1 Sauli ivija kaona mbuli iyo ya kumkoma Stefano kuwa inoga.

Zua ijo wanhu wamtogole Kilisito kulawa Yelusalemu wasonga kudununzigwa vihile. Wanhu wose wamtogole Kilisito wasonga kupwililika, na kukimbilila mzikae za Yudea na Samalia, mbali wasenga wa Mulungu wasigala. 2 Wanhu womfugamila Mulungu wamuwanda Stefano na kumlilila n'ni.

3 Sauli kagendelela kuwadununza wanhu waja wamtogole Kilisito, kakala yokwingila chila ng'anda na kuwabulula wanachike kwa walume na kuwagela mdigeleza.

4 Wanhu wao wapwililike waita chila hanhu kuligula Usenga Unogile. 5 Nayo Filipo katelemkila muikae ya Samalia na kuwaligulila wanhu mbuli ya Kilisito. 6 Wanhu viwamuhulike Filipo na kuona miujiza iyatendile, wamtegeleza goya gayalongile. 7 Vinyamkela viwalawa wanhu kuno wotoa nyangi, na wanhu wengi wakalile waholola lukuli wahonyigwa. 8 Ivo wanhu wa kae ija wadeng'helela ng'hani.

9 Hakala na munhu imwe muikae ija yokemigwa Simoni. Iyo kakala yotenda uhawi kwa chipindi chitali na kuwazaganya wanhu wa kae ya Samalia, kailagusa kua iyo munhu yamanyike. 10 Wanhu wose, wakulu kwa wadodo, wamtegeleza goya kuno wolonga, "Munhu ino iyo udaho wa Mulungu ikemegwa, ‘Udaho mkulu,’ " 11 Wamtegeleza kwavija kwa chipindi chitali kawazaganya kwa uhawi wake. 12 Mbali viwautogole Usenga Unogile wa ufaume Mulungu na usenga wa Yesu Kilisito uja uliguligwe na Filipo, wose wabatizigwa walume kwa wake. 13 Simoni nayo kamtogola Kilisito na kubatizigwa, kamuwinza Filipo chila hayoita na kazaganyika ng'hani kwa miujiza na uzonza uyaonile.

14 Waja watumigwa wa Mulungu wakalile kuja Yelusalemu viwahulike kua Wasamalia wabokela usenga wa Mulungu wawalagiza Petulo na Yohana. 15 Nao viwavikile uko wawapulila ili wabokele Muhe wa Mulungu, 16 kwavija Muhe wa Mulungu kakala yang'hali hanamwingila munhu yoyose manake wabatizigwa kwa zina da Yesu. 17 Baho, Petulo na Yohana wawekila makono waja wamtogole Yesu Kilisito, nao wambokela Muhe wa Mulungu.

18 Simoni viyaonile kua wanhu wekiligwe makono na wasenga wa Mungu wobokela Muhe wa Mulungu kalonda kuweng'ha sente, 19 yolonga, "Ning'heni na nie udaho uno ivija ili chila munhu nonda kumwikila makono gangu yambokele Muhe wa Mulungu."

20 Mbali Petulo kamwidika, "Segela hano na sente yako kwavija kutoga kua kodaha kugula nhunza ya Mulungu kwa sente! 21 Hudaha kuilumba na cheye muisang'hano ino kwavija muhe wako wotonga vihile kwambuli ya Mulungu. 22 Kwaivo, ulonge na kuleka malozo gano na umpule Mndewa kodaha kukulekesela gautonga mmoyo wako, 23 kwavija noona kolumila ng'hani na malozo gakugoga kama mfungigwa."

24 Simoni kalonga, "Mnipulile mweye kwa Mndewa ili sekeganipate gago gamlonga.

25 Labaho Petulo na Yohana viwakomeleze kuwalongela gaja gawaonile kwambuli Yesu na kuwalongela usenga wa Mndewa, wasonga kubwela Yelusalemu. Viwakalile nzila wakala woligula Usenga Unogile mvijiji vingi va isi Samalia.

26 Mtumigwa wa kwa Mulungu kamulongela Filipo, "Genda ubanzi wa hasi kuinzila ilawa Yelusalemu kuita Gaza." Nzila iyo ikala kuchiwala. 27 Baho Filipo kasonga mwanza na viyakalile mnzila kamuona mkulu imwe wa isi ya Isiopia iyo yakalile kahasigwa, munhu iyo kakala mwika usigavu muing'anda ya Kandake, malikila wa Isiopia. Mkulu iyo kakala yaitile Yelusalemu kumfugamila Mulungu. 28 Viyakalile nzila mumtuka wake ukalile wokwegigwa na mnyama yokemigwa Falasi viyobwela ukae, kakala yosoma chitabu chandikigwe na Isaya mlagusi wa Mulungu. 29 Muhe wa Mulungu kamlongela Filipo,"Uwinze mtuka uo na ukale behi nao." 30 Baho Filipo kaukimbilila mtuka uja na kamuhulika munhu iyo kosoma chitabu cha Isaya mlagusi wa Mulungu. Filipo kamuuza mkulu ija, "Ivo kochimanya icho chiusoma?"

31 Munhu iyo kamwidika, "Nodahaze kugamanya bila munhu kuni fambulila?" Baho kampula Filipo yakwele mumtuka yakale hamwe nayo. 32 Mayandiko gayakala yosoma munhu iyo iyo gano,

"Iyo kakala kama bung'hukilalo yagaligwa kuchinjigwa,

kakala kama gung'hundila da nhondolo viyakanhigwa mazoya.

Nayo kanyamala hupi halongile chinhu.

33 Wamuonela na kugeligwa chinyala

habule munhu yadahile kuulongelela ulelo wake,

kwavija ugima wake usegezigwa muiisi."

34 Iyo mkulu wa Isiopia kamlongela Filipo, "Nokupula nongele mlagusi ino wa Mulungu kolongelela mbuli zake hebu za munhu imwenga?" 35 Baho, Filipo kwa kutumila Mayandiko gaja kamfambulila Usenga Unogile wa Yesu. 36 Viwakalile wang'hali wogendelela na mwanza, wavika hanhu heli na mazi ija mkulu wa Isiopia kamuuza Filipo,"Ulole hano hana mazi, ivo chilihi chinhende nileke kubatizigwa?" 37 Filipo kamlongela,"Uhawa kotogola kwa moyo wako wose kodaha kubatizigwa." Nayo kedika, "Notogola kua Yesu Kilisito ni Mwana wa Mulungu."* 38 Ivo ija mkulu kamlongela ija mlongoza mtuka yeme, watelemka na kwingila mmazi, nayo Filipo kambatiza. 39 Viwalawile mmazi bahaja Muhe wa Mndewa kamsola Filipo. Mkulu ija hamuone kaidi Filipo mbali kagendelela na mwanza kuno yeli na ndeng'helelo ng'hulu. 40 Filipo nayo kaivika kakuikae ya Azoto, kabita mzikae zose kuno yoligula Usenga Unogile mbaka viyavikile Kaisalia.