1 Mumsimo uo Paulo kakala yokongeza kuwatenda wanhu wamtogole Kilisito wadumbe ng'hani kwakuwalongela kokwiza kuwakoma. Ivo kaita kwa mkulu wa Walava nhambiko. 2 Kapula yamwing'he balua ili yatambuligwe na vilongozai wa ng'anda za kuiting'hanila Wayahudi kae ya Damasiko ili yahavika uko yawagoge walume na wana chike, waja woiwinza Nzila ya Mndewa, na yawagale Yelusalemu. 3 Ila Sauli viakalile behi na kuvika kae ya Damasiko, baho lumwesa kulawa kuulanga umbung'hulila ubanzi wose. 4 Kagwa hasi na kuhulika dizi, "Sauli, Sauli! Habali undununza?" 5 Baho Sauli kamuuza, "Gweye kwa nani Mndewa?" Nayo kedika, "Niye iyo Yesu undununza." 6 Mbali sambi ima, wingile muikae na gweye kolongiligwa chiulondeka kusang'hana." 7 Wanhu wakalile muumwanza na Sauli, wema kuno wabule chakulonga, kwavija wahulika dizi mbali hawamonile ija yolonga. 8 Sauli kenuka, na viyagezile kulola hadahile kuona chochose, baho wamwamha mkono wamlongoza mbaka kae ya Damasiko. 9 Nayo kakala mazua madatu bila kuona chochose, na hadile hebu kung'wa chinhu chochose.

10 Hakala na mjalusona wa Yesu muikae ya Damasiko yakemigwe Anania. Mndewa, kamkema mgamaloleso,"Anania!" Nayo kedika, "Nahano, Mndewa," 11 Mndewa kamulongela Anania, "Itande uite hanhu hokemigwa nzila igoloke, uite muing'anda ya Yuda ukamuuze munhu imwe kulawa Taliso yokemigwa Sauli, na sambi kompula Mulungu, 12 nayo mgamaloleso kamuona munhu imwe yokemigwa Anania kokwingila muing'anda na kumwikila makono ili yeze kuona kaidi.

13 Mbali Anania kedika, "Mndewa wanhu wengi wanilongela kwambuli ya iyo Sauli viyawatendile vihile wanhu wako uko Yelusalemu. 14 Sambi kahano, wakulu wa walava nhambiko wamwing'ha udahi cha kuwagoga wose waja woditogola zina jako."

15 Mbali Mndewa kamulongela, "Gweye genda tu, kwavija munhu iyo nimsagula yawe mtumigwa wangu yawaligulile zina jangu kwa wanhu waja haweli Wayahudi na wafaume na wanhu wa Izilaeli. 16 Niye nomlagusila vija vonda yadununzike kwambuli ya zina jangu."

17 Baho, Anania kaita, kengila muing'anda iyo, kamwikila Sauli makono kalonga, "Mbwigaangu Sauli," Mndewa Yesu yakulawile mnzila kanilagiza kumwako ili udahe kuona kaidi na kulongozigwa na Muhe wa Mulungu." 18 Bahaja vinhu kama vibale vilagala kulawa mmeso ga Sauli, baho kasonga kuona kaidi. Amala kema na kubatizigwa, 19 na viyakomeleze kuja ndia ludabwa lwake lumbwelela.

Sauli kakala mazua madodo hamwe na wamtogole Kilisito wa uko Damesiko. 20 Baho kasonga kuligula usenga unogile kua Yesu ni Mwana wa Mulungu Mzing'anda za kuiting'hanila Wayahudi. 21 Wanhu wose wamhulike Sauli wakanganya na kuuza, "Ivo, munhu ino sio ija yawakomile waja wakalile wopula kwa zina da Yesu kuja Yelusalemu? Ivo, hezile hano ili yawagoge waja wamtogole Yesu na kuwagala kwa wakulu wa Walava nhambiko?

