1 Kuja kae ya Ikonio, Paulo na Banaba waita muikae ya kuiting'hanila Wayahudi, kama mazoela gao, uko waligula kwa udaho mkulu mbaka Wayahudi wengi na wanhu haweli Wayahudi wamtogola Kilisito. 2 Mbali Wayahudi wamwenga walemile kumtogola Kilisito, wawashwangiza wanhu wa isi zimwenga ili wawaleme waja wamtogole Kilisito. 3 Baho Paulo na Banaba wagendelela kukala uko kwa chipindi chitali. Walongelela kwa ugalu mbuli ya Mndewa, nayo Mndewa kagangamiza ukweli wa usenga waulavile kwa mbuli ya unovu wake, na kuwadahiza wanhu kusang'hana uzonza na miujiza. 4 Na wanhu wa kae iyo waigola, wamwenga wailumba na Wayahudi na wamwenga wakala ubanzi wa wasenga wa Mulungu. 5 Haichikomelezo, wanhu wa isi zimwenga na Wayahudi kuno wailumba na wakulu wao wawekila chigwena cha kuwabananga vihile hao wasenga na wawatoa kwa mabwe. 6 Wasenga viwamanyile mbuli iyo, wakimbilila kae za Lusitila na Delibe, zili Lukaonia na hanu hakalile behi nao, 7 uko wakala woligula Usenga Unogile.

8 Hakala na munhu imwe mulume yakalile mbetembete uko Lusitila kulawa viyavumbuke, na kakala hapatile kutembela ng'o. 9 Munhu iyo kakala yomtegeleza Paulo viyakalile yoligula. Nayo Paulo kamlola goya munhu iyo na viyamonile kakala yatogole kuhonyigwa, 10 kalonga kwa dizi kulu, "Ima kwa migulu gako!" Nayo munhu yakalile mbetembete bahaja kenuka kasonga kugenda. 11 Na bumbila da wanhu vidionile chiatendile Paulo, wasonga kutoa nyangi kwa ulonzi wa Chilukaonia, "Chivikiligwa na milungu kwa lumbo da kiunhu!" 12 Banaba kakemigwa Zeu zina da mulungu wao mkulu na Paulo kakemigwa mulungu Helime kwavija iyo yakalile mlonzi mkulu. 13 Nayo Mkulu wa nhambiko wa mulungu Zeu ija ng'anda yake ya kutambikila ikala hamgwazo chidogo ya kae, kagala malume ya ng'ombe na mashada ya malua haulongozi wa lwivi mkulu lwa kae. Iyo hamwe na dija bumbila da wanhu walonda kuwalavila nhambiko wasenga. 14 Banaba na Paulo viwapatile mbuli izo, wavidega vivalo vao kulagusa kua wolema mbuli iyo na kukimbilila haja mdibumbila da wanhu na kutoa nyangi walonga, 15 "Mweye wanhu habali mozitenda mbuli zino? Cheye cha wanhu kama mweye. Chahano kuwaligulileni Usenga Unogile, ili muleke ino milungu ya nyang'iti ilibule chinhu, mumhindukile Mulungu yeli na ugima, yalumbilie ulanga na isi, bahali na vinhu vose viliumo. 16 Umwaka Mulungu kawaleka wanhu wose haweli Wayahudi wasang'hane kama viwolonda. 17 Hamwe na ijo Mulungu halekile kuwasang'hanila mbuli zinogile wanhu wose, kuwatowela mvula kulawa kuulanga na koweng'ha mazao kwa msimo wake, koweng'ha ndia na kowamemeza deng'o mmioyo yenu."

18 Kwakulonga ivo, Paulo na Banaba, wadaha kuwakimila kwa udala wanhu waja sekewawalavile nhambiko.

19 Hamwande chidogo Wayahudi wamwenga, weza kulawa uko Antiokia na Ikonio wawatenda wanhu wailumbe hamwe nao, wamtoa mabwe Paulo na wambulula mbaka kunze mwa kae kuno wao wavimanya kua kadanganika. 20 Mbali waluko wamwenga viwaikunzanye na kumzunguluka kalamka na kubwela kuikae. Viivikile igolo yake yeye na Banaba waita Delibe.

21 Paulo na Banaba viwakomeleze kuligula Usenga Unogile uko Delibe na kupata wajalusona wengi wamtogole Kilisito. Amala wailumba hamwe kuita kae ya kae ya Lusitila na Ikonio na Antiyokia ya Pisidia. 22 Wawashwangiza wamtogole Kilisito wa kae izo, na kuwagela moyo ili wagangamale kwa kumtogola Kilisito. Wawalongela, "Cheye chose wanhu wochidununza chihawa ching'hali hachina kwingila muufaume wa Mulungu." 23 Viwakomeleze kuwasagula wavele mchila bumbila da wamtogole Kilisito, wapula Mulungu na kufunga kuja Mulungu yawakimile. 24 Amala wabitila uko Pisidia na kuvika uko Pamfulia. 25 Viwakomeleze kuligula uja usenga uko Peliga, wahumulukila uko Atalia, 26 kulawa uko waita kwa ngalawa muibahali kubwela Antiokia ya Pisidia kuja wamtogole Kilisito wekigwa muumilizi wa unovu wa Mulungu kwa mbuli ya sang'hano ija vino sambi wakala waikomeleza. 27 Viwavikile uko Antiokia wawakema wanhu wose womtogola Kilisito weli uko na kuwalongela gaja Mulungu gayasang'hane hamwe nao, na vija viyawadahize wanhu wa isi zimwenga kumtogola Kilisito. 28 Nao Paulo na Banaba kwa chipindi chitali wakala hamwe nao uko waja wamtogole Kilisito.