1 "ଅ଼ଡ଼େ ନୀନୁ ଦୁପ୍‌ଣି ହୂଡାଲି ତାକି ସିଟିମ ମା଼ର୍‌ନୁତି ର଼ ପିଣ୍ତା ତିୟାରା କିଦି। 2 ଏ଼ଦି ର଼ ହା଼ତା ଲାମ୍ବା, ର଼ ହା଼ତା ଅ଼ସାରା ଅ଼ଡ଼େ ସା଼ରି କନ ଆ଼ନେ; ଇଞ୍ଜାଁ, ରୀ ହା଼ତା ପାଡ୍‌ଣି ଆ଼ନେ; ଏମ୍ବାତି କମ୍‌କା ଏମ୍ବାତି ବା଼ଗା ଆ଼ନୁ। 3 ଏ଼ଦାଣି ଲାକ ଅ଼ଡ଼େ ସା଼ରି ୱାକି ଅ଼ଡ଼େ କମ୍‌କା ସୁଦୁ ବାଂଗାରା ୱା଼ରି କିଦେରି ଇଞ୍ଜାଁ, ତାନି ସା଼ରି ୱାକି ବାଂଗାରାତି ଗିଚୁ କିଦେରି। 4 ଇଞ୍ଜାଁ, ଏ଼ ଗିଚୁ ଡ଼଼ଇ ରିକୱାକିତି ରୀ କନୟାଁ ଦାରି ବାଂଗାରା ତଲେ ରୀ ରୀ କାଡ୍‌ୱାୟାଁ କିଦି; ଅ଼ଡ଼େ ଏ଼ଦାଣି ଡେ଼କାଲି ଟେଙ୍ଗାୟାଁ ପେନ୍ଦିଦି। 5 ଏ଼ ଟେଙ୍ଗାୟାଁ ସିଟିମ ମା଼ର୍‌କା ତଲେ କିହାଁ ବାଂଗାରା ୱା଼ରିକିଦି। 6 ଇଞ୍ଜାଁ, ନା଼ନୁ ଏମିନି ଟା଼ୟୁତା ନୀ ତଲେ କାତା ଆୟାଇଁ, ଏ଼ ଟା଼ୟୁତା, ଇଚିହିଁ, ରା଼ଜିମା଼ନା ପେ଼ଡ଼ା ଲାକତି ପା଼ପୁ ପ୍ଡିକ୍‌ନି ଡା଼ପ୍‌ଣା ନ଼କିତା ମେ଼ରା ପେ଼ଡ଼ା ନ଼କିତି ଏଟ୍‌କା କିନି ଟା଼ଟନି ହିମ୍ବରି ନ଼କିତା ଏ଼ଦାଆଁ ଇଟିଦି। 7 ହାରଣ ଏ଼ଦାଣି ଲାକ ଦୁପ୍‌ଣି ହୂଡିନେସି, ଏ଼ୱାସି ବାରେ ଦିନା ଲା଼ଇ ଦୀୱଁ ହ଼ମ୍ବିନାଟି ଏ଼ ଦୁପ୍‌ଣି ହୂଡିନେସି। 8 ଇଞ୍ଜାଁ, ମିଡ଼୍‌ଅଲା ବେ଼ଲା ହାରଣ ଦୀୱଁ ଡ଼଼ହ୍‌ନାଟି ଦୁପ୍‌ଣି ହୂଡିନେସି, ଏଚେଟିଏ ମୀ ଆକୁ ଆ଼ବାୟାଁ ଲେକା ତଲେ ପ୍ରବୁତି ନ଼କିତା ଦିନାତାକି ଦିନା ଦୁପ୍‌ଣି ହୂଡ୍‌କି ଆ଼ନେ। 9 ମୀରୁ ଏ଼ଦାଣି ଲାକ ଏଟ୍‌କାତି ଏ଼ନି ଦୁପ୍‌ଣି କି ହିଚୁତା ହୂଡିନି ପୂଜା ଆ଼ଆତିଁ କା଼ଦିତି ଦା଼ନା ହେର୍‌ପଅତେରି ଅ଼ଡ଼େ ଏ଼ଦାଣି ଲାକ ଗହ୍‌ନି ଦା଼ନା ୱା଼କ୍‌ଅତେରି। 10 ଇଞ୍ଜାଁ, ହାରଣ ବାର୍ସା ତାକି ର଼ ଦେବା ଏ଼ କମୁ ଲାକ ପୂଜା ହେର୍‌ପିନେସି; ଏ଼ ହେର୍‌ପି ଆ଼ହାମାନି ପା଼ପୁତି ପୂଜା ନେତେରି ତଲେ ମୀ ଆକୁ ଆ଼ବାୟାଁତି ଲେକା ତଲେ ବାର୍ସା ତାକି ର଼ ଦେବା ଏ଼ଦାଣି ଲାକ ହେର୍‌ପିନେସି। ଈ ପିଣ୍ତା ପ୍ରବୁତି କ଼ସମି ହା଼ରେକା ସୁଦୁ ଆ଼ନେ।"

