1 Wanhu wamwenga wavika Antiokia kulawa Yudea, nao wasonga kuwafunda waja wanhu haweli Wayahudi wamtogole Kilisito kwa kulonga, "Hamdaha kuloholigwa kama hamwingile kumbi kama Musa viyachifundile." 2 Mbuli ino iwatenda Paulo na Banaba sekewaitogolele nao. Ivo wanhu wawasagula Paulo na Banaba hamwe na wanhu wamwenga wa Antiokia wamtogole Kilisito waite Yelusalemu kuwaona waja wasenga na wavele kwa mbuli iyo.

3 Baho bumbila da wanhu wamtogole Kilisito wawalaga, na wao viwakalile wobitila uko Foinike na Samalia wawalongela wanhu vija wanhu wa isi zimwenga viwamhindukile Mulungu. Mbuli izo ziweng'ha ndeng'helelo ng'hani wanhu wao wose.

4 Viwavikile uko Yelusalemu wabokeligwa na wanhu wamtogole Kilisito, na wasenga wa Mulungu na wavele, nao ivija wawalongela zija mbuli zose Mulungu yazisang'hane kubitila wao. 5 Mbali wanhu wamwenga wa chibumbila cha Mafalisayo wamtogole Kilisito wema na kulonga, "Yolondeka wanhu wa isi zimwenga wageligwe kumbi na kufundigwa mbuli ya kuigoga ndagizi za Musa."

6 Baho waja wasenga wa Mulungu na wavele vilongozi watenda mting'hanilo hamwe ili kuilongelela mbuli ino. 7 Viwakalile wolongelela kwa chipindi chitali, Petulo kema na kulonga, "Mbwiga zangu, mweye movimanya kua baho haumwanduso Mulungu kakala na wende wa kunisagula niye mmwenu ili nipwililise Usenga Unogile kwa wanhu wa isi, ili wauhulike na kutogola. 8 Mulungu, iyo yaimanyile mioyo ya wanhu, kagangamiza kua kawatogola na kuweng'ha Muhe wake kama viyaching'ile cheye. 9 Habagule wowose mmwetu hebu mmwao na kawalekesela malozo gao kwavija wamtogola Kilisito. 10 Ivo, habali molema gaja Mulungu gayasang'hane kwa kuweng'ha mbahasha zija zizamile wanhu wao ija wavele wetu hebu cheye hachidaha kuipapa? 11 Sekeiwe ivo, ila chotogola kua, cheye kama wao ivija, choloholigwa kubitila unovu wa Mndewa Yesu Kilisito kama wao viwaloholigwa."

12 Wanhu wose wakalile baho wanyamala hupi, kuno wowategeleza Banaba na Paulo viwakalile wolongelela mbuli za miujiza na miuzonza ija Mulungu yaisang'hane kwa wanhu wa isi zimwenga. 13 Viwakomeleze kulongelela, Yakobo kasonga kulonga, "Wayangu nhegelezeni! 14 Simoni kasimulila vija Mulungu baho haumwanduso, viyawasang'hanile wanhu wa isi zimwenga, na kusagula wanhu wamwenga mmwao ili wawe wanhu wake. 15 Mbuli ino iilinga na mbuli za walagusi wa Mulungu, kama Mayandiko ga Mulungu vigalonga,

16 ‘Mbuli zino zihamala nobwela,

na nozenga kaidi chija chibanda cha Daudi chigwile.

Nogazenga gaja mahame gake

na kugatenda gagangamale kaidi.

17 Ili wanhu wamwenga wose wanihindukile nie Mndewa,

na wanhu haweli Wayahudi wose niwakemile wawe wangu.

