1 Apolo viyakalile uko Kolinto, Paulo kaita mwanza kabitila hanhu heli na vigongo mbaka kavika Efeso kuja kuyawavikile waluko wamwenga, 2 na kawauza, "Ivo, mubokela Muhe wa Mulungu vumumtogole Yesu?" Nao wamwidika, "Habule! Mosi, hachina hulika kama hana Muhe wa Mulungu."

3 Nayo kalonga, "Ivo, mbokela ubatizo wa vilihi?" Wamwidika,"Ubatizo wa Yohana."

4 Paulo kalonga,"Ubatizo wa Yohana ukala wa kulagusa wanhu kua wagalonga malozo gao na kugaleka. Yohana kawalongela wanhu wamtogole ija yakalile yonda kwiza badili yake, manake Yesu."

5 Viwamalile kugahulika gago,wabatizigwa kwa nzina da Mndewa Yesu. 6 Baho Paulo kawekila makono na Muhe wa Mulungu uwahulumukila, nao wasonga kulonga ulonzi umwenga na kuligula usenga wa Mulungu. 7 Baho wanhu wose wakala kama walume kumi na waidi.

8 Kwa chipindi cha miezi midatu Paulo kakala koita Muing'anda ya kuiting'hanila Wayahudi wakala wolongelelanao na kuwapula weze muufaume wa Mulungu. 9 Mbali wanhu wamwenga wakala wobela, ivo walema kutogola na wasonga kulongelela vihile kwa mbuli ya iyo nzila ya Mndewa Yesu mdimbumbila kulu da wanhu. Baho, Paulo kaleka kulonga nao na kawasola waja waluko wake kuno kakala yolonga nao chila zua muing'anda ya kusomela ya Tulano. 10 Kagendelela kutenda ivo kwa milao midi mbaka wenekae wose wa isi ya Asia, Wayahudi na waja haweli Wayahudi wauhulika usenga wa Mulungu.

11 Mulungu kasang'hana miujiza mingi kubitila Paulo. 12 Wanhu wakala wosola vitambala na vivalo vimwenga kwa sang'hano zija Paulo yakalile kavitumila, wazigala kwa watamu nao wahonyigwa vitamu vao, na waja wakalile wambula vinyamkela nao walekesigwa na vinyamkela ivo. 13 Wayahudi wamwenga wahunga vinyamkela waita uko na uko kuno wogeza kutumila zina da Mndewa Yesu kwa waja wakalile wambule vinyamkela. Wakala wolonga, "Nolagiza kwa zina da Yesu ija Paulo yakalile yomligula." 14 Hakala na wabwanga saba wa Sikewa ija mkulu wa walava nhambiko wa Kiyahudi, nao wakala wotenda ivo.

15 Zua dimwe chinyamkela kawedika, "Yesu nommanya na Paulo nommanya, mweye mwa china nani?"

16 Labaho ija munhu yambule chinyamkela kawavamila na kuwatoa na kuwahuma kwa ludabwa. Nao wabwanga wa Sikewa wakimbila na kulawa kunze muing'anda bila chivalo. 17 Chila munhu uko Efeso, yeli Myahudi hebu sio Myahudi kahulika mbuli iyo. Baho wose wadumba ng'hani, wading'ha nhogolwa zina da Yesu. 18 Wamtogole Kilisito wengi walawila hazelu na kuzilonga hazelu sang'hano zao zihile ziwatendile. 19 Wamwenga wakalile wosang'hana uhawi, wavikunzanya vitabu na kuvisoma moto haulongozi ha wanhu. Wapeta hisabu ya bei ya vitabu ivo va uhawi, waona ivika vihande hamsini elufu va madini ga sente. 20 Kwaivo, usenga wa Mndewa ugendelela kwenela na kua na udaho ng'hani.

21 Vizibitile mbuli izo, Paulo kaita Yelusalemu kwa kubitila Makedonia na Akaya. Kalonga, "Yahavika uko ivija nolondeka kuita Lumi." 22 Baho, kawalagiza watazi wake waidi, Timoteo na Elasto,wamulongolele waite Makedonia kwa chipindi chiguhi nayo kasigala uko Asia.

