Êxodo 1

ମିସରତା ଇସ୍ରାୟେଲ ଲ଼କୁଣି ସା଼ସ୍ତି

1 ଇସ୍ରାୟେଲତି ଏମିନି ମୀର୍‌କା ବାରେ ଜାହା ଜାହାରା କୁଟମି ଆସାହାଁ ଜାକୁବ ତଲେ ମିସର ଦେ଼ସାତା ୱା଼ତେରି, ଏ଼ୱାରି ଦ଼ର୍‌କା; 2 ରୁବେନ୍‌, ସିମିୟନ, ଲେ଼ବି, ଅ଼ଡ଼େ ଜୀହୁଦା, 3 ଇସାକର, ସବୁଲୁନ ଅ଼ଡ଼େ ବିନ୍ୟାମିନ୍‌, 4 ଦାନ୍‌ ଅ଼ଡ଼େ ନପ୍ତାଲି; ଗାଦ୍‌ ଅ଼ଡ଼େ ଆସେର। 5 ଏଚିବେ଼ଲା ଜାକୁବତି ବାରେ କୂଡ଼ା ତୀନି କ଼ଡ଼ି ଦସ ଜା଼ଣା ମାଚେରି; ସାମା ଜସେପ ନ଼କେଏ ମିସରତା ମାଚେସି। 6 ଏଚେଟିଏ ଜସେପ ଅ଼ଡ଼େ ତାନି ତାୟିୟାଁ ହା଼ତେରି, ଅ଼ଡ଼େ ଏ଼ ପା଼ଟୁତି ବାରେ ତାୟିୟାଁ ଜିକେଏ ହା଼ତେରି। 7 ଆ଼ତିଜିକେଏ ଇସ୍ରାୟେଲତି କୂଡ଼ା ଏ଼ପା ଆ଼ହାଁ ହା଼ରେକା କୂଲୁ କୁଟମି ଆ଼ହାଁ ବା଼ଡ଼୍‌ୟୁ ଆ଼ତେରି, ଇଞ୍ଜାଁ, ଏ଼ୱାରି ତା଼ଣାଟି ମିସର ଦେ଼ସା ନେଞ୍ଜାହାଚେ।

8 ଏଚେଟିଏ ମିସର ଦେ଼ସାତା ର଼ ପୁଃନି ରାଜା ଆ଼ତେସି, ଆମ୍ବାଆସି କି ଜସେପଇଁ ପୁଞ୍ଜା ହିଲାଆତେସି। 9 ଏ଼ୱାସି ତାନି ଲ଼କୁଣି ଏଲେଇଚେସି, "ମେହ୍‌ଦୁ, ଇସ୍ରାୟେଲ ଲ଼କୁତି କୂଡ଼ା, ବା଼ଡ଼୍‌ୟୁ ଅ଼ଡ଼େ ଲେକାତା ମା଼ କିହାଁ ହା଼ରେକା ଆ଼ହାମାନେରି। 10 ଏ଼ୱାରି ଏ଼ନିକିହିଁ ଗାଡି ଆ଼ଅରି, ଅ଼ଡ଼େ ଜୁଜୁ ଆ଼ତିସାରେ, ମା଼ ସାତ୍ରୁ ୱାକି ଆ଼ହାଁ ମା଼ ତଲେ ଜୁଜୁ କିଅରି, ଅ଼ଡ଼େ ଈ ଦେ଼ସାଟି ହାଲଅରି, ଈଦାଆଁତାକି ୱା଼ଦୁ, ମା଼ର ଏ଼ୱାରି ତଲେ ଜାଗ୍ରାତା ଆ଼ହାଁ ଲେ଼ମ୍ବିନାୟି ମାନେ।" 11 ଏଚେଟିଏ ଏ଼ୱାରାଇଁ ବ଼ଜୁ ଡେ଼କି କିହାଁ ଏ଼ୱାରାଇଁ ସା଼ସ୍ତି ହୀହାଲି ତାକି ଏ଼ୱାରି ମୁହେଁ କାମା କିୱି କିନାରାଇଁ ହେର୍‌ପିତେସି, ଇଞ୍ଜାଁ ଏ଼ୱାରି ପା଼ରକି ପିତମ୍‌ ଅ଼ଡ଼େ ରାମିସେସ୍‌ ଗା଼ଦେୟିକା ଗା଼ଡ଼ା କିୱି କିତେରି। 12 ସାମା ଏ଼ୱାରି ଏ଼ୱାରାଇଁ ଏଚେକା ସା଼ସ୍ତି ହୀତେରି, ଏ଼ୱାରି ଏଚେକେଏ ଗାଡି ଆ଼ତେରି, ଅ଼ଡ଼େ ଏଚେକେଏ ଗାଡି ଏ଼ପା ଆ଼ତେରି। ଏ଼ଦାଆଁତାକି ଇସ୍ରାୟେଲ ମୀର୍‌କା ତାକି ଏ଼ୱାରି ହା଼ରେକା ଆଜିତେରି। 13 ଏ଼ଦାଆଁତାକି ମିସରତି ଲ଼କୁ କାର୍ମା ଆ଼ଆନା ଇସ୍ରାୟେଲ ଲ଼କୁଣି ହ଼ଲିୟାଙ୍ଗା କାମା କିୱିକିତେରି। 14 ଇଞ୍ଜାଁ, କା଼ଦ, ଈଟା ଅ଼ଡ଼େ ବୂମିତି ବାରେ କାମା, ହା଼ରେକା କସ୍ତତି ହ଼ଲିୟା କାମା ତଲେ ଏ଼ୱାରି ଜୀୱୁତି ବିତିବାତା କିହାଲି ମା଼ଟ୍‌ହେରି। ଏ଼ୱାରି ଏମିନି ହ଼ଲିୟାଙ୍ଗା କାମା କିୱିକିତେରି; ଏ଼ ବାରେ କାର୍ମା ମେହ୍‌ଆରେ଼ଟୁ କିୱିକିତେରି।

