1 Wasenga wa Mulungu na waja wamwenga wambokele Yesu kuja Yudea wahulika kua wanhu haweli Wayahudi nao wabokela usenga wa Mulungu. 2 Baho, Petulo viyakwelile kuita Yelusalemu, waja Wayahudi wamtogole Kilisito wengile kumbi, wasonga kumlonga Petulo, 3 wolonga, "Gweye kuita kukala mzing'anda za wanhu waja hawengile kumbi na mbaka kuja nao!" 4 Baho, Petulo kasonga kuwalongela mbuli zose vizilawilile kusongela haumwanduso kalonga, 5 "Nikala muikae ya Yafa nipula, bahaja mhata utulo lovulovu na niona maloleso. Hakala na chinhu kama golole kulu dohulumuka kulawa kuulanga dikala jamhigwa mhindo zake nne, najo dinizila behi. 6 Vinilolile goya mgati yake niona wanyama wa magulu mane, wanyama wa kuimbago na waja wotambala na ndege. 7 Amala nihulika dizi,"Petulo lamuka uchinje uje!" 8 Mbali nie nilonga, "Habule Mndewa, sinakuja chinhu chochose chili mwiko kujigwa." 9 Dija dizi dihulikigwa kaidi kulawa kuulanga, "Chinhu chija Mulungu chiyalongile kodaha kuja, seke ukilonge mwiko kujigwa." 10 Mbuli iyo ilawilila mala nhatu, amala ivo vose vibwelezigwa kuulanga kwa Mulungu. 11 Bahaja, wanhu wadatu wakalile watumigwa kumwangu kulawa Kaisalia wavika kuing'anda ing'halile nokala. 12 Muhe wa Mulungu kanilagiza niite hamwe nao bila kuiuza. Wao ndugu sita wailongoza na nie na chose chingila kwa iyo Kolinelio. 13 Iyo kachisimulila vija viyamuone mtumigwa wa kwa Mulungu viyemile kuing'anda yake na kumlongela, "Lagiza wanhu waite Yafa wakamkeme Simoni yokemigwa Petulo. 14 Iyo kokwiza kokulongela mbuli ija ikutenda gweye na waja wokala muing'anda yako mloholigwe. 15 Navinisongile tu kulongelela, Muhe wa Mulungu kawahulumukila kama viyachihulumukile cheye haumwanduso. 16 Nanie siusemwile usenga wa Mndewa Yesu uyalongile, ‘Yohana kabatiza wanhu kwa mazi mbali mweye mobatizigwa kwa Muhe wa Mulungu.’ 17 Baho, ihawa Mulungu kaweng'ha wanhu wano nhunza iija iyaching'ile cheye chimtogole Mndewa Yesu Kilisito, ivo nie nani mbaka nigeze kumlema Mulungu?" 18 Viwahulike ivo waleka kumbelela Petulo na wamwing'ha nhogolwa Mulungu walonga, "Mulungu kaweng'ha nyafasi wanhu wa isi zimwenga walonge na kuleka malozo na kuweng'ha ugima!"

19 Madununzo galawilile viyadanganike Stefano wanhu wengi wamtogole Kilisito wapwililika, wamwenga waita isi ya Foinike na isi ya Kiplo na wamwenga Antiokia, uko kose wakala woligula usenga wa Yesu kwa Wayahudi waiyeka. 20 Mbali wamwenga wakala wanhu wa Kiplo na Kilene waitile Antiokia wauligule uo usenga kwa wanhu wa isi zimwenga, ivija wawaligulila Usenga Unogile wa Yesu. 21 Mndewa kawataza na wanhu wengi wautogola usenga na kumbwelela Mndewa. 22 Mbuli zino ziwavikila bumbila da wamtogole Yesu weli Yelusalemu ivo wamlagiza Banaba yaite Antokia. 23 Nayo viyavikile uko kaona vija Mulungu viyaweng'ile unovu wake, kadeng'helela ng'hani na kuwagela moyo wagendelele kua wanhu wakusang'hana gaja goyolonda Mndewa. 24 Banaba kakala munhu yanogile na yalongozigwa na Muhe wa Mulungu na kumtogola ng'hani Kilisito. Bumbila da wamtogole Kilisito jongezeka kua wengi.

25 Amala Banaba kaita kae ya Taso kumzambwila Sauli. 26 Nayo viyamonile kamgala Antiokia. Wose waidi wakala na bumbila da wamtogole Kilisito mlao wose na kuwafunda wanhu wengi ng'hani. Uko Antiokia uko chanduso cha waluko wa Yesu kukemigwa Wakilisito

27 Chipindi icho walagusi wa Mulungu wavika kulawa Yelusalemu mbaka Antiokia. 28 Imwe mmwao yokemigwa Agabo kema na kwa udaho wa Muhe wa Mulungu kalonga kua yolawila nzala ng'hulu muiisi yose. Nzala iyo iza kulawilila mfaume wa Kaisalia yokemigwa Kilaudio viyakalile yolongoza. 29 Waja waluko wa Yesu waitogolela chila munhu yagale chochose kuilinga na chieli nacho ili chiwataze waja ndugu wakalile wokala Yudea. 30 Baho, watenda ivo na kuweng'ha Banaba na Sauli chija chiwakunzanye wachivikize wao wenyego kwa wakulu wa bumbila da wamtogole Kilisito.