1 Vigabitile mazua matano, mkulu wa walava nhambiko Anania kavika Kaisalea hamwe na wavele wamwenga, na munhu imwe yokemigwa Tilitulo galu wa ndagizi za Musa. Wamuwinza mkulu Feliksi wamlongelezela mbuli zose ziyatendile Paulo.

2 Paulo viyakemigwe mng'anda, Telitulo kasonga kulonga, "Go mkulu Felisi! Ulongozi wako unogile uwo uching'ile utindiwala ng'hani mbaka mbuli nyingi zihile muiisi yetu zilavigwa. 3 Choibokela mbuli ino kwa ndeng'helo mazua gose mkulu Feliksi na ivija chila hanhu cholava hewela nyingi kumwako. 4 Mbali, silonda kukutenda ulegele ng'hani, ila chokupula kwa unovu wako uchitegeleze chidogo mbuli yetu.

5 Chivimanya kua munhu ino cha ndwagi. Iyo koshwangiza ndwagi mwa Wayahudi chila hanhu muiisi na ivija iyo chilongozi wa chija chikosi cha Wanazaleti. 6 Ivija kageza kuitenda ng'anda ya Mulungu sekeitogoligwe kwambuli ya nhambiko, mbali cheye chimgela mmakono. Chilonda kumlamula kuilinga na ndagizi yetu. 7 Mbali Lusia, mkulu wa wamilizi, kengilila mbuli iyo, na kamsola kwa ludabwa kulawa mmakono getu. 8 Amala kawakema waja wamlongelezele weze haulongozi hako. Manake kama wahamuuza Paulo gweye mwenyego kodaha kuzimanya mbuli zake zose zino chizilonga kumwako." 9 Nao waja Wayahudi waitogolela na kulonga kua mbuli zino zose ziwamlongeleze zikala kweli.

10 Baho, mkulu Feliksi kamwing'ha chilaguso Paulo yalonge mbuli, nayo Paulo kalonga, "Nodeng'helela kuigombela mbuli haulongozi hako, kuno novimanya kua kukala mlamuzi wa isi ino kwa milao mingi. 11 Mwenyego, kodaha kuvimanya kua haganabita hata mazua kumi na maidi kulawa viniitile kufugama uko Yelusalemu. 12 Wayahudi hawanivikile nolonga na munhu yoyose. Hawanivikile noshwangiza wanhu mui ng'anda ya Mulungu hebu Mzing'anda zao za kuiting'hanila Wayahudi, hebu hanhu hengine hohose muikae iyo. 13 Ivija wabule mbuli ya ukweli ya kunilongeleza kumwako. 14 Chinitogola kumwako iyo chino, "Niye nomfugamila Mulungu wa wavele zetu kuno nokala kwa kuilinga na nzila ija wao woikema nzila ya ufundaji wa uvwizi. Nozitogola mbuli zose zandikigwe mvitabu va ndagizi na walagusi wa Mulungu. 15 Niye ninajo tumanilo kama wao viwali na tumanilo, kua wanhu wotogoligwa na Mulungu na wehile wose wokwiza kuzilibuka. 16 Kwaivo, nogangamala mazua gose niwe na moyo mzelu haulongozi ha Mulungu na ha wanhu. 17 "Baho, vinikalile kutali kwa milao mingi, nibwela Yelusalemu ili kuwataza wenekae wayangu welibule chinhu na kulava nhosa kwa Mulungu. 18 Chipindi vinikalile nosang'hana gago, ivo wanivikile mui ng'anda ya Mulungu, vinikomeleze kuitenda nitogoligwe kwambuli ya nhambiko. Hahawile na bumbila da wanhu hebu siwaswangize wanhu kutenda ndwagi yoyose. 19 Mbali hakala na Wayahudi wamwenga kulawa uko Asia, wao iyo walondeka kukala haulongozi hako na kulonga kama hana mbuli yoyose ihile initendile, 20 hebu walongele wanhu wemile hano walonge mbuli gani ihile waionile haja hanimile haulongozi hachitala chikulu, 21 ila kwambuli zino zinilongile vinimile haja haulongozi hao, ‘Monilamula lelo kwa vija notogola kua wafile wozilibuligwa.’"

22 Baho, mkulu Feliksi ija yakalile yovimanya goya mbuli ya nzila ija, hagendelele kutegeleza ijo mbali kalonga, "Nolava ulamuzi wa mbuli ino mala tu yaheza Lusia, ija mkulu wa wamilizi." 23 Bahaja kamlongela ija mkulu wa chikosi cha wamilizi yamwike Paulo muuwimilizi, mbali yawe na nyafasi chidodo na mbwiga zake seke wagomigwe kumwing'ha vinhu viyolonda.

24 Vigabite mazua madodo, Feliksi na mwehe wake yokemigwa Dulusila ija yakalile Myahudi. Kalagiza Paulo yagaligwe hamwake, nayo kamtegeleza viyakalile yolonga kwa mbuli ya kumtogola Kilisito Yesu. 25 Mbali chipindi Paulo viyasongile kulongelela mbuli ya kusang'hana gaja gatogoligwa na Mulungu, na mbuli ya kuikimila na kwa mbuli ya zua da ulamuzi vidikwiza, Feliksi kadumba na kalonga, "Sambi nyamala kodaha kuita, nokwiza kukukema kaidi haja nahapata nyafasi." 26 Chipindi ichoicho Feliksi kakala yotumanila kua Paulo yahamwing'ile chinhu chochose ili yamlekese. Kwa mbuli iyo kamkema Paulo chila mala na kulonga nayo.

27 Kwa vija Filiksi kakala yonda kuweng'ha deng'o Wayahudi, kamleka Paulo mdigeleza. Viibitile milao midi, Polikio Festo kaisola nyafasi ya Feliksi kakala mkulu wa Mkoa.