22 Baho Sauli kagendelela kupata ugalu wa kuligula usenga wa Mulungu na kuwatenda Wayahudi wengi wakalile kae ya Damesiki wamkanganye kwa kugangamiza kua Yesu ni Kilisito. 23 Mazua mengi vigabitile, Wayahudi waikunzanya na kumwikila chigwena cha kumkoma Sauli, 24 mbali Sauli kalongeligwa mbuli iyo. Ivo Wayahudi waimila milwivi mikulu ya kwingilila misi na chilo ili wamkome. 25 Mbali ichilo wajalusona wa Sauli wamsola na wamwika mumgelo mkulu na kumhulumusa kubitila zonzo dili mchiambaza cha kae.

26 Sauli viyavikile Yelusalemu na kageza kuilumba na waluko wa Yesu, mbali waluko wose wa Yesu wamdumba hawatogole kua iyo kakala mwaluko. 27 Amala Banaba keza na kamsola Sauli kamgala kwa wasenga wa Mulungu na kuwafambulila vija Sauli viyamuonile Mndewa na vija Mndewa viyamlongele viyakalile mnzila. Banaba ivija kawalongela vija Sauli viyaligule kwa ugalu zina da Yesu uko Damesiko. 28 Baho, Sauli kakala hamwe nao, kagenda muikae yose ya Yelusalemu yoligula usenga wa Mndewa bila kudumba. 29 Kalongelela na kuibelela na Wayahudi waja wolonga ulonzi wa Chiyunani, mbali wao walonda kumkoma. 30 Ndugu wamtogole Kilisito viwaimanyile mbuli ino, wamsola Sauli wamgala Kaisalea, wamleka aite kumwao Taliso.

31 Kwaivo bumbila da wanhu wamtogole Yesu wakala na utindiwala mu Yudea yose na Galilaya na Samalia. Muhe wa Mulungu kawagangamiza na kuwagela moyo wongezeka kukala kwa kumtegeleza Mndewa.

32 Petulo viyakalile yogenda hanhu hakwe hakwe kaita kuwalola wanhu wa Mulungu wakalile wokala muikae ya Lidda. 33 Uko kamvika munhu imwe yokemigwa Ainea, iyo kwa milao minane kakala yawasile mdikomwa kwavija kakala yaholole. 34 Baho, Petulo kamulongela,"Ainea, Yesu Kilisto kokuhonya. Lamuka kunzanya chilago chako uite." Bahaja Ainea kalamuka. 35 Wanhu wose wokala muikae ya Lidda na konde da Shaloni wamona Ainea na wose wamtogola Mndewa Yesu.

36 Muikae ya Yafa kukala na mwaluko imwe wa Yesu yakemigwe Tabita, Zina jake kwa Chiyunani ni Dolikasi, manake mhala. Mwanachike imwe kakala yosang'hana ganogile na kuwataza vikumbi muyega mazua gose. 37 Chipindi icho kaugula na kadanganika, wanhu wausunha mtufi wake wawika mdigati da golofa. 38 Yofa hahakalile hatali na kae ya Lidda waluko viwahulike kua Petulo kauko, wawalagiza wanhu waidi waite kumwake na kumpula, "Chonde chokupula lopola wizo kuno. 39 Baho Petulo kasegela, kaita hamwe nao. Viyavikile, kagaligwa kung'anda kudigolofa. Uko wagane wengi wamzunguluka Petulo kuno wolila na kumlagusila makoti na vivalo viyakalile yovisona Dolikasi viyakalile mgima. 40 Petulo kawalava wose kuja mgati, amala kafugama mavindi kapula, kauhindukila uja mtufi kalonga, "Tabita lamuka." Nayo kafumbula meso gake na viyamonile Petulo kalamuka kakala. 41 Petulo kamwamha mkono na kumwinula, amala kawakema waja wanhu wa Mulungu hamwe na waja wagane kamleka kumwao yeli mgima. 42 Mbuli iyo yenela chila hanhu uko kuikae ya Yofa, na wanhu wengi wamtogola Mndewa. 43 Petulo kasigala Yafa kwa mazua mengi, kakala kwa munhu imwe galu wa kusang'hana vinhu va mbende yakemigwe Simoni.