ହାନାୟି 5

ମିସରତି ରାଜା ନ଼କିତା ମ଼ସା ଅ଼ଡ଼େ ହାରଣ

1 ଏଚେଟିଏ ମ଼ସା ଅ଼ଡ଼େ ହାରଣ ହାଜାହାଁ ପା଼ରଇଁ ଏଲେଇଚେରି, "ଇସ୍ରାୟେଲତି ପ୍ରବୁ ମାହାପୂରୁ, ଏଲେଇଞ୍ଜି ମାନେସି, ‘ବାଟାତା ନା଼ କ଼ସମି ପାର୍ବୁ କିହାଲି ନା଼ ଲ଼କୁଣି ହାଜାଲି ହୀମୁ।’"

2 ଏଚେଟିଏ ପା଼ର ଏଲେଇଚେସି, "ପ୍ରବୁ ଆମ୍ବାଆସି ? ନା଼ନୁ ଏ଼ୱାଣି କାତା ଆସାହାଁ ଇସ୍ରାୟେଲତି ହାଜାଲି ହୀଇଁ ? ନା଼ନୁ ପ୍ରବୁଇଁ ପୁଞ୍ଜାହିଲଅଁ; ଅ଼ଡ଼େ ନା଼ନୁ ଇସ୍ରାୟେଲତି ହାଜାଲି ହୀଅଁ।"

3 ଏ଼ୱାରି ଏଲେଇଚେରି, "ଏବ୍ରି ଲ଼କୁତି ମାହାପୂରୁ ମାଙ୍ଗେ ତ଼ଞ୍ଜାଆ଼ହା ମାଞ୍ଜାନେସି, ଏ଼ଦାଆଁତାକି ମା଼ମ୍ବୁ ବାତିମା଼ଲି ମାଞ୍ଜାନମି, ପ୍ରବୁ ମାହାପୂରୁ କ଼ସମି ପୂଜା କିହାଲି ମାଙ୍ଗେ ବାଟାତା ତୀନି ଦିନା ଜିରୁ ହାଜାଲି ହିୟାମୁ; ଆ଼ଆତିଁ ଏ଼ୱାସି ମାଙ୍ଗେ ମର୍‌ଡ଼ି ଆ଼ଆତିଁ କାଣ୍ତା ତଲେ ପା଼ୟାନେସି।"

4 ଏଚେଟିଏ ମିସରତି ରାଜା ଏ଼ୱାରାଇଁ ଏଲେଇଚେସି, "ହେ଼, ମ଼ସା ଅ଼ଡ଼େ ହାରଣ, ମୀରୁ ଏ଼ନାଆଁକି ଲ଼କୁଣି କାମାଟି ସାପି କିହିମାଞ୍ଜେରି ? ମୀରୁ ଜାହାରା ବ଼ଜୁ ଡେ଼କିନି କାମାତା ହାଜୁ।" 5 ପା଼ର ଅ଼ଡ଼େ ଏଲେଇଚେସି, "ମେହ୍‌ଦୁ, ନୀଏଁ ଈ ଦେ଼ସାତା ଈ ଲ଼କୁ ହା଼ରେକା, ଇଞ୍ଜାଁ ମୀରୁ ଏ଼ୱାରାଇଁ କାମାଟି ସାପି କିହିମାଞ୍ଜେରି।"