23 Mchipindi icho icho chilawilile ndwagi ng'hulu uko Efeso kwa mbuli ya iyo nzila ya Mndewa. 24 Hakala na msang'hanaji wa vinhu va shaba yokemigwa Demetilio, ija yakalile yosang'hana mlungu wa nyang'iti wa chike yokemigwa Alitemi. Sang'hano iyo iwapatila watazi wake sente nyingi zongezeke. 25 Demetilio kawakunzanya hamwe na wanhu wamwenga wakalile na sang'hano kama iyo, kawalongela, "Mweye wabwanga movimanya kua uzenzi wenu wolawila kwa sang'hano ino. 26 Kwaivo, modaha kuhulika na kuionela wenyego kwa meso genu mbuli za Paulo ziyotenda, sio hano Efeso haiyeka, mbali ivija mbaka uko Asia yose. Iyo kawaswangiza na kuwatenda wanhu watogole kua milungu ija isang'hanigwe na wanhu si milungu bule. 27 Ivo, hana bung'hukila ya sang'hano yetu kukemigwa kwa zina dihile. Sio ivo tu, mbali mbuli iyo yodaha kuitenda ng'anda ya mulungu Alitemi kua si chinhu chili na mana. Viioneka, nhogolwa za Atemi yofugamiligwa Asia na isi yose, zomala."

28 Viwahulike gago, wehiligwa ng'hani na wasonga kuguta nyangi,"Alitemi mulungu nyang'iti wa Waefeso ni mkulu!" 29 Baho kae yose ikala na ndwagi. Wamgoga Gayo na Alisitaliko, wenekae wa Makedonia waja wayage wakalile muumwanza umwe na Paulo, wakimbila nao mbaka muuhelengo wa kuvinila. 30 Paulo mwenyego kalonda kuita kuja kudibumbila da wanhu, mbali waja wamtogole Yesu wamgoma. 31 Wakulu wamwenga wa isi ya Asia, waja wakalile mbwiga zake, wamgalila Paulo usenga kuno wompula sekeyaite muluhengo la kuvinila.

32 Chipindi icho, chila munhu kakala yolila kwa dizi kulu, wamwenga wolonga dino na wamwenga dija, mbaka hata uja mting'hanilo upwililika. 33 Wayahudi wamgala Alekizanda haulongozi ha wanhu, na wanhu wamwenga mja mdibumbila wasonga kulonga nayo, baho nayo Alekizanda kawahungila mkono yolonda kuigombela. 34 Mbali viwamanyile kua iyo Myahudi, wose hamwe waguta nyangi kwa masaa maidi walonga,"Altemi wa Waefeso ni mkulu!"

35 Kilongozi wa kae ija kadaha kawatenda wanyamale, kawalongela, "Wenekae wa Efeso chila munhu kovimanya kua kae ino ya Efeso ni mmilizi wa ng'anda ya mulungu Alitemi na mmilizi wa ija mulungu wa nyang'iti yagwile hasi kulawa kuulanga. 36 Habule munhu yodaha kubela mbuli izo. Nvo, nyamaleni hupi sekemlopole kusang'hana chochose bila kutonga goya. 37 Muwagala wano wanhu hano mbali hawebile chinhu chochose muing'anda ya mulungu hebu hawamligile mulungu wetu wa chike.

38 Ivo, kama Demetilio na wasang'hanaji wayage wana mbuli yao kwa wanhu wano, vabaho vitala na wakulu wa isi, vodahika kuzilongelela mbuli zao uko. 39 Kama mwahawa na mbuli zimwenga zigaleni mchitala cha ndagizi.

40 Manake chihagaligwe mchitala kwa mbuli ya ndwagi za lelo chihapotigwe kuigombela kwavija ndwagi zino zabule mana yoyose." 41 Viyakomeleze kulonga gago, kawalongela wanhu wose weli mu mting'hanilo wasegele.