15 ଏଚେଟିଏ ମିସରତି ରାଜା ସିପ୍ରା ଅ଼ଡ଼େ ପୂୟା ଦ଼ରୁଗାଟି ରୀ ଏବ୍ରି କକାରି ପ଼ଦାୟାଁ ଆ଼ନାଟି ସେ଼ବାକିନି ଆୟାସିକାଣି ଈ କାତା ଏଲେଇଚେସି, 16 "ଏମିନି ବେ଼ଲାତା ମୀରୁ ଏବ୍ରି ଇୟାସିକାଣି କକାରି ପ଼ଦାୟାଁ ଆ଼ନାଣି ସେ଼ବା କିଦେରି ଅ଼ଡ଼େ ଏ଼ୱି ଜାର୍ନି କିନି ବେ଼ଲାତା ସିନିକିଦେରି; ଏଚିବେ଼ଲା କକାସି ଆ଼ନେସି, ଆତିହିଁ ଏ଼ୱାଣାଇଁ ପା଼ୟାଦୁ; ଅ଼ଡ଼େ ପ଼ଦା ଆ଼ନେ, ଆତିହିଁ ଏ଼ଦାଣି ଜୀୱୁ ତଲେ ଇଟାଦୁ।" 17 ସାମା ଏ଼ ସେ଼ବାକିନି ଇୟାସିକା ମାହାପୂରୁଇଁ ଆଜି ମାଚାକି ମିସର ରାଜାତି ହୁକୁମି ମା଼ନୱି ଆ଼ଆନା କକାରାଇଁ ଜୀୱୁତଲେ ପିସ୍ତୁ। 18 ଏ଼ଦାଆଁତାକି ମିସରତି ରାଜା ସେ଼ବାକିନି ଇୟାସିକାଣି ହା଼ଟାହାଁ ଏଲେଇଚେସି, "ମୀରୁ ଇଲେତି କାମା ଏ଼ନାଆଁତାକି କିହିମାଞ୍ଜେରି ? କକାରାଇଁ ଏ଼ନାଆଁତାକି ଜୀୱୁ ତଲେ ପିସିମାଞ୍ଜେରି ?"

19 ଏଚେଟିଏ ସେ଼ବାକିନି ଇୟାସିକା ପା଼ରଇଁ ଏଲେଇଚୁ, ଏବ୍ରି ଇୟାସିକା ମିସରତି ଇୟାସିକା ଲେହେଁ ଆ଼ଏ; ଏ଼ୱି ବା଼ଡ଼୍‌ୟୁ ଗାଟାଇ, ଏ଼ୱାସିକା ଡାଗେ ସେ଼ବାକିନି ଇୟାସିକା ୱା଼ନି ନ଼କେଏ ଏ଼ୱି ଜାର୍ନି କିନୁ। 20 ଇଞ୍ଜାଁ, ମାହାପୂରୁ ଏ଼ ସେ଼ବାକିନି ଇୟାସିକାଣି କାର୍ମା ମେସ୍ତେସି, ଏଚେଟିଏ ଲ଼କୁ ହା଼ରେକା ଏ଼ପା ଆ଼ହାଁ ଗାଡୁ ବା଼ଡ଼୍‌ୟୁ ଆ଼ତେରି। 21 ଏ଼ ସେ଼ବାକିନି ଇୟାସିକା ମାହାପୂରୁଇଁ ଆଜାଲିଏ ଏ଼ୱାସି ଏ଼ୱାସିକା କୂଡ଼ାତି ଏ଼ପା କିତେସି। 22 ଏଚେଟିଏ ପା଼ର ତାନି ବାରେ ଲ଼କୁଣି ଈ ହୁକୁମି ହୀତେସି, "ଏବ୍ରି ଲ଼କୁତି ପୁଃନି ଜାର୍ନା ଆ଼ନି କକାରାଇଁ ନିଲ କାଡାତା ମେତ୍‌ଦୁ, ସାମା ବାରେ ପ଼ଦାୟାଁଣି ଜୀୱୁ ତଲେ ଇଟାଦୁ।"