6 ଅ଼ଡ଼େ ପା଼ର ଏ଼ ଦିନା ଲ଼କୁଣି କାମା କିୱି କିନାରାଇଁ ଅ଼ଡ଼େ କାଜାରାଇଁ ଈ ହୁକୁମି ହୀତେସି। 7 "ମୀରୁ ଈଟା ରେଜାଲି ତାକି ତଲିତି ଲେହେଁ ଈ ଲ଼କୁତାକି ଅ଼ଡ଼େ ପୀଚୁ ହୀଆଦୁ; ଏ଼ୱାରି ହାଜାହାଁ ଜାହାରା ତାକି ପୀଚୁ କୂଡ଼ି କିପେରି। 8 ଇଞ୍ଜାଁ ତଲି ଏ଼ୱାରାକି ଏଚେକା ଈଟା ରେନାୟି ମାଚେ, ନୀଏଁ ଏଚେକେଏ ରେଜାଲି ହୀଦୁ; ଏମ୍ବାଟି ଇଚାଣି ଜିକେଏ ଊଣା କିଆଦୁ; ଏ଼ନିଇଚିହିଁ ଏ଼ୱାରି ନିସ୍ତା ଆ଼ହିମାନେରି; ଏ଼ଦାଆଁତାକି ମାଙ୍ଗେ ମାହାପୂରୁ କ଼ସମି ପୂଜା କିହାଲି ହାଜାଲି ହିୟାଦୁ ଇଞ୍ଜିମାନେରି; 9 ଈଦାଆଁତାକି ଈୱାରି ଗାଡି କାମା ତାକି ୱା଼ହାହାଜାହାଁ ଏମ୍ବାଆଁ କିଲିବିଲି ଆ଼ନେରି; ଏ଼ୱାରି ମିଚି କାତାତି ମ଼ନ ହୀଅରି।"

10 ଏଚେଟିଏ ଲ଼କୁଣି କାମା କିୱିକିନାରି ଅ଼ଡ଼େ କାଜାରି ପାଙ୍ଗାତା ହାଜାହାଁ ଏ଼ୱାରାଇଁ ଏଲେଇଚେରି, "ପା଼ର ଈ କାତା ଏଲେଇଞ୍ଜି ମାନେସି ମା଼ମ୍ବୁ ଅ଼ଡ଼େ ମିଙ୍ଗେ ପୀଚୁ ହିୟଅମି। 11 ମୀରୁ ହାଜାହାଁ ଆମ୍ବିୟା ପୀଚୁ ବେଟାଆ଼ଦେରି ଏମ୍ବାଟି ମିଙ୍ଗେ ତାକି କୂଡ଼ିକିଦୁ, ସାମା ମୀ କାମା ଇଚାୟି ଜିକେଏ ଊଣା ଆ଼ଏ।" 12 ଏ଼ଦାଆଁତାକି ଲ଼କୁ ପୀଚୁତି ବାଦୁଲି ନା଼ଡା କୂଡ଼ି କିହାଲି ମିସର ଦେ଼ସାତି ବାରେ ୱାକି ସିନାସାତ୍ରା ଆ଼ତେରି। 13 ଆ଼ତି ଜିକେଏ କାମା କିୱିକିନାରି ଦାଗା କିହାଁ ଏଲେଇଚେରି, "ପୀଚୁ ବେଟାଆ଼ହିମାଚି ବେ଼ଲା ମୀରୁ ଏ଼ନିକିଁ କାମା କିହିମାଚେରି, ଏଲେକିହିଁଏ ନୀଏଁ ଜିକେଏ ତୀରି କିହାମାନି ଦିନାତି କାମା, ବାରେ ଦିନା ପୂରା କିଦୁ।" 14 ପା଼ରତି କାମା କିୱିକିନାରି ଇସ୍ରାୟେଲ କୂଡ଼ାତି ଏମିନି କାମା କିୱିକିହାଲି ହେର୍‌ପା ମାଚେରି; ଏ଼ୱାରାଇଁ ୱେ଼ଚାନା ଏଲେଇଚେରି, "ମୀରୁ ତଲିତି ସମାନା ଈଟା ରେଜାଲି ତୀରି କିହାମାନି କାମା ଏ଼ନାଆଁତାକି ପୂରା କିହି ହିଲଅତେରି ?"

15 ଏଚେଟିଏ ଇସ୍ରାୟେଲ କୂଡ଼ାତି କାମା କିୱିକିନାରି ପା଼ର ତା଼ଣା ଡ଼ୀହିଁ ଏଲେଇଚେରି, "ନୀନୁ ଏ଼ନାଆଁତାକି ନୀ ହ଼ଲିୟାଙ୍ଗା ତଲେ ଇଲେକିଁ ଲେ଼ମ୍ବିମାଞ୍ଜି ? 16 ନୀ ହ଼ଲିୟାଙ୍ଗାକି ପୀଚୁ ହୀପ୍‌କି ଆ଼ହିହିଲେଏ, ଆ଼ତିଜିକେଏ ଏ଼ୱାରି ଏଲେଇନେରି, ଈଟା ରେଜୁ ଈଟା ରେଜୁ, ଅ଼ଡ଼େ ସିନିକିମୁ ନୀ ହ଼ଲିୟାଙ୍ଗା ମା଼ଡା ତିଞ୍ଜିମାନେରି, ସାମା ଦ଼ହ ନୀ ଲ଼କୁତାୟି।"

