1 Vichikomeleze kuilaga kwa giogio, chikwela meli kuita dimwe kwa dimwe mbaka kae ya Kosi. Igolo yake chivika uko Lode na kulawa uko chiita Patala. 2 Uko, chivika meli ikalile yoita uko Foinike, baho chikwela na chisonga mwanza.

3 Vichivikile hanhu haja hachionile chisiwa cha Kipulo, baho chibitila ubanzi wake wa hasi chiita isi ya Silia. Chima mhwani ya Tilo haja mbahasha zilondigwa kubakuligwa kulawa muimeli. 4 Uko chiwavika waluko na chikala hamwe nao kwa chipindi cha juma dibwe. Waluko wao wakala wolongozigwa na Muhe wa Mulungu, na kumlongela Paulo sekeyaite Yelusalemu. 5 Mbali chipindi chetu vichimalile chisegela. Waluko wao wose hamwe na wanachike na wana wao wachigala mbaka hanze ya kae. Vichivikile mhwani, chose chifugama mavindi chipula. 6 Amala chiilaga na cheye chikwela meli, na wao wabwela kumwao.

7 Cheye chigendelea na mwanza wetu kulawa Tilo mbaka chivika Tolemai kwa meli, kuja chiwalamusa ndugu zetu wamtogole Kilisito na kukala nao zua dimwe.

8 Igolo yake chisegela na chiita kae ya Kaisalea. Uko chiita ukae kwa Filipo ija yakalile mligula usenga wa Mulungu. Iyo, kakala imwe mwa waja saba wasaguligwe. 9 Filipo kakala na mabiti wane mhambe waja wakalile wolava ulagusi. 10 Vichikalile uko kwa mazua madodo, mlagusi imwe wa Mulungu yokemigwa Agabo kavika kulawa Uyahudi. 11 Viavikile kasola msipi wa Paulo, kagafunga makono na magulu gake kalonga, "Muhe wa Mulungu kalonga vino, ‘Vino ivo Wayahudi wa Yelusalemu vonda wamfunge ija yeli na msipi uno na kuwagala kwa wanhu haweli Wayahudi.’"

12 Vichihulike gago, cheye na waja wanhu wamwenga chimpula ng'hani Paulo sekeyaite Yelusalemu. 13 Mbali iyo kedika, "Habali molila na kunibena moyo? Niye nitogola kufungigwa hebu kudanganika uko Yelusalemu kwa mbuli ya zina da Mndewa Yesu."

14 Vichipotigwe kumswangiza chinyamala na chilonga, "Diyalonda Mndewa ditendeke."

15 Vichikalile haja kwa chipindi chidodo, amala chifunga mbahasha zetu na chigendelela na mwanza wetu mbaka uko Yelusalemu. 16 Waja waluko wamwenga kulawa Kaisalia waita hamwe na cheye, wachigala ha Mnasoni ija chiitile kukala nayo kwa chipindi chidodo, Mnasoni kakala mwenekae ya Kipulo na ivija kakala mwaluko kwa mazua mengi.

17 Vichivikile Yelusalemu, ndugu wamtogole Kilisito wachibokela goya ng'hani.

18 Igolo yake Paulo hamwe na cheye wamwenga wose chiita kumuona Yakobo na wavele wose wa bumbila da wamtogole Kilisito haja hawakalile. 19 Viwawalamuse, Paulo kaweng'ha vinogile usenga wose kwa mbuli yose ija Mulungu yakalile kaisang'hana mwa wanhu wose waja haweli Wayahudi kubitila utumigwa wake Paulo.

20 Viwahulike mbuli izo, wamwing'ha Mulungu nhogolwa. Amala wamlongela Paulo, "Ndugu, sambi koona kua hanamaelufu ga Wayahudi waja vino sambi wamtogola Kilisito na wose wao woitegeleza goya ndagizi za Musa.

21 Mbali walongeligwa kua kukala kowafunda Wayahudi wose wakalile mwa wanhu wa isi zimwenga kua sekewaitogole ndagizi ya Musa, na sekewawengize kumbi wana wao wala kuwinza mazoela ga Wayahudi. 22 Sambi chitendeze? Kweli wapata usenga kua kwiza hano Yelusalemu. 23 Ivo tenda kama vichikulongela. Hano china wanhu wane weka malaliko ga kumlavila Mulungu. 24 Ilumbe na wanhu wao kwa kuliha malaliko gao ga wekile kwa Mulungu na kulava nhosa zilondeka amala wabeigwe mvili zao. Baho wanhu wose wovimanya kua zija mbuli zose ziwalongeligwe kwambuli yako gauvwizi na kua gweye kuzigoga ndagizi za Musa.