18 Vino ivo vinilonga nie Mndewa, nisang'hane mbuli zino zimanyike kulawa umwaka.’"

19 Yakobo kagendelela kulonga, "Kwaivo ulamuzi wangu uwo uno, Sekechiwagaze wanhu wa isi zimwenga waja wombwelela Mulungu. 20 Ivo, chiwandikile balua ya kuwalongela seke waje ndia ija ilongigwe mwiko kujigwa kwa kutambikiligwa na wananyang'iti wa milungu, wainege na luhadu, seke waje mnyama yoyose yabobotigwe na seke wang'we damu. 21 Kwa chipindi chitali, mbuli za Musa zikala ziliguligwa kwavija kulawa umwaka mafundo ga Musa gafundigwa mchila kae na Mzing'anda za kuiting'hanila wayahudi Mdizua da kuhumula."

22 Wasenga, wavele na bumbila da wanhu wamtogole Kilisito walamula kuwasagula wanhu wamwenga mmwao na kuwalagiza uko Antiokia hamwe na Paulo na Balisaba. Wamsagula Yuda ija ivija yakemigwe Balisaba, na Sila waja wose wakalile womanyika ng'hani mwa ndugu wamtogole Kilisito, 23 na waweng'ha ino balua,

"Cheye wasenga wa Mulungu na wavele, ndugu zenu, chowalamuseni mweye ndugu wa isi zimwenga mliuko kae ya Antiokia, isi ya Silia na Kilikia. 24 Chihulika kua wanhu wamwenga kulawa kuno kumwetu wamwagazanyeni kwa mbuli zao, na kuwatendani mdumbe. Mbali watenda ivo bila cheye kuwalagiza kutenda ivo. 25 Ivo, chose chilamula kuwasagula wanhu wamwenga na kuwalagiza kumwenu hamwe na mbwiga zenu wa wende Banaba na Paulo, 26 waja waihonzile kwa mbuli ya zina da Mndewa wetu Yesu Kilisito. 27 Kwaivo, chowalagiza kumwenu Yuda na Sila, wano wenyego wowafambulila gaja gachandikile. 28 Baho muhe wa Mulungu na cheye chitogola kua seke chiwageleke mbuli ndala kubita zija zilondeke mzimanye,

29 seke mje ndia itambikiligwe na milungu ya nyang'iti, seke mng'we damu, seke mje nyama ya mnyama yabobotigwe na muitiganye na mbuli za uluhadu. Motenda goya kama mwahainega na gago, hewela!"

30 Viwakomeleze kuwalaga, wanhu wao walawa Yelusalemu wahumulukia kuita kae ya Antiokia uko wawakema wanhu wose wamtogole Kilisito, waweng'ha ija balua. 31 Viwaisomile iyo balua Wanhu wao, mbuli ziliumo ziwagela moyo na wadeng'helela ng'hani. 32 Yuda na Sila, waja wakalile Walagusi wa Mulungu, walongelela nao ndugu kwa chipindi chitali kuno wowagela moyo na kuwagangamiza. 33 Viwakalile uko kwa chipindi chiguhi, Yuda na wamwenga wawalaga waja ndugu wa kae ya Antiokia na kuwapulila utindiwala, amala wabwela kwa waja wawalagize. 34 Mbali Sila kusigala. *

35 Paulo na Banaba hamwe na wanhu wamwenga wasigala uko Antiokia kwa chipindi, wakafunda na kuligula usenga wa Mndewa.

36 Vigabitile mazua chidodo, Paulo kamlongela Banaba, "Haya chibwele chikawalongele waja ndugu mchila kae chiligule usenga wa Mndewa, ili chiilolele vija viwagendelela." 37 Baho Banaba ivija kalonda yamsole Maluko. 38 Mbali Paulo kaona havinogile kumsola Maluko ija haumwanduso yawalekile kuja Pamfulia na kulema kuilumba muisang'hano yao. 39 Basi, halawilila uhasanyi mkulu kummwao, baho waigola. Banaba kamsola Maluko na wakwela ngalawa kuita Kupulo. 40 Nayo Paulo kamsagula Sila, na baada ya ndugu wa hanhu haja kumwika muulolezi wa unovu wa Mndewa, wasegela. 41 Kabitila isi ya Silia na Kilikia kuno kowagela moyo mabumbila ga wanhu wamtogole Kilisito.