1 Mchipindi icho icho mfaume Helode Agilipa kasonga kuwadununza wamtogole Kilisito wamwenga. 2 Kalagiza Yakobo mkulu wake Yohana yakomigwe kwa kukanhigwa na panga. 3 Viyaonile mbuli iyo iwanogela Wayahudi kalagiza wamgoge na Petulo. Mbuli ino ilawila mchipindi cha lusona lwa migate igeligwe mela. 4 Viwamgogile, Petulo wamwika mdigeleza mvikosi vine vimiligwe na wamilizi wane wane ili wamwamile. Helode kalonda uhamala lusona lwa pasaka, amlave ha wanhu ili yalamuligwe. 5 Baho, Petulo kekigwe mdigeleza, mbali wamtogole Kilisito wasonga kumpulila ng'hani kwa Mulungu.

6 Ichilo vidikalile ding'hali zua da Helode da kumlava Petulo haulongozi ha wanhu, Petulo kakala yawasile hagati ha wamilizi waidi yeli kafungigwa na minyololo midi. Nao wamilizi wakala wokwamila lango kulu da geleza. 7 Bahaja mtumigwa wa kwa Mulungu kema behi nayo, na muja mgati mulawilila bung'hulo, ija mtumigwa wa kwa Mulungu kamwamha mulubavu kamulamusa kalonga, "Lopola wime." Bahaja minyololo ija idumuka mmakogo ga Petulo. 8 Mtumigwa wa kwa Mulungu kalonga, "Vala msipi wako na makwabaza gako." Petulo katenda kama viyalongeligwe, amala mtumigwa wa kwa Mulungu kalonga, "Vala koti jako uniwinze." 9 Petulo kalawa mdigeleza kuno yoilongoza na mtumigwa wa kwa Mulungu, hamanyile kama gaja galawilile ni kweli, kagesa kakala mmaloleso. 10 Wabita hanhu ha mosi na hakaidi ha wimilizi, labaho wavika haulwivi wa zuma wakwingilila muikae. Lwivi ijo da zuma divuguka denyego nao walawa kunze. Viwakalile wogenda muinzila imwe bahaja ija mtumigwa wa kwa Mulungu kamleka Petulo yaiyeka.

11 Baho iyo Petulo kavimanya gamulawilile kalonga, "Sambi nivimanya kweli kua Mndewa kamlagiza mtumigwa wake keza kunilohola mmakono ga Helode na kulawa kwa gehile gaja gawalondile kunhendela.

12 Viyamanyile ivo kagenda dimwe kwa dimwe mbaka ukae kwa Malia mami yake Yohana yokemigwa Maluko. Umo wanhu wengi wakala waikunzanye kuno wopula. 13 Petulo viyatoile hodi haulwivi wa kunze mtumwa wa chike yokemigwa Loda, keza kumtegeleza. 14 Viyaditambule dizi da Petulo kadeng'helela ng'hani kabwela bila kuvugula lwivi na kuwalongela Petulo kahanze haulwivi. 15 Wamulongela ija mndele, "Kuna chichala!" Mbali iyo kagangamiza kua ni kweli nao wamlongela, "Iyo mtumigwa wake wa kwa Mulungu." 16 Mbali Petulo kagendelela kutoa hodi nao viwavugule lwivi na kumuona Petulo wakanganya. 17 Petulo kalava chilaguso kwa makono ili wanyamale, kawalongela vija Mndewa viyamlavile mdigeleza. Amala kawalongela, "Mlongeleni Yakobo na ndugu wamwenga womtogola Kilisito." Labaho kalawa kuita hanhu hamwenga.

18 Vuuchile wamilizi wakala wodumba ng'hani kwachija chimlawilile Petulo.

19 Helode kalagiza Petulo yazambwiligwe chila hanhu mbali hawampatile. Kawauza waja wamilizi na kalava ndagizi wakomigwe.

Labaho Helode kalawa Yudea nakuita kukala kae ya Kaisalia kwa chipindi chidodo.

20 Helode kakala yehiligwe ng'hani na wanhu wa kae za Tilo na Sidoni, ivo wanhu wa kae izo wailumba hamwe, walonda kuiting'hanila nayo, na viwatogololigwe na Bulasto munhu yatogoligwa ng'hani na mfaume Helode yawe mbwiga wao, wampula Helode wakale nayo kwa utindiwala kwavija isi yao itumanila kupata ndia kulawa muiisi ya mfaume.

21 Zua dimwe disaguligwe, mfaume Helode kavala vivalo vake va ufaume na kakala mchigoda chake cha ufaume na kulonga na wanhu. 22 Wanhu wakalile waikunzanye waguta nyangi walonga, "Ino sio dizi ya munhu ila ya mulungu!" 23 Bahaja mtumigwa wa kwa Mulungu kamtoa Helode na kugwa kwavija hamwing'ile Mulungu nhogolwa iyo." Baho, ngili imgoga na kadanganika. 24 Usenga wa Mulungu wenela na kuwavikila wanhu wengi.

25 Baho Banaba na Sauli viwakomeleze ija sang'hano yao iwagalile, wamsola Yohana yakemigwa Maluko wabwela nayo Antiokia kulawa Yelusalemu.