ହାନାୟି 35

ଜ଼ମିନି ଦିନାତି ମେ଼ରା

1 ଏଚେଟିଏ ମ଼ସା ବାରେ ଇସ୍ରାୟେଲ କୁଲମିତି କୂଡ଼ିକିହାଁ ଏଲେଇଚେସି, "ପ୍ରବୁ ମିଙ୍ଗେ ଈ ବାରେ ବ଼ଲୁ ମା଼ନୱି ଆ଼ହାଲି ହୁକୁମି ହୀହାମାଞ୍ଜାନେସି। 2 ସ଼ଦିନା କାମା କିୱିଆ଼ନେ, ସାମା ସା଼ତା ଦିନା ମିଙ୍ଗେ ତାକି ସୁଦୁ ଦିନା ଆ଼ନେ; ଏ଼ଦି ପ୍ରବୁତି କ଼ସମି କାଜା ଜ଼ମିନି ଦିନା ଆ଼ନେ, ଆମ୍ବାଆସି ଏ଼ ଦିନା କାମା କିନେସି ଏ଼ୱାସି ହା଼ନି ଡଣ୍ତ ବେଟାଆ଼ନେସି।" 3 ମୀରୁ ଜ଼ମିନି ଦିନାତା ମୀ ଏମିନି ବାସା ଟା଼ୟୁତା ହିଚୁ ଡ଼ୀଞ୍ଜେଏ।

ତୂମୁ ତାକି ଦା଼ନା

4 ଅ଼ଡ଼େ ମ଼ସା ଇସ୍ରାୟେଲ ଲ଼କୁତି ବାରେ କୁଲମିତି ଅ଼ଡ଼େ ଏଲେଇଚେସି, "ପ୍ରବୁ ଈ ହୁକୁମି ହୀହାମାଞ୍ଜାନେସି। 5 ମୀରୁ ପ୍ରବୁତି କ଼ସମି ମୀ ତା଼ଣାଟି ଦା଼ନା କୂଡ଼ିକିଦୁ; ଆମ୍ବାଆସି ଏ଼ନାଆଁ ହିୟାଲି ମ଼ନ କିନେସି, ଏ଼ୱାସି ପ୍ରବୁତି କ଼ସମି ବାଂଗାରା, ୱେଣ୍ତି ଅ଼ଡ଼େ ପିତାଡ଼ା, 6 ଇଞ୍ଜାଁ, ନୀଲି, ହେୟାଁ, ନେତେରି ୱା଼ଣା, ଦବ୍‌ଲା ପା଼ତାଡ଼ା ଲୂଲୁ ଅ଼ଡ଼େ ଗରି ବା଼ଣାୟାଁ, 7 ଇଞ୍ଜାଁ, ନେତେରି ଗାଟି ମେ଼ଣ୍ତା ତ଼ଲୁ, ସିସୁକ*35:7 ସିସୁକ/ସାମ୍‌ଦୁରିତି ପା଼ଲୁ ଊଟ୍‌ନି ଗ଼ଜିୟା ମୂତି ମୀନୁ ତ଼ଲୁ ସମାନା । ତ଼ଲୁ ଅ଼ଡ଼େ ସିଟିମ ମା଼ର୍‌କା। 8 ଇଞ୍ଜାଁ, ଦୀୱଁ ଇଟିନି ନିୟୁଁ, ଅ଼ଡ଼େ ପା଼ଣା ହେର୍‌ପିନି ନିୟୁଁ ଅ଼ଡ଼େ ଦୁପ୍‌ଣି ତାକି ଗାନ୍ଦା ଆ଼ସ୍ତି, 9 ଇଞ୍ଜାଁ, ଏପଦ*35:9 ଏପଦ/ବମିଟିଏ କୁଦ୍‌ଗୁ ପାତେକା ପୂଜେରାଙ୍ଗା ତୁର୍‌ନି ଲାକତି ସକା ଅ଼ଡ଼େ ବକପା଼ଟା ତାକି ଗମେଦକ ମଣି*35:9 ମଣି/ଦାରାଗାଟି ୱାଲ୍‌କା ବାରେ କୂଡ଼ାତି ଆଟିକିନି ୱାଲ୍‌କା, ଈ ବାରେ ପ୍ରବୁତି କ଼ସମି ଦା଼ନା ତାଦେରି।"

