandiko vigandikigwe, "Kwambuli iyo mulume komleka tata na mami yake, koilumba na mwehe wake, nawo waidi wokua lukuli lumwe." 32 Hana ukweli uifisile mui mbuli ino, nanie noona ni kwambuli ya Kilisito na bumbila da wamtogole Kilisito. 33 Mbali ivija na kwambuli yenu. Chila mulume kolondeka yamwing’he wende mwehe wake kama viyoing’ha wende mwenyego, nayo mwehe kolondeka yamtegeleze mulumaake.