1 Petelo na Yohana wakala wang'hali wolonga na wanhu, Walava nhambiko wamwenga na mkulu wa wamilizi wa ng'anda ya Mulungu hamwe na Masadukayo waiting'hanila. 2 Wehiligwa ng'hani kwavija wao wasenga wa Mulungu wakala wawaligulila wanhu kua Yesu kazilibuka, chinhu chigangamiza kua wanhu wafile wozilibuka. 3 Baho wamgoga Petulo na Yohana na kuweka mdigeleza mbaka igolo yake, kwavija ikala chigulogulo. 4 Mbali wengi wahulike usenga uja waulongile Petulo na Yohana wautogola, na wanhu wautogole usenga uo wakala walume behi na elufu tano. 5 Igolo yake, vilongozi wa Wayahudi na wavele vilongozi na wafunda ndagizi waiting'hanila hamwe uko Yelusalemu. 6 Waiting'hanila hamwe na Anasi mkulu wa Walava nhambiko, Kayafa na Yohana na Alekizanda na wamwenga wakalile wa lukolo lwa mlava nhambiko. 7 Petulo na Yohana viwemile haulongozi wao, wawauza, "Mweye motenda mbuli zino kwa udaho gani na kwa ukulu wa nani?" 8 Baho, Petelo, yakalile yolongozigwa na Muhe wa Mulungu kawalongela, "Mweye wakulu na wavele wa Izilaeli! 9 Yahawa mochiuza lelo kwambuli inogile iyatendeligwe ija mbetembete na vija viyapatile kua mgima, 10 baho mweye na wanhu wose wa Izilaeli molondeka mvimanye kuwa munhu ino kema haulongozi wenu lelo yeli mgima kabisa, kwa udaho wa zina da Yesu wa Nazaleti ija immmuwambile mumsalaba mbali Mulungu kamzilibula. 11 Yesu iyo iyo Mayandiko ga Mulungu galonga,

‘Dibwe dimlemile mweye wazengaji

sambi diwa dibwe kulu da usimikilo.’

12 Yesu yaiyeka iyo yodaha kulohola wanhu, kwavija muiisi yose habule zina diching'higwe dilondeka kuloholigwa najo."

13 Wao wakulu wa chitala, viwaonile Petulo na Yohana wolonga bila kugwaya na kuvimanya kua wakala wanhu nzakabwa welibule ilimu, waja wavele wawakanganya ng'hani. Wavimanya kuwa wakala wailumba na Yesu. 14 Mbali viwamuone ija munhu yahonyigwe kema hamwe nao, hawalongile chinhu. 15 Ivo wawalongela walawe kunze mchitala, nao wasigala mng'anda wolongelela waiyeka. 16 Waiuza, "Chiwatendeze wanhu wano? Chila munhu yokala Yelusalemu kavimanya kuwa mujiza uno usang'hanika na cheye hachidaha kuilema mbuli ino. 17 Mbali ili chidahe kuikimila mbuli ino seke yenele ng'hani kwa wanhu, chiwagome wanhu wano sekewalonge na munhu yoyose kwambuli za Yesu." 18 Kwaivo wawakema kaidi mng'anda, wawalakila seke walonge kaidi kwa wanhu hebu kufunda kwazina da Yesu. 19 Baho Petulo na Yohana wawedika, "Lamuleni mweye wenyego kama vinoga ha Mulungu kuwategeleza mweye hebu kumtegeleza Mulungu. 20 Mbali cheye hachidaha kuleka kulonga mbuli zichionile na kuzihulika. 21 Baho, waja wavele wa chitala wawakomhokela ng'hani kwa ludoko, amala wawalekesa waite. Hawadahile kuwatowa hebu kuwafunga mdigeleza, kwavija wanhu wose wakala womtogola Mulungu kwambuli ino. 22 Munhu iyo yahonyigwe kakala na milao yobita alubaini.

23 Bahaja Petulo na Yohana viwalekesigwe, wabwela kwa wayao, wawalongela gaja gose gawalongiligwe na wakulu wa walava nhambiko na wakulu wa wavele. 24 Naviwahulike mbuli izo wailumba hamwe na kumupula Mulungu walonga, "Go Mndewa, iyo ulumbile ulanga na isi na bahali na vinhu vose viliumo. 25 Iyo umtendile mtumigwa wako, tata yetu Daudi, yalonge kwa udaho wa Muhe wako.

Habali wanhu wa isi zimwenga wagevuzike?

Mbona wanhu wasang'hana mbuli za chakachaka?

26 Wafaume wa isi waitanda goya,

na wakulu waiting'hana hamwe,

kumlema Mndewa na Kilisito wake.’

27 Kwa vovose, Helode na Pontio Pilato na wanhu wa Izilaeli na wanhu haweli Wayahudi, waiting'hana muikae ino kumlema Yesu mtumigwa wako umtumile ija umsagule. 28 Waiting'hanila ili wasang'hane gaja ugalondile galawile kwa udaho wako kulawa umwaka yalawile. 29 Sambi gweye Mndewa lola viwachitenda chidumbe, chokupula uchidahize cheye watumwa wako kuligula usenga wako bila kudumba. 30 Lagusa udaho wako wa kuhonya, uhonye wanhu. Sang'hana vilaguso na uzonza kwa zina da Yesu mtumigwa wako umsagule."

31 Viwamalile kupula, hanhu haja hawakalile waiting'hane hatigisika, na wose walongozigwa na Muhe wa Mulungu na wasonga kuligula usenga wa Mulungu bila kudumba.

32 Wanhu wose wamtogole Yesu wakala na moyo umwe na wagesa dimwe habule munhu yoyose yaonile chinhu chake yelinacho chake yaiyeka, ila waigolela vose welinavo. 33 Watumigwa wa Mulungu wagendelela kulonga kwa udaho mkulu na Mulungu kaweng'ha ganogile gake makulu. 34 Habule munhu yoyose yahungukiligwe na chinhu, kwavija wanhu wakalile na migunda hebu ng'anda wakala wozigula, 35 kaweng'ha watumigwa wa Mulngu sente izo nao wamwing'ha chila munhu kama viyalondile.

36 Kukala na munhu imwe yolawa mulukolo lwa Lawi yavumbuke Kupulo zina jake Yusufu, ija watumigwa wamkema Balaba manake munhu yogela moyo wayage. 37 Munhu iyo kagula mgunda wake na kasola sente ziyapatile kawenga watumigwa.