ତୂମୁ ଇଲୁତି ଆ଼ସ୍ତି

10 ଅ଼ଡ଼େ ମୀ ବିତ୍ରା ବାରେ ବୁଦିଗାଟି ଲ଼କୁ ୱା଼ହାଁ ପ୍ରବୁ ୱେସାମାନି ଆ଼ସ୍ତି ବାରେ ତିୟାରା କିପେରି, 11 ଇଚିହିଁ, ବାସା ଟା଼ୟୁ, ଏମ୍ବାତି ତୂମୁ, ତେପରି, ଡ:ଙ୍କିୟାଁ, ପା଼ଟାୟାଁ, ଅର୍ଗଡ଼ି, ମୁଣ୍ତାୟାଁ ଅ଼ଡ଼େ ପତ୍‌ପିଆ଼ତି କଟ୍‌ଲାୟାଁ*35:11 କଟ୍‌ଲାୟାଁ/ପା଼ଟା ଅ଼ଡ଼େ ମୁଣ୍ତା ଆ଼ଟ୍‌ୱା ତଲେ ନିପ୍‌ନାୟି ।, 12 ଇଞ୍ଜାଁ, ରା଼ଜିମା଼ନା ପେ଼ଡ଼ା, ଏମ୍ବାତି ଟେଙ୍ଗାୟାଁ, ପା଼ପୁ ପ୍ଡିକ୍‌ନି ଡା଼ପ୍‌ଣା ଅ଼ଡ଼େ ପ୍ଡିକ୍‌ହାଁ ଏଟ୍‌କା କିନି ଟା଼ଟିନି ହିମ୍ବରି, 13 ଇଞ୍ଜାଁ, ବାଲାପା଼ଟା*35:13 ବାଲାପା଼ଟା/ମାହାପୂରୁକି ହେର୍‌ପିତି ରୂଟି ଇଟିନି ଟା଼ୟୁ ।, ଏମ୍ବାତି ଟେଙ୍ଗାୟାଁ, ଗିନା ସିପା ହେର୍‌ପିନି ରୂଟି, 14 ଇଞ୍ଜାଁ, ଉଜେଡ଼ି ତାକି ଦୀୱଁ ମୁଣ୍ତା, ଦୀୱଁ ମାଣ୍ତି, ଦୀୱଁତି ନିୟୁଁ, 15 ଇଞ୍ଜାଁ, ଦୁପ୍‌ଣି ପିଣ୍ତା, ଏମ୍ବାତି ଟେଙ୍ଗାୟାଁ, ପା଼ଣା ହେର୍‌ପିନି ନିୟୁଁ, ନେହିଁ ଗାନ୍ଦା ଦୁପ୍‌ଣି ଅ଼ଡ଼େ ତୂମୁତା ହ଼ଡ଼୍‌ନି ଦୁୱେରିତି ଟା଼ଟନି ହିମ୍ବରି, 16 ଇଞ୍ଜାଁ, ହୂଡିନି ପିଣ୍ତା, ଏମ୍ବାତି ପିତାଡ଼ା ଜା଼ଲି, ଟେଙ୍ଗାୟାଁ, ବାରେ ଗିନା ସିପା, ନର୍‌ନି କୁଣ୍ତି, କୁଣ୍ତି କୁଗିନି ପିଣ୍ତା, 17 ଇଞ୍ଜାଁ, ଆଂଗେଣିତି ଟା଼ଟନି ହିମ୍ବରି, ଏମ୍ବାତି ମୁଣ୍ତା, ପତ୍‌ପିଆ଼ତି କଟ୍‌ଲା ଅ଼ଡ଼େ ଆଂଗେଣି ଦୁୱେରିତି ଟା଼ଟନି ହିମ୍ବରି, 18 ଇଞ୍ଜାଁ, ବାସା ଟା଼ୟୁତି କୁଟିୟାଁ, ଆଂଗେଣିତି କୁଟିୟାଁ ଅ଼ଡ଼େ ରିକୱାକିତି ଡ:ର୍‌କା, 19 ଇଞ୍ଜାଁ, ସୁଦୁ ଟା଼ୟୁତା ସେ଼ବା କିୟାଲି ତାକି ନେହିକିଁ ତିୟାରା ଆ଼ହାମାନି ସକାୟାଁ, ଇଚିହିଁ, ହାରଣ ପୂଜେରାକି ସୁଦୁ ସକାୟାଁ ଅ଼ଡ଼େ ପୂଜେରା କାମା ତାକି ତାନି ମୀର୍‌କାତି ସକାୟାଁ, ଈ ବାରେ ତିୟାରା କିଦେରି।