11 ଅ଼ଡ଼େ ପ୍ରବୁ ମ଼ସାଇଁ ଈ କାତା ଏଲେଇଚେସି, 12 "ଏଚିବେ଼ଲା ନୀନୁ ଏଜିକିତି ଲ଼କୁତି ଲେକା ତଲେ ଇସ୍ରାୟେଲ ଲ଼କୁଣି ଏଜି କିଦି, ଏଚିବେ଼ଲା ଏ଼ୱାରି ବାରେ ଲ଼କୁ ପ୍ରବୁତି ନ଼କିତା ଜାହାରା ଜୀୱୁ ତାକି ଏଜି କିନି ବେ଼ଲା ହେର୍‌ପିନେରି; ଏଚେଟିଏ ଏ଼ୱାରି ବିତ୍ରା ଏଜିକିନି ବେ଼ଲା ଏ଼ନି ମର୍‌ଡ଼ି ଆ଼ଏ। 13 ଆମ୍ବାଆସି ଏଜିକିତି ଲ଼କୁ ତା଼ଣା ଆଣ୍ଡିତାସି, ଏ଼ୱାସି ସୁଦୁ ଟା଼ୟୁତି ସେକଲତି ଲେକା ତଲେ ଆଦା ସେକଲ* ହୀନେସି; କଡ଼େ ଗେରା* ଇଚିହିଁ ର଼ ସେକଲ; ଏ଼ ଆଦା ସେକଲ ପ୍ରବୁ ବେଟାଆ଼ନି ଦା଼ନା ଆ଼ନେ। 14 କଡ଼େ ବାର୍ସା କି ଏ଼ଦାଣି କିହାଁ ଗାଡୁ ବାର୍ସା ଆମ୍ବାଆସି ଏଜିକିତି ଲ଼କୁ ତଲେ ଆଣ୍ତିତେସି, ଏ଼ୱାସି ପ୍ରବୁକି ଈ ଦା଼ନା ହୀନେସି। 15 ମୀରୁ ଜାହା ଜାହାରା ଜୀୱୁ ତାକି ହେର୍‌ପା କଡାଲି ପ୍ରବୁକି ଏ଼ ଦା଼ନା ହୀନାଟି ବାତ୍‌କୁ ଗାଟାସି ଆଦା ସେକଲଟିଏ* ଗାଡି ହୀଆପେସି, ଇଞ୍ଜାଁ, କା଼କୁଲି ଗାଟାସି ଊଣା ହୀଆପେସି। 16 ଏଚେଟିଏ ନୀନୁ ଏ଼ ଇସ୍ରାୟେଲ ଲ଼କୁ ତା଼ଣାଟି ଏ଼ ହେର୍‌ପାମାନି ୱେଣ୍ତି ଟାକାୟାଁ ଅ଼ହାଁ ଆଣ୍ତ୍‌ୱିଆ଼ନି ତୂମୁ କାମାତା ଲେ଼ମ୍ବିଦି; ଏ଼ଦି ମୀ ଜୀୱୁତି ହେର୍‌ପାଲି ତାକି ଇସ୍ରାୟେଲ ଲ଼କୁଣି ଅଣ୍‌ପାଲି ପ୍ରବୁତି ନ଼କିତା ଡ଼ୟିନେ।"

17 ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, 18 "ନୀନୁ ନର୍‌ହା କଡାଲି ତାକି ପିତାଡ଼ାତି ଏ଼ୟୁ କୁଣ୍ତି ଅ଼ଡ଼େ ପିତାଡ଼ା ତଲେତି କୁଣ୍ତି କୁଗିନି ପିଣ୍ତା ତିୟାରା କିମୁ; ଇଞ୍ଜାଁ, ଆଣ୍ତ୍‌ୱିଆ଼ନି ତୂମୁ ଅ଼ଡ଼େ ପୂଜା ପିଣ୍ତା ମାଦି ଏ଼ଦାଣି ଇଟାହାଁ ଏ଼ ବିତ୍ରା ଏ଼ୟୁ ୱା଼କ୍‌ମୁ। 19 ହାରଣ ଅ଼ଡ଼େ ତାନି ମୀର୍‌କା ଏମ୍ବାଆଁ ଜାହା ଜାହାରା କେସ୍କା ଅ଼ଡ଼େ କଡାୟାଁ ନର୍‌ନେରି। 