25 Mbali kwa mbuli ya wanhu haweli Wayahudi, chimala kuwagalila balua kuno chiwalongela mbuli zichilamule, Seke waja chochose chitambikiligwe milungu ya uvwizi, seke wang'we damu, na seke waje nyama ya mnyama yabotigwe na wainege na uluhadu."

26 Ivo, igolo yake Paulo kawasola waja wanhu na waika kwa kutogoligwa kama vigalonda mazoela ga nhambiko. Amala kengila Muing'anda ya Mulungu na kuwalongela mazua gonda wakale baho na nhosa yondailavigwe kwa chila munhu mmwao.

27 Mbali mazua gago saba vigawile behi kumala, Wayahudi wamwenga wakalile wolawa mumkoa wa Asia wamwona Paulo Muing'anda ya Mulungu. Wawaswangiza wanhu wakalile baho nao wamgoga Paulo.

28 Waguta nyangi walonga, "Mweye Waizilaeli, chitazeni! Ino iyo ija munhu yofunda wanhu chila hanhu, kwambuli ya wanhu wetu na kuilema ndagizi za Musa na ng'anda ino ya Mulungu. Sambi kawengiza wanhu wamwenga haweli Wayahudi na kuhatenda hanhu hano seke hatogoligwe na Mulungu." 29 Wadilonga dino, kwa vija wakala wamuonile Tilofimo ija mwenekae wa Efeso, yeli muikae hamwe na Paulo, na wagesa kua Paulo kakala yamwingize Muing'anda ya Mulungu.

30 Kae yose yenela ndwagi, wanhu weza kulawa chila ubanzi na wamgela mmakono Paulo, wambulula na kumlawa kunze ng'anda ya Mulungu. Amala milwivi mikulu ya ng'anda ya Mulungu ihindigwa. 31 Bumbila dija da wanhu vidikalile dolonda kumkoma Paulo, mbali baho usenga umvikila mkulu wa wamilizi wa Kiloma kua Yelusalemu yose imema ndwagi ng'hulu. 32 Bahaja iyo mkulu wa wamilizi kawasola wamilizi na vilongozi wa wamilizi na kukimbilila mzindwagi zija. Nao viwamonile ija mkulu wa wamilizi hamwe na wamilizi wake, waleka kumtoa Paulo. 33 Mkulu wa wamilizi kamuwinza Paulo, kamgela mmakono na kulamula yafungigwe minyololo midi. Amala kauza, "Munhu ino nani na katenda choni?"

34 Wanhu wamwenga mdibumbila dija da wanhu wakala woguta nyangi, wano wolonga dino na wamwenga wolonga dija. Mmilizi mkulu kapotigwa kuvimanya kwambuli ya nyangi zija, ivo kalagiza Paulo yagaligwe mng'anda ya geleza. 35 Paulo viyavikile muingazi ya kwingilila muing'hambi ya jeshi, wamilizi walamula kumpapa uchanha kwa vija hakala na ndwagi za dija bumbila da wanhu. 36 Kwa vija dija bumbila kulu da wanhu dikala domuwinza kuno doguta nyangi dolonga, "Yakomigwe!"

37 Viwakalile womwingiza muingome ya wamilizi, Paulo viyamonile mkulu wa wamilizi kalonga, "Ivo, nodaha kukulongela chinhu?" Naija mkulu wa wamilizi kamwidika, "Ivo kochimanya chiyunani? 38 Ivo, gweye sio ija Mmisili ija vino behi kasonga ubala na kuwashwangiza bumbila da wanhu wehile elufu nne mbaka kuluwala?"

39 Paulo kedika, "Niye ni Myahudi nileligwe Taso muikae ng'hulu ya Kilikia. Nokupula ng'hani ning'he chibali nilonge na wanhu."

40 Ija mkulu wa wamilizi kamwing'ha chibali. Baho Paulo kema hachanha muingazi kawahungila waja wanhu mkono, na viwakalile hupi, kasonga kulonga nao kwa Chiebulania.