1 Baho Aglipa kamlongela Paulo, "Sambi kodaha kuigombela." Baho Paulo kenula mkono wake kulagusa kuwa kosonga kuigombela kalonga,

2 "Go mfaume Aglipa, niye noina ning'higwa ng'hekewa lelo kigombela haulongozi yako kwambuli zose zinilongelezigwe na Wayahudi,

3 kwa vija gweye mwenyego kumanya goya mazoela ga Wayahudi na ndwagi zao, ivo nokupula unhegeleze kwa kufunya moyo.

4 "Wayahudi wose wonimanya goya kulawa vinikalile ching'hele, kulawa vinikalile muiisi yangu mbaka vinikalile Yelusalemu. 5 Wao wonimanya niye kwa chipindi chitali na wodaha kuzilonga mbuli kama wahalonda, kua kulawa mwaka nikala munhu imwe mwa chibumbila chija cha Mafalisayo wotegeleza ndagizi za dini ya Kuyahudi kubita chibumbila chimwenga chochose.

6 Vino sambi nolongelezigwa hano kwa vija tu notumanila laliko dija Mulungu diyawalike tati zetu, 7 Laliko ijo iyo dija ditumainiligwa na makabila kumi na maidi ga wanhu wa isi yetu, kuno womsang'hanila Mulungu vija viilondeka misi na chilo. Go mkulu mfaume, Wayahudi wonilamula kwambuli ya tumanilo dino! 8 Mweye habali mmwenu moona udala ng'hani kutogola kua Mulungu kowazilibula wafile?

9 "Kweli niye mwenyego baho mwaka niona kua nilondeka kusang'hana gose gadahika ili kulema zina da Yesu wa Nazaleti. 10 Mbuli izo izo nizisang'hane uko Yelusalemu. Niye ning'higwa ukulu kulawa kwa wakulu wa walava nhambiko, niwagela wanhu wengi wa Mulungu mdigeleza na viwalamuligwe kukomigwa, nitogola wakomigwe.

11 Nikala noita Mzing'anda zao za kuiting'hanila Wayahudi kuno nowatenda watoigwe na kuwaswangiza waleke kumtogola Yesu. Ludoko lwangu kumwao lukala lukulu mbaka niita mzikae za nyambenyambe ili niwadununze.

12 "Zua dimwe vinikalile mmiyanza iyo, vinikalile noita Damasiko, kuno nikala na ukulu na malagizo kulawa kwa wakulu wa walava nhambiko.

13 Go mfaume, vinikalile mnzila saa sita imisi, niona bung'hulo dibalika kubita zua, dibung'hula kulawa kuulanga, dinizunguluka niye hamwe na waja weli muumwanza umwe na niye. 14 Cheye chose chigwa hasi, nihulika dizi dolonga kwa chiebulania, ‘Sauli, Sauli habali konidununza? Gweye koilumiza bule kuihuma na nie kama vija mhunda viyoitoa teke mbalati ya msusilaji wake.’ 15 Niye niuza, ‘Gweye kwa nani Mndewa?’ Nayo Mndewa kedika, ‘Niye iyo Yesu ija yumdununza. 16 Mbali lamuka na wime kwa magulu gako. Nikulawila gweye ili nikutende uwe mtumigwa wangu. Kowalongela wanhu gaja ugaonile lelo na gaja gonda nikulagusile. 17 Nokulohola kulawa kwa Wayahudi wayago na wanhu haweli Wayahudi waja nonda nikulagize kumwao.

18 Kokwiza kuwataza wanimanye walawe mdiziza na kwingila mdibung'hulo, walawe muukulu wa Mwenembago, wambwelele Mulungu ili walekesiligwe malozo gao wakale hamwe na waja wonitogola.’

19 "Ivo, mfaume Agilipa, silekile kugategeleza gaja maloleso galawile kuulanga. 20 Ila mosi nisonga kuligula kwa wanhu wa Damesiko, amala kwa waja wa Yelusalemu na isi yose ya Uyahudi, ivija kwa wanhu wa isi zimwenga. Niwaligulila kua wamlongele Mulungu malozo gao na kugaleka amala wambwelele Mulungu. 21 Kwa mbuli iyo, Wayahudi wanigoga vinikalile Muing'anda ya Mulungu, na wageza kunikoma. 22 Mbali Mulungu kanitaza, ivo mbaka vino lelo nima na nolongelela kweli kwa wanhu wose, wakulu na wadodo. Silonga chochose kubita gaja galongigwe na Musa na walagusi wa Mulungu, 23 ivo ilondeka Kilisito yadununzigwe na kua wa mosi kuzilibuka, ili yawabunhulile bung'hulo da ulohozi kwa wanhu wose, kwa Wayahudi wayage na wanhu haweli Wayahudi."

24 Baho, Paulo viyakalile yoigombela, Festo kalonga kwa dizi kulu,"Paulo! Ivo gweye kuna nzewele kweli! Kusoma kwako ng'hani kokugela chichala!"

25 Mbali Paulo kedika, "Go mkulu Festo niye nabule chichala. chinilonga ni kweli muhala. 26 Hata gomkulu mfaume kozimanya mbuli zose zino, ivo nodaha kuzilonga bila kudumba hamwake. Kwa vija novimanya kua habule hata chinhu chimwe huchimanyile, kwa vija mbuli ino haitendeke mchifiso. 27 Mfaume Agilipa, ivo, kogatogola gaja gowolonga walagusi wa Mulungu? Novimanya kua kogatogoga!"

28 Agilipa kamwidika Paulo, "Ivo koniswangiza hima hima ivo niwe Mkilisito kwa chipindi chiguhi?"

29 Paulo kedika, "Nompula Mulungu kua kwa chipindi chiguhi hebu chitali, ivo sio gweye uiyeka, mbali wose wonihulika niye wapate kukala kama vinili niye, ila tu bila minyololo ino."

30 Baho, mfaume Agilipa na mkulu Festo na Belinike na waja wose wakalile hamwe nao wema, 31 viwalawile, wailongela, ‘Munhu ino hatendile chochose chimlonda yafe hebu yafungigwe." 32 Nayo Agilipa kamlongela Festo, "Munhu ino yahafunguligwe, kama halondile kuita kwa Kaisali mfaume mkulu wa Lumi."