17 ଏଚେଟିଏ ରାଜା ଏଲେଇଚେସି, "ମୀରୁ ହା଼ରେକା ନିସ୍ତାଗାଟାତେରି, ଏ଼ଦାଆଁତାକି ଏଲେଇଞ୍ଜି ମାଞ୍ଜେରି, ପ୍ରବୁତି କ଼ସମି ପୂଜା କିହାଲି ମାଙ୍ଗେ ହାଜାଲି ହିୟାମୁ। 18 ନୀଏଁ ହାଜୁ କାମା କିଦୁ, ମିଙ୍ଗେ ଏ଼ନି ପୀଚୁ ହୀପ୍‌କି ଆ଼ଏ, ଆ଼ତିଜିକେଏ ମୀ ଈଟାତି ପୂରା ଲେକା ହୀନାୟି ମାନେ। 19 ଏଚେଟିଏ ମୀ ଦିନାତାକି ତୀରି କିହାମାନି ଈଟାତି ଲେକା ଊଣା ଆ଼ଏ, ଈ କାତା ଇସ୍ରାୟେଲ କୂଡ଼ାତି କାମା କିୱିକିନାରି ମେସ୍ତେରି, କି ଏ଼ୱାରି କସ୍ତତି ଦିନା ଏଗାୱା଼ତେ।"

20 ଏଚେଟିଏ ଏ଼ୱାରି ପା଼ର ତା଼ଣାଟି ୱେଣ୍ତେ ୱା଼ହିମାଚାଟି ଏ଼ୱାରି ମ଼ସା ଅ଼ଡ଼େ ହାରଣଇଁ କାତା ଆ଼ତେରି, ଏ଼ନିକିଁ ଏ଼ୱାରି ଏ଼ୱାରାଇଁ କା଼ଚା ମାଚେରି; 21 ଏ଼ଦାଆଁତାକି ଏ଼ୱାରି ମ଼ସା ଅ଼ଡ଼େ ହାରଣଇଁ ଏଲେଇଚେରି, "ପ୍ରବୁ ମିଙ୍ଗେ ସିନିକିହାଁ ବିଚାରା କିୟାପେସି; ଇଚିହିଁ ମୀରୁ ପା଼ର ଅ଼ଡ଼େ ତାନି ହ଼ଲିୟାଙ୍ଗା ନ଼କିତା ମାଙ୍ଗେ ଅ଼ପାଆ ଗାଟାତମି କିହାଁ ମାଙ୍ଗେ ପା଼ୟାଲି ତାକି ଏ଼ୱାରି କେୟୁତା କାଣ୍ତା ହୀତେରି।"

ମ଼ସା ମାହାପୂରୁ ତା଼ଣା ଦାୱା

22 ଏଚେଟିଏ ପ୍ରବୁ ତା଼ଣା ମ଼ସା ୱେଣ୍ତା ହାଜାହାଁ ଏଲେଇଚେସି, "ହେ଼, ପ୍ରବୁ ନୀନୁ ଏ଼ନାଆଁତାକି ଈ ଲ଼କୁତି ଲାଗେଏ କିହାମାଞ୍ଜି ? ନୀନୁ ଏ଼ନାଆଁତାକି ନାଙ୍ଗେ ପାଣ୍ତାତି। 23 ଇଚିହିଁ ଏମିନି ଦିନାଟିଏ ନା଼ନୁ ନୀ ଦ଼ରୁ ତଲେ କାତା ଜ଼ଲାଲି ପା଼ର ନ଼କିତା ୱା଼ତେଏଁ, ଏ଼ ଦିନାଟିଏ ଏ଼ୱାସି ଈ ଲ଼କୁଣି ଲାଗେଏ କିହାମାନେସି, ସାମା ନୀନୁ ନୀ ଲ଼କୁତି ଇଚାଣି ଜିକେଏ ଗେଲ୍‌ପା ହିଲଅତି।"