20 ଏ଼ୱାରି ଆଣ୍ତ୍‌ୱିଆ଼ନି ତୂମୁତା ହ଼ଡ଼୍‌ନି ବେ଼ଲାତା ଏ଼ନିକିଁ ହା଼ଅରି, ଏ଼ଦାଆଁତାକି ଏ଼ୟୁଣା ଜାହାରାଇଁ ନର୍‌ହା କଡିନେରି; ଆ଼ଆତିଁ ପ୍ରବୁତି ସେ଼ବା ତାକି, ଇଚିହିଁ, ହିଚୁତା ହୂଡିନି ଦା଼ନା ଦୁପ୍‌ଣି ଲେହେଁ ହୂଡାଲି ତାକି ପୂଜା ପିଣ୍ତା ଦାରି ୱା଼ନାଟି ଏ଼ନିକିଁ ହା଼ଅରି, 21 ଈଦାଆଁତାକି ଏ଼ୱାରି ଜାହା ଜାହାରା କେସ୍କା କଡାୟାଁ ନର୍‌ନେରି; ଈଦି ତାଙ୍ଗେ ଅ଼ଡ଼େ ତାନି କୂଡ଼ାତି ଆକୁ ଆ଼ବାୟାଁ ଲେକା ତଲେ ମା଼ନୱି ଆ଼ନି କା଼ଲେଏତି ମେ଼ରା ଆ଼ନେ।"

22 ଅ଼ଡ଼େ ପ୍ରବୁ ମ଼ସାଇଁ ଏଲେଇଚେସି, 23 "ନୀନୁ ନୀ ତା଼ଣା ଈ ବାରେ ହା଼ରେକା ନେହିଁ ଗାନ୍ଦା ଆ଼ସ୍ତି, ଇଚିହିଁ, ସୁଦୁ ଟା଼ୟୁତି ସେକଲତି ଲେକା ତଲେ ପା଼ସା ୱାଞ୍ଜା ସେକଲ ସୁଦୁ ଗାନ୍ଦାରାସା ଅ଼ଡ଼େ ଏମ୍ବାତି ଆଦା, ଇଚିହିଁ, ରୀ ୱାଞ୍ଜା ଦୁଇ କ଼ଡ଼ି ଦସ ସେକଲ ଦାଲ୍‌ଚିନି* ଅ଼ଡ଼େ ରୀ ୱାଞ୍ଜା ଦୁଇ କ଼ଡ଼ି ଦସ ସେକଲ ନେହିଁ ଗାନ୍ଦା। 24 ଅ଼ଡ଼େ ପା଼ସା ୱାଞ୍ଜା ସେକଲ ଡାଲ୍‌ଚିନି ଅ଼ଡ଼େ ର଼ ହିନ୍‌* ଜୀତ ମା଼ର୍‌ନୁତି ନିୟୁଁ କୂଡ଼ିକିଦି। 25 ଈ ବାରେ ତଲେ ନୀନୁ ପା଼ଣା ହେର୍‌ପିନି ସୁଦୁ ନିୟୁଁ, ଇଚିହିଁ, ଗାନ୍ଦାଗାଟି ଆ଼ସ୍ତି କାଲ୍‌ହାଁ ନିୟୁଁ ତିୟାରା କିଦି, ଏ଼ଦି ପା଼ଣା ହେର୍‌ପିନି ସୁଦୁ ନିୟୁଁ ଆ଼ନେ। 26 ନୀନୁ ଏ଼ଦାଣି ଅ଼ହାଁ ଆଣ୍ତ୍‌ୱିଆ଼ନି ତୂମୁ ଅ଼ଡ଼େ ରା଼ଜିମା଼ନା ପେ଼ଡ଼ା, 27 ଇଞ୍ଜାଁ, ବାଲାପା଼ଟା* ଅ଼ଡ଼େ ଏମ୍ବାତି ବାରେ ଆ଼ସ୍ତି, ଦୀୱଁ ମୁଣ୍ତା ଅ଼ଡ଼େ ଏମ୍ବାତି ବାରେ ଆ଼ସ୍ତି, 28 ଦୁପ୍‌ଣି ହୂଡିନି ପିଣ୍ତା ଅ଼ଡ଼େ ଏମ୍ବାତି ବାରେ ଆ଼ସ୍ତି, ନର୍‌ନି କୁଣ୍ତି ଅ଼ଡ଼େ ଏ଼ଦାଣି ଇଟିନି ପିଣ୍ତାତା ସୁଦୁ କିଦି। 29 ଇଞ୍ଜାଁ ଈ ବାରେ ଆ଼ସ୍ତିତି ସୁଦୁ କିଦି, ଏଚେ଼ଟିଏ ଏ଼ଦି ହା଼ରେକା ସୁଦୁ ଆ଼ନେ; ଏ଼ନାୟି ଏ଼ଦାଆଁ ଡୀଗିନେ ଏ଼ ବାରେ ସୁଦୁ ଆ଼ନେ। 