1 Vichivikile goya mhwani, chivimanya kua chija chisiwa chokemigwa Malita. 2 Wenekae wa baho wakala na wende ng'hani kumwetu. Mvula ikala isonga kutoa na kukala na mbeho, na wao wakoka moto na kuchilongela chikotele. 3 Paulo kadondola mzigo mdodo wa ngodi na kakala kokwika mmoto, kwambuli ya moto mkali nyoka yeli na sumu ng'hali kalawa mzingodi na kuizinga mumkono wa Paulo.

4 Wenekae wa haja viwaonile ija nyoka koning'inila muumkono wa Paulo wailongela, "Yodahika munhu ino kamala kukoma munhu, na ingawa kahonyeka kudanganika muibahali." Nyinukila ya milungu haimleka yawe mgima. 5 Mbali Paulo kamkung'hunila ija nyoka muumoto na Paulo halumizigwe hata chidodo. 6 Waja wanhu wakala wotumanila kua Paulo yahavimbile hebu kugwa hasi na kudanganika bahaja. Mbali viwabetele kwa chipindi chitali na kuona habule chihile chochose chimpatile Paulo, wasonga kutonga vimwenga kwa mbuli ya Paulo na walonga iyo ni mulungu!"

7 Behi na hanhu haja hakala na migunda ya Pubilio, mkulu wa chija chisiwa. Pubilio kachibokela na kuchihunganikila kwa wende mkulu kwa mazua madatu. 8 Baho, ikala tati yake Pubilio kawasa mdikomwa, kuno yolumwa homa na kuhala. Paulo kaita kugati mwa tata ija na kumpula Mulungu, na kamwikila makono gake ija mtamu nayo kahona. 9 Mbuli izo vizilawilile ivo, watamu wose muichisiwa chija weza na wahonyigwa. 10 Nao wanhu waching'ha nhogolwa ng'hulu na vichilondile kusonga mwanza, kubitila muibahali wachigweka vinhu vose vichikalile chovilonda.

11 Viibitile miezi midatu, chisonga mwanza wetu kaidi kwa meli imwe ilawa Alekisandilia ikemigwa, "Milungu mhacha," Manake Kasta na Poluksi. Meli iyo ikala imile mchisiwa mchipindi chose cha mbeho. 12 Chivika muikae ya Silakusa, na chikala baho kwa mazua madatu. 13 Kulawila baho, chisegela na chizunguluka mbaka chivika Legio. vidibitile zua dimwe, mbeho isonga kubuma kulawa banzi wa hasi, ivo igolo yake chivika bandali ya Potioli. 14 Uko chiwavika ndugu wamwenga wamtogole Kilisito wachipulia chikale nao kwa juma dimwe. Vino ivo vichivikile muiisi ya Lumi. 15 Ndugu wa uko Lumi viwahulike mbuli zetu, weza kuchibokela mdigulilo da Apio na uko Migahawa midatu. Paulo viwaonile ivo kamwing'ha Mulungu hewela na kugeligwa moyo.

16 Vichivikile Lumi, Paulo kaluhusigwa kukala iiyeka hamwe na mmilizi imwe wa kumkimila.

17 Vigabitile mazua madatu, Paulo kawakema vilongozi wa Chiyahudi wa hanhu baho. Viwamalile kuikunzanya hamwe, Paulo kawalongela, "Ndugu zangu, niye mbali sitendile chochose chihile wala kulema mazoela ga wavele wetu, nigeligwa mmakono kuja Yelusalemu na kwikigwa mmakono ga Walumi. 18 Viwaniuzile na kuona kua siwile na mbuli yoyose inilondile nife, walonda kunilekesa. 19 Mbali Wayahudi wamwenga walema mbuli iyo, niye nilonda mbuli yangu igaligwe kwa Kaisali mfalume mkulu wa Lumi, ingawa sikalile na chochose cha kuwalongeleza wenekae wayangu. 20 Kwambuli iyo nipula kuonana na kulongelela na mweye, manake nifungigwa minyololo ino kwambuli ya tamanilo dija da Izilaeli."

21 Wao wamwidika, "Cheye hachina bokela balua yoyose kulawa Uyahudi, hebu habule ndugu yoyose yavikile hano na kugala mbuli yoyose hebu kulonga chochose chihile hamwako. 22 Mbali cholonda chikuhulike mwenyego vondauchilongele, kwa vija chivimanya chila hanhu wanhu wodibela bumbila da wamtogole Kilisito.

23 Baho, waigoneka zua da kuiting'hanila, na wanhu wengi wavika uko kuyakalile kokala. Kulawa imitondo mbaka ichigulogulo Paulo kakala kosimulila na kuwafambulila mbuli ya ufaume wa Mulungu kuno kugeza kuwatenda watogole mbuli ya Yesu kwa kutumila ndagizi za Musa na Mayandiko ga walagusi wa Mulungu. 24 Wamwenga wao watogola usenga wake mbali wamwenga hawatogole.

25 Baho, waihasanya na chila imwe katonga viyamanyile. Viwakalile woita, Paulo kawalongela mbuli ino: "Muhe wa Mulungu kalonga kweli na tati zenu kwa kubitila Isaya mlagusi wa Mulungu, 26 Viyalongile, ‘Genda kwa wanhu wano ukawalongele, "Mokua mohulika mbali hamvimanya, mokua molola mbali hamtambula, 27 kwa vija mioyo ya wanhu wano midala, wagaziba magutwi gao na meso gao wafing'iliza. Kama wahaonile kwa meso gao na wahahulike kwa magutwi gao, na kuvimanya kwa mioyo yao na wahainduke mmoyo na niye nihawaonyile.’ "

28 Baho Paulo kalonga, "Mvimanye kua usenga wa Mulungu kwa mbuli ya ulohozi ugaligwa kwa wanhu haweli Wayahudi. Wao wotegeleza!" 29 Paulo viyakomeleze kulonga gago, Wayahudi wasegela kuno wakala woiuza wenyego kwa wenyego.

30 Kwa milao midi yose Paulo kakala muing'anda yapangile mwenyego, kakala kowabokela wose wakalile wokwiza kumwake kumlamusa. 31 Baho kakala yoligula kwa kugagamiza mbuli ya ufaume wa Mulungu na kufunda kwambuli ya Mndewa Yesu Kilisito bila kudumba na bila kukimiligwa na chochose.