ଇସ୍ରାୟେଲ ଲ଼କୁତି ଦା଼ନା

20 ଏଚେଟିଏ ଇସ୍ରାୟେଲ ଲ଼କୁତି ବାରେ କୁଲମି ମ଼ସା ନ଼କିଟି ହାଚେରି। 21 ଇଞ୍ଜାଁ, ଆମ୍ବାଆରି ମ଼ନ ଏ଼ନାଆଁ ହିୟାଲି ମ଼ନ କିତେ ଅ଼ଡ଼େ ଆମ୍ବାଆରି ଜୀୱୁ ଏ଼ନାଆଁ ହିୟାଲି ମ଼ନ କିତେ, ଏ଼ୱାରି ଆଣ୍ତ୍‌ୱିଆ଼ନି ତୂମୁ ଇଲୁ ତିୟାରା କିହାଲି ଅ଼ଡ଼େ ଏମ୍ବାତି ବାରେ କାମାତା ଲ଼ଡ଼ାମାନି ଆ଼ସ୍ତି ଅ଼ଡ଼େ ସୁଦୁ ସକାୟାଁ ତାକି ପ୍ରବୁତି ନ଼କିତା ଦା଼ନା ତାତେରି। 22 ଇଞ୍ଜାଁ, ଆ଼ବାୟାଁ ଅ଼ଡ଼େ ଇୟାସିକା ଏଚେକା ଲ଼କୁ ଜାହାରା ମ଼ନ ମାଚାରି, ଏ଼ୱାରି ବାରେ ୱା଼ହାଁ ବାଂଗାରା ମୁତେଲି, ନା଼ଗୁୟାଁ, ମୁଦି, ଅ଼ଡ଼େ ପୂସାୟାଁ ଈ ବାରେ ବାଂଗାରା ସାଜୁ ତାତେରି; ବାରେ ଜା଼ଣା ପ୍ରବୁତି କ଼ସମି ବାଂଗାରା ଦା଼ନା ହୀତେରି। 23 ଇଞ୍ଜାଁ, ଆମ୍ବାଆରି ତା଼ଣା ନୀଲି, ହେୟାଁ, ନେତେରି ୱା଼ଣା ଅ଼ଡ଼େ ଦବ୍‌ଲା ଆଲିତି ଲୂଲୁ, ଗରି ବା଼ଣାୟାଁ, ନେତେରିଗାଟି ମେ଼ଣ୍ତା ତ଼ଲୁ ଅ଼ଡ଼େ ସିସୁକ ତ଼ଲୁ ମାଚେ, ଏ଼ୱାରି ବାରେ ଏ଼ୱାଆଁ ତାତେରି। 24 ଇଞ୍ଜାଁ, ଆମ୍ବାଆସି ୱେଣ୍ତି କି ପିତାଡ଼ା ଦା଼ନା ହୀତେସି, ଏ଼ୱାସି ପ୍ରବୁକି ଦା଼ନା ତାତେସି; ଅ଼ଡ଼େ ଆମ୍ବାଆରି ତା଼ଣା ସେ଼ବାତି ଏ଼ନି କାମାତାକି ସିଟିମ ମା଼ର୍‌କା ମାଚୁ, ଏ଼ୱାରି ଏ଼ୱାଆଁ ତାତେରି। 25 ବୁଦିଗାଟି ଇୟାସିକା ଜାହାରା କେୟୁ ତଲେ ଲୂଲୁ ଆଲାହାଁ ନୀଲି, ହେୟାଁ, ନେତେରି ୱା଼ଣା ଅ଼ଡ଼େ ଦବ୍‌ଲା ପା଼ତାଡ଼ା ଲୂଲୁ ତାତୁ। 26 ଇଞ୍ଜାଁ, ଆମିନି ଇୟାସିକା ବୁଦି ପୁଞ୍ଜାମାଚୁ, ଏ଼ ବାରେ ଜା଼ଣା ଗରି ବା଼ଣାୟାଁ ଲୂଲୁ ଆଲିତୁ। 27 ଇଞ୍ଜାଁ, କାଜାରି ଏପଦ ଅ଼ଡ଼େ ବକପା଼ଟା ତାକି ଗମେଦକ ଆଟିକିନି ୱାଲ୍‌କା ତାତେରି। 28 ଅ଼ଡ଼େ ଦୀୱଁ ଇଞ୍ଜାଁ ପା଼ଣା ହେର୍‌ପିନି ନିୟୁଁ ଅ଼ଡ଼େ ନେହିଁ ଗାନ୍ଦା ଦୁପ୍‌ଣି ଅ଼ଡ଼େ ନିୟୁଁ ତାତେରି। 29 ଇସ୍ରାୟେଲ ଲ଼କୁ ତାମି ମ଼ନ ତଲେ ପ୍ରବୁତି କ଼ସମି ଦା଼ନା ତାତେରି; ପ୍ରବୁ ମ଼ସାକି ଏ଼ନା ଏ଼ନାଆଁ କିହାଲି ହୁକୁମି ହୀହାମାଚେସି, ଏମ୍ବାତି ଏ଼ନି କାମା କିୟାଲି ଏମିନି ଏମିନି ଇୟାସିକା ଆ଼ବାୟାଁ ମ଼ନତା ଏ଼ୱାରାଇଁ ମ଼ନ କିୱିକିତେ, ଏ଼ୱାରି ବାରେ ଜା଼ଣା ଦା଼ନା ତାତେରି।

