1 "Ndugu zangu na tati zangu, tegelezeni mbuli ino viili!"

2 Viwahulike yolonga nao, kwa chiebulania wagendelela kunyamala hupii kubita baho haumwanduso. Nayo Paulo kagendelela kulonga, 3 "Niye ni Myahudi, nileligwa muikae ya Taso ili Kilikia. Mbali nikulila bahano mui kae ya Yelusalemu kama mwaluko wa Gamalieli. Nifundigwa goya kuwinza mahala ga wavele wetu. Niilava kwa moyo wose kwa mbuli ya Mulungu kama vumli mweye wenyego vino sambi. 4 Niwadununza na kuwakoma waja wanhu wose waitogole nzila ino. Niwagela mmakono walume na wanachike na kuwafunga mdigeleza. 5 Mkulu wa walava nhambiko na chitala chose cha wavele wodaha kulongelela mbuli iyo. Nibokela balua kulawa kumwao wawandikile waja ndugu Wayahudi wakalile uko Damasiko. Niita Damasiko ili niwagele mmakono wanhu wao na kuwagala wafungwa mbaka Yelusalemu ili walamuligwe.

6 "Ivo, vinikalile mmabehi na Damasiko, yopata saa sita imisi, bung'hulo kulu kulawa kuulanga bahaja dilawila dinibung'hulila ubanzi wose. 7 Baho nigwa hasi, na nihulika dizi donilongela, ‘Sauli Sauli! Habali konidununza?’ 8 Niye niuza, ‘Gweye kwanani Mndewa?’ Nayo kanilongela, ‘Iyo niye Yesu wa Nazaleti ija umdununza.’ 9 Baho waja wanhu wakalile hamwe na niye, wadiona dija bung'hulo mbali hawadihulike dija dizi da ija yalongile na niye.

10 Baho niye niuza, ‘Nhende choni Mndewa?’ Nayo Mndewa kanilongela, ‘Ima genda Damasiko na uko kolongeligwa gaja gose Mulungu gayalondile ugatende.’ 11 Kwa mbuli ya bung'hulo dija dibalike, sidahile kuona na ivo waja wayangu wanilongoza kwa kunyamha mkono mbaka nivika Damasiko.

12 "Uko kukala na munhu imwe yokemigwa Anania, munhu yomfugamila Mulungu, yotegeleza ndagizi zetu na yatogoligwa ng'hani na Wayahudi wakalile wokala Damasiko. 13 Iyo kakala yezile kunilola ivo kema behi na niye, kalonga, ‘Ndugu Sauli, uone kaidi!’ Bahaja meso gangu gasonga kuona kaidi, na nimuona Anania. 14 Amala Anania kalonga, ‘Mulungu wa tata zetu kakusagula gweye udahe kumanya goyolonda na kumuona ija mtumigwa wake yotogoligwa na Mulungu na kumhulika iyo mwenyego viyolonga. 15 Kwavija kowalongela wanhu wose chija chuuonile na kukihulika kulawa kumwake. 16 Sambi kobeta choni? Ima ubatizigwe na kusunhigwa na kulekeseligwa malozo gako kwa kuditogola zina jake.’

17 "Baho nibwela Yelusalemu na vinikalile nopula Muing'anda ya Mulungu, bahaja mhata maloleso, 18 nimuona Mndewa konilongela, ‘Iyohe usegele Yelusalemu hima manake wanhu wa hano hawalonda kutogola chiulonga kwa mbuli yangu.’ 19 Niye nimwidika, ‘Mndewa, wao wenyego wovimanya kua niye iyo ija nikalile noita Mzing'anda za kuiting'hanila wayahudi na kuwagela mmakono na kuwatoa waja wakalile wokutogola. 20 Nakua ija shahidi wako Stefano viyakomigwe, niye mwenyego nikala haja na kuona vija viwakalile womkoma, na nikala nokwamila gaja makoti gawakalile womkoma.’ 21 Nayo Mndewa kanilongela, ‘Genda kwavija nokulagiza kutali kwa wanhu haweli Wayahudi.’"

22 Dija bumbila da wanhu wamtegeleza Paulo mbaka viyalongile mbuli iyo na kusonga kuguta nyangi kwa dizi kulu, "Mkomeni, munhu kama iyo halondeka kua mgima!" 23 Chipindi viwakalile woguta nyangi na kwasa vivalo vao kuno wotimula timbwisi kuchanha. 24 Ija mkulu wa wamilizi kawalongela wanhu wake wamgale Paulo muingome. Kawalongela wamlibule ili wapate kumanya habali Wayahudi womtowela nyangi. 25 Mbali viwakalile womfunga ili wamlibule, Paulo kamuuza mkulu wa chikosi cha wamilizi imwe yemile haja, "Ivo, ndagizi yotogoligwa kumwenu kumlibula mwenekae wa Lumi yang'hali hanalamuligwa?"

26 Ija mkulu wa chikosi cha wamilizi viyahulike gago, kamwing'ha usenga ija mkulu wa wamilizi kalonga, "Kolonda kutenda choni? Munhu ino ni mwenekae wa Lumi!"

27 Baho ija mkulu wa wamilizi kamuwinza Paulo, kamuuza, "Nilongele ivo, gweye ni mwenekae wa Lumi?"

Paulo kedika,"Enaa niye mwenekae wa Lumi."

28 Mkulu wa wamilizi kalonga, "Na niye ivija nikala mwenekae wa Lumi kwa kuliha sente nyingi." Paulo nayo kalonga, "Mbali niye iyo mwenekae wa kuleligwa."

29 Bahaja wanhu waja wakalile wolonda kumuuza Paulo wasegela hima. Hata ija mkulu wa wamilizi kadumba viyahulike kua Paulo ni mwenekae wa Lumi na kua kakala kamala kumfunga minyololo.

30 Igolo yake, mkulu wa wamilizi kalonda kugamanya gaja gose Wayahudi wakalile womlongeleza Paulo. Ivo, Kamvugula Paulo ija minyololo, kalamula vilongozi wa walava nhambiko na chitala chose waiting'hanile. Amala kamgala Paulo na kumwimiza haulongozi ya chitala.