30 ଇଞ୍ଜାଁ, ନୀନୁ ହାରଣଇଁ ଅ଼ଡ଼େ ତାନି ମୀର୍‌କାଣି ନା଼ ପୂଜେରା କାମା କିହାଲି ପା଼ଣା ହେର୍‌ପାହାଁ ସୁଦୁ କିଦି। 31 ଅ଼ଡ଼େ ଇସ୍ରାୟେଲ ଲ଼କୁଣି ୱେହ୍‌ଦି, ଈ ନିୟୁଁ ମୀ ଆକୁ ଆ଼ବାୟାଁ ଲେକା ତଲେ ନା଼ କ଼ସମି ପା଼ଣା ହେର୍‌ପିନି ସୁଦୁ ନିୟୁଁ ଆ଼ନେ। 32 ଏ଼ଦାଆଁ ଏମିନି ମାଣ୍‌ସି ଆଙ୍ଗାତା ୱା଼କ୍‌ପିଆ଼ଏ; କି ଏମ୍ବାଆଁ ଆଟ୍‌ନି କାଟୁ ତଲେ ଏ଼ନି ଆ଼ସ୍ତି କାଲ୍‌ହାଁ ଇଲେତି ନିୟୁଁ କିଅତେରି; ଇଚିହିଁ ଏ଼ଦି ସୁଦୁ ଆ଼ହାମାନେ, ଅ଼ଡ଼େ ଏ଼ଦି ମିଙ୍ଗେ ତାକି ସୁଦୁ ଆ଼ନେ। 33 ଆମ୍ବାଆସି ଏ଼ଦାଣି ଲେହେଁ ଏ଼ନାଆଁ ତିୟାରା କିନେସି, କି ଆମ୍ବାଆସି ପୁନାଆତି ଲ଼କୁତି ଆଙ୍ଗାତା ଏ଼ଦାଆଁ ରୁବିନେସି, ଏ଼ୱାସି ଜାହାରା ଲ଼କୁ ତା଼ଣାଟି ଏଟ୍‌କା କିୱି ଆ଼ନେସି।"

34 ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, "ନୀନୁ ନୀ ତା଼ଣା ନେହିଁ ଗାନ୍ଦା ଆ଼ସ୍ତି, ଇଚିହିଁ, ଗୁଗ୍‌ଗୁଲୁ, ନକି, କୁନ୍ଦୁରୁ ଅ଼ଡ଼େ ନେହିଁ ଲବାନ ଈ ବାରେ ନେହିଁ ଗାନ୍ଦା ଆ଼ସ୍ତି ରଣ୍ତିଏ ସମାନା କୂଡ଼ିକିଦି। 35 ଇଞ୍ଜାଁ, ଏ଼ଦାଣି ତଲେ ଗାନ୍ଦା ଆ଼ସ୍ତି ଅ଼ଡ଼େ ହା଼ରୁ କାଲ୍‌ହାଁ ନେହିଁ ସୁଦୁ ଗାନ୍ଦା ଦୁପ୍‌ଣି ତିୟାରା କିମୁ। 36 ଅ଼ଡ଼େ ଏ଼ଦାଣି ଇଚାଣି ଗୁଣ୍ତା କିହାଁ ଏମିନି ଆଣ୍ତ୍‌ୱିଆ଼ନି ତୂମୁତା ନା଼ନୁ ନୀ ତଲେ କାତା ଆୟାଇଁ, ଏ଼ ବିତ୍ରା ରା଼ଜିମା଼ନା ପେ଼ଡ଼ା ନ଼କିତା ଏ଼ଦାଣି ଇଟିଦି; ଏ଼ଦି ମିଙ୍ଗେ ତାକି ହା଼ରେକା ସୁଦୁ ଆ଼ନେ। 37 ଇଞ୍ଜାଁ, ନୀନୁ ଏମିନି ନେହିଁ ଗାନ୍ଦା ଦୁପ୍‌ଣି କିଦି, ଏମ୍ବାତି କାଲ୍‌ହି ଆ଼ସ୍ତିତି କାଟୁ ତଲେ କାଲ୍‌ହାଁ ମିଙ୍ଗେ ତାକି କିଆଦୁ, ଏ଼ଦି ମିଙ୍ଗେ ତାକି ପ୍ରବୁତି କ଼ସମି ସୁଦୁ ଆ଼ନେ। 38 ଆମ୍ବାଆସି ଜାହାରା ନେହିଁ ଗାନ୍ଦା ତାକି ଦୁପ୍‌ଣି ଏଲେକିହିଁ ତିୟାରା କିନେସି, ଏ଼ୱାସି ତାମି ଲ଼କୁ ତା଼ଣାଟି ନା଼ସା ଆ଼ନେସି।"