ଆଣ୍ତ୍‌ୱିଆ଼ନି ତୂମୁ କେ଼ପିନାୟି

30 ଏଚେଟିଏ ମ଼ସା ଇସ୍ରାୟେଲ ଲ଼କୁଣି ଅ଼ଡ଼େ ଏଲେଇଚେସି, "ମେହ୍‌ଦୁ, ପ୍ରବୁ ଜୀହୁଦା କୂଡ଼ାତି ହୁର ତାଙ୍ଗା ମୀର୍‌ଏସି ଉରି ମୀର୍‌ଏସି ବସ୍‌ଚଲେଲଇଁ ଦ଼ରୁ ଆସାହାଁ ହା଼ଟାମାନେସି। 31 ଇଞ୍ଜାଁ ଏ଼ୱାଣାକି ବୁଦି, ଜ୍ଞାନ, ପା଼ଟାତା ଅ଼ଡ଼େ ବାରେ କାମା ପୁନି ମାହାପୂରୁତି ଜୀୱୁତା ନେଞ୍ଜିକିହାଁ, 32 ବମାୟାଁ ବାନାୟାଁ କେ଼ପିନି କାମା, ବାଂଗାରା, ୱେଣ୍ତି ଅ଼ଡ଼େ ପିତାଡ଼ା କାମା, 33 ଅ଼ଡ଼େ ଆଟିକିନି ୱାଲ୍‌କା ରାତ୍‌ହାଲି ବାରେ କୂଡ଼ାତି କାମାତାକି ମା଼ର୍‌କା ପତ୍‌ହାଲି, ଈ ବାରେ କାମା କିହାଲି ତାକି ଏ଼ୱାଣାଇଁ ପୁଣ୍‌ମ୍ବି କିହାମାନେସି। 34 ଇଞ୍ଜାଁ ଜା଼ପ୍‌ହାଲି ତାକି ଏ଼ୱାଣାକି ଅ଼ଡ଼େ ଦାନ୍‌ କୂଡ଼ାତି ଅହିସାମକ ମୀର୍‌ଏସି ଅହଲିୟାବ ମ଼ନତା ବୁଦି ହୀତେସି। 35 ପତ୍‌ହାଲି ଅ଼ଡ଼େ ବମାୟାଁ କିହାଲି, ଇଞ୍ଜାଁ, ନୀଲି, ହେୟାଁ, ନେତେରି ୱା଼ଣା ଅ଼ଡ଼େ ଦବ୍‌ଲା ପା଼ତାଡ଼ା ଲୂଲୁ ତଲେ ହିମ୍ବରିକା ଆଲାଲି, ଇଚିହିଁ, ବାରେ କୂଡ଼ାତି କାମା ଅ଼ଡ଼େ ବମାୟାଁ ପତ୍‌ହାଁ କିହାଲି ଏ଼ୱାରି ମ଼ନତି ବୁଦିତା ନେଞ୍ଜି କିହାମାନେସି।"